Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu re’e seore i Yesu mampoguru wo’u tau nja’u towo ndano Galilea. Pasi boros kojo tau to mangampago Ia ri towo ndano etu, wali see naka i Yesu mapone ri bangka pei matunda nja’u rayanya ri wawo ndano etu. Wali tau boros sira maroo ri towo ndano.
2 Yako etu boros to napoguruka i Yesu sira mangansaritaka sira rapa. Wali si’i semo samba’a rapa to Ia manganto’oka sira etu.
3 Ia manganto’o, “Padongeka kojo rapa to Aku manganto’oka komi si’i. Re’e samba’a to panawu, wali to panawu etu ia yau mangansawu liano.
4 Tempo ia mangansawu liano etu, liano to sawunya etu re’e to kono ri jaya. Wali to kono ri jaya etu tonsi ma’i mangantungku yau.
5 Pasi re’e seja liano etu to kono ri tana to ri rapa mbatu. Pei tana ri rapa mbatu etu taa mayombu. Wali liano etu taa napeas tuwu,
6 pei tempo eo malangan, liano etu mawali malau yau sampe mate yau apa kalenya taa longko lo raya ntana apa re’e watu la’u aranya.
7 Panewa re’e seja liano to nasawu to kono re’e tana to nja’u waka njunju ndui. Wali liano etu tuwu pei rui etu tuwu seja muni, panewa roo see nangi yau liano. Rui etu to langa-langan, see naka liano taa mawali kojo apa kaoung. Wali see naka liano etu taa mawua.
8 Panewa re’e seja liano etu to kono ri tana to maboko. Wali liano etu magaya kojo tuwunya panewa rata temponya mawua ia mampowuaka wuanya re’e to togo mpuyu ngkani kaborosinya yako to rasawu, pasi re’e to ono mpuyu ngkani kaborosinya yako to rasawu, pasi re’e to satu ngkani kaborosinya yako to rasawu.”
9 Wali ojo karoonya i Yesu manganto’o rapa etu Ia manganto’oka wo’u tau boros, to’oNya, “I sema to nadonge ntalinganya, padongeka kojo.”
10 Wali roo see tau boros mawolili muni yako ri rano Galilea. Tempo sira mayoko etu jamo i Yesu pasi sawei mba’a tau to joaNya seja pasi anaguruNya sampuyu pei dua to nja’uwa nja’u ria. Wali tempo etu anaguruNya pasi joaNya etu sira mampotanaka resi i Yesu, sira manganto’o, “Kesaa batuanginya rapa to nuto’o ngKomi etu?”
11 Wali i Yesu manganto’oka sira, “Komi rawaika mangansani anu to tawa rapaponsanika resi sa’e mangkonong temponya i Pue Allah damawali Makole ri lino. Pei ane tau to yusa, tau to taa nansani i Pue Allah, ojo rapa to rapotundeka resi sira.
12 Wali sira mangabanang gombo i mPue Allah to natulis yami nto pantuntu tuntuNya tempo owi. Tempo etu to pantuntu tuntu i mPue Allah etu mangantulisika yami sira, to’onya, ‘Komi damangalo’a-lo’aka pei komi taa damangansani batuanginya palaong to nukita ngkomi etu. ‘Komi mandudu ngkani damangandonge pei komi taa damangansani batuanginya gombo to nudonge ngkomi etu. Komi taa rani mangandolika tango ngkomi resi Aku. Pei ane rapanya komi mangandolika tangomu resi Aku, ane ewa see Aku maya mangalapa dosa ngkomi.’ Etu semo gombo to natulis i Yesaya.”
13 Wali i Yesu manganto’oka wo’u anaguruNya pasi joaNya to yusa, Ia manganto’o, “Ane komi taa nunsani batuanginya rapa si’i, komi bara taa seja mangansani rapa to yusa to Aku manganto’o.
14 Wali si’i semo batuanginya rapa mangkonong to pansawu liano. To panawu etu, ia semo tau to mampakarebaka sa’e tuntu i mPue Allah, pasi liano etu batuanginya tuntu i mPue Allah semo.
15 Pasi ane liano to rasawu kono ri jaya, jaya etu batuanginya tau to mangandonge tuntu i mPue Allah. Pei roo see ma’i Kepala Measa pei mansaka mangoko yau tuntu i mPue Allah etu yako ri pampobuuka nsira. Wali palaong to etu semo to raporapaka ewa liano to rasawu to kono ri jaya pei to natungku yau ntonsi.
16 Wali ane liano to kono ri tana to ri rapa mbatu, tana etu batuanginya tau to mangandonge tuntu i mPue Allah pasi mansaka ndende raya nsira mangantima. Pei pangaya nsira ri tuntu i mPue Allah etu ewa liano to taa maroso kalenya apa sira taa maroso rayanya pasi taa seja inso rayanya. Wali tempo sira mangarata kasusa bara kasesa apa saba sira mangaya tuntu i mPue Allah etu, taa masae sira mamposaka yau pangaya nsira etu.
17 (4:16)
18 Panewa re’e wo’u liano to kono re’e tana to nja’u njunju ndui. Wali tana to nja’u njunju ndui etu batuanginya tau to mangandonge tuntu i mPue Allah
19 pei sira taa mangaluluka kojo apa sira ojo moru-moru mampobuuka katuwunya ri lino si’i, pasi sira mampobuuka kojo kasugi pasi anu to yusa to naporani nsira. Wali pangaya nsira ri tuntu i mPue Allah ewa pinumuya to taa mawua.
20 Pei ane liano to rasawu kono re’e tana to maboko, tana etu batuanginya tau to mampodongeka kojo tuntu i mPue Allah pei mangaya. Wali pangaya ntau etu ri tuntu i mPue Allah raporapaka ewa pinumuya to mawua, re’e to mampowuaka togo mpuyu ngkani yako to rasawu, re’e to mampowuaka ono mpuyu ngkani yako to rasawu, pasi re’e to mampowuaka satu ngkani kaborosinya yako to rasawu.” Wali ewa wetu nato’o i Yesu mampakanasaka anaguruNya pasi joaNya to yusa batuanginya rapa mangkonong liano etu.
21 Wali ojo karoonya i Yesu mampakanasaka sira mangkonong rapa etu, Ia rani sira mangansani matao ane tuntu i mPue Allah rapakarebaka resi sa’e. Wali Ia mangaligi sira, Ia manganto’o, “Tau ane mangkeni pansona ri raya banua to mawurim, ia taa mangabombongika yau ember pasi taa seja mamposaka la’u ara ngkoi. Ia mamposaka ri tampa to masipato rapamposaka pansona etu, see rakita remenya.
22 Wali ri katawanya pansona etu ratuni, anu to ri raya banua etu tawa maya rakita apa mawuri. Pei ojo pangantuni pansona etu panewa samparia maya rakita. Pasi ewa see seja tuntu i mPue Allah. Apa samparia to rawuni ri tempo si’i, to etu darapakarebaka. Pasi samparia to tawa ransani ri tempo si’i, samparia etu darapaponsanika.
23 I sema tau to nadonge ntalinganya, padongeka.”
24 Wali yako etu i Yesu manganto’o wo’u, Ia manganto’o, “Podongeka kojo anu to Kupotundeka komi. Apa ewa wimba kadota ngkomi mangampodongeka, ewa see seja kaborosinya to komi damangansani, pasi i Pue Allah damangadugang wo’u to nunsani ngkomi.
25 Apa tau to mampodongeka kojo tuntu i mPue Allah, tau etu daradugangika kapandenya see ia damangansani wo’u. Pei tau to taa mampodongeka, tau etu nempo ia re’e sangkodi kapandenya, kapandenya etu daraoko yau see ia tamo damangansani.”
26 Wali roo etu i Yesu mamporapaka wo’u mangkonong temponya i Pue Allah mawali Makole nto lino. Ia manganto’o, “Palaong i mPue Allah tempo Ia mawali Makole nto lino maya raporapaka ewa si’i. Rapanya re’e samba’a to panawu to mangansawu liano nja’u nawunya.
27 Roo ia mangansawu liano etu, ia ojo mampeas. Ponto wuri ia yore, pasi ponto eo ia mambangu mangampeas kojo liano etu. Wali liano etu tuwu pasi mawali bae, pei to panawu etu ia taa nansani ewa wimba mawali resi liano etu naka pei ia tuwu.
28 Apa yako ri tana semo naka tuwu liano etu. Tempo ia tuwu, yako tuwunya etu mawali tokonya. Yako tokonya etu mawali wuanya. Wuanya etu re’e wulinya pasi kayontin.
29 Panewa rata temponya matasam wua ngkalingaanya etu. Wali to panawu ojo karatanya temponya matasam, ia mampota, apa ratamo temponya rapampota.”
30 Wali i Yesu manganto’o, “Wimba daraika mampakanasaka komi ewa wimba palaong to naika i mPue Allah ri lino see Ia maya mawali Makole nto lino? Wimba daKuika mangamporapaka?”
31 Panewa i Yesu manganto’o, “Palaong to naika i mPue Allah ri lino see Ia maya mawali Makole nto lino maya raporapaka ewa si’i. Rapanya re’e wua mpinumuya to rato’oka sesawi to nasawu nto panawu nja’u nawunya. Wali wua nsesawi etu ia to mayunu kojo pei wua mpinumuya to yusa.
32 Pei ane rasawu pei tuwumo, tempo etu ia semo to bose-bose pei pinumuya to yusa. Wali sesawi etu ia mawali bose kojo ra’anya, see naka tonsi maya mangika sea nja’u oyo nda’anya apa mou.” Wali ewa wetu nato’o i Yesu mangkonong i Pue Allah mawali Makole ri lino. Tempo si’i tawa boros tau to Ia Makolenya, pei kanjo’u-njo’u kaboro-boros tau to mawali Ia Makolenya.
33 Pasi boros wo’u rapa to ewa wetu to nato’o i Yesu mampakarebaka tau boros tuntu i mPue Allah. Tempo Ia mampakarebaka sira etu, imba pata mpangkurang nsira mampobuuka, etu semo to Ia manganto’oka.
34 Pei tempo Ia mampakarebaka tau boros etu Ia ojo mamporapaka. Pei ane jamo anaguruNya to re’e resi Ia, tempo etu Ia taa ojo mamporapaka. Tempo Ia mampotundeka anaguruNya etu Ia mampakanasaka resi sira batuanginya nu rapa etu.
35 Wali tempo i Yesu room mampotundeka tau boros etu, ojo kawenginya rao Ia manganto’oka anaguruNya, “Yaumo kita njo’u sambote ndano.”
36 Tempo Ia manganto’o gombo etu, Ia tiroowa matunda ri bangka to ipakeNya tempo mampotundeka tau boros etu. Wali anaguruNya mapone seja ri bangka to kare’e i Yesu etu panewa sira malayag mampiyaikamo tau boros. Tempo sira malayag etu, re’e seja bara sawei bangka ntau to yusa to mangalulu.
37 Pei ri raya mpalayag nsira, kodi majoli rata ngoyu to marimbo kojo see naka bombang mawali bose kojo. Bombang etu masua ri raya bangka nsira wali bangka etu dabukemo ue.
38 Pei i Yesu, Ia re’e yore yau ojo mayuna-yuna ri raya bangka etu tondo ri payunya. Wali anaguruNya magasi mangalike Ia, sira manganto’o, “Guru! Kita damate! Wimba, bara taa mawei resi Komi ane kita datondu?”
39 Wali i Yesu mambangu pei mamporentang ngoyu, pasi Ia manganto’oka rano etu, “Pandoomo, pei kalindu muni!” Wali ngoyu marimbo etu mandoo yau, pasi rano mawali lindu kojo.
40 Roo etu i Yesu manganto’oka anaguruNya, “Maka pei meka raya ngkomi? Maka pei komi taa mansarumaka Aku?”
41 Wali anaguruNya etu ipu kojo raya nsira pei masipotanaka samba’a pei samba’a, sira manganto’o, “Gete, sema kamonsonya tau si’i maka sakowa ngoyu pasi bombang mampalaika seja Ia?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA