Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lelek fo Yesus la'oela Manetualain Uma na boema, ana mana tunga nala esa nafa'dan nae, "Ama Mesen, mete su'dik uma manamapadeik sila la dei. Taoafik matalololen batu nala te, lole na seli!"

² Boema Yesus nae, "O mita uma matuaina sila la so hetu? Uma mapadeik sila la neukose batu nala esa boeo, ta nananakatoto'dok nahele neme mamana na fa. Neukose basa-basas tu'u leu."

³ Basa boema, Yesus neu leo lete pupuku Zetu na de nangatuuk neu mamanak esa, nasasalematak no Manetualain Uma na. Boema Petrus, Yakobis, Yohanis, ma Anderias ala mai de ala kokolak lo Yesus lae,

⁴ "Ama mafa'da su'dik fe ami, faihi'da besa ka basa sila la ala da'di? Ma ta'du-tana bee ka nde nafa'da nae, fai na losa so?"

⁵ Boema Yesus nae, "Manea matalolole, fo boso nalosak ala ke'dindiu la emi.

⁶ Neukose hataholi ba'u ka ala mai fo ala pake Au na'de nga, fo ala ke'dindiu la hataholi ba'u ka lae, 'Au nde sila!'

⁷ Metema emi mamanene ala benga musu do matee-mata'ti kala soona boso bii, te dede'ak sila la muse ala da'di, tehu ndia ta nafa'da nae, fai mate'e ka nde ndia so.

⁸ Neukose leoina esa natati no leoina esa. Nusaina esa natati no nusaina esa. Dae nanggengo, ma la'andoes da'di nai basa mamanak lala'ena. Basa sila la, besa ka makasososa na nde ndia. Sama na leo inak esa name'da he'di bobongi na.

⁹ Emi muse manea matalolole, nana neukose ala ho'u la emi fo ala lele'a-loloso emi leo manamaketu-mala'di Agama matua meu. Neukose ala fepa-li'u emi nai uma mamaso kala dalek. Neukose lo emi meu mataa manaho'u paleta la ma mane kala, nana Au ana mana tungang emi. Tehu no dede'ak ndia fo emi hapu fai loak soaneu emi tui-benga Au neu hataholi sila la.

¹⁰ Nana Manetualain Hala Malole na muse tui-benga nakahulu kana neu basa leoina lala'ena.

¹¹ Ma metema ala ho'u la emi fo lo emi leo manamaketu-mala'di kala meu soona, boso bii la'eneu hata fo emi kokola kana. Metema fai na losa soaneu emi kokolak soona, kokolak ka'da hata fo nananafa'dak neu emi a. Nana dede'a-kokolak fo emi kokolak sila la, emi dede'a-kokolam ta sila fa. Dede'a-kokolak sila la leme Manetualain Dula Dale na mai.

¹² Neukose hataholi a fe heni tolanoo na fo ala taonisan. Dede'ak ndia boeo, neukose ana da'di soaneu ama ka no ana ka. Neukose ana kala la'ban ina-ama nala, ma ala taolisas.

¹³ Neukose basa hataholi la lakamu-lakadau emi nana Au ana mana tungang emi. Tehu ba'eneu hataholi fo nakatatakak losa mate'e na, neukose ana hapu maso'da ka."

¹⁴ "Nai faik esa te neukose emi mita, 'Nitu Mangalauk fo Mana Tao Nakalulutu ka' napadeik nai mamanak fo nanapa'dak ba'eneun. See lees ia soona, so'ba malela kana leona! Metema lelek ndia emi nai Yudea soona, emi muse malai leo lete lepa kala meu.

¹⁵ Hataholi manai uma puni na, boso kona fo ho'i hata neme uma dale mai.

¹⁶ Hataholi manai tina-osi, boso fali fo ho'i ba'du manalu nala.

¹⁷ Bibii namata'u matuaina nanseli nai fai-faik sila la, ba'eneu ina kailu sala, ma inak fo bei manamasu'u ana ka!

¹⁸ Hule-haladoi fo manda'dik sila la boso da'di la'e oefaak.

¹⁹ Neu fai-faik mangalauk matuaina sila la, neukose hapu susa-soe esa fo susa-soe ndia, ana beita da'di nita nai daebafa ka, mulai neme Manetualain nakadada'dik daebafa ka losa besak ia, tehu neukose ana ta da'di so'on.

²⁰ Leo uni'ka Manetualain ta tao keke'u faik ndia fa soona, ta hapu hataholi esa boen, hapu naso'da fa. Tehu, hu ka nde Manetualain hataholi kamahehele nala de, Ana tao keke'u faik ndia.

²¹ Nai lelek ndia, makanaema hataholi esa nafa'da emi nae, 'Mitak, Mane Mana Fe So'dak ndia, nai ia!' do 'Mitak, nai ndia!' soona boso mamahele hataholi ndia.

²² Nana manafe so'dak masapepeko kala ma nabi pepeko kala neukose ala mai. Neukose ala tao tatao-nono'i matuaina la, ma manada'di beu kala fo ala ke'dindiu hataholi, fo metema da'di soona, ala ke'dindiu Manetualain hataholi kamahehele nala boe.

²³ Hu ndia de, manea matalolole leona! Basa dede'ak sila la, ala beita da'di fa te, Au afa'da akahuluk emi so."

²⁴ "Basa le'do fai susa-soe ndia soona, neukose le'do da'di makahatuk, ma bula ka ta nasalaa so'on.

²⁵ Neukose nduu kala tu'da leme lalai mai, ma manakoasa lalai maloa, neukose esak tofak matan.

²⁶ Nai lelek ndia, neukose Ana Hataholi ka Ana mai nai ko'as dale no koasa matuaina na, ma mandela-masa'an.

²⁷ Neukose nadenu ata nusa so'da kala fo ala tao lakabubua hataholi kamahehele nala leme daebafa ka bu'un has mai, ma leme daebafa ka pe'da na leo lalai pe'da na."

²⁸ "Ho'i nanolik neme ai kak ka mai. Metema ndana nala momo'do ma mangana'uk, boema ala mulai bukubeu soona, emi bubuluk fai ha'na sa deka so.

²⁹ Leondiak boe, metema emi mita dede'ak sila la ala da'di soona, emi bubuluk mae, fai na deka nanseli so.

³⁰ Bubuluk leona! Te basa manda'dik ia la neukose ala da'di te, hataholi maso'dak besak ia la, beita mate basa fas.

³¹ Lalai a no daebafa ka neukose ala sapu-lalo, tehu Au dede'a kokolang lahele losa dodoo na."

³² "Leomae leondiak boe, ta hapu hataholi esa boen fo ana bubuluk faik bee do li'u bee a fa. Ata nusa so'dak fo manai nusa so'da ka, ala ta bubulu kana fa, ma Ana ka boeo, ana ta bubulu kana fa, te ka'da Ama ka mesa kana nde bubulu kana.

³³ Hu ndia de emi muse manea ma masanene'dak, nana emi ta bubuluk neu faik bee fo, faik ndia losa fa.

³⁴ Dede'ak ndia lakasasama kana sama leo hataholi esa la'oela uma na, fo neu leo mamanak dook neu. Nadenu malalau-maoono nala lanea uma na, ma ana ba'e fe esa-esak nok ndia belaba'un. Ana helu manamanea lelesu fo nanea matalolole.

³⁵ Hu ndia de, emi muse manea, nana emi ta bubuluk neu faik bee ndia, fo uma lamatuak ana fali ma'in. Fafa'kama la'e le'donosok, fafa'kama la'e fatila'da neu dua, fafa'kama la'e lolebalahaana na, do fafa'kama la'e le'do tii.

³⁶ Metema uma lamatuak ndia ana mai no kaiboik soona, boso nalosak ana hapu na emi bei sungu.

³⁷ Hata fo Au afa'dan neu emi ia, Au afa'dan neu basa hataholi la ae, manea leona!"

Markus

Video Markus 13

Ikuti Kami:

KONTAK | PARTISIPASI | DONASI