Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wodotokoli 'o Galilea ma talaga ma batingoka. 'O nyawa kayokudaiokali widoomuno, so waika 'o ngo'otiri moioka wogogeruku gee 'imatapu-tapuku 'o 'akeroka, de yoku-kudai 'ona yoma'okode 'o talaga ma batingoka.

² Ge'enaka de 'o Yesus wakisidotoko 'okia sonaa 'o gudai, wopake 'o 'ade-'ade. Konedau wakidotoko:

³ "Bika niosigisene! Wopai-pairi wimoi wotagi 'o fini wopiakoro.

⁴ Gee wopiakoro, de munuka 'itotaka 'o ngekomuku. Ge'enaka de 'o namoro 'iboa so ya'odomo yabootoka.

⁵ Munuka 'itotaka 'o tonaka 'ikakatetoku gee ma tonaka ka ma etaka. Ma fini ge'ena ma japatioka 'igo'oo, sababu ma tonaka koikipirinuwa,

⁶ ma gee 'o wange yodasauku de ma fini 'igo-go'oode ge'ena 'imaai deika 'i'osaka, so 'isongene sababu 'imasingutuku koikurutukuwa.

⁷ Mita munuka 'itotaka 'o sisika ma gu-gudaiku, de ma sisika ge'ena 'ifero so ma fini ma go'oo ge'ena yapilatu so kaisowokuwa.

⁸ Ma naga mita 'itotaka 'o tonaka 'iro-roromoku. Ge'ena 'igo'oo de 'ifero so 'isowoko munuka 'iliono 'o nagi sa'angeka, munuka 'o nagi butangaka, munuka 'o ratusu moika."

⁹ Wakidajarita 'iduanga 'o 'ade-'ade ge'ena de kawongosekau, "De nia ngaukoka so nio'isenika!"

¹⁰ Ma 'orasi 'o Yesus kawomatengoka, de 'o nyawa gee yo'ise-'isenokau 'awi do-dotoko, de mita 'awi do-domoteke yamogiooko de modidi yaino 'unano. 'Ona yoga'asoko wosiwaiti 'o 'ade-'ade ge'ena ma ngale.

¹¹ So 'o Yesus kawongosekau 'onaka, "Ngini nikulakau 'o co-catu ma ngale niosikanako kokia ma Jo'oungu ma Dutu wopareta gee 'o nyawa 'iregu koyanakowasi. Ma 'o nyawa 'iregu takidotoko de 'o 'ade-'ade.

¹² La 'itiai moteke ma demo konaneda: 'La ngaro 'ona kayodiriidokau ma koyanakowa 'okia 'idadi; 'ona 'asa koyomaogoruwa yosigisene ma koyasahewa, la 'uwa yamake de yasahe de 'uwa yoboa ma Jo'oungu ma Dutuka de wakisilaha.'"

¹³ Ge'enaka de 'o Yesus kawongosekau 'onaka, "Nako koniasahewa 'o 'ade-'ade ge'ena, kokia 'idadi niasahe 'o 'ade-'ade 'iregu-regu?

¹⁴ Wopai-pairi wimoi ge'ena 'o nyawa gee yosidagi-dagi ma Jo'oungu ma Dutu 'awi demo.

¹⁵ 'O fini gee 'itotaka 'o ngekomuku, ge'ena 'isoka 'o nyawa gee yo'isenokau ma Jo'oungu ma Dutu 'awi demo. Gee yo'isenoka de 'o Tokata ma Koana 'iboa de ya'eseka ma Jo'oungu ma Dutu wi demo gee manga singinakau.

¹⁶ 'O fini gee 'itotaka 'o tonaka 'iteto-tetoku, ge'ena 'isoka 'o nyawa gee yo'isenoka ma demo ge'ena de yadawongokau kayomore-morene.

¹⁷ Ma 'o demo ge'ena koimasingutukuwa manga singinaka, so kaito'ingokawa. Ka gee yosangisara bolo yakisikisaa sababu 'o demo ge'ena, de yamadakau.

¹⁸ 'O fini gee 'itotaka 'o sisika ma dodaku, ge'ena 'isoka 'o nyawa gee yo'isenokau 'o demo ge'ena,

¹⁹ ma yododato ma ngale manga 'ahu, de yomau kayokorago, de manga singina ma dodaka 'okia sonaa 'i'ini-'inioka yonyafisuu. So yape'etoro 'o demo ma Jo'oungu ma Dutuno so koisowokuwa.

²⁰ De 'o fini gee 'itotaka 'o tonaka 'iro-roromoku, ge'ena kaimatero de 'o nyawa gee yo'isenoka 'o demo ge'ena de yadawongo. 'Ona yakidosowoko ma giliono munuka 'o nagi sa'angeka, munuka 'o nagi butangaka de munuka 'o ratusu moika."

²¹ Ge'enaka de 'o Yesus wongoseli, "Komoiwa 'o silo yatuuika de 'o pa'udi yositamunuku, bolo yanoaku 'o dangiri ma timioka. Ma raiokau yatamide ma silo ma ngiioka.

²² Koi'iwa gee 'o nyawa koyanako-nakowasi dua koisupuwa, de koi'iwa gee koisidumu-dumutuawasi 'asa koiwaituwa.

²³ Sababu ge'ena, nio'isenika nako de nia ngaukoka!"

²⁴ Ge'enaka de kawongosekauoli, "Niatagoko niosidi-diai 'okia naga nio'isene! 'O du-duga gee kiaka ngini niapake niakisituga 'o nyawaka koge'enali mita ma Jo'oungu ma Dutu winisituga nginika.

²⁵ Sababu to nago'ona de ma 'enau, ge'ena dua 'ifoloiosi 'ikudai yakikula; ma gee to nago'ona koi'iwa, ge'ena gee ma etakasi 'onaka ma 'asa ya'eseka mita."

²⁶ 'O Yesus wosidowangoli 'awi bicara, "Nako ma Jo'oungu ma Dutu wopareta ma ngale wokoana, ge'ena ma jako 'idadi 'isi'ade-'ade 'isoka 'o nyawa wimoi 'o fini wopiakoro wi bairoka.

²⁷ 'O obiri woma'idu de 'o wange womomiki; 'ena wi fini ge'ena kayaika-ikaka 'ifero sigado 'iamoko. Ma kokia ma do-dagi 'awi fini ge'ena 'igo'oo de 'ifero, 'una kowanakowa.

²⁸ 'O tonakou ma sirete 'isisupu ma hasili ge'ena; ma si-siraka ma bosono, 'asa de 'isooboto, 'asa deika 'iti'imono.

²⁹ De nako ma joro ge'ena 'i'umuokau, ge'ena 'o nyawa gu'una wokurueu wo'utuku sababu 'o gutuku ma 'orasi ya'adonokau." ma doda

³⁰ 'O Yesus wosanoli, "Nako ma Jo'oungu ma Dutu wopareta, de 'okia 'idadi posikatero? De 'okia posi'ade-'ade la posiwaiti?

³¹ Ma Jo'oungu ma Dutu wopareta ge'ena 'isoka 'o 'ade-'ade ne'ena: 'O nyawa wimoi 'o sawi ma doda 'o muhi moi wa'ese de watuduku. 'O sawi ma doda ge'ena 'ifoloi 'itingoono de 'o joro 'iregu-iregu ma doda 'o duniaka.

³² Ma nako 'i'oodeu ge'ena 'ena 'ifoloi 'iamokie de 'o joro 'iregu-regu. Ma sago-sago 'ikudaioka so 'o namoro yokadi'igutu ge'enaka."

³³ 'O Yesus 'o nyawa wakidotoko de 'o 'ade-'ade 'o gudai bekoge'ena, de kogee kayasaheka de koge'ena.

³⁴ 'O Yesus nako wakidotoko 'o nyawa go'ona, ge'ena kaitaurika wopake 'o 'ade-'ade. Ma nako ka 'una de wi do-domoteke, ge'ena 'iodumu kawakisiti-tiaika.

³⁵ Kage'ena ma wange maatuku mita, de 'o Yesus kawongosekau 'awi do-domoteika, "Nou, ngone posidete 'o talaga ma songonaka."

³⁶ So 'o Yesus de wi do-domoteke yokokiparenokau ka 'o ngo'otiri moi, de 'o nyawa yoku-kudai 'ona ge'ena 'o talaga ma batingoka yakimadakou. 'O ngo'otiri 'iregu-regu de ma 'ena mita ge'enaka. Ge'enaka de 'o Yesus de wi do-domoteke yosidete.

³⁷ Koito'ingowa de yakidarato de manga ngo'otiri 'o moku-moku yapoka de 'o 'akere 'iwosama ya'omangou, so tanu 'ilutuou.

³⁸ 'Ena 'o Yesus woma'iduoka ge'ena 'o ngo'otiri ma aseroka 'awi saeke wapanginie. De 'awi do-domoteke witomanga, kayongosekau, "Ee 'Aba Guru, konokalesanguawa ngone pobodito?"

³⁹ 'O Yesus womomiki de wodorofu 'o ratoka, wongose 'ato, "Nomaogoro!" de 'o talagaka wongose 'ato, "Nomariidi!" So 'o rato ma 'imaogorokau de ma talaga ma 'isoka 'o gooorou patarisie.

⁴⁰ Ge'enaka de wakidongose 'awi do-domoteika, "Tei! 'Ido'oa so nimodongo? 'Ido'oa so koningakuwa?"

⁴¹ So 'ona yakimodongo ma de yoherangi, de yomakadongose, "'Una ne'ena nagu'una so 'o rato de 'o moku-moku wisingounu?"

Markus

Video Markus 4

Ikuti Kami:

KONTAK | PARTISIPASI | DONASI