Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu Deside Isa sugul lẽman Gedẽng Allah, salaq sopoq pengiring-pengiring-Ne matur, "Paq Guru, silaq Pelungguh cingakin bangunan-bangunan nike. Perhatiang batu-batune. Luar biase solahne!"

² Jawab Deside Isa, "Side serioq bangunan-bangunan saq belẽq nike? Setetune ndẽq araq sopoq juaq batu lẽq bangunan-bangunan nike saq masih beronjoq maraq bẽngan. Selapuqne gen terobohang."

³ Beterus Deside Isa lumbar ojok Bukit Zaitun, dait melinggih lẽq taoq saq berandangan kance Gedẽng Allah. Beterus Petrus, Yakub, Yahya dait Andreas parek ojok Deside Isa jari matur secare husus lẽq Ie:

⁴ "Silaq Pelungguh sampẽang lẽq tiang pade, piran selapuqne nike gen telaksane? Dait napi saq jari tande-tandene lamun sampun dateng wayene?"

⁵ Jawab Deside Isa, "Pade waspade. Ndaq jangke side pade tetipu.

⁶ Luwẽq dengan gen dateng kadu aran Tiang, dait bebase, 'Tiang niki Ie!' Ie pade gen miaq luwẽq dengan jari sesat.

⁷ Lamun side pade dengah suare-suare perang dait berite-berite mengenai perang, ndaq takut. Hal-hal nike harus telaksane, laguq nike ndẽq berarti bahwe sampun wayene kiamat.

⁸ Bangse saq sopoq gen perang ngelawan bangse saq lain, dait negare saq sopoq gen nyerang negare saq lain. Lẽq mbẽ-mbẽ gen araq lindur dait kelapahan. Laguq selapuqne nike baruq awalne doang, maraq sakit saq tealamin dengan nine saq gen nganak.

⁹ Side pade harus onyaq-onyaq, sẽngaq side pade gen tebau dait teoros ojok Mahkamah Agame. Side pade gen tempuk lẽq balẽ-balẽ ibadah dait gen tejauq ojok pare penguase dait pare raje lantaran Tiang, sebagẽ kesaksian umaq ie pade.

¹⁰ Laguq Kabar Solah lẽman Allah harus tekabarang juluq tipaq selapuq bangse.

¹¹ Dait lamun side pade tebau dait tejauq ojok pengadilan, ndaq kuatir mengenai napi saq harus side pade sampẽang. Lamun sampun waktune ngeraos, sampẽang doang napi saq tebadaq tipaq side pade lẽq waktu nike. Sẽngaq ucapan-ucapan saq side pade sampẽang nike ndẽqne ucapan-ucapande mẽsaq, laguq asalne lẽman Roh Suci.

¹² Dengan gen nyerahang semetonne mẽsaq jari tematẽq. Dait hal nike gen telaksane ẽndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematẽq.

¹³ Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang."

¹⁴ "Side pade gen serioq 'Perbuatan najis saq miaq binase' nganjeng lẽq taoq saq tebalaq umaq ie. (Hal niki saq harus teperhatiang siq dengan saq mace.) Lẽq waktu nike dengan-dengan saq araq lẽq Yudea harus pelai ojok pegunungan.

¹⁵ Dengan saq araq lẽq atas atep balẽ, ndaq turun dait tame ojok dalem balẽ jari bait napi juaq.

¹⁶ Dengan saq kenyeke araq lẽq lendangne, ndaq tulak bait jubahne.

¹⁷ Celake inaq-inaq saq kenyeke betian, atao inaq-inaq saq masih penyusuq bebẽaqne lẽq waktu nike!

¹⁸ Pade bedo'e adẽq hal-hal nike ndaq telaksane lẽq musim telih.

¹⁹ Lẽq jelo-jelo saq penoq siq sengsare nike, gen araq kesusahan saq ndẽq uwah araq, lẽman Allah cipteang dunie jangke mangkin, dait ndẽq gen araq malik.

²⁰ Seandẽne Tuhan nẽnten pesingket waktune nike, make ndẽq araq sopoq dengan juaq saq selamet. Laguq lantaran dengan-dengan saq sampun tepilẽq siq Tuhan, make Ie pesingket waktune.

²¹ Lẽq waktu nike, lamun araq dengan badaq side: 'Pade serioq, Almasih nike araq lẽq deriki!' atao 'Pade serioq, Ie araq lẽq derike!' -- ndaq gati percaye lẽq dengan nike.

²² Sẽngaq almasih-almasih palsu dait nabi-nabi palsu gen dateng. Ie pade gen miaq tande-tande dait muqjizat-muqjizat jari nipu, dait lamun bau, dengan-dengan saq sampun tepilẽq siq Tuhan ẽndah.

²³ Jari, pade waspade! Selapuqne nike sampun Tiang badaq side sendẽqman hal nike telaksane."

²⁴ "Sesampun mase kesusahan nike, sinar jelo gen jari peteng dait bulan ndẽq becahaye.

²⁵ Bintang-bintang gen geriq lẽman langit dait selapuq kuase saq araq lẽq langit jari biur lantur.

²⁶ Lẽq waktu nike, Bije Manusie gen penggitan rauh lẽq dalem awan siq kuase dait kemuliean saq belẽq.

²⁷ Ie gen ngutus malaẽkat-malaẽkat jari ngumpulang dengan-dengan saq sampun Ie pilẽq lẽman keempat penjuru gumi, lẽman poton gumi jangke dateng poton langit."

²⁸ "Pade bait perajahan lẽman lolo are. Lamun pẽmpang-pẽmpangne ijo dait odaq, dait mulai besuli, side pade nenaoq bahwe musim panas sampun rapet.

²⁹ Maraq nike ẽndah lamun side pade serioq hal-hal nike telaksane, side pade nenaoq bahwe waktune sampun rapet gati.

³⁰ Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne.

³¹ Langit dait gumi gen musnah laguq manik Tiang gen kekel selaẽq-laẽqne."

³² "Timaqne maraq nike ndẽq araq sopoq dengan juaq saq nenaoq piran jelo atao piran jamne. Malaẽkat-malaẽkat lẽq sorge nẽnten wikan dait Bije ẽndah nẽnten wikan, cume Bapa doang saq wikan.

³³ Jari, side pade harus bejage-jage dait waspade, sẽngaq side pade ndẽq nenaoq piran waktune.

³⁴ Keadaanne ibarat sopoq dengan saq bilin balẽne, terus lumbar ojok taoq saq jaoq. Ie suruq pelayan-pelayanne ngurus balẽne dait ngebẽng tugas lẽq ie pade sopoq-sopoq. Lẽq penjage lawang, ie bepesen adẽqne pacu-pacu bejage.

³⁵ Keranaq nike side pade harus bejage-jage, sẽngaq side pade ndẽq nenaoq piran waktune ẽpẽn balẽ nike gen tulak -- sang kebian atao sang tengaq kelem, sang subuh atao kelẽmaq.

³⁶ Lamun ie selung-selung dateng, ndaq jangke ie ndait side pade kenyeke tindoq.

³⁷ Napi saq Tiang sampẽang lẽq side niki, Tiang sampẽang ẽndah lẽq selapuq dengan: Pade bejage-jage!"

Markus

Video Markus 13

Ikuti Kami:

KONTAK | PARTISIPASI | DONASI