Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tawe nararěnnạ wọu ene, piạ l᷊ai ghapaěngu taumata l᷊awọ diměnta nẹ̌komol᷊ẹ̌. Ual᷊ingu i sire tawẹu kanengang, ute Mawu Yesus měngkatewe kimui manga murit'E kụ něhengetang,

² "Iạ e timal᷊ěntụ u taumata l᷊awọ tamai ini e. Seng těllu ěllo karěngụe i sire ringang-Ku, kụ orasẹ̌ ini i sire tawẹu kanengang.

³ Kamageng Iạ měndoloh'i sire iapakapul᷊ẹ lunusẹ̌ e ute i sire sarung měnsu su tal᷊oaran dal᷊eng. Kutẹu sěnggạ kawe piạ u nahunděnta wọu mararau."

⁴ Manga murit'E simimbang, "Su tampạ kụ naghea ini e, kai suapạ e kapědeakeng kaěng mapakal᷊aed'u taumata l᷊awọ ini e?"

⁵ "Kal᷊awọe borotẹ̌ si kamene?" ungkuěng u Mawu Yesus. "Pitumbaụ," angkuěng i sire.

⁶ Tangu Mawu Yesus nangorọe taumata sěnggapaěnge niapakaiang su ěntana, mase i Sie nangal᷊ạ borotẹ̌ pitum baụ e kụ nakitarimakasẹ su Ruata. Bọu e i Sie něngangangompengke borotẹ̌ ene ringangu l᷊iman'E, mase nitẹ̌gone su manga murit'E tadeạu ipẹ̌papahiạ su taumata l᷊awọ. Tangu manga murit'E němpẹ̌koạ ene.

⁷ Ene si sire piạko l᷊ai kinạ daridị manga pirambua. Mawu Yesus nakitarimakasẹ su Mawu Ruata waug'u manga kinạ ene, bọu e rimoloh'u manga murit'E pinẹ̌papahiạ u kinạ ene lai.

⁸ I sire nahungkaěngke sarang něngkal᷊aedẹ̌ -- kụ piạu manga ěpạ u hiwu su kataune apan nahungkaěng. Bọu ene manga murit'u Mawu Yesus e němpangomol᷊en lěmbeng kaěng -- kụ pitung kěmbuahẹ̌ nasěgadẹ̌. Mase Mawu Yesus dimoloh'i sire ene nipakapul᷊ẹ,

⁹ (8:8)

¹⁰ kụ i Sie ringangu manga murit'E apid'u němpẹ̌sake sakaeng kụ něngkakoạ sol᷊ong banuan Dalmanuta.

¹¹ Piạ e tau Farisi pirang katau nahunděnta su anun Mawu Yesus kụ nanětạe nẹ̌darendehẹ̌ dingang'E tadeạu měmpanompol᷊ẹ̌ e. I sire mědẹ̌dorong Mawu Yesus pěkẹ̌koạ karal᷊inaụ kere karal᷊ahẹu i Sie kai wọu anun Duata.

¹² Mawu Yesus nẹ̌kurate, bọu e simimbang, "Kawe unụe taumatang ěllo ini e mědẹ̌dorong si Siạ pěkẹ̌koạ karal᷊inaụ? Tala! Iạ e tawe měgěllịu karal᷊inaụ kerene si sire!"

¹³ Mase Mawu Yesus naněntang i sire, kụ simake su sakaeng; kụ bọu ene rimakị sol᷊ong sěmběkan dano e.

¹⁴ Manga murit'u Mawu Yesus e nạung niwul᷊e němpẹ̌bawa borotẹ̌ pinakatimu. Si sire nạung kětạewen piạ borotẹ̌ sěmbaụ su sakaeng.

¹⁵ "Pěmpẹ̌teghang bue su lahaes'u tau Farisi ringangu lahaes'i Herodes," ungkuěng u Mawu Yesus si sire.

¹⁶ Tangu manga murit'u Mawu Yesus e nanětạe němpahumbisarang hal᷊ẹ̌ ene. I sire němpẹ̌bera, "I Sie nẹ̌bera kerene watụ u si kitẹ e kawe tawẹ apa borotẹ̌."

¹⁷ Mawu Yesus e masingkạu apa ipẹ̌pahumbisaran sire. Batụu ene i Sie nakiwal᷊o si sire, "Kawe unụe ipạhumbisarawen kamene hal᷊ẹ̌ u si kamene tawẹ apa borotẹ̌ e? I kamene kai wěga, arau kai relaing ta nakaěnna? Kai apạe kal᷊umu tiněnnang kamene e?

¹⁸ I kamene piạbe mata, kawe unụe tanakasilo? I kamene piạbe tul᷊i, kawe unụe ta nakaringihẹ̌? Kai ta nakatahěndung i kamene,

¹⁹ borotẹ̌ limambaụ Takụ nipẹ̌kakakompeng baug'u l᷊ima hiwu su kataune? Pirang luwe kal᷊awọe lěmbeng kaěng nịkakomol᷊'i kamene?" "Mapul᷊o dua," angkuěng i sire.

²⁰ "Kutẹu piạ e Iạ něngangempang borotẹ̌ pitumbaụ baug'u ěpạ u hiwu su kataune," saụewe kapia Mawu Yesus nakiwal᷊o, "pirang luwe kal᷊awọe lěmbeng kaěng nịkakomol᷊'i kamene?" "Pitu," sasimbah'i sire.

²¹ "Kutẹu, měngkai wẹ̌dang ta nakaěnna i kamene?" angkuěngkewen Mawu Yesus e.

²² Tangu i sire narěntạe su Betsaida. Sene kai piạ taumata nangěntud'u sěngkatau wuta su anum Mawu Yesus, kụ mědẹ̌dorong tadeạu i Sie apạnenggehẹ̌ tau wuta e apakạpia.

²³ Tangu Mawu Yesus něngumpaedẹ̌ liman tau wuta e kụ nitatan'E niapasěbang bọu soa ene. Bọu e Mawu Yesus něngědu matan tau ene ringangu naněllid'u liman'E su matan tau ene, kụ nakiwal᷊o si sie, "Piạ e nikasilonu orasẹ̌ ini e?"

²⁴ Tau ene němandạ e sol᷊ong těngone, kụ nẹ̌bera u, "Ore. Iạ e nakasilo taumata mědẹ̌daral᷊eng; kaiso i sire kakěllaěng kai kere kalu."

²⁵ Mawu Yesus saụewe naněllidu l᷊iman'E su matan tau ene. Sěnsul᷊e ini tau ene tụtaedẹ̌ sěngapam botonge. Matane nul᷊e, kụ i sie nakasilọ e kěbị dingangu mal᷊ahẹ-l᷊ahẹ.

²⁶ Mase Mawu Yesus nehengetang si sie, "Kapul᷊ẹ e, kụ abe pẹ̌sul᷊e sol᷊ong soa ene."

²⁷ Mawu Yesus dingangu manga murit'E nahundal᷊eng sol᷊ong manga kampong mạngělikụ Kaisarea Filipi. Su tal᷊oaran dal᷊eng Mawu Yesus nakiwal᷊ọe si sire, "Angkuěngu taumata, kai i sai Iạ ini e?"

²⁸ I sire simimbang, "Piạ u němpẹ̌berau i Yohanes Měnanahani; piạ u lai němpẹ̌berau, i Elia, ringangu wal᷊ine ete wue němpẹ̌berau; kai sěngkatau wọu manga nabi."

²⁹ "Arawe tumuhụ si kamene hala e, kai i sai Iạ ini e?" ungkuěngu Mawu Yesus. I Petrus simimbang, "I Tuang e kai Ratu Mananal᷊amatẹ̌!"

³⁰ Bọu e Mawu Yesus nẹ̌sěding masěga-sěgadẹ̌ si sire, tadeạu kumbahangbe piạu měhabarẹ̌ si sai-sai mạanun batangeng'E.

³¹ Bọu ene, Mawu Yesus nanětạe naněntiro manga murit'E u Ahus'u Taumata e harusẹ̌ mẹ̌tatahangu sunsara haghi, ringangu sarung dokatengu manga těmbonange, manga imang těmbonange ringangu manga mananěntiro agama. I Sie sarung pateěng, kai su katěllu ěllone i Sie sarung ipẹ̌bangung kapia.

³² Dingangu mal᷊ahẹ-l᷊ahẹ Mawu Yesus něhabar'u hal᷊ẹ̌ ene su manga murit'E. Tangu i Petrus němol᷊engke Mawu Yesus sarang sěndihange apid'u namokạ si Sie.

³³ Kai Mawu Yesus e nẹ̌bihu kụ němanda manga murit'E, mase nẹ̌bera maihạ si Petrus, "Pěmehọe wọu ini, setang! Tiněnnanu e kai tiněnnan taumata; wal᷊inewe tiněnnan Duata!"

³⁴ Bọu ene Mawu Yesus nẹ̌kuị e taumata lawọ apang ene sene ringangu manga murit'E. Mase i Sie něhengetang si sire, "I sai mapulu tumol᷊e Siạ harusẹ̌ mẹ̌timbul᷊eng kapulun batangenge, bọu e pamasaěng kuruisẹ̌ kụ tol᷊e si Siạ sěntiniạ.

³⁵ U i sai mẹ̌tahutěndạu pẹ̌bawiahe, sarung kailangengu pẹ̌bawiahe. Arawe i sai kụ manarakangu pẹ̌bawiahe waugu Iạ dingangu waugu Injil'u Ruata, sarung mapakasal᷊amat'u watangenge.

³⁶ Apa wue gunane su taumata e, kereu kạguwạu dunia e makoạ tataghuanenge, a kutẹu i sie kawe kailangengu pẹ̌bawiahe?

³⁷ Makoạ bue ngae pẹ̌bawiahẹ̌ e ipěnal᷊iu apa-apa?

³⁸ Kereu pẹ̌sěngkataue mamea mangakung Iạ dingangu těntiroku su tempon duruhaka ringangu kararalakisẹ̌ ini e, ute Ahus'u Taumata e mal᷊aing mamea mangakun taumata ene, su tempong i Sie ruměnta sarung dingangu kawasang Amang'E, tẹ̌takinangu manga malạekatẹ̌ masasusi e."

Markus

Video Markus 8

Ikuti Kami:

KONTAK | PARTISIPASI | DONASI