Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa taẽk ojok dalem perau, beterus mbelat danao tulak ojok kote asal-Ne.

² Lẽq derike araq dengan saq parek tipaq Deside Isa jauq sopoq dengan kẽpaq saq tetindoqang lẽq tipah. Sewaktu Deside Isa cingakin iman dengan-dengan nike, Ie bemanik lẽq dengan kẽpaq nike, "Teguqang angende, anak Tiang, dose-dosende sampun teampunin."

³ Ahli-ahli Taurat saq araq lẽq derike bebase dalem angenne, "Dengan niki menghine Allah!"

⁴ Deside Isa wikan napi saq tepikirang siq dengan-dengan nike, jari Ie bemanik, "Kembẽq pikirande jahat maraq nike?

⁵ Mbẽ saq molahan ngucapang: 'Dosende sampun teampunin', atao ngucapang: 'Ures dait lampaq?'

⁶ Laguq adẽq side pade nenaoq bahwe lẽq dunie niki Bije Manusie bedowẽ kuase ngampunin dose." Terus manik Deside Isa lẽq dengan kẽpaq nike, "Ures, terus lampaq!"

⁷ Dengan kẽpaq nike ures, terus ulẽq ojok balẽne.

⁸ Sewaktu dengan-dengan nyaksiang peristiwe nike ie pade takut dait mulieang Allah. Sẽngaq Allah sampun ngicanin kuase saq belẽq gati tipaq manusie.

⁹ Beterus Deside Isa bilin taoq nike. Sewaktu bemargi, Ie cingakin sopoq penagih pajek aranne Matius, kenyeke tokol lẽq taoqne begawẽan. Deside Isa bemanik lẽq ie, "Silaq turut Tiang!" Terus Matius nganjeng dait ngiring Deside Isa.

¹⁰ Waktu Deside Isa kenyeke medaran lẽq gedẽng Matius, dateng luwẽq penagih pajek dait dengan-dengan bedose, milu medaran kance Deside Isa dait pengiring-pengiring-Ne.

¹¹ Araq dengan-dengan Parisi saq serioq hal nike. Dait ie pade beketuan lẽq pengiring-pengiring Deside Isa, "Kembẽq gurunde bareng medaran kance penagih pajek dait dengan bedose?"

¹² Deside Isa pirengang napi saq teketuanang siq dengan Parisi nike, terus jawab Deside Isa, "Dengan saq sẽhat ndẽq merluang tabib, cume dengan saq sakit doang.

¹³ Silaq lumbar dait perajahin napi artine ayat Kitab Suci niki: 'Tiang mẽlẽ belas kasihan, ndẽqne kurban binatang'. Sẽngaq Tiang dateng ndẽqne jari ngempoh dengan-dengan saq nganggep diriqne sampun kenaq, laguq dengan-dengan saq bedose."

¹⁴ Sesampun nike, pengiring-pengiring Yahya parek metakẽn tipaq Deside Isa, "Kembẽq tiang pade dait dengan-dengan Parisi puase, laguq pengiring-pengiring Pelungguh nẽnten?"

¹⁵ Jawab Deside Isa lẽq ie pade, "Segerah temuẽ-temuẽ lẽq gawẽ ngawinang asẽq angenne lamun pengantẽn mame masih araq bareng ie pade? Pasti ndẽq! Laguq gen dateng waktune pengantẽn mame nike gen tebait lẽman ie pade. Lẽq waktu nike baruq ie pade puase.

¹⁶ Ndẽq araq dengan nampel kelambi saq sampun lotoh kadu bakal saq masih baru. Sẽngaq bakal saq jari penampel nike gen keset, dait gen miaq sayan belẽq roẽk kelambi nike.

¹⁷ Maraq nike ẽndah ndẽq araq dengan saq ngisiq anggur saq masih baru lẽq dalem kantong lẽndong saq sampun lebung. Sẽngaq kantong nike gen bedah dait sẽde, terus aiq anggur nike gen tumpah. Anggur saq masih baru harus teisiq lẽq dalem kantong saq baru ẽndah, adẽq deduaqne tetep solah."

¹⁸ Lẽq waktu Deside Isa bebaos kance pengiring-pengiring Yahya, parek sopoq kepale balẽ ibadah. Ie sujut lẽq arepan Deside Isa terus matur, "Anak tiang saq nine baruq gati milinang. Laguq tunas Pelungguh rauh dait jamah ie, make ie gen idup malik."

¹⁹ Deside Isa ngadeg teiring siq pengiring-pengiring-Ne terus lumbar kance dengan nike.

²⁰ Lẽq tengaq langan araq sopoq dengan nine saq sakit pendarahan sampun due olas taun ngonẽqne, ngerapetin Deside Isa lẽman mudi. Pikirne, "Asal tiang kintur jubah-Ne, tiang gen selah." Beterus ie kintur poton jubah Deside Isa.

²¹ (9:20)

²² Waktu nike ẽndah Deside Isa nyereminang andang mudi dait cingakin dengan nine nike beterus bemanik, "Teguqang angende, anak Tiang, imande sampun miaq side selah!" Lẽq waktu nike ẽndah dengan nine nike selah.

²³ Beterus Deside Isa rauh lẽq gedẽng kepale balẽ ibadah nike. Sewaktu Deside Isa cingakin dengan-dengan saq nabuh gending kematẽan dait luwẽq dengan uyut lẽq derike,

²⁴ Deside Isa bemanik lẽq ie pade, "Sugul side pade selapuq! Kanak niki ndẽq milinang, ie cume tindoq." Deside Isa tekelelẽqang siq ie pade selapuq.

²⁵ Sesampun dengan-dengan nike sugul, Deside Isa tame ojok dalem kamar kanak nike, dait negel imene. Beterus langsung kanak nine nike ures.

²⁶ Kabar nike jari nyebar ojok selapuq daẽrah nike.

²⁷ Deside Isa lumbar lẽman taoq nike. Lẽq tengaq langan araq due dengan bute milu ngiring Deside Isa. Ie pade bekuih-kuih, "Keturunan Daud! Periakang tiang pade!"

²⁸ Sesampun Deside Isa tame ojok dalem gedẽng, kedue dengan bute nike parek ojok Deside Isa. Deside Isa bemanik lẽq ie pade, "Napi side pade percaye bahwe Tiang bau nyelahang side pade?" "Percaye Junjungan Saq Mulie!" Jawab ie pade.

²⁹ Beterus Deside Isa jamah penenteng ie pade dait bemanik, "Lantaran imande, make telaksane napi saq side pade harepang."

³⁰ Make ie pade tao nyerioq. Ie pade tepajar siq Deside Isa adẽqne ndẽq bebadaq lẽq sai-sai mengenai hal nike.

³¹ Laguq ie pade lumbar dait nyiarang kabar mengenai Deside Isa ojok selapuq daẽrah nike.

³² Baruq gati kedue dengan bute nike lumbar, sopoq dengan pakoq saq tekuasein siq roh jahat tejauq parek tipaq Deside Isa.

³³ Deside Isa sediq roh jahat nike dait lẽq waktu nike ẽndah dengan nike tao ngeraos malik. Dengan luwẽq nike bengaq, dait bebase, "Ndẽq uwah tiang pade serioq peristiwe saq maraq niki lẽq Israel!"

³⁴ Laguq dengan-dengan Parisi bebase, "Datune sẽtan saq ngebẽng Ie kuase jari sediq sẽtan-sẽtan nike."

³⁵ Beterus Deside Isa lumbar lẽman sopoq kote ojok kote saq lain dait lẽman sopoq kampung ojok kampung saq lain; Ie ngajahang lẽq balẽ-balẽ ibadah dait nyampẽang Kabar Solah mengenai Kerajaan Sorge. Deside Isa nyelahang dengan-dengan saq ngidap segale macem penyakit dait saq awakne cacat.

³⁶ Sewaktu Deside Isa cingakin dengan luwẽq nike, Ie jari periak lẽq ie pade, sẽngaq ie pade lelah dait ndẽq araq saq perhatiang, maraq dombe saq ndẽq bedowẽ pengarat.

³⁷ Beterus Deside Isa bemanik lẽq pengiring-pengiring-Ne, "Saq tepataq mule luwẽq, laguq tukang pataqne cume sekediq.

³⁸ Keranaq nike tunas lẽq ~Epẽne adẽq Ie ngirim tukang pataq jari mataq."

Matius

Video Matius 9

Ikuti Kami:

KONTAK | PARTISIPASI | DONASI