Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nopaḷut makow nosingog kon natua, ki Yesus iḷumuai kom Baḷoi Tuhan, bo minayak. Murí-Nya mita namangoi bo notundú kom bangunan Baḷoi Tuhan tatua.
2 Ki Yesus nolibó ko'i monia, "Inontongdon monimu in nion komintan? Poguman-Kudon ko'i monimu, diábí tobatúmai im batu kon na'a im pomayak makow mo'itudu motompia kom batu ibanea. Tua komintan daitonbí u'uyon."
3 Wakutu ing ki Yesus ilimitú kon tudu im buḷud Zaitun, murí-Nya mita namangoidon ko'i-Nia bo mongonguman takin-Nya. Kai monia, "Pogumandon ko'inami, mongóto'onu intua komintan mobalí bo onu in tanda kong koángoian-Mu bo tanda ing kopaḷutan dunia na'a?"
4 Dá ki Yesus noguman ko'i monia, "Mokopo'ingat simbá diá ko'uboḷan intau im mo'ikow.
5 Sim mobayong in intau mamangoi bo momaké in tangoi-Ku bo mosia moguman, 'Aku'oi ing ki Mesias!' bo mosia na'a inta mokopopisí kom mobayong in intau dumudui kon soáḷ inta no'itaḷá.
6 Kodongogan monimu in tombá poparangan andeka habar mita moparang. Ta'e dika mo'ondok; sin tua komintan im mobalíbí tongá de'emanpabí singgainya.
7 Sim bangusa bo bangusa mosiparangan bo karaja'an moparang doman takin karaja'an. Mo'iangoi i wakutu kom bayongan intau kodaitan ing ka'anon bo linug kom bayongan tampat.
8 Tongá tua komintan im bagubí pomangkoian in roriga ko wakutu in diápa modapot in zaman inta mobagu.
9 Ko wakutu intua mo'ikow im poposarakan simbá roriga'an, bo mo'ikow in limodon bo saturuon im bayongan intau sim mo'ikow in dumodudui-Ku,
10 Bo moántó intau im momayow ko'i-Nakó bo mosia im mosiposarahkan bo poḷat mosisaturuan.
11 Moántó intau inta de'eman totu'u nabi im mamangoi bo motundú kon inta noitaḷá kom moántó intau.
12 Bo lantaran kodugang-kodungang in oáid mora'at, dá tabi kon tumpaḷa intau im modaitdon.
13 Tongá intau inta monahang modapot ing kopaḷutan tua, komintan mosia mosaḷamat.
14 Bo Habar Mopia kong ki Allah im mamangoi momarentah saḷaku Raja im popota'audon kom bayongan intau kon dunia na'a bo tua im mobalí kesaksian kom bayangan intau. Naonda intua komintan mobalí bain tua bo moíangoidon in singgai pangabisan."
15 "Mo'ikow i moko'ontongbí kon 'Intau inta totok im mora'at' sinimindog makow kon tampat inta mokudus, ná inta pinoguman i Nabi Daniel. (Paraḷu indoian in intau mita inta mobaca: tarukira totok im mangalenya!)
16 Dá intau mita inta kon Yudea mustibí moḷagui mopobayak im buḷud.
17 Intau inta kon tampat pobobarasanangan dona'aidon bui moponag bo mogamá kom pakakat mita kom bonu im baḷoinya,
18 Bo intau inta kong gobá dikadon sia mobui mogamá kom pakeangnya.
19 Moboditodon guyanga mita bobay inta sidia andeka inta koyogotpa nopotete in adí ko wakutu intua.
20 Posambayangdon, simbá wakutu i mo'ikow moḷagui de'eman kon sempo in tumping bo de'eman kon singgai in Sabat.
21 Sin ko wakutu intua koángoian in roriga totok, roriga tatua in diápa dodai onda nobalí pinangkoipamai dunia na'a pinomia nodapot masa in tana'a, bo roriga tatua in diá bidon bui mobalí.
22 Bo aka kuma bo wakutunya na'a bo diá impoḷokan, yo kom bayongan inta nobiag diábí im mosaḷamat; tongá lantaran intau mita inta sinokopilídon dá wakutu tatua inimpoḷokandon.
23 Ko wakutu intua aka oyúon intau moguman ko'i monimu, 'Indoiai, ki Mesias kon na'a!' andeka 'Ki Mesias kon tua!' -- dika mopirisaya i mo'ikow.
24 Sin oyúon im mongaku ki Mesias bo mongaku nabi ta'e mosia tua intaubí mongongakaḷ, tongá mosia im mogaid doman kon tanda mita inta moḷoben bo soáḷ mita inta mokoherang sahingga in aka mobalí, yo mosia imokoákaḷ doman kon intau mita inta aim pinilí.
25 Tarukira inta pinoguman-Ku muna ko'i monimu.
26 Aka intau moguman kómonimu, 'Indoiai, Sia tua kom Padang gurun!' -- dikabí mo'ikow mayak intua. Andeka, kai monia, 'Indoiai, Sia tua kom bonu in ruangan!' -- dikabí im mo'ikow mopirisaya.
27 Sin naonda bo kilat inta monindar nongkon dotá im pomuka'an singgai bo no'isindar nodapot kon dotá in toyopan singgai, natuadon doman in aka koángoian i Adí Intau.
28 Kon onda oyúon mahaḷuk minatoi, kon tua doman in ḷagapan mokoka'an kom mahaḷuk minatoi moyosipun."
29 "Naonda im mopaḷutdon roriga wakutu intua, yo mata in singgai mosindip bo buḷan diádon monindar, bo tundi mita im mongoḷabú nongkon ḷangit bo kawasa mita kom baḷangon mo'irangkap.
30 Ko wakutu intua ontongondon tanda Adí Intau kon ḷangit bo komintan intau kon dunia na'a mogamui bo mosia im moko'ontong kon Adí Intau tatua mamangoi mongin limonik ing goḷom kon ḷangit takin bayongan kawasa bo kamulia'an-Nya.
31 Bo Sia mopotabá kom malaekat-Nya mita ḷumuai bo mogirup kom bansí inta mopia totok in singognya sim mosia mosipun kon intau mita inta aindon pinilí-Nya nongkon popod mita in dunia bo nongkon popod in ḷangit toḷosi modapot popod in ḷangit toḷosi doman."
32 "Manangka intua yo indoiai i mangaḷe totundú inta nongkon porumpama'an pangkoi in ara. Aka tanganya bo ḷumukó bo momangkoidon momolimping, yo kota'auan monimu, kon diádon mo'onggot bo sempo im poninggai.
33 Ná doman tua aka mo'ikow bo moko'ontong kon na'a komintan, yo pokota'audon ko wakutunya diádon mo'onggot.
34 Poguman-Ku ko'i monimu! Tua komintan mobalídon ko wakutu intau mita masán na'a diápa matoi modait.
35 ¡angit bo butá im moyoyangbí, ta'e singog-Ku na'a im mononoibí."
36 "Tongá wakutu ing kobalían tua diábí tobatúmai intau nokota'au, umpakahbí malaekat kon soroga bo Adí, tongábí ki Amá kon soroga in nonota'au.
37 Sin ná inta nobalí kom masa i Nuh, yo natua doman im mobalí kom masa ing koángoian i Adí Intau.
38 Ko wakutu in diápa in ḷunud moḷoben namangoi, mosia nonga'an bo nonginum, nobuḷoi bo pinobuḷoi nodapot kon singgai ki Nuh sinumu'ot kom bonu ing kapaḷ;
39 Bo diábí kinota'auan monia onu inta nobalí, wakutu in ḷunud diápa noíangoi bo nomutú ko'i monia komintan. Natua doman im mobalí kom masa ing koángoian i Adí Intau.
40 Ko wakutu intua aka doyowa intau kong gobá, yo tobatú in diaan, tobatú in taḷáan;
41 Aka doyowa im bobay inta koyogot mogiling, yo tobatú in diaan, tobatú in taḷáan.
42 Manangka intua umuran kiḷuka-ḷukadmai, sin diábí kota'auan monimu mongo to'onu ing ki Tuhan mamangoi.
43 Tongá bá kota'auan monimu in nana'a: Aka kitogi baḷoi bo mokota'au kon to'onu im mononakow mamangoi, tantú moḷukadbí in sia, sin diábí pomayaknya makow baḷoinya tua im bongkaron.
44 Tuamai im mo'ikow umurandon pobasadia, sin Adí Intau mamangoi ko wakutu inta diá monimu sinangka-sangka."
45 Ki Yesus noguman, "Ki ine in simpaḷ inta mopia bo mopandoi, inta aindon inaidan i tuangnya itoi in simpaḷ ibanea, simbá sia mobogoi ing ka'anon ko wakutunya?
46 Yo kosanangdon totok in simpaḷ inta kinotambakan mangoi i tuangnya koyogot nogaid kon oáidannya tua, wakutu ing ki tuangnya nobuidon mangoi.
47 Poguman-Ku ko'i nimu; simpaḷ natua im balíonbí i tuangnya moḷoḷukad kom bayongan kapunya'annya.
48 Tongá aka simpaḷ mara'at inta mosingog kom bonu ing ginanya nana'a,
49 'Ki tuangku im mo'onggotpabí im mamangoi,' bo mulai in sia momongkug kon simpaḷ ibanea bo sia tongábí monginum bo monga'an moyotakin in intau mita nongoḷoḷangu,
50 Bo ki tuangnya namangoi kon singgai inta diá sinangka-sangkanya bo ko wakutu in diá kinota'auannya.
51 Bo totok im bino'ut i tuangnya bo pomia'anya náonda bo intau mita inta mongomunapik. Kon tuata kodongogan in amui bo rokokot in ingipon."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA