Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa Almasih ma aja pulo baliak di tapi danau Galilea. Sambuah urang nan mangarumuni Baliau. Dek karano itu, mako payilah Baliau duduak ka dalam sabuwah parawu di dalam danau, nan urang banyak tu bi tagak di tapi danau.

² Sudah tu Isa Almasih ma ajakan bamacam-macam pangajaran kabake urang-urang tu, jo mamakai parumpamoan. Bakcando ikolah Baliau ma aja.

³ "Dangakanlah! Adolah surang urang paladang payi manyerakkan bijo baniah.

⁴ Kutiko inyo sadang manyerakkan bijo baniah, ado bijo baniah tu nan jatuah di jalan. Sudah tu tibolah unggeh, mako bijo baniah tu abih dimakan unggeh.

⁵ Ado pulo nan jatuah di tanah nan babatu-batu, nan tanahnyo tipih. Bijo-bijo baniah tu capek tumbuah, dek karano tanahnyo tipih,

⁶ tapi kutiko matoari muloi nayiak, tuneh-tuneh tu muloi layua, sudah tu kariang mati kakeh, dek karano ureknyo indak ta unjam masuak ka tanah.

⁷ Ado pulo bijo baniah nan jatuah di tangah samak baduri. Samak baduri tu tumbuah manyapikkan tuneh-tuneh nan baru mancogok tu, sainggo tuneh tu indak bisa babuwah.

⁸ Tapi ado pulo bijo baniah tu, nan jatuah di tanah nan rancak. Bijo baniah tu tumbuah manjadi gadang, sudah tu babuwah, ado nan tigo puluah, ado nan anam puluah, ado pulo nan saratuih kali lipek buwahnyo."

⁹ Sasudah mancuritokan parumpamoan nan bakcando itu, Isa Almasih bakato, "Kok angku-angku layi batalingo, inok manuangkanlah apo nan Ambo katokan ko!"

¹⁰ Kutiko Isa Almasih sadang duduak surang-Nyo, mako urang-urang nan lah mandangakan pangajaran Baliau tu, bi tibo kabake Baliau, samo-samo jo pangikuik Baliau nan duwo baleh. Urang-urang tu bi mamintak kabake Baliau, supayo Baliau manarangkan, apo arati dari parumpamoan nan Baliau curitokan cako.

¹¹ Mako bakatolah Isa Almasih kabake urang-urang tu, "Angku-angku lah di agiah karunia untuak mangatawui rasiyo, tantang baa caro Allah mamarentah. Tapi urang-urang nan diluwa, di aja jo parumpamoan,

¹² supayo, 'Inyo layi taruih juwo mamparatikan tapi inyo indak tawu apo nan tajadi, inyo layi tatap juwo mandanga, tapi inyo indak mangarati, tajadi nan bakcando itu, supayo urang-urang tu jan maliyek, sarato jan mangarati, supayo inyo jan babaliak kapado Allah, supayo Allah ma ampuninyo.'"

¹³ Kamudian Isa Almasih bakato kabake urang-urang tu, "Jikok angku-angku indak mangarati jo parumpamoan tu, dima pulo ka mungkin angku-angku dapek mangarati jo parumpamoan nan lain?

¹⁴ Urang nan manyerakkan bijo baniah tu, adolah urang nan manyampaikan firman Allah.

¹⁵ Bijo baniah nan jatuah di jalan, ibaraiknyo samo jo urang nan mandanga firman Allah. Baitu inyo mandanga, ubilih tibo ma ambiak apo nan lah diserakkan di atinyo tu.

¹⁶ Bijo baniah nan jatuah di tanah nan babatu-batu, ibaraiknyo saroman jo urang nan baitu mandanga firman Allah, inyo lansuang manarimonyo jo sanang ati.

¹⁷ Tapi firman Allah tu indak tumbuah ba urek dalam atinyo, sainggo indak tahan lamo. Baitu inyo manangguangkan kasusahan, atau panganiayoan dek karano di firman Allah tu, inyo lansuang babaliak marotaik.

¹⁸ Bijo baniah nan jatuah di tangah samak baduri, ibaraiknyo saroman jo urang nan layi namuah manarimo firman Allah tu,

¹⁹ tapi inyo cameh tantang iduiknyo, nan katuju dek inyo iduik basanang-sanang. Napasu untuak mandapekkan babagai-bagai ka inginan masuak di atinyo. Dek karano itu firman nan dari Allah tu, talampok dalam atinyo, sainggo indak babuwah.

²⁰ Bijo baniah nan jatuah di tanah nan rancak, ibaraiknyo saroman jo urang nan layi namuah mandangakan firman Allah, namuah pulo mangarajokannyo, mako urang-urang tu ka babuwah labek, ado nan tigo puluah, ado nan anam puluah, malah ado nan saratuih kali lipek asienyo."

²¹ Salanjuiknyo Isa Almasih bakato pulo, "Adokoh urang nan ma iduik-i dama togok, sudah tu disongkoknyo jo embe, kok indak inyo latakkan di bawah tampaik tidua? Nan galiknyo, lah musti inyo latakkan di ateh rengkaknyo.

²² Indak ado doh nan ta andok, nan indak ka kaliyatan; indak ado doh rasiyo, nan indak ka tabongka.

²³ Dek karano itu, kok angku-angku layi batalingo, dangakanlah apo nan Ambo kecekkan ko!"

²⁴ Sasudah tu Isa Almasih bakato pulo, "Paratikanlah apo nan angku-angku dangakan ko! Ukuaran nan angku-angku pakai untuak pa ukua urang lain, itu pulo nan ka dipakai dek Allah untuak pa ukua angku-angku -- malahan dilabiahi pulo lai daripado itu.

²⁵ Dek karano, bagi urang nan lah mampunyoi, kabake inyo di agiahkan nan labiah banyak lai; tapi bagi urang nan indak ado punyo sabagai alah jo, nan saketek nan ado dinyo tu, ka di ambiak pulo."

²⁶ Isa Almasih manyambuang kecek-Nyo sakali lai, "Jikok Allah mamarentah sabagai Rajo, ka adaannyo dapek di ibaraikkan, bakcando urang nan manyerakkan bijo baniah di ladangnyo.

²⁷ Malam ari inyo lalok; siang ari inyo jago. Samantaro itu bijo-bijo baniah tu taruih juwo tumbuah sampai gadang. Tapi baa caronyo bijo-bijo baniah tu tumbuah, sampai manjadi gadang, urang tu indak tawu doh.

²⁸ Tanah itu sajolah nan sacaro sandirinyo mangaluwakan asie: mulo-mulo kaluwa pucuaknyo, sudah tu tangkainyo, kudian barulah buwahnyo.

²⁹ Jikok gandun tu lah masak, mako dimuloi uranglah manyabik, dek karano lah tibo masonyo untuak manuwai."

³⁰ Bakatolah Isa Almasih "Jikok Allah mamarentah, jo apolah nan ka dapek kito ibaraikkan? Apolah conto nan ka dapek kito pakai untuak panarangkannyo?

³¹ Jikok Allah mamarentah, mako ka adaannyo sarupo jo ibaraik nan bakcando: Saincek bijo sasawi nan ditanamkan urang di tanah. Bijo sasawi adolah bijo nan paliang aluih di antaro sagalo bijo.

³² Tapi, jikok inyo lah tumbuah, batangnyo manjadi nan labiah gadang di antaro tanam-tanaman. Daun sangkaknyo sangaik rimbunnyo, sainggo bi tibolah unggeh untuak mambuwek sarang di bawah nauangannyo."

³³ Baitulah caronyo Isa Almasih ma aja urang, Baliau banyak mamakai ibaraik-ibaraik nan sarupo itu, layi sampai dima urang-urang tu bisa mangarati.

³⁴ Isa Almasih tatap mamakai parumpamoan jikok Baliau ma aja urang-urang tu. Tapi jikok Baliau jo pangikuik-Nyo sajo, Baliau manarangkan sacaro jaleh.

³⁵ Disasanjo ari tu juwo, Isa Almasih mangecek kabake pangikuik-Nyo, "Molah kito balayie ka subarang danau."

³⁶ Mako nayiaklah Baliau ka ateh parawu, nan pangikuik-pangikuik-Nyo maninggakan urang nan banyak di tapi danau, inyo bi nayiak ka parawu nan itu pulo. Parawu-parawu nan lain ado pulo disinan. Mako muloilah Baliau sarato jo pangikuik-Nyo balayie.

³⁷ Indak bara lamo antaronyo, mako tibolah angin limbubu. Ombak muloi ma antam parawu tu, ayie lah masuak ka dalam, sainggo parawu tu lah ampia panuah dek ayie.

³⁸ Isa Almasih sadang lalok, di sabalah ka ikua parawu, Baliau mampakalang banta. Pangikuik-pangikuik-Nyo manjagokan Baliau. Inyo bi bakato, "Angku Guru, apokoh Angku indak paduli, jikok kito cilako?"

³⁹ Mako jagolah Isa Almasih, Baliau ariaklah angin limbubu tu, sambia bakato kabake ayie danau tu, "Tananglah, jan manggilo juwo!" Angin tu pun rado, sacaro tibo-tibo ayie danau tu pun, manjadi tanang satanang-tanangnyo.

⁴⁰ Sudah tu Baliau bakato kabake pangikuik-Nyo, "Baa mangko angku-angku takuik? Baa mangko angku-angku indak picayo kabake Ambo?"

⁴¹ Mako bi tabik takuiklah kasadonyo pangikuik Isa Almasih tu, inyo bi mangecek sasamo inyo, "Siya Baliau ko nan sabananyo, sainggo angin jo ombak patuah kabake Baliau."

Markus

Video Markus 4

Ikuti Kami:

KONTAK | PARTISIPASI | DONASI