Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa mulai malik ngajahang lẽq sedin danao. Luwẽq gati dengan bekumpul lẽq sekelining-Ne. Keranaq nike Ie lumbar melinggih lẽq dalem sopoq perau lẽq atas aiq, dait dengan luwẽq nike nganjeng lẽq sedin danao.

² Beterus Deside Isa ngajahang luwẽq hal tipaq ie pade kadu perumpamean. Maraq niki Deside Isa ngajah ie pade.

³ "Pade dengahang! Araq sopoq dengan lumbar sawur binẽq.

⁴ Sewaktu ie kenyeke sawur binẽq nike, araq binẽq saq geriq lẽq langan. Beterus dateng kedit ngaken binẽq nike jangke bis.

⁵ Araq ẽndah saq geriq lẽq taoq saq bebatu-batu saq tanaqne sekediq. Binẽq-binẽq nike becat tiwoq sẽngaq tanaqne sekediq,

⁶ laguq sesampun panjeng jelo, suli-suli nike mulai layu beterus gero dait matẽ sẽngaq ndẽq berakah.

⁷ Araq ẽndah binẽq saq geriq lẽq tengaq bebenes beduwi. Bebenes nike sayan belẽq, dait gepit suli-suli nike sehingge ndẽq bebuaq.

⁸ Laguq araq ẽndah binẽq saq geriq lẽq tanaq saq subur. Binẽq nike tiwoq, terus jari belẽq dait bebuaq, araq saq telung dase, araq saq enem dase, dait araq saq satus kali lipet."

⁹ Sesampun nyeriteang perumpamean nike, Deside Isa bemanik, "Sai-sai bedowẽ kentok jari dedengah, harus ie dengahang!"

¹⁰ Sewaktu Deside Isa kenyeke mẽsaq-mẽsaq, pire dengan saq sampun dengah perumpamean nike parek tipaq Ie bareng kance kedue olas pengiring-Ne. Ie pade tunas adẽq Deside Isa ngartiang perumpamean nike.

¹¹ Make Deside Isa bemanik lẽq ie pade, "Side pade sampun teicanin jari nenaoq rahasie Kerajaan Allah. Laguq dengan-dengan luah teajah kadu perumpamean,

¹² adẽq: 'Timaq ie pade serioq laguq ndẽq paham, timaq ie pade dengah laguq ie pade ndẽq ngerti, adẽq ie pade ndẽq tobat dait Allah ngampunin ie pade.'"

¹³ Beterus Deside Isa bemanik lẽq ie pade, "Lamun side pade ndẽq ngerti perumpamean nike, berembẽ side pade bau ngerti perumpamean-perumpamean saq lain?

¹⁴ Dengan saq sawur binẽq nike dengan saq nyampẽang Manik Allah.

¹⁵ Binẽq saq geriq lẽq langan ibarat dengan-dengan saq dengah Manik Allah. Sesampun dengah, dateng Belis dait bait napi saq sampun tesawur lẽq dalem atẽ ie pade.

¹⁶ Binẽq saq geriq lẽq taoq saq bebatu-batu ibarat dengan-dengan saq dengah Manik Allah nike, dait langsung nerimaq siq seneng angenne.

¹⁷ Laguq Manik Allah nike ndẽq berakah lẽq atẽ ie pade, sehingge ndẽq tahen ngonẽq. Sewaktu ie pade mauq penyusah atao penganiayean lantaran Manik Allah nike, ie pade langsung murtat.

¹⁸ Binẽq saq geriq lẽq tengaq bebenes saq beduwi nike ibarat dengan-dengan saq dengah Manik Allah nike,

¹⁹ laguq kuatir mengenai idup ie pade dait melẽt idup mẽwah. Segale macem napsu tame ojok dalem atẽ ie pade. Keranaq nike Manik Allah tegepit lẽq dalem atẽne sehingge ndẽq bebuaq.

²⁰ Dait binẽq saq geriq lẽq tanaq saq subur ibarat dengan-dengan saq dengah Manik Allah nike, dait nerimaq, ie pade bebuaq luwẽq, araq saq telung dase, araq saq enem dase dait araq saq satus kali lipet hasilne."

²¹ Selanjutne manik Deside Isa, "Dengan jauq dilah ndẽqne jari tetoloq lẽq bawaq tepaq atao lẽq bawaq lasah, laguq adẽq tetoloq lẽq atas naẽn dilah.

²² Ndẽq araq saq teseboq, saq ndẽq gen penggitan; dait ndẽq araq saq terahasieang saq ndẽq gen tebungkar.

²³ Keranaq nike, lamun bedowẽ kentok, pade dengahang!"

²⁴ Beterus Deside Isa bemanik malik, "Perhatiang napi saq side pade dengah niki! Ukuran saq side pade kadu lẽq dengan lain, nike ẽndah gen tekadu siq Allah lẽq side pade -- malahan luwẽqan malik.

²⁵ Sẽngaq dengan saq sampun bedowẽ, gen teican luwẽqan malik; laguq dengan saq ndẽq bedowẽ napi-napi, make napi juaq saq araq lẽq ie gen tebait."

²⁶ Deside Isa ngelanjutang penuturan-Ne, "Maraq niki halne Kerajaan Allah nike, keadaanne bau teumpameang maraq dengan saq sawur binẽq lẽq lendangne.

²⁷ Lẽq kekelem atao kenjelo, sewaktu ie tindoq atao ngase, binẽq-binẽq nike tiwoq dait sayan belẽq. Laguq berembẽ entane binẽq-binẽq nike tiwoq dait jari sayan belẽq dengan nike ndẽq nenaoq.

²⁸ Tanaq nike mẽsaq saq nyugulang hasil: Penembẽq pẽmpangne, beterus motẽkne, terus buaqne.

²⁹ Dait lamun gandum nike sampun toaq, dengan nike ẽndah saq penembẽq ngawis sẽngaq sampun wayene tepataq."

³⁰ Deside Isa beketuan, "Napi saq gen ite kadu bandingang Kerajaan Allah nike? Conto napi saq bau ite kadu jari jelasang ie?

³¹ Kerajaan Allah setetune maraq perumpamean niki: Araq sopoq dengan bait sopoq tolang sawi, terus tesawur lẽq tanaq. Tolang sawi nike binẽq saq paling kodẽq lẽq dunie.

³² Laguq lamun sampun tiwoq, ie jari saq paling belẽq lẽq antare selapuq tetaletan. Pẽmpang-pẽmpangne benes gati bau taoq kedit-kedit miaq kesebu lẽq dalemne."

³³ Maraq nike Deside Isa nyampẽang Manik Allah kadu luwẽq perumpamean, sesuai kance pengertian ie pade.

³⁴ Deside Isa kereng kadu perumpamean lamun Ie ngajah dengan-dengan nike. Laguq lamun Ie kance pengiring-pengiring-Ne doang, Deside Isa jelasang selapuqne tipaq ie pade.

³⁵ Lẽq kebian nike ẽndah, Deside Isa bemanik lẽq pengiring-pengiring-Ne, "Silaq ite belayar ojok itoqan danao."

³⁶ Make Deside Isa taẽk ojok perau, dait pengiring-pengiring-Ne bilin dengan luwẽq lẽq sedin danao, terus taẽk ojok perau saq pade. Perau-perau lain ẽndah araq lẽq derike. Beterus Deside Isa dait pengiring-pengiring-Ne mulai belayar.

³⁷ Ndẽq ngonẽq sesampun nike, dateng angin pusut. Umbak belẽq mulai ngamuk dait tame ojok dalem sehingge perau nike gen penoq siq aiq.

³⁸ Lẽq waktu nike Deside Isa kenyeke merem lẽq bagian mudi perau nike. Pengiring-pengiring-Ne tangiang Deside Isa. Ie pade matur, "Paq Guru! Napi Pelungguh nẽnten peduli, lamun ite celake?"

³⁹ Deside Isa metangi, terus semprak-Ne angin nike dait bemanik lẽq danao nike, "Engkah, tenang!" Langsung angin nike telang dait danao nike jari tenang gati.

⁴⁰ Beterus Deside Isa bemanik lẽq pengiring-pengiring-Ne, "Kembẽq side pade takut? Kembẽq side pade ndẽq percaye?"

⁴¹ Make ie pade jari takut, dait bebase sopoq kance saq lainne, "Sai setetune dengan niki jangke angin dait umbak ẽndah taat lẽq Ie."

Markus

Video Markus 4

Ikuti Kami:

KONTAK | PARTISIPASI | DONASI