Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sekua' teh Yésus nengimun mada' nelun mula' tangeb Takung Galilia. Idi mula' lemulun nepamung pad Ieh sinaad umak bang aceh alud idi Ieh tudo déi' bang abpa', idi lun mula' ineh pana' netuped tangeb abpa'.
2 Idi Ieh nemada' nedeh luk pinginud, idi kareb Ieh nemada', kebalaNeh,
3 "Ninger muyuh! Inan selemulun luk iné' ngisak padé pimara.
4 Kareb uned ieh nengisak, inan sebuang nebpeh iring dalan, idi suit-suit nacing nekuman ilung ineh.
5 Idi inan teh luk nebpeh luun tana' luk metekura', luk na mula' tana'neh, idi petacu ilung ineh temubu' ngaceku tana'neh na medalem.
6 Iamo' kareb aco masat, ieh mekarang peh, idi ngaceku ieh na uat, ieh petacu melayuh.
7 Inan teh luk nebpeh arang tabpa', idi tabpa' ineh pana' netemubu' idi libutneh mapet, pad ieh na miak ngeruat bua'.
8 Idi inan teh luk nebpeh luun tana' luk mebaleng, pad nengeruat bua' luk mulun, idi bua'neh amé'-amé mula', ieh ineh inan luk teluh ngepulu', idi inan luk anem ngepulu', idi inan teh luk meratu kinula'neh."
9 Idi kebala Yésus nedeh, "Idé-idé luk inan lalid miak ninger, do' ieh ninger."
10 Kareb Yésus sebuleng mo', idi lemulun luk neninger balaNeh iné' Neneh dengan pulu' dueh anak sekola'Neh idi nengitun Neneh ratnan luk pinginud ineh.
11 Idi kebala Yésus nedeh, "Kuan muyuh pangeh biré luk inalum ratnan Imet Allah, iamo' kuan amung-amung lemulun luk déi' liang ineh pangeh biré amung-amung ini dengan luk pinginud,
12 pelé, 'Ideh miak nier idi nier, iamo' na ideh kali' luk sirendeh. Ideh miak ninger idi ninger, iamo' na ideh kali' ilungneh. Ngaceku kudeng ideh neninger, idi ideh lumi inan Allah, pad Ieh maré do' ratnan sala'deh.'"
13 Kebala Yésus nedeh, "Naké muyuh kali' ilung luk pinginud ini? Kudeng apehké muyuh miak kali' ilung maung-amung pinginud luk baken teh?
14 Idi lun luk ngisak ineh, ieh ineh ngisak bala Allah.
15 Inan kareb bala ineh mebpeh iring dalan. Lemulun ninger, iamo' kareb ideh pangeh neninger, petacu Sétan macing idi ngalap bala ineh luk pangeh inisak bang niatdeh.
16 Lun baken mepad kudeng luk inisak luun tana' luk metekura'. Kareb ideh pangeh neninger bala ineh, petacu ideh ngalap neneh dengan mawang niat.
17 Iamo' na luk idi uat bang bururdeh sebuleng idi na ideh tuman mio. Kareb susa' idi dereh macing ngaceku bala ineh, petacu ideh lemubed.
18 Lun baken mepad kudeng luk inisak arang tabpa' ineh teh. Ideh ninger ala ineh,
19 iamo' rapang ratnan ulun tana' ini, idi lili ratnan mula' binaweh, idi lili ratnan amung-amung luk baken teh, semuet bang niatdeh idi nebpek bala ineh, pad ieh na kebua'.
20 Iamo' lun baken mepad kudeng luk inisak luun tana' luk do'. Ideh ninger bala ineh, idi ngalap neneh, idi ieh kebua' idi ngeruat mula' uli': inan luk teluh ngepulu', inan luk anem ngepulu', idi inan teh luk meratu kinula'neh."
21 Idi teh kebala Yésus, "Inanké lemulun nguit aceh lapung idi ngerareng neneh pa liang gatang, kian pa liang bitaran lek? Naké ieh nganau' neneh luun kukud dawan?
22 Anun-anun luk inapung miak uen ngegala', idi anun-anun luk inalum miak badén.
23 Kudeng iko inan lalid, do' iko ninger."
24 Idi teh kebalaNeh, "Ngerawé do'-do' ratnan luk pedingeren muyuh. Allah ngukum nemuyuh maya' uad luk muyuh nguad kuan lun baken. Iamo' ukum Allah meluun berat kuan muyuh.
25 Ngaceku lemulun luk inan anun-anun, idi kuanneh miak barén teh, idi lemulun luk na luk idi anun-anun, idi rat neneh teh miak lapen anun-anun luk ieh kuan."
26 Idi teh kebala Yésus, "Imet Allah mepad kudeng seburur lemulun luk ngisak ilung luun tana'.
27 Idi ieh rudap kareb malem idi tumui kareb macang, idi ilung ineh pana' temubu'. Iamo' na ieh kali' kudeng apeh ieh mulun.
28 Imao' tana' ineh ngeruat bua' ratnan tibu ineh, pun-pun donneh, muci runguhneh, idi luk kekiped ilungneh.
29 Idi kareb bua'neh melak, petacu lemulun ineh nguit aling, ngaceku pangeh macing karebneh ngeranih."
30 Idi kebala Yésus, 'Kudeng apehké luk pian tau maad Imet Allah, idi dengan pinginud luk kudeng apehké miak tau ngegala' ratnan ineh?
31 Ieh ineh mepad kudeng aceh ngilung sesawi' luk meluun isuut ratnan amung-amung ilung bang tana' ini. Lemulun ngalap idi ngisak ineh luun tana';
32 iamo' kareb ieh pangeh inisak idi ieh mulun, id mangun ku aceh lawa luk meluun rayeh ratnan amung-amung lawa irin luk baken, idi ngeruat angat-angat luk mekara teh, pad suit pana' miak ngarar pa liang donneh."
33 Dengan pinginud luk kinula' ini, Yésus nemada' bala ineh kuan lun mula', pad luk miak kali'deh.
34 Idi na Ieh nepebala nedeh dengan na luk pinginud; iamo' kareb Ieh sebuleng dengan anak-anak sekola'Neh, idi Ieh nemaré kali' ilung amung-amung bala ineh kuandeh.
35 Bang aco sineh teh, kareb malem, idi kebala Yésus kuan ana-anak sekola'Neh, "Do' tau guta amé' déi' dipar."
36 Idi ideh nenecan nelun mula' ineh, idi anak-anak sekola'Neh nenguit Yésus pad-pad dengandeh bang aceh alud. Inan teh alud luk baken.
37 Denak-denak barui luk rayeh nacing, idi ribut pana' nengeduyung alud, pad alud ineh lélé panu' ku abpa'.
38 Iamo' Yésus déi' pa puet alud uned rudap luun laga. Ideh nengalat Neneh, keburideh, "O Guru! naké Iko ngerawé netau lélé mekarem?"
39 Yésus netumui, idi nemebpeng barui ineh idi kebalaNeh kuan ribut ineh, "Ugka' iko!" Idi barui ineh nugka' peh, pad abpa' ineh melino peh.
40 Idi Yésus nepebala nan anak-anak sekola'Neh, "Ngudehké muyuh matot? Natehké muyuh manu?"
41 Iamo' ideh pelaba tot idi nepebala seburur kuan seburur, "Idéké lemulun ini, pad barui idi ribut pana' maya' balaNeh?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA