Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu nike pengiring-pengiring Deside Isa parek dait metakẽn, "Sai saq paling belẽq lẽq dalem Kerajaan Sorge?"

² Deside Isa ngemanikang sopoq kanak kodẽq, dait penganjeng-Ne kanak nike lẽq julu ie pade.

³ Terus Deside Isa bemanik, "Tiang badaq side pade! Setetune lamun side pade ndẽq betobat dait jari maraq kanak kodẽq niki, side pade ndẽq gen tame dalem Kerajaan Sorge.

⁴ Dengan saq ngerendahang diriqne dait jari maraq kanak kodẽq niki, ie saq jari paling belẽq lẽq dalem Kerajaan Sorge.

⁵ Dait dengan saq nerimaq sopoq kanak maraq niki lantaran Tiang, artine nerimaq Tiang."

⁶ "Sai-sai saq jari penyebap salaq sopoq lẽman kanak-kanak kodẽq saq percaye lẽq Tiang niki bedose, solahan lamun batu penggilingan tetaliq lẽq belongne terus ie tetelepang lẽq segare saq dalem.

⁷ Celake gati dunie niki lantaran hal-hal saq jari penyebap dengan gawẽq dose. Mule hal-hal saq maraq nike gen tetep araq, laguq celake gati dengan-dengan saq jari penyebapne!

⁸ Lamun imende atao naẽnde miaq side bedose, araqan side peleng dait tetẽh. Solahan side bedowẽ setowẽq naẽ atao ime laguq side selamet idup bareng kance Allah, ketimbang side tetetẽh ojok dalem api nerake lantong kedue ime dait naẽnde.

⁹ Dait lamun penentengde miaq side bedose, luwit dait tetẽh. Solahan side bute setowẽq laguq idup bareng kance Allah, ketimbang side tetetẽh ojok dalem api nerake lantong kedue penentengde."

¹⁰ "Pade inget! Ndaq menghine salaq sopoq lẽman kanak-kanak kodẽq niki. Tiang badaq side, malaẽkat-malaẽkat ie pade tetep araq lẽq arepan Bapa Tiang lẽq sorge.

¹¹ [Sẽngaq Bije Manusie rauh jari nyelametang dengan saq sesat!]

¹² Berembẽ pendapet side? Seandẽne araq sopoq dengan saq bedowẽ satus dombe, terus sopoq lẽq antare dombe-dombe nike telang. Napi saq gen tepiaq siq dengan nike? Pasti ie gen bilin dombe-dombene saq siwaq pulu siwaq nike lẽq gunung dait lumbar boyaq saq telang nike.

¹³ Tiang badaq side, setetune lamun ie ndait malik dombe nike, cemohne gen belẽqan tipaq dombe saq sopoq nike ketimbang saq siwaq pulu siwaq lainne saq ndẽq telang.

¹⁴ Maraq nike ẽndah Bapa side saq lẽq sorge, nẽnten kayun salaq sopoq lẽman kanak-kanak niki telang."

¹⁵ "Lamun semetonde bedose lẽq side, dateng badaq ie dait jelasang napi kepelihanne. Laksaneang hal nike tedoq-tedoq antare side kance ie doang. Lamun ie turut nasẽhat side, artine side berhasil mauq semetonde malik.

¹⁶ Laguq lamun ie ndẽq mẽlẽ, dateng jauq sopoq atao due dengan malik. Sẽngaq araq tetulis lẽq dalem Kitab Suci, 'Sekurang-kurangne due atao telu dengan saksi saq teperluang jari nyatayang kesalaqan sopoq dengan saq tetuduh.'

¹⁷ Laguq lamun ie ndẽq mẽlẽ nerimaq nasẽhat dengan-dengan nike, sampẽang hal nike tipaq jemaah. Dait ahirne, lamun ie ndẽq nerimaq nasẽhat jemaah, anggep doang ie sebagẽ penagih pajek atao dengan saq ndẽq kenal Allah."

¹⁸ Tiang badaq side: "Napi saq side pade taliq lẽq dunie niki, gen tetaliq ẽndah lẽq sorge. Dait napi saq side pade lekaq lẽq dunie niki, gen telekaq ẽndah lẽq sorge.

¹⁹ Dait Tiang badaq side malik: Lamun lẽq antare side pade lẽq dunie niki araq due dengan sepakat mengenai napi juaq dait bedo'e, do'e nike gen tekabulang siq Bapa Tiang lẽq sorge.

²⁰ Sẽngaq lẽq mbẽ araq due atao telu dengan bekumpul lantaran Tiang, Tiang araq lẽq tengaq-tengaq ie pade."

²¹ Beterus Petrus parek ojok Deside Isa dait metakẽn, "Junjungan Saq Mulie, lamun semeton tiang bedose lẽq tiang, jangke pire kali tiang harus ngampunin ie? Napi jangke pituq kali?"

²² Jawab Deside Isa, "Ndẽq, ndẽqne cume pituq kali, laguq jangke pituq pulu kali pituq kali!

²³ Sẽngaq hal Kerajaan Sorge seumpame maraq sopoq raje saq gen ngerẽkẽng utang-utang hambe-hambene.

²⁴ Sewaktu ie mulai ngaraqang pemeriksaan, tejauq ojok ie sopoq hambe saq bedowẽ utang jangke bejute-jute,

²⁵ dait ie ndẽq sanggup ngelunasin. Beterus raje nike ngican prẽntah adẽq hambe nike tejual bareng seninene dait bijene, lantong selapuq dowẽne jari bayah utangne.

²⁶ Hambe nike sujut lẽq arepan raje nike dait tunas, 'Tuan raje, sabar juluq, tiang gen ngelunasang selapuq utang tiang.'

²⁷ Raje nike periak lẽq ie, sehingge ie bẽbasang selapuq utangne.

²⁸ Sewaktu hambe nike sugul, ie bedait kance baturne pade pade jari hambe ẽndah saq berutang lẽq ie araq pire iyu luwẽqne. Baune baturne nike, pekokne dait ie bebase, 'Bayah selapuq utangde!'

²⁹ Beterus baturne nike sujut ngẽndẽng tulung lẽq julune, 'Sabar juluq batur, selapuqne pasti gen tiang bayah!'

³⁰ Laguq hambe nike nolaq, sebalikne, ie tamaq baturne ojok dalem bui, jangke ie ngelunasang utangne.

³¹ Sewaktu teserioq siq hambe-hambe saq lain napi saq sampun ie laksaneang lẽq baturne nike, ie pade asẽq dait ngelaporang hal nike ojok raje.

³² Beterus raje nike ngempoh hambe saq jahat nike dait bebase lẽq ie, 'Hambe saq jahat! Selapuq utangde sampun tiang apus cume lantaran petunasande lẽq tiang.

³³ Seharusne side ẽndah periak lẽq baturde nike pade maraq tiang sampun periak lẽq side?'

³⁴ Raje nike menggah gati. Hambe saq jahat nike tetamaq ojok dalem bui jangke ie ngelunasang selapuq utangne."

³⁵ Ahirne Deside Isa nutuqang cerite-Ne siq manik niki, "Maraq nike ẽndah side pade sopoq-sopoq gen teperlakuang siq Bapa Tiang lẽq sorge, lamun side pade ndẽq ihlas ngampunin baturde."

Matius

Video Matius 18

Ikuti Kami:

KONTAK | PARTISIPASI | DONASI