Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mawu Yesus simakẹ e su sakaeng, kụ liměbạe rano, kụ nẹ̌sul᷊e su soan'E.

² Paị sene taumata e němpanondạen tau nipeose su anun'E, rụdal᷊oka su těpihẹ̌. Tangu Mawu Yesus nakasilọe kasarian pangangimang i sire e, kụ i Sie něhengetangke su tau peosẹ̌ ene angkuěng, "Pakatarimạe naung u amang! Kal᷊awọu rosanu e seng niampungang."

³ Manga mananětirong agama němpẹ̌bẹ̌bera su ral᷊ungu naung i sire angkuěng, "Tau ěndaịe kai mělẹ̌hodatẹ̌ Mawu Ruata e!"

⁴ Mawu Yesus e masingkạu tiněnnan sire, kụ i Sie něhengetang, "Kai unụe i kamene měmpẹ̌tẹ̌tiněnna ral᷊akị?

⁵ Sude něngalembon nẹ̌tatarang: mẹ̌berau, 'Dosanu e seng niampungang' arau, 'Pẹ̌bangungke, kụ dal᷊eng'?

⁶ Arawe Iạ kai mapakasingkạ si kamene u su dunia ini e Ahus'u Taumata kai kawasa mangampung dosa." Tangu Mawu Yesus něhengetang su tau peosẹ̌ e, "Pẹ̌bangungke, sapuạe ral᷊okaěngu kụ kapul᷊ẹ e!"

⁷ Tau peosẹ̌ e nẹ̌bangung dingangu napul᷊ẹ sarang bal᷊ene.

⁸ Tangu taumata l᷊awọ nakasilọe hal᷊ẹ̌ ene, něngkatakụe kụ němpẹ̌dalọe Mawu Ruata watụ u seng nangonggọu kawasa kerene kasariane su taumata.

⁹ Ene wọu e Mawu Yesus naněntangken soa ene. Kạpahundal᷊enge i Yesus nakasilọe maghaghělle bea sěngkatau mạiang su wal᷊em pěmamaehang bea e arenge i Matius, kụ něhengetang si sie, "Tol᷊eko Siạ!" Tangu i Matius nẹ̌buạe kụ timol᷊ẹ e Mawu Yesus.

¹⁰ Piạ e Mawu Yesus kạkaěnge su wal᷊eng Matius, narěntạe lai i sire maghaghělle bea riọ natimu, ringangu apang lẹ̌ěnnaěngu taumata l᷊awọe kai taumata raral᷊aị, kụ nahungkaěng sěngkakaěng dingangu Mawu Yesus dingangkewelain manga murit'E.

¹¹ Piạ i sire tau Farisi nakasilo hal᷊ẹ̌ ene, nakiwal᷊ọe su manga murit'u Mawu Yesus, "Kawe unụe mananěntirong kamene kawe kụkaěng dingangu maghaghělle bea ringangu taumata warạdosa?"

¹² Mawu Yesus nakaringihẹ̌ kakiwal᷊on sire mase simimbang angkuěng, "Mal᷊ahuwekae tawe wahal᷊uas'u piạ mangangundang e, pianẹ e apan masasakị.

¹³ Sẹ̌suieko měnsang apa mangal᷊eng ayet'u Winohẹ Susi ini: 'Iạ e kai měgẹ̌gausẹ̌, tatal᷊ěntụ, bal᷊inewe sasěmba binatang'. Batụ u Iạ diměnta wal᷊inewe kumui apam mal᷊aadilẹ̌ kaiso kawe apang barạdosa e."

¹⁴ Bọu e manga tumatol᷊e si Yohanes Mananahani e němpẹ̌děnta su anum Mawu Yesus, kụ nakiwal᷊ou, "Kawe unụe i kami ringangu tau Farisi e měpẹ̌puasa wue, arawe manga murit'i Tuang kawe tala?"

¹⁵ Mawu Yesus simimbang, "Kereapa ngae su tiněnnan kamene? Botonge sake su sal᷊iwangu pẹ̌kakawinge lumahunsusa kereu kaghiang esẹ e wědang ene sutal᷊oaran sire? Tantu tala wue! Kai hědowen su tempong kaghiang esẹ e al᷊akeng bọu anun sire. Kụ su tempo ene wuhụe i sire měmpẹ̌tělling.

¹⁶ Tawẹ taumata měnděpel'u ririsẹ̌ buhu su lakụ těbe. Batụ u ririsẹ̌ ene kai měngahimběsọ dingangu makaghehẹ lakụ ene hakịu makakatapeng gehẹ e limembong kasariane.

¹⁷ Kerene lai tawẹu makapěndal᷊ingu anggorẹ̌ buhue su ral᷊ungu wakuhẹ̌ pisị seng těbe. Batụ u wakuhẹ̌ ene e kai mạběse ringangu magholang, mase anggorẹ̌ e mạboso. Anggorẹ̌ buhue harusẹ̌ itaho su ral᷊ungu wakuhẹ̌ lai wuhu tadeạu i rẹ̌dua ene mapiawe kěbị."

¹⁸ Piạ e Mawu Yesus kạpěhengetange su manga tumatol᷊e si Yohanes Měnanahani e, ute riměntạe sěngkatau těmbonang u wal᷊em pẹ̌kakal᷊iomanengang. I sie nẹ̌tumpěkuhẹ̌ su těngom Mawu Yesus dingangu nẹ̌bera, "Anạku wawine wuhu-wuhu nate. Kai karimạko i Tuang deng duměnta mědeạu makapěnělid'u l᷊iman'U e tadeạu i sie mẹ̌biahẹ̌ kapia."

¹⁹ Ene Mawu Yesus dingangu manga murit'E měngkatewe nẹ̌buạ kụ timol᷊e si sie.

²⁰ Ene kạpahundal᷊enge kai piạ tau wawine kụ seng mapul᷊o dua su taunge karěngụe masakị dẹ̌dal᷊engangu raha, himaung si Yesus wọu l᷊ikude. I sie mětẹ̌tiněnna u, "Manịeng kětạeng manenggehẹ̌ kakingkaeng'E, iạ e mang sarung mapia." Mase i sie nanenggehe humbung kakingkaengu Mawu Yesus.

²¹ (9:20)

²² Su orasẹ̌ ene lai Mawu Yesus nẹ̌bihụe kụ nakasilo si sie, kụ nẹ̌bera u, "Pakatarimạ bue inang! Ual᷊ingu pangangimangu e nakapia si kau!" Ene tau wawine e nul᷊ẹ e wọu orasẹ̌ ene.

²³ Bọu e Mawu Yesus narangengke su wal᷊en těmbonang u wal᷊em pẹ̌kakal᷊iomanengange. Sarạeng i Sie nakasilo měmamusikẹ̌ u pěhampugang dingangu taumata l᷊awọ měmpẹ̌gẹ̌ganohạe,

²⁴ i Sie něhengetang si sire, "Sẹ̌bangko kěbị i kamene! Dariọ ini e tawe nate; i sie kětạeng mětẹ̌tikị." I sire kěbị němpěheghesẹ̌ Mawu Yesus.

²⁵ Kụ sarạeng taumata l᷊awọe nahunsẹ̌bang, tangu i Sie simuẹ̌ e su ral᷊ungu kamar'u rariọ e, mase nangumpaedẹ̌ limane. Tangu rariọ e nẹ̌bangungke.

²⁶ Habarẹ̌ ene e nasěsahe su kaguwạu wanua ene.

²⁷ Kutẹu, sarạeng i Yesus dimal᷊eng bọu ene, i Sie kai niwatukangu tau wuta ruang katau kapẹ̌kuine angkuěng, "Tal᷊ěntụkong kandua e Ahus'i Daud!"

²⁸ Sarạeng i Yesus simuẹ̌ su wal᷊e, tau wuta rarua e himaungke si Sie. Ene i Yesus nakiwal᷊ọe si rẹ̌dua, "I rua mangimang u Iạ makakaul᷊ewen dua wọu sakịe?" "Mangimang Tuang!" angkuěng i rẹ̌dua.

²⁹ Mase Mawu Yesus nanenggehe matan dẹ̌dua apid'u něhengetang, "Ual᷊ingu i rua mangimang, ute kariadịe kere lẹ̌harapeng i rua."

³⁰ Tangu i rẹ̌dua e někěllạe. Ene Mawu Yesus kai nẹ̌sẹ̌ding masěga-sěgadẹ̌ u kumbahang měhabar'u hal᷊ẹ̌ ene si sai-sai.

³¹ Kaiso i rẹ̌dua e mang nahundal᷊eng nẹ̌dal᷊ahabar'u Mawu Yesus su kạguwạu wanua ene.

³² Piạ i rẹ̌dua kạpahul᷊intụe, tangu piạko i anu mou nisawelangu rohkẹ̌ dal᷊akị niěntudẹ̌ su anung Yesus.

³³ Mawu Yesus nanokol᷊eng rohkẹ̌ dal᷊akị e, kụ i anu mou e nakawerạe. Taumata l᷊awọe něngkaherangke ringangu němpẹ̌bera u, "Kakakoạ kere ini e tawe kinasilo sarang sěnsul᷊e su Israel e!"

³⁴ Kai tau Farisi e němpẹ̌bera u, "kai těmbonang u rohkẹ̌ dal᷊akị e nangonggọu kawasa si Sie mẹ̌deạu manokol᷊ẹ̌ manga rohkẹ̌ dal᷊akị e."

³⁵ Kerene raral᷊engu Mawu Yesus bọu soa sěmbaụ sarang soa wal᷊ine, wọu kampong sěmbaụ sarang kampong bal᷊ine. I Sie mạněntiro su manga wal᷊em pẹ̌kakal᷊iomanengang, dingangu mělẹ̌habar'u Injilẹ̌ mạanun kararatuang u Mawu. I Sie mapakạpian taumata wọu kal᷊awọu haghin sakị dingangu kurangu wadang.

³⁶ Ene Mawu Yesus tụtal᷊ěntụ i sire, watụ u i sire měngkatewe nionganenge ringangu tawe makapẹ̌kapura, mẹ̌sul᷊ungkewen domba tạ měndal᷊ukade.

³⁷ Kụ i Yesus něhengetang su manga murit'E, "Paměnsakenge mal᷊awọ bue, arawe měmaměnsạe kawe mahal᷊i.

³⁸ Tangu pẹ̌dorongke su taghuangu waelẹ̌ e tadeạu měndoloh'u mamaměnsạ ipaměnsạ."

Matius

Video Matius 9

Ikuti Kami:

KONTAK | PARTISIPASI | DONASI