Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wongo'otiri 'o talaga watoaka wolio doka 'awi soanika.

² Ge'enaka doka de yamuruo naga yoboa 'o Yesusino wi'asa wolugu-lugu wimoi wi kokowaka witigirangisa. Gee 'o Yesus wakimake to 'ona manga ngo-ngaku ma guatoka, de wongose wolugu-luguka gee, "'Ai ngowaka, 'uwa ni singina 'i'ogu! Ni so-sowono ta'ikirokau."

³ 'O Yahudioka manga 'agamaka yodoto-dotoko yamuruo naga ge'enaka gee ka manga singinaka, "'O nyawa nu'una ma Jo'oungu ma Dutu wisiti-tingoono."

⁴ 'O Yesus wanako manga singina ma dodaka so wongose, "'Ido'oa so nia di-dibangi koge'ena ma dorou?

⁵ Ka'ena 'ifoloi 'igapangi tongose wolugu-luguka, ''Ani so-sowono tosi'aikokau!' bolo, 'Nomomikie de notagiou!'?

⁶ Ma ne'ena dua tosidumutu nginika 'ato 'o duniaka ne'ena 'o Nyawa ma Ngowaka wopareta 'o so-sowono wa'ikiri." Ge'enaka de wolugu-luguka wongose, "Noma'okodeu, ni kokowa nagoraka la noliou!"

⁷ De wolugu-lugu gu'una woma'oko so wolio wi woaka.

⁸ So gee yamake ge'ena 'idadi, de yakimodongo de ma Jo'oungu ma Dutu wisiarene sababu wokulakau wi guata koge'ena ma amoko 'o nyawaka.

⁹ Gee 'o Yesus womagoraka ge'enaka dau so wotagika de wimake 'o pajaki woga-ga'asoko wimoi wi ronga 'o Matius. 'Una wogogerie 'o pajaki yoga-ga'asoko ma woaka. So 'o Yesus wongose, "Nou, noimoteke!" De 'o Matius kawoma'oko de wimotekokau 'o Yesus.

¹⁰ Gee 'o Yesus wo'odomo ma gu-gudaioka 'o Matius wi woaka, de manga gudai yoboa 'o balasitengi yoga-ga'asoko de 'o nyawa gee 'o kawasa yakimakeka 'o nyawa ma dorou, yomasido'odomo de 'o Yesus de wi do-domoteke.

¹¹ De 'o Farisioka yakimake de yongose 'o Yesus wi do-domoteika, "'Ido'oa so nia Guru de 'o balasitengi yoga-ga'asoko de 'o nyawa ma do-dorou yomasido'odomo?"

¹² De 'o Yesus wo'isene yosano koge'ena so wongose 'ato, "'O nyawa ma guata koyoparaluuwa 'o dotere, ma 'ena gee yopa-panyake.

¹³ So tagi niatibangi kokia ma ngale 'o Buku 'Itebi-tebini ma demo ne'ena: 'Ngoi kotoduakuwa 'o su-suba 'o haewani, ma 'ena 'o dora.' Sababu ngoi taino kotaki'asokuwa 'o nyawa ma owa, ma 'ena gee yosowo-sowono."

¹⁴ Ge'enaka de 'o Yohanes Wo'osi-'osiki wi do-domoteke yaino 'o Yesusino yosano, "'Ido'oa so ngomi de 'o Farisioka 'ijaga miopuasa de 'ani do-domoteke 'ona ko'uwa?"

¹⁵ De 'o Yesus wosango, "'O nyawa yaki'aso-'asokino 'o ngaamoko ma rameka, nako ma 'orasi wonga-ngaamoko ge'enakasi, ge'ena dua manga singina 'isusa? Ma gee dua ma 'orasi kowi'iwau, 'asa de yopuasa.

¹⁶ Komoiwa 'o mosa ma siraka de ma sungi yosipata, sababu ma ba-bata ge'ena dua 'isikaino 'itingoono de yatobaka so 'ifoloi 'iracanga.

¹⁷ Koge'enali mita 'o 'anggur ma sungi koidadiwa posinoa ma ngii ma siraku, sababu dua yosidopotoka de 'ipoaka. So 'o 'anggur ma sungi salingou posinoa ma ngii ma sungiku, la ma 'anggur de ma ngii ge'ena koyado'oawa."

¹⁸ 'O Yesus wobicara ma gu-gudaioka 'o Yohanes Wo'osi-'osiki wi do-domoteika, de 'o lo-lomu ma woa ma balusu wimoi woboa de wobukuku 'o Yesus wi bionoka 'asa de wongose, "'Ai ngowaka mimoi 'asa kamosongenuku, so tanu noboa moni'aosi la mowangoli!"

¹⁹ 'O Yesus de wi do-domoteke yoma'oko so wimoteke 'o nyawa gu'una.

²⁰ Manga do-dagi ma sigoronaka de mimoi 'ami 'aunu 'ijaga 'itagi ma do'ingo 'o taunu mogiooko de modidiou, momasisori 'o Yesus wi dudunino. Muna matibangi 'ato, "Ngaro ka wi jubaka tatigi ma dua 'ai panyake 'i'aiki." Ge'enaka de matigi 'awi baju 'ikuru-kurutuku ma barenika.

²¹ (9:20)

²² De ma 'orasi ge'ena 'o Yesus womadutumu de womimake 'o ngeweka gumuna de kawongosekau munaka, "'Ai ngowaka! 'Uwa ni singina 'i'ogu, sababu noingaku so ni panyake 'i'aiki!" De kage'ena ma 'orasi de mi panyake ge'ena 'i'aiokau.

²³ 'O Yesus woboa 'o lo-lomu ma woa ma balusu wi woaka, 'ena yosuling de yogaribetongo ma gu-gudaioka.

²⁴ De 'o Yesus wongose 'onaka, "Niosupuka nioodumu, sababu 'o ngowaka numuna komosongenuwa kamiki'ookoka." Ge'enaka de 'ona wirisela.

²⁵ 'O nyawa yoku-kudai go'ona yakiginiioka, de 'o Yesus wowosama so 'o ngowaka gumuna mi giamika wa'ao de momomiki.

²⁶ So ma habari ge'ena 'itagi ma daeraaka ge'ena yasuluunuku.

²⁷ 'O Yesus womagoraka ge'enaka, de 'o ngekomoka de yorau-rau yamididi wimoteke. 'Ona yomasigaso-gasoko, "Ee Dautu wi Ngowaka! Minidoranosi!"

²⁸ Gedagee 'o Yesus wowosamika 'o woa moioka, de yorau-rau yaino 'o Yesusino de wongose 'onaka, "Niongaku? 'ato ngoi 'idadi tinisilaha?" De 'ona yosango, "Miongaku, 'Aba!"

²⁹ Ge'enaka de 'o Yesus wa'ao manga akoka de wongose, "Sababu niongaku, 'idadi moteke to ngini nia mau."

³⁰ Ge'enaka de yomasimakekau. 'O Yesus wakisitiari, "'Uwa niosikademo ma hali ge'ena ka moika ma."

³¹ Ma gee yotagika de yosikawasa ge'ena ma daeraa yasuluunuku.

³² Yorau-rau yopasaka, de wimoi womou-mou 'o tokata widongosamuku wi'asa 'o Yesusino.

³³ 'O Yesus woginiioka ma tokata ge'ena, de 'idadiokau wobicara. So 'o nyawa yoku-kudai ge'enaka yoherangi de yongose, "Koma'iwasi miamake kone'ena 'idadi 'o Israeloka."

³⁴ Ma 'o Farisioka yongose, "'O Tokata ma Koana wikulaka 'o guata ma ngale wosikiniiki 'o tokata."

³⁵ Koge'enau 'o Yesus wotagi 'o kota de 'o soana wanga-ngaimoi. 'Una wodotoko 'o lo-lomu ma woa-woaka, de wositotara 'o Habari ma Owa ma ngale ma Jo'oungu ma Dutu wopareta. 'Una wakisi'aiki 'o nyawa manga panyake 'i'ini-'inioka, de yobo-bolohi.

³⁶ Gedagee 'o Yesus wakimakeka 'o nyawa yoku-kudai go'ona de wakisingina sababu koyomasinakowau de koyomado-do'oawau, so 'isoka 'o domba komoiwau yapiara.

³⁷ Ge'enaka de 'o Yesus wongose 'awi do-domoteika, "'I'umukukou ma amooka ma yo'utu-'utuku ka munukaka.

³⁸ Sababu ge'ena nioga'asoko ma Bairi ma Dutuka la wakisidingoto yo'utu-'utuku."

Matius

Video Matius 9

Ikuti Kami:

KONTAK | PARTISIPASI | DONASI