Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gee 'o Yesus womagoraka ma Jou 'awi Woaka, de 'awi do-domoteke wimoi kawongosekau, "'Aba Guru, bika nakokilega ma Jo'oungu ma Dutu 'awi Woa ne'ena, de nalega nosidi-diai ma teto 'isikaretene, tei de kaisureli so!"

² 'O Yesus wosango, "Ngona namakekau ma woa 'isure-sure ge'ena! Ma dua 'o woa ge'ena ma teto ka 'o ngai moi ma kaimakareteniewau. 'Iodumu 'asa 'iturukaka."

³ Ge'enaka de 'o Yesus wotagi 'o Zaitun ma gigieka de wogogerie ma dekuoka gee 'imasidaarino de ma Jo'oungu ma Dutu wi Woa. De 'o Petrus, 'o Yohanes, 'o Yakobus de 'o Andreas yaika 'unaka ma ngale yomabi-bicara ka 'ona duga.

⁴ 'Ona kayongosekau 'unaka, "'Aba, bika minisidemo muruoka de 'iodumu gee nongose-ngosekau ge'ena 'idadi. De minisidumutu ma no-nako 'okia nako ma 'orasi ya'adonokau."

⁵ 'O Yesus wosango, "Nimasitiari, 'uwa sigado 'o nyawa nisihaga.

⁶ 'O nyawa manga gudai dua yoboa yopake 'ai ronga de yongose, 'Ngoi ne'ena 'unau!' Ge'enaka de yakisihaga 'o nyawa manga gudai.

⁷ So nako la nio'isene 'o nyawa yokoya de yoto-tora sababu 'o gudoti bolo 'o gudoti ma habari, 'uwa nimodongo. Ma hali ge'ena salingou 'idadi, ma ge'ena ko ma ngalewa 'ato 'o dunia ma do-dogumu ma 'orasi ya'adonokau.

⁸ 'O suku de 'o suku, 'o negara de 'o negara 'asa 'imakakudoti. Kiaka naga bato 'asa 'idadi 'o 'osu de 'o baulaco. 'Iodumu ge'ena 'asa ka ma gurue, 'isoka 'o ngeweka mimoi 'ikurue mosiri ma ngale momaku'arenou.

⁹ Ngini salingou nimasitiari sababu ngini dua nitagoko de ni'asa 'o 'agama ma balu-balusika. Ngini 'asa nipesana 'o lo-lomu ma woa-woaka. De ngini 'asa nisitaari yopa-paretaka de 'o koa-koanika sababu ngini to ngoi 'ai do-domoteke. De ge'enau to ngini nia 'orasi ma ngale ngoi nisisakisii 'onaka.

¹⁰ Ma 'o Habari ma Owa ma Jo'oungu ma Dutuno salingou 'isidagiokasi 'isira 'o soana 'iodumika.

¹¹ De nako ngini nitagoko de ni'asa 'o hakimika, 'uwa nimodongo ma ngale 'okia salingou ngini niosango. Nako ma 'orasiou niobicara, kaniosidemo 'okia naga gee nisidemoka 'o Ngomasa 'Itebi-tebini ma 'orasi ya'adono de. Sababu 'o demo-demo gee ngini niosibicara ge'ena ko to nginiwa ma sirete 'ania demo-demo, so 'ena 'iboa 'o Ngomasa 'Itebi-tebinino.

¹² 'O nyawa manga dodoto ma dutu 'asa yakikada'akali la yakito'oma. Koge'enali mita 'asa 'idadi 'o dea de 'o ngowaoka. 'O ngowa-ngowaka 'asa yakilawani manga dea de manga 'esaka, de yakisisarakani 'o nyawaka la yakito'oma.

¹³ Ngini 'asa 'o nyawa 'iodumu nidu'uduku sababu ngini to ngoi 'ai do-domoteke. Duga nago'ona yotongosono sigado ma do-dogumika, 'ona ge'ena 'asa yakisilaha."

¹⁴ "Ngini 'asa niamake ''O Dorou gee 'Isito-torou' 'ima'okode 'o ngii gee koisidabi-dabiwa 'enaka. ('Isidemo yobaca-bacaka: Nialega ma diai 'okia ma ngale!) Ma 'orasi ge'ena 'o nyawa gee 'o Yudeaka salingou yoowara 'o gigiede.

¹⁵ So 'o nyawa daku manga woa ma dekuoka 'uwa yo'uti dau manga woa ma dodaku ma ngale manga kianikia ya'ese.

¹⁶ 'O nyawa gee naga 'o bairoka 'uwa yolio manga baju ya'ese.

¹⁷ Ge'ena ma wange posironga manga 'alu 'itongaka 'o nge-ngeweka gee yotu-tubusou de gee manga ngowaka kayasusuosi!

¹⁸ Nimalahidoa la ge'ena 'uwa 'idadi ma 'orasi 'o besa-besaka.

¹⁹ Ma 'orasi ge'ena 'asa 'idadi 'o sangisara gee koma'iwasi 'idadi ka ma 'orasi ma Jo'oungu ma Dutu 'o dunia wosidadi sigado ne'ena, de mita dua koidadiwau.

²⁰ Nako 'iso ma Jo'oungu ma Dutu kowositipokowa 'o sangisara ma 'orasi ge'ena, tanu 'o nyawa komoiwa yakisilaha. Ma ngano 'awi 'umati, so wositipoko ma 'orasi ge'ena.

²¹ Ma 'orasi ge'ena nako 'o nyawa yongose nginika, 'Ee, 'o Koana 'o Nyawa Wosilaha-laha ma Jo'oungu ma Dutu Wiiri-iriki, 'una nongoka!' Bolo, ''Una ge'enaka!' Ge'ena 'uwa niakingaku 'o nyawa go'ona.

²² Sababu 'o nyawa yosilaha-laha ma ngeluku de 'o nabii ma ngeluku 'asa yoboa. 'Ona 'asa yodiai 'o hali 'ila-laagomo de 'o no-nako 'ihera-herangi ma ngale yosiliba nako ya'akunu, ma Jo'oungu ma Dutu 'awi 'umati mita.

²³ So salingou nimasitiari yaowa, 'iodumu ge'ena tinisidemokau koidadiwasi 'ena!"

²⁴ "'O sangisara ma 'orasi 'ipasaka, 'o wange ma ako 'asa 'itarusu, de 'o mede koisiwaruawau.

²⁵ 'O sagala ngoma 'asa 'itotaka daku 'o diwanguku, de 'o ngawa-ngawaka ma pareta 'asa 'iruahe.

²⁶ Ma 'orasi ge'ena dua ngoi 'o Nyawa ma Ngowaka 'imake toboa 'o kakamoro ma dodaka de 'ai kuasa ma amoko de 'ai kumati.

²⁷ 'Una 'asa wasuloko 'awi mala'ekatika yakitoomu 'o nyawa wakiiri-iriki kiano naga bato 'o duniaka 'iodumu."

²⁸ "Nia'ese 'o do-dotoko 'o 'ara ma gotano. Nako ma sago-sago 'iboboko de 'ito'ori, ngini nianako 'ato 'o ngogoro ma 'orasi 'isoriokau.

²⁹ Koge'enali mita nako ngini niamake 'o susa de 'o sangisara gee tosidemo-demokau 'iodumu la 'idadi, ge'ena ngini 'asa nianako ma 'orasi ge'ena 'isori ma foloiokau.

³⁰ Tinisidemo! Ma hali ge'ena 'idadi dua gee 'o nyawa yo'ahu-'ahu ma 'orasi ne'ena koyobootuawasi yosongene.

³¹ 'O diwanga de 'o dunia 'asa 'iisanga, ma 'ai demo-demo dua kaisi'ado-'adonika."

³² "Ngaro koge'ena ma, ka moi ma koyanakowa to ngoi 'ai bo-boa ma wange bolo ma 'orasi. 'O mala'ekati 'o sorogaaka mita koyanakowa, de ngoi ma Jo'oungu ma Dutu 'awi Ngowaka ma sirete mita kotanakowa, ka 'ai Dea duga wanako.

³³ So salingou niongano-nganono de nimasitiari sababu ngini koniosidongoowa muruoka toboa.

³⁴ Ge'ena 'isi'ade-'ade 'isoka 'o nyawa wimoi wi woaka wamada de wotagi 'o daeraa 'ikuru-kurutika. 'Una 'awi ro-riwoka wakisuloko wi woa yojaga, de wakikula to 'ona moi-moi manga manarama. Gee 'o ngorana ma ja-jagaka wobesesongo 'ato wojaga wosidi-diai.

³⁵ So ngini salingou nimajaga-jaga, sababu ngini konianakokawa muruoka de 'o woa ma dutu gu'una woboa. Poilia 'o wange maata, bolo 'o utu gorona, bolo 'isori 'ibibini, bolo 'o ngoru-ngorumika.

³⁶ 'Uwa sigado 'una woboa kawomasoobotino 'ena ngini nionisuoka.

³⁷ 'Okia naga gee tosidemo nginika, tosidemo mita 'o nyawa 'iodumika: Nimajaga-jaga!"

Markus

Video Markus 13

Ikuti Kami:

KONTAK | PARTISIPASI | DONASI