Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me inõtõ da'õ ba la'ondrasi Yesu ira nifahaõ-Nia, lasofu khõ-Nia, "Haniha zabõlõ ebua ba mbanua Lowalangi?"
2 Ikaoni samõsa ndraono side'ide Yesu, Ifezizio fõnara.
3 Imane khõra Yesu, "Ya faduhu dõdõmi! Ha na tobali ami si mane iraono andre, awena tobali ami ndrotondroto mbanua Lowalangi andrõ.
4 Niha sangidengide'õ ya'ia ba si tobali si mane iraono andre, ya'ia zabõlõ ebua ba gotalua mbanua Lowalangi.
5 Ba haniha zanema iraono andre bõrõ Ndra'o, no gõi itema Ndra'o niha andrõ."
6 "Haniha zamobõrõ wa lõ faduhu dõdõ fa zamõsa niha side'ide andre khõ-Gu, ba abõlõ sõkhi na lataw̃i ba mbaginia gara wondrekha, ba latibo'õ ia ba nasi sabakha.
7 Alai gulidanõ andre samobõrõ niha ba wolau horõ. Duhu wa lõ aetu'aetu so zi mane da'õ, ba alai niha samobõrõ ya'ia!
8 Na tangau ma aheu mbõrõ wa õlau horõ, ba tema taba ba tibo'õ ia. Abõlõ sõkhi auri ndra'ugõ khõ Lowalangi ha tambai danga ma ha tambai gahe, moroi na so duadua dangau ba aheu, ba nitibo'õ ndra'ugõ ba narako.
9 Na hõrõu mbõrõ wa õfalua horõ, ba tema ko'e ba tibo'õ ia. Abõlõ sõkhi auri ndra'ugõ khõ Lowalangi ha tambai hõrõ, moroi na dombua hõrõu ba nitibo'õ ndra'ugõ ba galitõ narako."
10 "Mitõngõni! Bõi mi'o'aya fa zamõsa niha side'ide andre. Uw̃a'õ khõmi, lõ mamalõmalõ so so mala'ikara fõna Nama-Gu si so ba zorugo.
11 [Hiza, tohare Nono Niha ba wangorifi niha selungu!]
12 Hewisa wangerangerami? Na so niha sokhõ otu nga'eu mbiribiri. Ba na elungu sageu mbiribiri andrõ, hadia nilau niha andrõ? Tatu irõi mbiribiri si siw̃a wulu a siw̃a nga'eu, mõi ia ba hili wangalui biribiri si sageu si no elungu andrõ.
13 Faduhu dõdõ-Gu, na no isõndra mangawuli mbiribiri andrõ, ba abõlõ wa'omuso dõdõnia ba zi sageu andrõ moroi ba zi siw̃a wulu a siw̃a tõ si lõ elungu.
14 Si manõ gõi Namami andrõ si so ba zorugo, lõ omasi Ia na elungu zamõsa niha side'ide andrõ."
15 "Na mosala dalifusõu khõu, ae'e khõnia ba ombakha'õ khõnia zalania andrõ. Mifahuhuosi da'õ ba zi darua ami. Na i'o'õ niw̃a'õu, ba no õsõndra mangawuli dalifusõu andrõ.
16 Ba na lõ'õ, ohe zamõsa tõ ma darua tõ nawõu. Bõrõ me no tesura ba Mbuku Ni'amoni'õ, 'Dozi sangadu, lõ tola lõ'õ darua ma datõlu zamaduhu'õ sanga'aro'õ ya'ia.'
17 Ba na lõ itema menemene niha andrõ, ba ombakha'õ da'õ ba gotalua mbanua. Ba na lõ nasa itema menemene mbanua, akha hulõ niha si lõ aboto ba dõdõ Lowalangi ia ba ma hulõ zanema beo."
18 "Tõngõni da'e: Hadia nitegumi ba gulidanõ, ba tetegu gõi da'õ ba zorugo. Ba hadia nitehegõmi ba gulidanõ andre, ba da'õ gõi nitehegõ ba zorugo.
19 Mitõngõni da'e: Na darua ba gotaluami zi fao tõdõ ba wangandrõ hadia ia ba gulidanõ andre, Ifondrondrongo wangandrõmi andrõ Ama-Gu si so ba zorugo.
20 Bõrõ me gofu heza so darua datõlu zowulo bõrõ Ndra'o, so Ndra'odo ba gotaluara."
21 Aefa da'õ, mõi Wetero i'ondrasi Yesu ba isofu khõ-Nia, "He So'aya, hame'uga kali tola u'efa'õ zala dalifusõgu si fasala khõgu? Hadia fitu kali?"
22 Itema li Yesu, "Lõ'õ, tenga ha fitu kali, hiza sa irugi fitu ngafulu kali fitu!
23 Bõrõ na mamatõrõ Lowalangi, ba hulõ gamaedola da'e: Samõsa razo somasi mangerai fo'õmõ zawuyunia.
24 Me ibõrõtaigõ wamareso, ba samõsa ba gotalua zawuyu andrõ ni'ohe khõnia si so õmõ jutajuta wa'ebua,
25 ba tebai ibu'a gõmõnia andrõ. Andrõ wa ibe'e li razo ena'õ la'amawa zawuyu andrõ fabaya fo'omonia ba iraononia, awõ fefu zi so khõnia, ba wamu'a õmõnia andrõ.
26 Bõrõ da'õ maoso zawuyu andrõ, mangalulu ia ba gahe razo, ifaogõ wangandrõ, 'He Tuha, bologõ dõdõu khõ zawuyumõ andre. Ubu'a fefu wo'õmõgu andrõ khõu dania.'
27 Ahakhõ dõdõ Razo ia, iheta fefu wo'õmõ zawuyu andrõ.
28 Me mõi baero zawuyu andrõ, ba falukha ia nawõnia sawuyu. So gõmõ nawõnia andrõ khõnia mato ha'uga ribu. Ira'u nawõnia da'õ, itõgi mbagi ba imane, 'Bu'a fefu gõmõu khõgu!'
29 Ba mangalulu khõnia nawõnia andrõ si fao angandrõw̃a, 'Bologõ dõdõu khõgu, ubu'a fefu gõmõgu andrõ dania!'
30 Lõ ba dõdõ zawuyu andrõ gangandrõw̃a nawõnia. Ibe'e ba gurunga nawõnia andrõ irege ibu'a fefu gõmõnia.
31 Me i'ila sawuyu bõ'õ zalua andrõ, abu dõdõra ba la'ombakha'õ da'õ khõ Razo.
32 Maoso Razo ikaoni zawuyu si lõ sõkhi andrõ, imane khõnia, 'He sawuyu si lõ sõkhi! No uheta gõmõu andrõ me õ'andrõ khõgu.
33 Hadia, lõ õ'oroma'õ wa'ahakhõ dõdõu ba nawõu sawuyu andrõ me no u'oroma'õ wa'ahakhõ dõdõgu ndra'ugõ?'
34 Ba mofõnu Razo, ifakuru'õ zawuyu si lõ sõkhi andrõ. Ba so ia ba gurunga irege ahori ibu'a fefu gõmõnia."
35 Ba gafuriata nidunõdunõ Yesu andrõ Imane, "Si manõ gõi nilau Nama-Gu andrõ si so ba zorugo khõmi, na lõ mi'efa'õ zala dalifusõmi soroi dõdõ."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA