Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba zahulõ wongi sibai lahalõ gangetula ira ere sebua awõ zatua mbanua niha Yahudi fefu ba wamunu Yesu.
2 Labõbõ Ia ba la'ohe khõ Wilato, hõgõ zamatõrõ ba gamatõrõw̃a Roma.
3 Me i'ila Yuda si manga mbõli andrõ no la'etu'õ huku Yesu, ifuli maniasa dõdõnia. Mõi ia mufuli gefe firõ si tõlu ngafulu andrõ khõ ndra ere sebua ba khõ ndra salaw̃a niha Yahudi.
4 Imane, "No ufazõkhi horõ ba wemanga bõli niha si lõ sala, irege lahuku Ia huku famunu!" Lamane wanema linia, "Hadia ndra'aga ba da'õ? Balibaliu sa'ae!"
5 Ifazaumba gefe andrõ Yuda ba Nomo Zo'aya, aefa da'õ mõi ia mutaw̃i mbaginia.
6 Lahalõ gefe andrõ ira ere sebua lamane, "Bõli ndro da'e. Molo'õ huku agama, tebai labe'e gefe andre ba naha game'ela ba Nomo Zo'aya."
7 Me no ha sara dõdõra, lafake gefe andrõ ba wowõli tanõ sotõi Tanõ Zamõzi Bowoa. La'oguna'õ danõ andrõ nahia lewatõ niha sikoli.
8 Da'õ mbõrõ wa irugi ma'õkhõ lafotõi danõ andrõ, "Tanõ Do".
9 Ba zi manõ alua niw̃a'õ Yeremia sama'ele'õ, imane, "Latema tõlu ngafulu gefe firõ, bõli-Nia nifatõni soi Gizera'eli.
10 Ba la'oguna'õ gefe andrõ ba wowõli tanõ Zamõzi Bowoa, si mane niw̃a'õ Lowalangi khõgu."
11 Me mõi Yesu fõna Filato, hõgõ zamatõrõ ba danõ andrõ, isofu khõ-Nia Filato, "Hadia razo niha Yahudi Ndra'ugõ?" Imane wanema li Yesu, "Si manõ wanguma'õu."
12 Ba oya labe'e wangadu ira ere sebua awõ zatua niha Yahudi sanandrõsa khõ Yesu, ba ma'ifu lõ Itema lira Yesu.
13 Bõrõ da'õ isofu khõ-Nia Filato, "Hadia lõ Õrongo wangadugõra Ya'ugõ?"
14 Ma'ifu lõ itema li Yesu, irege ahõlihõli dõdõ Filato.
15 Ero'ero Owasa Fasa, si to'õlõnia i'efa'õ hõgõ zamatõrõ samõsa nikuru somasi niha sato.
16 Ba ginõtõ andrõ so samõsa nikuru, safaito sibai, sotõi Yesu Baraba.
17 Ba me no owulo niha sato, isofu khõra Filato, "Haniha zomasi ami u'efa'õ khõmi? Yesu Baraba ma zui Yesu andrõ nifotõi Keriso?"
18 Imanõ wehede Filato bõrõ me i'ila wa bõrõ wa'afõkhõ dõdõra wa labe'e Yesu ba dangania ira salaw̃a mbanua niha Yahudi.
19 Me mudadao Wilato ba dadaoma wanguhuku, ifa'ohe'õ khõnia goroisa fo'omonia wanguma'õ, "Bõi babaya niha si lõ sala andrõ. No mangifi ndra'o fangifi si hokha mbuda bõrõ Ia andrõ."
20 Ba lõ labato ira ere sebua awõ zalaw̃a niha Yahudi ba wamawe'e niha sato ena'õ la'andrõ aefa Mbaraba ba labunu Yesu.
21 Ifuli isofu zui khõra hõgõ zamatõrõ andrõ, "Ba gotalua zi darua andre haniha zomasi ami u'efa'õ?" Lamane, "Baraba!"
22 Itohugõ wanofu Filato, "Ba hadia nilaugu khõ Yesu andrõ nifotõi Keriso?" Lamane niha sato, "Forõfa Ia!"
23 Imane Filato, "Hadia nilau-Nia si lõ sõkhi?" La'ebua'õ lira we'ao lamane, "Forõfa Ia!"
24 I'ila Filato wa tebai ilau hadia ia sa'ae, bõrõ me tola manõ kaliru niha sato andrõ. Bõrõ da'õ, ihalõ nidanõ fõna niha sato, isasai dangania ba imane, "Aefa ba hulugu wa'amate niha andre! Dali ami hemiwisa!"
25 Latema linia niha sato andrõ lamane, "Akha malu'i awõ ndraonoma huku ba wa'amate-Nia!"
26 Ba i'efa'õ Filato khõra Mbaraba, awõ wa ifabõzi'õ Yesu, ba ibe'e niforõfa!
27 Aefa da'õ la'ohe Yesu ira saradadu Filato we'amõi ba gõdo zamatõrõ, owulo ndra saradadu, lafasui Yesu.
28 Laheta nukha Yesu, labe'e khõ-Nia mbaru sobowo doru.
29 Lafazõkhi dakula moroi ba ndroi, labe'e ba hõgõ Yesu. Aefa da'õ labe'e zi'o ba danga-Nia, latuhi danõ fõna-Nia ba la'o'aya Ia lamane, "Ya'ahowu Razo Niha Yahudi!"
30 Ba ladidiloi Ia, lahalõ zi'o ba lahare'õ ba hõgõ-Nia.
31 Me no aefa la'o'aya Ia, laheta khõ-Nia mbaru sobowo doru andrõ ba lafuli lafobaru Ia nukha-Nia. Aefa da'õ la'ohe Ia baero ba wamorõfa.
32 Me larugi dalu lala falukha ira Zimoni banua Girene. Lafaso Zimoni wolohe rõfa Yesu.
33 Larugi nahia sotõi Gologota, eluahania, "Nahia zole hõgõ."
34 Ba da'õ lafabadugõ khõ Yesu nagu nifaruka awõkhu. Ba me no isifi nagu andrõ Yesu, lõ edõna Ia Ibadu.
35 Aefa da'õ laforõfa Ia, ba lalau fadahõdahõ ba wamaosa nukha-Nia.
36 Ba dumadao ira ba wanaro Ya'ia ba da'õ.
37 Tanõ yaw̃a ba hõgõ-Nia no lasura wangadura khõ-Nia. Si mane nisura andrõ, "Yesu da'e, Razo Niha Yahudi!"
38 Si fao khõ Yesu gõi, darua zorabu niforõfa, samõsa ba gambõlõ-Nia ba samõsa ba gabera-Nia.
39 Ba lafalikhõlikhõ ira niha sanõrõ lala da'õ ba la'o'aya Yesu.
40 Lamane khõ-Nia, "He, Ya'ugõ somasi manudugõ Omo Lowalangi, ba sangotomosi ya'ia ba zi tõlu ngaluo! Na Ono Lowalangi Ndra'ugõ, orifi'Õ! Ae'e tou moroi ba rõfa andrõ!"
41 La'o'aya gõi Yesu ira ere sebua awõ zalaw̃a niha Yahudi. Lamane khõ-Nia.
42 "I'orifi niha bõ'õ, ba tebai I'orifi Ia! Hadia, tenga Razo niha Gizera'eli Ia? Na si manõ, sõkhi na mõi Ia tou moroi ba rõfa andrõ, awena faduhu dõdõma khõ-Nia.
43 Faduhu dõdõ-Nia khõ Lowalangi, awõ wa Imane Ono Lowalangi Ia. Da tafaigi, hadia mõi Lowalangi, ba wangefa'õ Ya'ia."
44 La'o'aya gõi Ia ira sorabu niforõfa awõ-Nia andrõ.
45 Me laluo, mato tõlu za wa'ara, ba ogõmigõmi danõ ma'asagõrõ.
46 Ba me bõzi tõlu tanõ owi, mu'ao Yesu ebua li-Nia imane, "Eli, Eli, Lama Sabakhtani?" eluahania, "He Lowalangi-Gu, he Lowalangi-Gu, hana wa Õrõi Ndra'o?"
47 Ba lamane õsa niha si so ba da'õ me larongo we'ao da'õ, "Ikaoni Gelia!"
48 Fagohi samõsa ba gotaluara, ihalõ rabo, ifo'õsi agu saisõ. Ituwu ba mbalõ geu, ifabadugõ khõ Yesu.
49 Lamane niha bõ'õ, "Bõi ua! Da tafaigi hadia mõi Gelia ba wangorifi Ya'ia!"
50 Ifuli mu'ao Yesu ebua li-Nia, ba aefa da'õ aetu noso-Nia.
51 Ba hiza, asika mba'aba'a si so ba Nomo Zo'aya, fabali i'otarai si yaw̃a irugi si tou. Moduru danõ ba oi fabali gara ba hili.
52 Teboka lewatõ, ba ato mbanua Lowalangi si no mate, ifuli auri.
53 Ba me no maoso Yesu moroi ba wa'amate, mõi ira baero moroi ba lewatõ, numalõ ba Yerusalema. Ba ato niha ba da'õ sangila ya'ira.
54 Ata'u sibai ndra samatõrõ andrõ awõ zaradadu sanaro Yesu me la'ila ndruru danõ awõ zalua fefu. Lamane, "Sindruhu Ono Lowalangi Ia!"
55 Ato ndra alawe sangila da'õ moroi ba zarõu. Ya'ira andrõ ira alawe solo'õ Yesu i'otarai Galilea ba wanolo Ya'ia.
56 Ba gotaluara so Maria Magadala, Maria ina Yakobo ba Yosefo awõ nina ndraono Zebedai'o.
57 Bongi da'õ, tohare samõsa niha si kayo moroi ba mbanua Garimatea. Yosefo dõinia. Solo'õ khõ Yesu ia gõi.
58 Mõi ia khõ Wilato, ba wangandrõ boto Yesu. Iw̃a'õ Filato ena'õ labe'e khõnia mboto Yesu.
59 Ihalõ mboto Yesu Yosefo, i'olohuni nukha si sõkhi.
60 Ibe'e mboto Yesu andrõ ba lewatõ si bohou khõnia nifakhao'õ ba gara. Aefa da'õ ifagaõlõ gowe sebua ba wondruhõ bawa lewatõ, ba mofanõ ia.
61 Ba so ba da'õ Maria Magadala ba Maria si samõsa andrõ, no dumadao ira ba gamaudu lewatõ.
62 Mahemolu õ, me no aefa luo Zumaha, mõi khõ Wilato ndra ere sebua awõ ndra Farizai'o.
63 Lamane, "He Tuha, awena itõrõ tõdõma wa me auri nasa zamaelungu andrõ, no irai Iw̃a'õ, 'Maoso Ndra'o dania ba ngaluo si tõlu.'
64 Bõrõ da'õ, fatenge zanaro ba lewatõ andrõ irugi zi tõlu ngaluo. Na lõ si manõ, mõi ndra nifahaõ-Nia dania wanagõ boto-Nia, ba law̃aõ ba niha wa no ifuli maoso Ia. Ba abõlõ lõ sõkhi wamaelungu safuria andre moroi ba zi fõfõna."
65 Imane khõra Filato, "Mihalõ zaradadu sanaro, ba mi'ae'e mihaogõ wanaro lewatõ andrõ."
66 Ba mõi ira ba lewatõ, lafotandro gowe lewatõ andrõ, labe'e zanaro fõnania, ena'õ lõ sombambaya lewatõ andrõ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA