Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa Almasih nayiak ka ateh parawu, Baliau payi manyubarangi danau, babaliak ka kampuang-Nyo.

² Tibo disinan, urang mambawok kabake Baliau, surang urang lumpuah nan lalok di lapiak. Kutiko Baliau maliyek dek takah tu bana iman urang-urang tu, mako bakatolah Baliau kabake urang nan lumpuah tu, "Oih anak-Den, tabahkanlah ati angkau! Doso-doso angkau lah di ampuni."

³ Babarapo urang guru agamo Yahudi nan ado disinan, bi bakato dalam atinyo, "Urang ko lah samo ko jo mahino Allah!"

⁴ Isa Almasih mangatawui, apo nan dipikiekan dek guru-guru agamo tu, jadi, Baliau bakato, "Baa mangko pikieran angku-angku sajahek itu?

⁵ Nama nan labiah mudah: mangatokan 'Doso angkau lah di ampuni', atau mangatokan, 'Tagaklah, sudah tu bajalanlah'?

⁶ Kiniko Ambo ka mampaliyekkan kabake angku-angku, baraso di ateh dunia ko, Anak Manusia bakuwaso untuak ma ampuni doso." Mako bakatolah Isa Almasih kabake urang nan lumpuah tu, "Tagaklah, angkeklah lapiak angkau, sudah tu pulanglah!"

⁷ Urang nan lumpuah tu tagak, sudah tu inyo pulang ka rumahnyo.

⁸ Kutiko urang-urang tu maliyek kajadian nan bakcando itu, mako inyo bi katakuik-an, sarato mamuji Allah, dek karano Allah lah mambarikan kuwaso nan sangaik gadang kabake manusia.

⁹ Sasudah tu Isa Almasih barangkek dari tampaik tu. Samantaro Baliau sadang bajalan, Baliau manampak surang tukang mintak pajak, nan banamo Matius, sadang duduak di kantua pajaknyo. Bakatolah Isa Almasih kabake inyo, "Kamarilah, molah turuikkan Ambo!" Mako tagaklah Matius, inyo lansuang payi manuruikkan Isa Almasih.

¹⁰ Kutiko Isa Almasih sadang makan di rumah Matius, bi tibo pulolah tukang-tukang mintak pajak, sarato jo urang-urang nan di anggap indak elok dek masarakaik, sato pulo makan samo-samo jo Baliau sarato jo pangikuik-pangikuik-Nyo.

¹¹ Ado urang-urang Farisi nan maliyek kajadian tu. Inyo bi batanyo kabake pangikuik-pangikuik Isa Almasih, "Apo sababnyo, mangko Guru angku-angku makan samo-samo jo tukang mintak pajak, sarato jo urang-urang nan badoso tu?"

¹² Isa Almasih mandangakan, apo nan ditanyokan dek urang tu, sudah tu Baliau manjawab, "Urang nan siyaik indak mamaralukan dotor doh, tapi kok urang nan sakik iyo.

¹³ Paresolah apo aratinyo ayaik Alkitab nan tatulih sarupo iko: 'Nan Den kahandak-i iyolah raso ibo, indak karoban taranak doh'. Dek karano Ambo datang, indak untuak ka ma imbau urang nan lah maraso dirinyo baiak doh, tapi Ambo datang kabake urang nan dipandang hino."

¹⁴ Sasudah tu pangikuik-pangikuik Nabi Yahya Pambaptis datang kabake Isa Almasih, untuak payi batanyo, "Kami sarato jo urang-urang Farisi, bi bapuwaso, tapi pangikuik-pangikuik Angku indak, baa tu?"

¹⁵ Baliau manjawab, "Baa pandapek angku-angku? Dapekkoh tamu-tamu di alek kawin ba ibo ati, jikok marapulai sadang ado di tangah-tangah alek? Tantu indak! Tapi isuak ka tibo juwo tu masonyo, marapulai tu ka dibawok dari tangah alek tu. Kutiko itu, barulah urang-urang tu bi bapuwaso.

¹⁶ Indak ado doh urang manumbok baju nan lah usang, jo kain nan baru. Dek karano, kain panumbok tu ka susuik, mako inyo cabiaklah baju tu, batambah lawehlah kuyaknyo.

¹⁷ Baitu pulo, indak ado doh urang nan mamasuakkan anggur nan baru, ka dalam kampia kulik nan usang. Dek karano kampia tu bisa cabiak bisa kuyak, taseraklah anggur tu kasadonyo. Anggur nan baru musti dimasuakkan ka dalam kampia nan baru pulo, buliah kaduwo-duwonyo samo-samo tapaliaro."

¹⁸ Samantaro Isa Almasih sadang mangecek jo pangikuik-pangikuik Nabi Yahya Pambaptis, tibolah surang pamimpin rumah ibadaik. Inyo tagak jo singantua di adok-an Baliau sambia bakato, "Anak ambo nan padusi baru maningga sabanta ko. Tapi kiniko ambo mambana kabake Angku, maringanilah Angku datang untuak manyintuah anak ambo tu, buliah iduik inyo baliak."

¹⁹ Isa Almasih lansuang tagak, baitu pulo pangikuik-pangikuik-Nyo, bi payi manuruikkan urang tu ka rumahnyo.

²⁰ Di tangah jalan basuwolah jo surang padusi, nan lah duwo baleh tawun lamonyo sakik pandarahan. Panyakiknyo tu nan ba ubuangan jo haidnyo, inyo tibo dari balakang mandakek-i Isa Almasih. Manuruik agak-agak di atinyo, "Asa dapek den manyintuah jubah Baliau, panyakik den cegak." Mako inyo awailah ujuang jubah Isa Almasih.

²¹ (9:20)

²² Kutiko tu Isa Almasih malengah ka balakang, Baliau mancaliak kabake padusi tu, sambia bakato kabake inyo, "Tabahlah, oih anak-Den! Dek karano angkau layi picayo kabake Ambo, itu mangkonyo angkau cegak!" Pado kutiko tu juwo, cegaklah panyakik padusi tu.

²³ Indak lamo sasudah itu, sampailah Isa Almasih di rumah pamimpin rumah ibadaik tu. Kutiko Baliau maliyek pamain-pamain musik kamatian, sarato banyak urang nan ma-iruak,

²⁴ Baliau bakato kabake urang nan banyak tu, "Bi kaluwalah kasadonyo! Anak ko indak mati bagai ko doh; inyo hanyo talalok." Urang nan banyak tu bi mampagalakkan Isa Almasih.

²⁵ Sasudah urang tu bi kaluwa kasadonyo, mako masuaklah Isa Almasih ka dalam biliak paja tu, Baliau paciklah tangan paja nan mati tu. Mako tasintaklah paja tu.

²⁶ Pacahlah kaba tantang apo nan tajadi, disadonyo daerah tu.

²⁷ Isa Almasih barangkek dari tampaik tu, dipajalanan ado duwo urang buto nan manuruikkan Baliau. Urang buto tu ba imbau, "Oih Anak Nabi Daud, iboilah kami ko!"

²⁸ Kutiko Isa Almasih masuak ka dalam rumah, urang buto nan baduwo ko datang kabake Baliau. Baliau batanyo kabake urang nan buto tu, "Apo angku-angku layi picayo, baraso Ambo bisa mancegakkan angku-angku?" "Picayo, Ngku!" keceknyo.

²⁹ Mako di awai Baliaulah mato urang nan buto tu sambia bakato, "Dek karano angku-angku layi picayo, mako tajadilah apo nan angku-angku pintak."

³⁰ Mako cegaklah mato urang nan buto tu, sainggo bisa untuak maliyek. Tapi Baliau mamparingekkan bana, supayo inyo jan mancuritokan kajadian tu kabake siya-siyanyo.

³¹ Tapi urang buto nan lah cegak tu, payi kian kumari mancuritokan Isa Almasih, sampai kasadonyo daerah.

³² Kutiko urang nan baduwo tu lah payi, ado surang urang bisu nan dikuwasoi dek roh jahek, dibawok kabake Isa Almasih.

³³ Baliau usielah roh jahek tu, sakutiko tu juwo urang nan bisu tu bisa mangecek baliak. Urang nan banyak tu bi tacangang sambia bakato, "Alun ado lai kami maliyek kajadian nan sarupo iko di Israel!"

³⁴ Tapi urang-urang Farisi bi mangatokan, "Induak angkang roh-roh jaheklah ko, nan mambari Inyo kuwaso untuak ma usie roh-roh jahek tu."

³⁵ Bakcando itulah Isa Almasih payi bakuliliang, dari kota nan iko, ka kota nan lain, dari kampuang nan iko, ka kampuang nan lain. Baliau ma aja di rumah-rumah ibadaik, Baliau mambaritokan Injil Karajaan Sarugo. Baliau mancegakkan urang-urang nan manangguangkan sagalo macam panyakik, sarato jo urang nan cacaik badan.

³⁶ Kutiko Isa Almasih maliyek urang nan banyak tu, Baliau maraso ibo kabake urang-urang tu, dek karano urang tu lah ka ilangan aka, sarato indak badayo lai, saroman jo domba nan indak bagubalokan.

³⁷ Mako bakatolah Baliau kabake pangikuik-pangikuik-Nyo, "Tuwaian sambuah, tapi urang nan ka manuwai saketek.

³⁸ Dek karano itu mintaklah kabake urang nan punyo ladang, supayo inyo mandatangkan urang nan ka untuak manuwai asie ladangnyo."

Matius

Video Matius 9

Ikuti Kami:

KONTAK | PARTISIPASI | DONASI