¹ Yesus ki zep etan Yahudi mo mam-mam zini insa gulk sun de ol blaonzimdinkim aisil gwibiridaka,
² “Alap zere mo irik ginni, zen gulk sun de ol blaonzimdinni an kiye: Zen san de teipsin zi de tane zikhip de we oto gulblunnak tembane yawalsa syal gwibinni.
³ Teipsin zini in hamal hap mes nonol gubirida guku– men desa zena dwam gwibiridakaye, tembane yawala iwe de ang tan hap. Tembanena kim sowe heka, ki zep zere hon de ebabu gwe-gwen zini lup gul sonen daka– zen de zini insa kwang guluda naseran hap. Hwena hamal hap de gubiridan wenya in man yaing gwen hap baes tak.
⁴ Teipsin zini in ki zep ahakore naka etan lup gul soneka. Zen man gubiridaka, ‘Zini insa anakan enbiridak, “Tembanena mes de danan. Sapi zirya hen tane-nena hanapna tangan naka mes beyakam taiblin dabir. Kitak mes hohle danan. Angkam dekam de tembane yala awe dep yaing gwezak.”’
⁵ Hwena men desa sap kwang nulidak, zen man nasalsibiridak. Zen hwena zere mae mo syal san dep sekwak gwendak– ahakon nga san, ahakon hen zere mae mo syal bete-tek san.
⁶ Hen ahakorena teipsin zini in hon de ebabu gwe-gwen zini insa dahyok, zao zep ol lamang naban dangolebik, hendep damerak.
⁷ Teipsin zini in kim kirekam salka, zen man tangan jal gweka. Dekam zep zere mo jana nabare zini lup gul soneka– zen de hwena desa tameran hap, in zen damerakke, hen zeno mae mo esa de ang tan hap.
⁸ “Dekam zep etan ebabu gwe-gwen zini insa tagal gulsuku, zao zep gubiridaka, ‘We oto gublun tembane yawala an mes hohle danan. Hwena mensa sap gu sonebiridak, zen hom ang tan hap edakastik.
⁹ Zep emki angkam sek gwen– ora bol yawal-yawal san. Mensa ki oletowe gwek, zen desa kitak tembane yawala awe dep kwang ulidahal gwezak.’
¹⁰ Babu zem in ki zep hendep sek gwek– ora-bol ora-bol san. Zini men desa ki noletowe gweꞌak, desa zep tingan kwang nulida halzak. Ahakon dawem-dawem naka, ahakon karek-karek naka. Hendep tembane yawal hap de teksonna in dekam zep zikim sowehek.
¹¹ “Hwena teipsin zini in ki zep til zika– in zen yaing gwek, desa de hlauludan hap. Hwena dekam zep ahana hla taka. Zen hom tembane yawala iwe dikim ang gwen hap de bajuna ala soꞌanka, hwena totore bajusa ala soka.
¹² Zao zep takensiblika, ‘Wal bosyan, em banakan tangane awe til zila? – tembane yawala awe dikim ang tan hap de baju ala son sremkamye.’ Zini in hwena hom mae banakan mae ding gulbluka.
¹³ Teipsin zini in dekam zep zere mo irgwa taha nakore zini gubiridaka, ‘Dekam taha-tana tahalebir-blin naka kawesin sin dep hiri lak– men dekon zi mo angna yusyustin niban gona ta gwenanke, hen sang-sang hap ekna ngalk-ngalk da gwibirinke.’”
¹⁴ Zao zep Yesus gulk sun de ol blaonzimdinni insa anakare ola ban golzausuku, “Sap eiwa, kitak de kwang gulu dankam, hwena eiwakam de hlil irin wenya kitak hom.”
¹⁵ Dekam zep Farisikam de gubirida gwen zini ze-en nonol ola anakan aha-en nuk, “Nen banakare u siwen olkam esa taken-taken eblal? – dekam de zeno karekkam de ding gun nukon karek tan hapye.”
¹⁶ Ki zep zere mae hon de ang ta gwen zisi hen teipsin zini Herodes mo hliknak de biti gwen zi niban Yesus osan dep lup nul sonek. Zen zep Yesussu nenblak, “Bian Guru, ee mese emsa tawa eblak: Em in dam-dam enkame gwe gwenda. Alap mo dwam gwibinni dam-dam enkame tawa ta gwibirida, sap zi mo husus gwibin maena damnake gollewen sremkam tonbirida gwenda. Sap em zi mo bosesa home kara gul gwizimnira.
¹⁷ Zen in zebe emsa lakensibliꞌan: Em banakane Musa mo titi tabin ola dam gulsuꞌura? San ha nen sap esa Roma mo irik ginnik dep pajak te-alana ol gwizim? San ha bap nen?”
¹⁸ Hwena Yesus mes zeno mae mo enlala jal-jal aning tanna insa tame tazimki. Zep gubiridaka, “Em in eiwa de ora nakon mese tangan syan nahlak, zebe u siweblan hap de enlala naban kirekam Asa lakensiblinanzal.
¹⁹ Abe hap emki pajak hap de te-ala kasona insa ahanaka goltreblan.” Dekam zep ahanaka nolblak.
²⁰ Ki zep ze takensibiridaka, “Te-ala kasonak, an nara mo nwe-masesa ze yang dasik? Hen nara mo bosesa ze ale nuk?”
²¹ Ki zep ding nulblik, “Roma mo teipsin zi mo denakake.” Ki zep hwena ding gulzimki, “Ki Roma mo teipsin zini in mo bi gwibin kire-kirena amki zebe hap etan lop la gweblak. Hen kirekam, Alap mo bi gwibin kire-kirena, amki Alap hap lop la gweblak.”
²² Kirekam de srip gulsizimdinnik kim sane daꞌak, zen man tangan denggwanblak, ki zep hendep hli dak.
²³ Yaklana dekam zep Sadukikam de gubirida gwen zini u siwen ola ban hen Yesus onak dep yaing gwezak. Zen Yahudi mo aha hlikna– men zen anakan tawa da gwibirinke, “Zini bejen tin nikon etan ngaya gwen.”
²⁴ Zen ki zep hen dakensiblik, “Bian Guru, Musa Bak mo titi tabin olak a kirekam mo lwakye, ‘Zi de we zemka walas we lan sremnak tinkim hli yunnu, zen oso zik de etan gonkam– zen de ze walassa aya zik mo weinak dep we tan hap. Hen kirekam, oso zik de tinkim, aya zik de hwena we semna insa gonkam.’
²⁵ Orep awe zini ki, beyana tuju enkam, aha-ere ane-bianna. Zena zi nik zep nonol wenya golka, hwena walas we lan sremnak zep tilki. We nal zem insa hwena oso zik zep etan golka.
²⁶ Zen hen walas we lan sremnak zep tilki. Zao hen etan dan-ahan nik etan golka. Zen hen walas we lan sremnak tilki. Hendep tujukam de aya-wal oso-walya in kire enkam zep sap nol gwek, hwena walas en srem ennak zep juwe gwek.
²⁷ Wenya in hwena aumwa hap zep tik.
²⁸ Zep zen de etan engaya gweꞌanam, men kirekam ahakon tawa da gwibirin, wenya insa nara mo wekam maka nenbiꞌin? Sap tujukam de zini in mes desa kitak nol gwek.”
²⁹ Yesus ki zep ding gulzimki, “Em in ema ebute gweꞌan, sap em home Alap mo ola ban zeno soson naban tame osoꞌan.
³⁰ Sap tin nikon de etan engaya gwenkam, dekam molya etan zenaka kap da gwek– men kirekam hen Alap mo dam taha nakore zini zenaka de kap tan sremkam lowehe gwenanke.
³¹ Hwena em bawalkam esa Alap mo ola an mo eini dam ulsul? – tin nikon de ngaya gwen hap dena mensa gukuye. Zen man-am Yahudi zini emsa gubiridaka,
³² ‘Ëe an eno auyan wal mo Alap– Abraham, Isak, hen Yakob Bak mo.’ Zep Zen tin zi mo Alapsa hom. Zen ngaya wenyik mo Alap.”
³³ Zi trana in kim Yesussu kirekam de srip gulsuzimdinnik sane daꞌak, zen man tangan denggwanblak.
³⁴ Farisikam de gubirida gwen zini kim anakan esak, “Sadukikam de gubirida gwen zini etan banakarekam dep? – Yesus mo olsa de ding gulblun naye,” dekam zep hen yaing gwezak.
³⁵ Zeno mae mo ahana, zen Musa mo titi tabin olsa de tawa ta gwibinni. Zen zep Yesussu de akasiblin hap takensiblika,
³⁶ “Bian Guru, neno mae mo titi tabin ola kon, bol-zaun tanganna enda zen moye? – desan de nen dawemkam ang ta gwen hapye.”
³⁷ Ki zep ding gulbluka, “Zen a zen moye: ‘Bian Alapsa em ensa lwa gweblan– tingare enho naban, enlala naban, hen tim niban.’
³⁸ Zen zen– nonol wenya hen bol-zaun tangan wenyaye.
³⁹ Ahana hen ki– deban de apde nen makare naye. Zen a kirekam moye: ‘Zi bose omka em kwasang gwibirida gwen– san de enaka de kwasang gweblanna kiye.’
⁴⁰ Tingare titi tabin ola mensa Musa Bak ayang gul gwizimki, hen Alap mo ola mensa aha zi ayang nul gwizimk, zen ausuna kitak dare titi tabin ola in zewe.”
⁴¹ Farisikam de zini in kim ze nama lowe heꞌak, Yesus ki zep takensibiridaka,
⁴² “Eno mae mo tame gun nukon, Israelsa de ngaya tabin hip de Zi hip dena banakan? Zen nara mo auyan-tanekam sa hata zala?” Ki zep ding nulblik, “Zen Daud Bak mo auyan-tanekam sa hata zala.”
⁴³ Ki zep hwena ding gulzimki, “Ki hwena Daud Bak zena ba hap Israelsa de ngaya tabin hip de Zini insa ‘Teipsin Zi’kim gubluka? – Alap mo Enhona kim bi gweblakaye. Sap zen dekam anakan am guku,
⁴⁴ ‘Bian Alap man ano Teipsinni gubluka, “Ëre mo dam taha nakon emki nikirin– dekon de hen teipsinkim irik gin hip. Ki asa hwena ebe hap de jal zini ere mo tana iltikinnik sisik gulin.”’
⁴⁵ Zep Daud insa Israelsa de ngaya tabin hip de Zini insa ‘Teipsin Zi’kim gubluka, ki Zen banakan sa zeno auyan-tanekam hata zala?”
⁴⁶ Hwena Yesussu de ding gulblun hap man topse neblak. Dekam etan hom mae Yesus hon takensiblin mae hap yaing gwek. Saher hap baes tak.