Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Diaí no'onggot kon tua namangoi domandon intau nobayong bo noyosipun. Lantaran mosia diaí koka'anon, daí inoinií i Yesus im murií-Nya mita bo noguman,
2 "Aku'oi motabi kon intau nobayong tanion. Toḷudon nosinggai mosia kotaki-takin-Ku, bo tana'a mosia diaídon koka'anon.
3 Aka poki'pobuian-Kudon im mosia takin diaí im bonu in sian, yo mopusingbií im mosia kon daḷan. Apapa doman kon sigad monia tua oyuíon in namangoi nongkon noyayuk."
4 Daí murií-Nya mita noguman, "Guru, tampat tana'a no'itontanií, kon onda ing ko'uliían naton kong ka'anon inta tugat ko'i monia tanion?"
5 Ki Yesus noliboí, "Tongonupa in roti nion ko'i monimu?" "Pitupa," tubag i murií-Nya mita.
6 Daí pinokilituían i Yesus in intau moaíntoí tatua kom butaí, bodongka nogamaí kon roti pitu tatua bo nopoyaput in sukur ko'i Allah. Onda intua binosi-bonsig-Nya in roti tatua bo inogoi kom murií-Nya mita pinokisilai kon intau mita tatua. Daí sinilai domandon im murií-Nya mita.
7 Ko'i monia oyuíon doman in toyak nongoaáḷus. Ginamaí i Yesus in toyak tatua bo nosukur ko'i Allah bodongka pinoki sila-silai-Nya doman magií-makow kom murií-Nya mita tatua.
8 Mosia komintan nonga'an nobotug. Degaí opatmai noribu intau nonga'an. Nopaḷut makow kon tua sinipun i murií-Nya mita ing kalebean ka'anon tatua -- bo pitupa noḷoto in nopuling. Onda intua pinotabaídon i Yesus nobui intau mita tatua
9 (8:8)
10 Bo Sia takin murií-Nya mita ḷagidon sinumakoi kon uangga bo minayak in daerah Dalmanuta.
11 Tongonumai intau im Parisi namangoi ko'i Yesus bo nomangkoidon nosi-soaáḷan-Nya sim potayakan monia kon taḷaí-Nya. Mosia nopo'igum simbaí ki Yesus mogaid kon soaáḷ inta mokoherang kon intau saḷaku tanda kon Sia tua in totu'u nongkon i Allah.
12 Ta'e noaíjar ing gina i Yesus, daí Sia noliboí, "Nongonu sin intau mita masai na'a mopo'igumbií simbaí Aku'oi mogaid kon inta mokoherang? Diaíbií ah! Doiíbií in Aku'oi mopo'ontong in tobatuímai in tanda ko'i monia!"
13 Bo sinaḷaíanmaidon i Yesus im mosia bo minayak sinumakoi kon uangga bodongka nopobayak in ḷoḷan danow tatua.
14 Murií mita i Yesus nokoliong nodia kon roti, kolikudbií in roti tobatuí inta koyongan kon uangga.
15 Ki Yesus noguman ko'i monia, "Mokopo'ingat i mo'ikow kon ragi intau mita im Parisi bo ragi i Herodes."
16 Daí murií-Nya mita mulaidon nongonguman kon soaáḷ tatua. Kai monia, "Noguman Sia natua sing kita diaí nodia kon roti."
17 Kinota'auan i Yesus onu im pinobobayowan monia tua, tuamai iliboí-Nya ko'i monia, "Nongonu sim mobobayowanbií im mo'ikow kon soaáḷ diaí in roti? Degaí diaípa doman kinota'auan bo kinomangalean monimu? Eta naí domaidon tua ing kobo bodok im pororai monimu?
18 Komata im mo'ikow, ta'e nongonu sin diaíbií mo'indoi? Kobongoḷan mo'ikow, ta'e nongonu sin diaíbií mokidongog? Diaídon degaí kinotoropan monimu
19 in roti lima inta binonsi-bonsig-Ku bo pinoka'an kon intau lima noribu? Tongonupa noḷoto ing kalebean ka'anon tatua naonda in sinipun magií?" Tubag monia, "Mopuḷuh bodoyowaí."
20 Ki Yesus nolibo' doman bui, "Wakutu in Aku'oi nomonsi-monsig kon roti pitu sim pinoka'an kon intau opat noribu, tongonupa noḷoto ing kalebean ka'anon tatua sinipun magií monimu?" "Pitu," tubag monia.
21 Ki Yesus noguman, "Degaí diaípa doman komangalean monimu?"
22 Mosia no'iyaputdon kom Betsaida. Kon tua oyuíon tobatuí intau nodia mangoi kon tobatuí intau bilog ko'i Yesus. Sia nopo'igum ko'i Yesus simbaí yapuon-Nya intau bilog tatua baí mopia.
23 Kinadaian i Yesus intau bilog tatua bo kinapit-Nya minayak kon ḷuai ing kotaí. Onda intua dinuyaían i Yesus mata intau bilog tatua, bo kinadaian-Nya doman kom mata poḷat noliboí, "Oyuíondon degaí in ontongonmu in tana'a makow?"
24 Intau tatua inimindoi naí muna, bo noguman, "O,o. Aku'oi noko'ontong kon intau minayak, ta'e ontongonku naíonda i mosia tua bo pangkoi ing kayu."
25 Bui iyapu i Yesus mata intau tatua, daí totu-totu'udon noko'ontong intau tatua bo nopiadon, sahingga in nodaitnyadon ontongon notarang.
26 Ki Yesus noguman, "Pobuidon bo dikadon mobui kong kotaí tatua."
27 Onda intua ki Yesus bo murií-Nya mita minayak in lipu-lipuíannya inta kon diugmai ing Kaisarea Pilipi. Kon daḷan ki Yesus noliboí ko'i monia, "Aka podudui in guman intau, ki ine in Aku'oi na'a?"
28 Tubag monia, "Oyuíon noguman: Ki Yohanes Mobobaptis, oyuíon doman noguman ki Elia, bo ibanea in noguman: tobatuí nabi."
29 "Yo aka podudui in raian monimu tontanií, Ki ine in Aku'oi na'a?" Tua in ḷoliboí i Yesus. Ki Petrus notubag, "Ki Pak Guru na'a in Raja Mopoposaḷamat!"
30 Daí dinandi Yesus i mosia simbaí diaí pota'au monia intua ko'i inekadon in soaáḷ Sia.
31 No'iduduimai kon tua nomangkoidon ki Yesus nobogoi in totunduí kom murií-Nya mita, kon Adií Intau musti mokorasa kon roriga mobayong, bo bayowan in itoi mita, imang mita itoi bo im mototunduí mita kon agama. limodon in Sia, ta'e kon singgai intoḷunya biagon bui.
32 Nosilangbi' totok pinongonguman i Yesus kom murií-Nya mita soaáḷ tatua. Daí inugut pinosií i Petrus bo sinogurnya ing ki Yesus.
33 Ta'e ki Yesus nobobui bo inimindoi kom murií-Nya mita bo nonogur bui ko'i Petrus, "Bayakdon nongkon na'a, hei mogogoda! Raianmu nion in raianbií intau, de'emanbií raian i Allah!"
34 Onda intua ki Yesus nogoinií kon intau moaíntoí inta noyotakin murií-Nya mita bo noguman ko'i monia, "Intau inta mo'ibog dumudui ko'i-Nakoí musti liongonnya ing kopontingannya tontanií bo momota'an kong kayu pinoyotalempang bo umuran dumudui ko'i-Nakoí.
35 Sin intau inta mo'ibog moposaḷamat ing kobiagannya, kobulianbií ing kobiagannya. Ta'e intau inta moposarahkan kobiagannya sing kopontingan-Ku bo kopontingan in Habar Mopia inta nongkon i Allah, yo tuabií in mokosaḷamat ko'inia.
36 Onubií im baragunanya kon intau, aka dunia na'a nobaliídon kapunya'annya, ta'e sia kobulian ing kobiagannya?
37 Mota'au degaí ing kobiagan na'a toliuan in onukadon?
38 Sing ki inekabií im mo'oyak lantaran Aku'oi bo lantaran singog-Ku kon yuaí-yuaík in intau mita inta diaí mosatia bo binaradosa na'a, yo ki Adií intau mo'oyak doman lantaran intau tatua aka Sia mamangoidon bui kom bonu ing kamulia'an i Amaí-Nya takin malaekat mita mokudus."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA