Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dikutiko itu pangikuik-pangikuik Isa Almasih datang kabake Baliau untuak batanyo, "Siya urang nan di anggap paliang takamuko, di antaro umaik Allah?"

² Mako Isa Almasih ma imbau surang paja ketek, Baliau manyuruah paja tu tagak di adok-an pangikuik-Nyo.

³ Sudah tu Baliau bakato, "Picayolah! Jikok angku-angku layi barubah, sainggo ati angku-angku sarupo jo ati paja-paja ketek, barulah angku-angku dapek masuak Karajaan Sarugo.

⁴ Urang nan layi namuah marandahkan dirinyo, sainggo samo jo paja ketek ko, mako inyolah urang nan di anggap paliang takamuko di dalam Karajaan Sarugo.

⁵ Baitu pulo, urang nan lai namuah manarimo paja ketek nan sarupo iko, dek karano di Ambo, ba arati inyo lah manarimo Ambo."

⁶ "Siya nan manyababkan, dek karano dek inyo salah surang dari urang-urang nan ketek ko, indak picayo lai kabake Ambo, mako labiah elok lai di urang tu jikok batu panggiliangan dikabekkan di mariahnyo, sudah tu inyo di oncekkan masuak lauik basa.

⁷ Baralah ka cilakonyo dunia ko, karano dek ulahnyo nan manyababkan urang bi badoso. Batua, parkaro-parkaro nan sarupo itu ka tatap ado, tapi cilakolah urang nan mampabuweknyo!

⁸ Jikok tangan angkau, atau kaki angkau nan manjadi panyabab angkau babuwek doso, mako kuduanglah tangan atau kaki angkau tu, campakkanlah kasadonyo. Labiah elok angkau iduik indak batangan sabalah, atau indak bakaki sabalah, asakan iduik angkau tu layi manyanangkan ati Allah. Daripado angkau batangan bakaki langkok di ambuangkan masuak api narako.

⁹ Jikok mato angkau nan manyababkan angkau badoso, mako cukialah incek mato angkau tu, campakkanlah. Labiah elok angkau bamato celek, asakan lai iduik manyanangkan ati Allah, daripado bamato langkok di ambuangkan masuak api narako."

¹⁰ "Ati-atilah! Jan sampai mahino salah surang dari urang-urang nan ketek ko. Dek karano, ingeklah, baraso ado malekaiknyo satiyok wakatu di adok-an Bapak Ambo di sarugo.

¹¹ [Dek karano Anak Manusia datang ka dunie ko, untuak manyalamaikkan urang nan sasek!]

¹² Baa manuruik pandapek angku-angku? Jikok sakironyo ado surang urang nan punyo saratuih ikua domba, kudian ado sikua dombanyo tu nan ilang, apo nan ka dipabuwek dek urang nan punyo domba tu? Tantu inyo ka maninggakan dombanyo nan sambilan puluah sambilan tu di ateh bukik, sudah tu inyo payi untuak mancari dombanyo nan ilang tu.

¹³ Jikok dombanyo nan ilang tu lah basuwo baliak -- picayolah jo kecek Ambo ko -- inyo labiah bagadang ati jo dombanyo nan sikua tu, dek karano lah basuwo baliak, daripado jo dombanyo nan sambilan puluah sambilan nan indak ilang.

¹⁴ Baitu pulo Bapak angkau nan di sarugo, Baliau indak niyo doh, jikok ado salah surang dari urang-urang nan baru ba iman kabake Ambo ko, disemba baliak dek ubilih."

¹⁵ "Jikok umpamonyo ado di antaro sudaro-sudaro angkau, nan bakasalahan kabake angkau, mako payilah untuak manamuinyo, katokanlah sacaro elok tantang kasalahannyo tu. Pabuweklah nan saroman itu, sacaro ba anok-anok antaro angkau baduwo jo inyo sajo. Jikok inyo layi manarimo nasiyaik angkau, mako barasillah angkau mandapekkan sudaro angkau tu baliak.

¹⁶ Tapi jikok inyo indak namuah manarimo nasiyaik angkau, mako bawoklah surang atau duwo urang lai sudaro nan lain. Dek karano dalam Alkitab ado tatulih nan bakcando iko, 'Sakurang-kurangnyo ado duwo atau tigo urang sasi nan diparalukan, untuak manyatokan surang urang nan tatuduah basalah.'

¹⁷ Jikok inyo indak namuah juwo manarimo nasiyaik urang-urang tu, mako baritawukanlah parkaro itu kabake sidang jamaat. Akienyo, jikok inyo indak namuah pulo manarimo nasiyaik sidang jamaat, mako anggaplah inyo tu saroman jo urang tukang mintak pajak, saroman jo urang nan indak ba Tuhan Allah."

¹⁸ "Katawuilah: Apo nan angkau tagah di dunie ko, itupun batagah pulo di sarugo. Baitu pulo, apo nan angkau buliahkan di dunie ko, itupun dibuliahkan pulo di sarugo.

¹⁹ Katawui pulolah: Jikok di antaro angku-angku kutiko didunie ko, ado duwo urang nan supakaik sahati mandowakan tantang sasuatu, mako dowanyo tu ka dipalakukan dek Bapak Ambo nan di sarugo.

²⁰ Dek karano, dima ado duwo atau tigo urang nan bakumpua, dek karano di Ambo, mako Ambo pun ado samo-samo jo inyo."

²¹ Kamudian si Petrus tibo kabake Isa Almasih untuak batanyo, "Tuhan, jikok sudaro ambo mambuwek kasalahan kabake ambo, sampai bara kalikoh, ambo musti mamaohkannyo? Apokoh sampai tujuah kali?"

²² Baliau manjawab, "Indak, indak sampai tujuah kali doh, tapi sampai tujuah puluah kali tujuah.

²³ Dek karano parkaro Karajaan Sarugo, ka adaannyo sarupo jo nan Ambo ibaraikkan ko: Ado surang rajo bamukasuik nak manyalasaikan utang piutang jo budak-budaknyo.

²⁴ Kutiko rajo tu muloi mamareso, mako dibawoklah ka adok-annyo surang budak nan ba utang bajuta-juta,

²⁵ rasonyo indak kamungkin lai budak tu dapek ka mambayie utangnyo. Mako rajo tu mamarentahkan, supayo budak tu jo anak bininyo sarato jo sagalo arato bandonyo, dijuwa untuak ka pambayie utangnyo.

²⁶ Budak tu sujuik di adok-an rajo tu, sambia mambana, 'Tuanku, basaba atilah tuanku taradok ambo. Ambo layi baniyaik ka mambayie utang tu kasadonyo.'

²⁷ Rajo tu ibo maliyek budaknyo tu, sainggo inyo abihkan sajo kasadonyo utang budak tu.

²⁸ Kutiko budak tu ka kaluwa, basoboklah inyo jo kantinyo, surang budak pulo, nan ba utang pulo kabake inyo, tapi indak bara ribu doh. Mako inyo tangkok, inyo cakiak mariah kantinyo tu, sambia bakato, 'Bayielah utang wa-ang kasadonyo!'

²⁹ Kantinyo tu sujuik di adok-annyo sambia mambana, 'Sabalah dulu sanak, sadonyo utang ka ambo bayie!'

³⁰ Tapi budak tu indak namuah. Malah inyo masuakkan kantinyo tu ka pinjaro, sampai kantinyo tu bisa mambayie utang.

³¹ Sadiah ati budak-budak nan lain kutiko maliyek kajadian tu, mako inyo agiah tawulah rajo tantang kajadian tu.

³² Mako di imbaulah budak nan jahek tu dek rajo, sambia bakato, 'Oih budak nan indak tawu di untuang! Kasadonyo utang wa-ang lah den abihkan, dek karano wa-ang lah mambana kabake den.

³³ Indak koh wa-ang patuik pulo maraso ibo kabake kanti wa-ang, bakcando den nan lah maraso ibo kabake wa-ang?'

³⁴ Rajo tu sabana bangih. Mako budak nan jahek tu dipuruakkannyo masuak pinjaro, sampai inyo dapek mambayie utangnyo kasadonyo."

³⁵ Isa Almasih manyudahi pangajaran-Nyo jo kato-kato nan bakcando iko, "Baitu pulolah Bapak Ambo nan di sarugo, Baliau ka mampabuwek nan sarupo itu pulo kabake satiyok angku-angku, jikok angku-angku indak namuah mamaohkan sudaro angku jo ati nan barasiah."

Matius

Video Matius 18

Ikuti Kami:

KONTAK | PARTISIPASI | DONASI