Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Irõi Nomo Zo'aya Yesu, ba la'ondrasi Ia ira nifahaõ-Nia, latuturu khõ-Nia domosa Nomo Zo'aya andrõ.
2 Imane khõra Yesu, "Hadia, no mi'ila fefu da'õ? Mitõngõni! Sambua lõ sa'ae dania kara andrõ si te'anõ ba nahiania. Fefu no oi adudu."
3 Aefa da'õ numalõ Yesu ba Hili Zaitu, mudadao Ia ba da'õ. Me mudadao Ia nasa, tohare ndra nifahaõ-Nia, fahuhuo ira khõ-Nia ba zi ha ya'ira. Lasofu khõ-Nia, "Tandraigõ Ama, ombakha'õ khõma hawa'ara alua da'õ fefu? Ba hadia dandra we'aso-Mõ awõ wa'atua danõ andrõ?"
4 Itema li Yesu, "Mi'angenanõi. Bõi lalimo ami niha.
5 Bõrõ me ato zi so dania sangoguna'õ tõi-Gu, 'Ya'o Razo Sangorifi!' Ato niha nifaelungura dania.
6 Mirongorongo dania duria wasuwõta ba mokamoka wana ba wanuwõ, ba bõi ata'u ami. Bõrõ me lõ tola lõ'õ alua da'õ. Ba tenga nasa Ngaluo Safuria da'õ.
7 Fasuwõ ira soi si sambua soi si sambua, banua si sambua isuwõ mbanua tanõ bõ'õ. Alua lofo misa awõ ndruru danõ.
8 Ba awena famobõrõ da'õ, hulõ wa'afõkhõ nitaõgõ ndra alawe na tumbu ndraono.
9 Lara'u ami dania, la'ohe ba wamakao ba famunu. Fefu soi ba fatiu dõdõra khõmi dania bõrõ Ndra'o.
10 Ba ginõtõ da'õ dania ato zi farõi khõ-Gu. La'a mbõli nawõra ba faoma afõkhõ dõdõra khõ nawõra.
11 Ato maoso zama'ele'õ sofaya, ato niha lalimo.
12 Tesao wa lõ sõkhi sabõlõbõlõ irege ato niha si taya fa'omasi.
13 Ba sanau õlõ irugi gamozua da'õ ni'orifi.
14 Turia Somuso Dõdõ sanandrõsa khõ Lowalangi awõ wamatõrõ-Nia, ba teturiaigõ dania ba gulidanõ ma'asagõrõ, ena'õ oi larongo niha. Aefa da'õ awena tohare Luo Safuria."
15 "Mi'ila dania 'Wa'alõsõkhi samakiko andrõ', si hokha mbuda, si mane niw̃a'õ Danieli, sama'ele'õ si zizio ba naha wame'e sumange andrõ. (Angombakhata ba zombaso: Haogõ wanõngõni hadia geluahania!)
16 Na alua da'õ dania, akha moloi niha si so ba Yudea, ya lasaw̃a hili.
17 Niha si so yaw̃a ba dete zagõ nomo bõi ya mõi tou ba nomo wanga'i gamagamania.
18 Niha si so ba nowi bõi ya mangawuli miyomo wangai barunia sebua.
19 Alai ndra alawe sanabina ba si so ono sawuyu ba ginõtõ da'õ!
20 Mi'angandrõ khõ Lowalangi ena'õ bõi moloi ami ba mbaw̃a deu ma ba luo Sabato!
21 Ba ginõtõ da'õ so wamakao sabõlõbõlõ si lõ irai alua i'otarai mbõrõta danõ irugi iada'e; ba lõ gõi irai alua sa'ae.
22 Na lõ I'adogo'õ ginõtõ da'õ Lowalangi, ba samõsa lõ sauri niha. Bõrõ mbanua-Nia andrõ si no Ituyu Lowalangi, wa I'adogo'õ ginõtõ da'õ.
23 Na ba ginõtõ da'õ so zanguma'õ khõmi, 'Mifaigi, ya'e Razo Sangorifi andrõ!' Ma zui law̃a'õ, 'Hiza Ia ba da'õ!' -- bõi faduhu dõdõmi ba niha andrõ.
24 Ba maoso dania zangorifi ba sama'ele'õ sofaya andrõ. Lafazõkhi dandra sebua awõ gila'ila ba wamaelungu niha, na tola ba lafaelungu gõi mbanua nituyu Lowalangi andrõ.
25 Mitõrõ tõdõmi! No Uhõnagõ U'ombakha'õ khõmi fatua lõ salua nasa.
26 Na so zanguma'õ khõmi niha, 'Faigi, so Ia ba da'õ ba danõ si mate!' -- Bõi mi'ae'e ba da'õ. Ma zui lamane, 'Aine faigi, no ibini'õ Ia ba da'e!' -- bõi faduhu dõdõmi.
27 Bõrõ me fa'atohare Nono Niha andrõ ba hulõ gari mbanua si otarai gatumbukha si haga numalõ ba gaekhula.
28 Gofu heza so gamatela, ba da'õ owulo moyo."
29 "Lõ ara me no aefa ginõtõ wamakao andrõ, ba ogõmi haga luo, taya haga mbaw̃a. Atoru ndrõfi moroi ba mbanua si yaw̃a, ba muheuheu zangokhõgõ banua si yaw̃a.
30 Na no aefa da'õ awena oroma dandra Nono Niha ba mbanua si yaw̃a. Ba ginõtõ andrõ oi mege'ege fefu soi bõrõ wa'abu dõdõ. La'ila dania Nono Niha andrõ, tohare Ia ba dete lawuo si fao fa'abõlõ ba lakhõmi sebua.
31 Lalau dorofe sebua li, Ifatenge dania mala'ika-Nia Ono Niha andrõ ba wangowuloi banua-Nia i'otarai zi õfa watalinga danõ, i'otarai mbalõ mbanua si sambua irugi wondrege mbalõ mbanua tanõ bõ'õ."
32 "Mihalõ wamahaõ moroi ba ara. Na awuyuwuyu duturu ara ba na tumbu lehelehe, ba mi'ila wa no ahatõ mbaw̃a lõkhõ.
33 Si manõ gõi na mi'ila alua da'õ fefu, ba mi'ila wa no ahatõ sibai ginõtõnia.
34 Mitõngõni! Alua dania fefu da'õ fatua lõ mate fefu niha sauri iada'e.
35 Taya dania mbanua awõ danõ, ba lõ taya wehede-Gu irugi zi lõ aetu."
36 "Samõsa lõ sangila baw̃a awõ ginõtõ, he ira mala'ika ba zorugo ba he gõi Ono lõ la'ila; ha Ama zangila.
37 Si mane salua ba ginõtõ Noakhi fõna, si manõ gõi dania zalua na tohare Nono Niha.
38 Fatua lõ inõtõ molõ sebua andrõ, mangamanga, mamadumadu, ba mangowalu niha. Daõ manõ nifaluara, irugi mõi Noakhi bakha ba nowo.
39 Me inõtõ inõnõi ira molõ, awena la'ila hadia zalua. Si manõ gõi dania zalua na tohare Nono Niha.
40 Ba ginõtõ da'õ darua zohalõw̃õ ba danõ; la'ohe zi samõsa ba si samõsa larõi.
41 Darua ndra alawe sogili gandru: si samõsa lahalõ ba si samõsa larõi.
42 Andrõ mi'angenanõi me lõ mi'ila mbaw̃a wa'atohare Zo'aya ya'ami andrõ.
43 Mitõngõni da'e! Na i'ila sokhõ omo ginõtõ wa'atohare zanagõ, ba lõ mõrõ ia ba lõ ifa'amõi ba nomonia zanagõ.
44 Bõrõ da'õ, mifa'anõ ami. Bõrõ me Ono Niha andrõ tohare Ia dania ba zi lõ mudõnadõna."
45 Imane Yesu nasa, "Na si manõ, haniha zawuyu satuatua ba si lõ farõi? Ya'ia nituyu zokhõ ya'ia tobali hõgõ zawuyu bõ'õ; ena'õ ibe'e gõra ba ginõtõ si no muhonogõi.
46 Ya'ahowu zawuyu andrõ, na mangawuli zokhõ ya'ia, i'ila ibayabaya halõw̃õnia.
47 Ya faduhu dõdõmi, ibe'e barõ mbawania fefu zi so khõnia sokhõ ya'ia andrõ.
48 Ba na lõ sõkhi zawuyu andrõ, na imane tõdõnia,
49 'Ara nasa mangawuli zokhõ ya'o,' ibõrõtaigõ ibõbõzi zawuyu bõ'õ, mangamanga ia ba mamadumadu awõ zi mabumabu andrõ.
50 Tohare dania zokhõ ya'ia ba zi lõ mudõnadõna, ba ginõtõ si lõ i'ila sawuyu andrõ.
51 Ihuku sindruhundruhu dania zawuyu andrõ, ibali'õ hulõ zamini tõdõ ia. Mege'ege dania zawuyu andrõ ba fa'afõkhõ ba da'õ."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA