Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kayaika 'ikinitara de 'o 'imam ma saeke yoodumu de 'o Yahudioka manga balu-balusu yomatoomu 'o butusangi yodiai ma ngale 'o Yesus wito'oma.

² 'Ona wipusuku de wi'asa wisisarakani 'o Pilatusika 'o Romaka manga sangaji.

³ 'O Yudas gee 'o Yesus wisisa-sarakani wolega-lega 'ena 'o hukumani 'iotaokau 'o Yesusuku, de womatoduba so 'o pipi 'o saaka 'o nagi sa'ange wosigilio 'o 'imam ma sae-saekika de 'o Yahudioka manga balu-balusika.

⁴ 'Una wongose, "Ngoi tosowonokau. Ngoi towiwukunu 'una gee wi sala koi'iwa, sigado wihukumu wiso-songene!" Ma 'ona yongose, "Ngomi komianakowa ge'ena! Ge'ena to ngona ni 'urusangi."

⁵ Ma pipi ge'ena 'o Yudas wa'umo ma Jou wi Woa ma dodaku, de wotagiokau womasidele.

⁶ 'O pipi ge'ena 'o 'imam ma saeke yatoomu de yongose, "'O pipi ne'ena 'o 'aunu ma pipi. Moteke 'o 'agama ma 'atorangi, 'o pipi ne'ena koidadiwa 'isingosama 'o sadakaa ma ngiiku ma Jou wi Woaka."

⁷ Ge'enaka de yomaka'aturokasi 'asa de ma pipi ge'ena 'o tonaka yosi'ija, gee yosironga 'o Boso yodi-diai manga Tonaka. 'O tonaka ge'ena yadiai 'o nyawa ma dudunino yakido-dobo'osuku.

⁸ Ge'enau so 'o tonaka ge'ena sigado ne'ena yosironga, "'O 'Aunu ma Tonaka."

⁹ De ge'enau, 'idadiokau 'isoka 'okia naga Nabii Yeremia wosidemokau 'ato: "'Ona ya'ese 'o pipi 'o saaka 'o nagi sa'ange, ge'ena 'o Israeloka yomodekokau yofangu to 'una wi 'ija.

¹⁰ De ma pipi ge'ena yosi'ija 'o boso yodi-diai manga tonaka, 'isoka gee ma Jo'oungu ma Dutu wosulokokau ngoino."

¹¹ Ge'enaka de 'o Yesus wotaari 'o Pilatusika, ma gubernur ge'ena ma daeraaka gee, de 'o Pilatus wosano, "Ngona ne'ena 'o Yahudioka manga Koana?" 'O Yesus wosango, "Ia, 'isoka to ngona 'ani demo."

¹² Ma gedagee 'o 'imam ma sae-saeke de 'o Yahudioka manga balu-balusu wikalaki 'ikudai, de 'una kowosangowau.

¹³ Sababu ge'ena 'o Pilatus wongose, "Kono'isenuwa nikalaki ge'ena ma gudai?"

¹⁴ Ma 'o Yesus kowosangowa ka ma eta ma, so ma gubernur gu'una woherangi ma sala.

¹⁵ 'O taunu 'isinoi-noimi gee Wakisisupu ma Wange ma rame yodiai, ma gubernur 'o Pilatus biasa wosisupu 'o bui ma nyawa moi moteke 'o kawasa yoiriki.

¹⁶ Ma 'orasi ge'ena wobui-buika wimoi gee wikokinako-nakokau sababu 'o dorou wodi-diai, 'awi ronga 'o Yesus Barabas.

¹⁷ Gedagee 'o kawasa yomakokitoomuno de 'o Pilatus kawongosekau, "Ngini niomau nagu'una towisisupu nginika? 'O Yesus Barabas bolo 'o Yesus gee wisironga ma Kristus?"

¹⁸ 'O Pilatus wongose koge'ena sababu 'una wanako 'ona wisisarakani ma ngale witaleana.

¹⁹ Ma 'orasi 'o Pilatus wogogeruku wosi'adi-'adili ma ngiioka, de ma wekata mobesesongo konee, "Tanu 'uwa wonido'oanikia 'o nyawa gee wi sala koi'iwa. Sababu ma ngale 'una ngoi 'ai naneroka 'imodongo ma sala kangano ne'ena."

²⁰ Ma 'o 'imam ma sae-saeke de 'o Yahudioka manga balu-balusu koyomaogoruwa yosisau-sauku 'o kawasaka go'ona la yoga'asoko 'o Pilatusika 'ato 'o Barabas wisisupu de 'o Yesus wihukumu wiso-songene.

²¹ Ge'enaka de ma sangaji gu'una wosanoli 'onaka, "'O nyawa yamididi no'ona, ka 'una towisisupu nginika?" 'Ona yosango, "'O Barabas."

²² 'O Pilatus wongose 'onaka, "Nako koge'ena, kokia todiai 'o Yesusika gee wisironga ma Kristus?" 'Ona yoodumu yosango, "Powisidele 'o salipoka!"

²³ 'O Pilatus wosano, "Ma ka'ena wadiai gee 'ito-torou?" Ge'enaka de 'ona yosigasoko 'ifoloiosi 'iamokie, "Powisidele 'o salipoka!"

²⁴ 'O Pilatus wamaoku kowomado-do'oawau, de yoku-kudai go'ona wiridutukou, so 'o 'akere wa'ese de yoku-kudai manga bionoka de wi giama wa'isoko de wongose, "Ngoi kotomadomokuwa 'o nyawa nu'una wi songene. Ge'ena ngini nimadomoku."

²⁵ Yoku-kudai go'ona yoodumu yosango, "Ia, ngaro ngomi de mia ngowa-ngowaka 'asa miamoku wi songene ma hukumani ge'ena!"

²⁶ Ge'enaka de 'o Pilatus 'o Barabas wisisupu 'onaka, de wosuloko 'o Yesus wipa'asana de wisisarakani 'onaka la wisidele 'o salipoka.

²⁷ Ge'enaka de 'o Pilatus wi solodado 'o Yesus wi'asa ma gubernur wi gogerika, de 'o solodado yoodumu yomatoomu wisigilolitino.

²⁸ 'Ona yaawene 'o Yesus wi baju so yositagali 'o baju gee ya'ungu-'ungu.

²⁹ 'Ona yodiai 'o tuala ngai moi 'o da'ara 'ido-dodowoko, de yosinoa 'o Yesus wi saeuku. Ge'enaka de 'o papadi ngai moi wi giama ma ginirakoka yokulaka de wi bionoka yobukuku de wisisasaru yongose, "Suba Jou, 'o Yahudioka manga Koana!"

³⁰ 'Ona wikibiti de 'o papadi ge'ena ya'ese so yosipesana wi mumuuku.

³¹ Gedagee wisisasaru 'iduanga, de 'o baju ge'ena yaawene so wisinoali gee to 'una. Ge'enaka de 'una wi'asa 'o kota ma dudunika ma ngale wisidele 'o salipoka.

³² 'O ngekomo ma goronaka, de yomakamake de 'o Kirene ma nyawa wimoi wi ronga 'o Simon. 'O solodado go'ona wigegoto wamoku 'o Yesus wi salip.

³³ Gee ya'adono 'o ngii moi ma ronga 'o Golgota, ma ngale, "'O Saeke ma Kobongo ma Ngii."

³⁴ Ge'enaka dau de 'o Yesus wisi'okere 'o 'anggur gee 'o haewani ma miringi yosiganuku. Ma 'o 'anggur ge'ena watailoka de waolukou.

³⁵ Ge'enaka de 'o solodado go'ona wisidele 'o salipoka, de wi baju yomasibula-bula yodu'undi.

³⁶ Ge'ena 'ipasa de 'ona yogogerieu ge'enaka wilega-lega.

³⁷ 'Awi saeke ma dekude 'isilefoka kokia naga 'una wikalaki gee, ge'ena la, "Nu'una 'o Yesus, 'o Yahudioka manga Koana."

³⁸ Yamididi 'o dorou yodi-diai mita yakisidisidele 'o salipoka de 'o Yesus, wimoi wi giniraoka, de wimoi wi gubalioka.

³⁹ 'O nyawa gee yotoaka ge'enano kayomagiwi-giwi wisiti-tingoono 'o Yesus.

⁴⁰ Yongose 'ato, "Ngonau ne'ena nomau ma Jou wi Woa natotaka de nosigokoli ka 'o wange sa'ange ma dodaka! Nako ngona ma gou-goungu ma Jo'oungu ma Dutu wi Ngowaka, bika no'uti 'o salipoka de ngona ma sirete nomasilaha!"

⁴¹ Koge'enali mita 'o 'imam ma sae-saeke de 'o Yahudioka manga 'agamaka yodoto-dotoko, de mita 'o Yahudioka manga balu-balusu, 'o Yesus wisiti-tingoono. 'Ona yongose,

⁴² "'O nyawa 'iregu wakisilaha, 'ena momongo 'una ma sirete koidadiwa womasilaha! Nako 'una 'o Israeloka manga Koana de yaowa ma 'orasi ne'ena wo'uti 'o salipioka, 'asa de ngomi miongaku 'unaka.

⁴³ 'Una wongaku ma Jo'oungu ma Dutuka. So bika dua wisilahaka. Sababu 'una wongose 'ato 'una ge'ena ma Jo'oungu ma Dutu wi Ngowaka."

⁴⁴ Yo'ora-'ora gee yakisidi-disidele de 'o Yesus, 'ona mita koge'enali yositi-tingoono 'o Yesusika.

⁴⁵ 'O wange 'ikoronako, de ma daeraa ge'ena 'itarusu ka ma moiku ma do'ingo 'o takoro sa'ange.

⁴⁶ 'O takoro sa'ange de 'o Yesus wopoaka womasigasoko ma Deaka, "'Eli, 'Eli, lama sabatani!" ma ngale, "Jo'oungu ma Dutu, Jo'oungu ma Dutu, 'ido'oa so noimadaka?"

⁴⁷ Yamuruo naga ge'enaka gee yo'isene wi 'ilingi de kayongosekau, "Ee! 'O Elia wi'asoko!"

⁴⁸ Wimoi ge'enaka dau wosijai-jai 'o spons wa'ese de wositubuku 'o daluku 'icuka-cukaku, ge'enaka de 'o gotaka wosisagatuku de widotobe 'o Yesus wi 'uru ma kaide la bari wa'okere.

⁴⁹ Ma munuka yongose, "'Uwasi! Nou, polega-lega bika dua 'o Elia woboa wisilaha!"

⁵⁰ Ge'enaka de 'o Yesus womapoakoli waamo-amokie de wi ngomasa 'ipidili.

⁵¹ Ge'enaka de ma Jo'oungu ma Dutu ma sirete 'awi Ngii ma da-datoko 'iside-sideluku ma 'iracanga 'itaga modidioka kadaku de 'isikauku, de 'o 'osu de 'o gigie 'iteto-teto 'ikapelaka.

⁵² 'O bo'osuku 'ikokipelenga, de manga gudai ma Jo'oungu ma Dutu wi kawasa yosonge-songenokau wakisimomiki, de yamada manga bo'osuku.

⁵³ Gedagee 'o Yesus womomioka de yowosanga 'o Yerusalemuka so manga gudai yakimake.

⁵⁴ 'O solodado ma balusu de ma solodado gee 'o Yesus wijaga-jagano yosawanoka gee yamake 'o 'osu de 'okia naga gee 'ikokidadi. 'Ona yongose, "Ma gou-goungu nu'una ge'ena ma Jo'oungu ma Dutu wi Ngowaka."

⁵⁵ Ge'enaka mita manga gudai 'o nge-ngeweka yolega-lega 'o gurutika. 'Ona ge'ena gee 'o Yesus wimote-moteke de wiriwo-riwo ka 'o Galileakasi de 'isikaino.

⁵⁶ Ge'ena la ngo Maria Magdalena de ngo Maria 'o Yakobus de 'o Yusuf manga 'esa, de mita 'o Zebedeus wi ngowa-ngowaka manga 'esa.

⁵⁷ 'Iobirou de 'o Arimateano wokaya-kaya wimoi waino wi ronga 'o Yusuf. 'Una mita 'o Yesus wimote-moteke.

⁵⁸ 'Una wotagi 'o Pilatusika, woga'asoko 'o Yesus 'awi songene. Ge'enaka de 'o Pilatus wosuloko 'o Yesus 'awi songene yosiguti la yokula 'o Yusufika.

⁵⁹ Ge'enaka de 'o Yusuf wa'ese 'o maieti ge'ena de wosisao de 'o mosa 'i'are-'arese de 'i'alu-'alusu de 'itebi-tebini.

⁶⁰ Ge'enaka de 'o maieti ge'ena wapo'osuku to 'una ma sirete wi bo'osuku ma sungika, gee wa'aruika 'o teto ma dodaka. Ge'enaka de 'o teto 'iamo-amoko moi wodololoika de wotagiokau.

⁶¹ 'Ena ngo Maria Magdalenano de ngo Maria 'iregu, ge'enaka yogogerie ma bo'osuku yodaarika.

⁶² Ma bibinoka 'o Yahudioka Pomaoma-omasa ma Wangeka, 'o 'imam ma sae-saeke de 'o Farisioka yotagi 'o Pilatusika,

⁶³ de yongose, "Jou, ngomi kamiongano-nganonosi gee wotabaeluku kawowango-wangosi, 'una wongosekau, 'Dua 'o wange sa'angeka 'asa ngoi tomomiki 'o songenoka.'

⁶⁴ Sababu ge'ena nosuloko la 'o bo'osuku ge'ena yojaga yosidi-diai sigado 'o wange sa'ange, la 'uwa sigado 'awi do-domoteke yatosiki 'awi maieti ge'ena de yongose 'o nyawa-nyawaka 'ato, ''Una womomiokau 'o songenino.' De manga ngeluku ma du-du'uruoka ne'ena dua 'ifoloiosi 'itorou de gee ma si-siraka."

⁶⁵ 'O Pilatus wongose, "To ngini nia jo-jaga de ma 'ena so tagi niakisuloko la yojaga yosidi-diai!"

⁶⁶ Ge'enaka de 'ona yotagi 'o bo'osuika de yano-nakokau 'o tetoka gee ma bo'osuku ma da-datoko ge'ena de yojaganou.

Matius

Video Matius 27

Ikuti Kami:

KONTAK | PARTISIPASI | DONASI