Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu Deside Isa sugul lẽman Gedẽng Allah, pengiring-pengiring-Ne parek tipaq Ie, dait nijoqang bangunan-bangunan Gedẽng Allah nike.

² Deside Isa bemanik lẽq ie pade, "Napi side pade serioq selapuqne nike? Tiang badaq side: Setetune ndẽq araq sopoq juaq batu lẽq bangunan-bangunan nike saq masih beronjoq maraq bẽngan. Selapuqne gen terobohang."

³ Beterus Deside Isa lumbar ojok Bukit Zaitun, dait waktu Ie kenyeke melinggih, pengiring-pengiring-Ne secare husus parek tipaq Ie jari matur. Ie pade matur lẽq Deside Isa, "Silaq Pelungguh, sampẽang lẽq tiang pade piran selapuqne nike gen telaksane dait napi saq jari tande-tande kerauhan Pelungguh dait ahir jaman?"

⁴ Jawab Deside Isa, "Pade waspade, ndaq side pade jangke tetipu.

⁵ Sẽngaq luwẽq dengan gen dateng kadu aran Tiang dait bebase, 'Tiang niki Almasih!' Ie pade gen miaq luwẽq dengan jari sesat.

⁶ Side pade gen dengah suare-suare perang dait berite-berite mengenai perang, laguq ndaq takut. Sẽngaq hal-hal nike harus telaksane, laguq hal nike ndẽq berarti bahwe sampun wayene kiamat.

⁷ Bangse saq sopoq gen perang ngelawan bangse saq lain, dait negare saq sopoq gen nyerbu negare saq lain. Lẽq mbẽ-mbẽ gen araq bahle kelapahan dait lindur.

⁸ Selapuqne nike baruq awal penderitean sendẽqman dateng jaman saq baru.

⁹ Beterus side pade gen tebau dait teserahang jari tesiksaq dait tematẽq. Seantẽro dunie gen meriq lẽq side pade sẽngaq side pade jari pengiring Tiang.

¹⁰ Lẽq waktu nike, luwẽq dengan gen murtat, saling hianat dait saling meriqang sopoq kance saq lain.

¹¹ Luwẽq gen dateng nabi-nabi palsu dait ie pade gen miaq dengan luwẽq jari sesat.

¹² Kejahatan gen jari sayan luwẽq jangke luwẽq dengan engkah ngasihin Allah dait sepade manusie.

¹³ Laguq dengan saq tahen jangke penutuqne, gen teselametang.

¹⁴ Dait Kabar Solah mengenai Kerajaan Allah gen tekabarang ojok seantẽro dunie, adẽq selapuq dengan dengah hal nike. Sesampun nike baruq kiamat nike dateng."

¹⁵ "Side pade gen serioq berembẽ 'Perbuatan najis saq miaq binase', maraq saq tesampẽang siq Nabi Daniel, nganjeng lẽq taoq saq suci (hal niki saq harus teperhatiang siq dengan saq mace).

¹⁶ Lẽq waktu nike dengan-dengan saq araq lẽq Yudea harus pelai ojok pegunungan.

¹⁷ Dengan saq araq lẽq atas atep balẽ, ndaq turun ojok dalem balẽne bait napi juaq.

¹⁸ Dengan saq kenyeke araq lẽq lendangne, ndaq tulak bait jubahne.

¹⁹ Celake inaq-inaq saq kenyeke betian, atao inaq-inaq saq masih penyusuq bebẽaqne lẽq waktu nike!

²⁰ Pade bedo'e adẽq ndaq jangke side harus pelai lẽq musim telih atao lẽq jelo Sabat!

²¹ Lẽq jelo-jelo saq luwẽq sengsare nike, gen araq kesusahan belẽq maraq saq ndẽq uwah araq lẽman dunie tecipteang jangke mangkin niki, dait ndẽq gen araq malik.

²² Seandẽne Allah nẽnten pesingket waktune; make ndẽq araq sopoq dengan juaq saq selamet. Laguq lantaran dengan-dengan saq sampun tepilẽq siq Allah nike, make Ie pesingket waktune.

²³ Lẽq waktu nike, lamun araq dengan badaq side, 'Pade serioq, Almasih nike araq lẽq deriki!' atao 'Ie araq lẽq derike!' -- ndaq gati percaye lẽq dengan nike.

²⁴ Sẽngaq almasih-almasih palsu dait nabi-nabi palsu gen dateng. Ie pade gen miaq tande-tande saq luar biase dait macem-macem muqjizat jari nipu, lamun bau dengan-dengan saq sampun tepilẽq siq Allah ẽndah.

²⁵ Jari, pade inget! Tiang sampun juluan badaq hal nike lẽq side pade sendẽqman hal nike telaksane.

²⁶ Lamun dengan bebase lẽq side, 'Serioq, Ie araq lẽq derike lẽq padang gurun!' -- ndaq side pade lumbar ojok derike. Atao lamun ie pade bebase, 'Serioq, Ie araq lẽq dalem kamar niki!' -- ndaq percaye.

²⁷ Sẽngaq kerauhan Bije Manusie maraq cahaye kisap saq ngempor lẽman timuq jangke dateng bat.

²⁸ Lẽq mbẽ araq bangkẽ, lẽq derike araq kedit saq girang ngaken bangkẽ."

²⁹ "Ndẽq ngonẽq sesampun mase kesusahan nike, sinar jelo gen jari peteng, dait bulan ndẽq becahaye. Bintang-bintang gen geriq lẽman langit, dait selapuq kuase saq araq lẽq langit jari biur lantur.

³⁰ Sesampun nike, tande Bije Manusie gen penggitan lẽq langit. Lẽq waktu nike selapuq bangse lẽq gumi gen nangis ẽroq asẽq. Ie pade serioq Bije Manusie rauh lẽq atas awan siq kuase dait kemuliean saq belẽq.

³¹ Terompẽt belẽq gen tepuniqang, dait Bije Manusie gen ngutus malaẽkat-malaẽkat-Ne ngumpulang dengan-dengan saq sampun Ie pilẽq lẽman keempat penjuru gumi, dait lẽman poton langit saq sopoq jangke poton langit saq lain."

³² "Pade bait perajahan lẽman lolo are. Lamun pẽmpang-pẽmpangne ijo dait odaq, terus mulai besuli, side pade gen nenaoq bahwe musim panas sampun rapet.

³³ Maraq nike ẽndah lamun side pade serioq hal-hal nike telaksane, side pade nenaoq bahwe waktune sampun rapet gati.

³⁴ Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne.

³⁵ Langit dait gumi gen musnah, laguq manik Tiang gen kekel selaẽq-laẽqne."

³⁶ "Ndẽq araq saq nenaoq piran jelone dait jamne, malaẽkat-malaẽkat lẽq sorge nẽnten wikan, Bije saq asalne lẽman Allah ẽndah nẽnten wikan, cume Bapa doang saq wikan.

³⁷ Lamun Bije Manusie rauh ẽraq, keadaanne pade maraq jaman Nuh laẽq.

³⁸ Lẽq jelo-jelo sendẽqman belabur belẽq nike, dengan-dengan bekelor, nginem dait merariq. Tetep maraq nike jangke waktune Nuh tame ojok dalem kapalne.

³⁹ Sewaktu ie pade selapuq tetimpe siq belabur nike, baruq ie pade sadar napi saq kenyeke ie pade alamin. Maraq nike ẽndah keadaanne ẽraq lamun Bije Manusie nike rauh.

⁴⁰ Lẽq waktu nike, lamun araq due dengan kenyeke begawẽan lẽq lendang: Saq sopoqne gen tejauq dait saq sopoqne malik teadẽqang.

⁴¹ Lamun due dengan nine kenyeke nujaq gandum: Saq sopoqne gen tejauq, dait saq sopoqne malik gen teadẽqang.

⁴² Jari, pade siep sedie, sẽngaq side pade ndẽq nenaoq piran Tuhande rauh.

⁴³ Ingetang hal niki! Lamun ẽpẽn balẽ nenaoq jam pire lẽq waktu kemalem maling gen dateng, pasti ie ndẽq gen mesarẽ adẽq maling nike ndẽq tame ojok balẽne.

⁴⁴ Keranaq nike, side pade ẽndah harus tetep siep sedie. Sẽngaq Bije Manusie gen rauh lẽq waktu saq side pade ndẽq badẽq."

⁴⁵ Deside Isa bemanik malik, "Lamun maraq nike, sai pelayan saq setie dait bijaksane, saq teangkat siq majikanne jari kepale tipaq pelayan-pelayan lain, adẽq ie ngebẽng ie pade bekelor lẽq waktune?

⁴⁶ Bahagie gati pelayan saq tedait kenyeke ngelaksaneang tugasne waktu majikanne tulak.

⁴⁷ Tiang badaq side: Setetune pelayan nike gen tesaduq siq majikanne jari jagaq selapuq dowẽne.

⁴⁸ Laguq lamun pelayan nike jahat, ie gen bebase lẽq dalem angenne,

⁴⁹ 'Majikan tiang masih ngonẽq tulak,' terus ie mulai ngempuk pelayan-pelayan saq lain, sesampun nike ie bekelor dait nginem kance dengan-dengan saq girang bowos.

⁵⁰ Beterus majikanne tulak lẽq jelo dait jam saq ndẽq ie badẽq.

⁵¹ Make pelayan nike gen tesiksaq jangke matẽ siq majikanne, terus tetetẽh ojok taoq dengan-dengan munapik. Ie pade gen nangis dait menderite lẽq derike."

Matius

Video Matius 24

Ikuti Kami:

KONTAK | PARTISIPASI | DONASI