Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb Yésus neremuat rat bang Ruma' Allah idi seburur anak sekola'Neh nepebala Neneh, "O Guru, siruh kudeng apeh do' ayuneh batu-batu idi pudut ini!"
2 Idi keburi' Yésus, "Iko nier amung-amung pudut luk rayeh iniké? Na miak ketecan sebuleng batu luk buun-buun ieni, luk na miak uen ngusag peh."
3 Kareb Yésus tudo luun Pegkung Saitun muneng ku Ruma' Allah ineh, idi Pétrus, Yakub, Yahya, idi Andrias nengitun Neneh lulem, keburi'deh,
4 "Do' mada' kuan kai, idanké amung-amung ini miak mangun, idi anunké tanu'neh kareb amung-amung ini malé macing?"
5 Idi kebala Yésus nedeh, "Matar do'-do', pad lemulun na naluk nemuyuh.
6 Ngaceku mula' lemulun sikal macing bang ngadanKu, keburi'deh, 'Ui ini Ieh!' Idi ideh miak naluk mula' lemulun.
7 Kareb muyuh ninger uni lun pebunu' idi bala ratnan pebunu', aleg muyuh megagap, ngaceku na miak na amung-amung ini mangun peh; iamo' nateh ineh kekipedneh.
8 Aceh bawang sikal pebunu' dengan bawang baken, idi aceh imet sikal pebunu' dengan imet baken; idi miak mangun ruyuh tana' iapeh-iapeh, idi teh iru' luk rayeh miak mangun. Idi ineh mepad kudeng pun ét nenganak.
9 "Iamo' do' muyuh matar do'-do'. Muyuh miak kamen idi iten amé' besara'. Muyuh miak bebalen bang ruma' sembayang. Idi teh muyuh miak tuped pa atun lun luk ngimet bawang idi raca'-raca' teh ngaceku Ui, pad muyuh mada' Bala luk Do' nedeh.
10 Na miak na Bala luk Do' ineh badén atun kuan amung-amung pupu.
11 Iamo' kareb muyuh kamen idi itendeh amé' pa kiung luk inan besara', aleg muyuh megagau atun ratnan anun-anun luk miak belén muyuh, iamo' anun-anun luk biré kuan muyuh bang kareb ineh, idi ineh luk miak belén muyuh, ngaceku baken muyuh luk pebala iamo' Roh Meligan.
12 Idi kinanak miak maré kinanakneh pitayen, idi taman miak maré anakneh, idi anak-anak ineh sikal metueh ratnan taman-tinandeh, idi maré nedeh pitayen.
13 Idi muyuh miak inan amung-amung lemulun megateh ngaceku Ui, iamo' lemulun luk tuman pad macing kekipedneh miak uen ngulun.
14 "Muyuh miak nier 'Dat luk Ngacing Tot' ineh tuped su luk na petulu." (Idi do' lemulun luk maca' kali' ilungneh!) "Kareb ineh do' lemulun luk ang tana' Yudia buro amé' luun pegkung.
15 Idi do' lemulun luk luun buduk ruma' aleg temurun idi semuet sikal ngalap anun-anun luk bang ruma'neh.
16 Idi aleg lemulun luk bang lati'neh muli' idi ngalap kuyu'neh.
17 Idi pelaba susa' kuan decur luk mali' idi luk niti' anak kareb ineh!
18 Sembayang pelé amung ini na mangun kareb meteneb.
19 Ngaceku bang aco sineh miak mangun dereh, mepad kudeng luk na nangun rat pun-pun tana' pinudut Allah pad macing nekini, idi na tu-tu miak mangun muci.
20 Iamo' Tuhan pangeh nengekamu' kareb ineh; kudeng na pieh kudeng ineh seburur pana' na miak mulun. Iamo' ngaceku pupuNeh luk pinili' Ieh nengekamu' kareb ineh.
21 "Idi teh kudeng seburur lemulun pebala nemuyuh bang kareb ineh, 'Siruh, ini Keristus!' idi 'Ineh Keristus!' aleg muyuh manu!
22 Ngaceku tuda'-tuda' Keristus luk mebalih idi nabi luk mebalih miak macing, idi nganau' tanu' idi kekamen luk nan mawa, pad naluk, kudeng miak, lun luk pinili' pana'.
23 Matar do'-do'! Ui pangeh nemada' nemuyuh atun ratnan amung-amung ini.
24 "Iamo' bang kareb ineh, muci ratnan dereh ineh mateh aco miak medacem, idi bulan pana' na miak maré acangneh.
25 Idi gituen-gituen bang langit miak merurug, idi amung-amung lalud luk déi' langit ineh pana' miak mebubuh peh.
26 Kareb ineh Anak-Lemulun miak megala', kareb Ieh macing bang laput dengan lalud luk rayeh idi rasat.
27 Ieh miak ngecuk melaikat-melaikat ineh ngamung lun luk pinili'Neh ratnan apat busat bui, ieh ineh ratnan iring tana' macing iring langit.
28 "Do' muyuh ngalap aceh luk pinginud ratnan lawa gita'. Kareb angatneh mebata', idi donneh pun mua', muyuh kali' kareb melau' pangeh muneng.
29 Kudeng ineh teh muyuh ini, kareb muyuh nier amung-amung ineh mangun, do' muyuh kali' karebneh pangeh muneng idi malé macing.
30 Ngerawé do'-do'! Amung ini miak mangun kareb nateh inul ini maté.
31 Langit idi tana' miak metutu', iamo' balaKu na miak metutu' peh.
32 "Iamo' ratnan aconeh idi karebneh seburur pana' nateh kali, sagan pana' melaikat luk déi' surga, idi Anak ineh pana' nateh kali', iamo' Taman sebuleng mo'.
33 Matar do'-do' idi sembayang, ngaceku na muyuh kali' idan karebneh.
34 Idi ieh mepad kudeng seburur lemulun luk amé' ngarang idi necan ruma'neh bang palad demulunneh. Ieh maré kekamen kuan anid-anid bururdeh, idi periteteng kuan luk matar tanga' ineh, pad ieh matar do'-do'.
35 Ngaceku ineh matar do'-do' ngaceku muyuh na kali' idan tuan ruma' ini sikal macing, kian malem, tangal dacem lek, kareb kok lal lek, kian kareb masat aco lek.
36 Kudeng Ieh macing denak-denak aleg Ieh kali' nemuyuh rudap.
37 Luk belénKu nemuyuh kudeng ineh teh luk belénKu kuan amung-amung lemulun: Matar do'-do'!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA