Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo, waktu nike jelo Sabat, Deside Isa kance pengiring-pengiring-Ne bemargi lẽq lendang gandum. Sambil bemargi pengiring-pengiring-Ne pade bau gandum, terus kelorne sẽngaq ie pade lapah.

² Sewaktu dengan-dengan Parisi serioq hal nike, ie pade matur lẽq Deside Isa, "Cobaq serioq, pengiring-pengiring Pelungguh ngelanggar Hukum Taurat ite, ie pade ngelaksaneang hal saq ndẽq kanggo telaksaneang lẽq jelo Sabat."

³ Jawab Deside Isa lẽq ie pade, "Napi side pade ndẽq uwah bace mengenai napi saq telaksaneang siq Daud sewaktu ie dait dengan-dengan saq bareng kance ie lapah?

⁴ Daud tame ojok dalem Gedẽng Allah dait kelorang ruti saq sampun teaturang tipaq Allah. Padahal Daud atao dengan-dengan saq ngiring ie ndẽq kanggo kelorang ruti nike, kecuali imam-imam.

⁵ Atao napi ndẽq uwah side pade bace lẽq dalem Kitab Suci Taurat bahwe sebilang jelo Sabat, imam-imam saq betugas lẽq Gedẽng Allah ndẽq tesalaqang timaq ie ngelanggar aturan jelo Sabat?

⁶ Tiang badaq side: Setetune lẽq deriki araq saq belẽqan lẽman Gedẽng Allah.

⁷ Lẽq dalem Kitab Suci araq tetulis: Tiang mẽlẽ belas kasihan, ndẽqne kurban binatang. Lamun side tetu-tetu ngerti maksut Tiang niki, side pade pasti ndẽq gen nyalahang dengan-dengan saq ndẽq salaq.

⁸ Sẽngaq, Bije Manusie nike Penguase jelo Sabat."

⁹ Beterus Deside Isa bilin taoq nike, dait lumbar ojok balẽ ibadah.

¹⁰ Lẽq derike araq dengan saq imene matẽ setowẽq. Araq dengan-dengan lẽq derike saq mẽlẽ boyaq-boyaq kesalaqan adẽqne bau nyalahang Deside Isa. Ie pade metakẽn lẽq Deside Isa, "Kanggo napi nẽnten nyelahang dengan lẽq jelo Sabat?"

¹¹ Jawab Deside Isa, "Lamun araq lẽq antare side pade saq bedowẽ dombe, dait lẽq jelo Sabat dombe nike geriq ojok longkak saq dalem; napi ẽpẽn dombe nike ndẽq gen berusahe nyugulang dombe nike lẽman longkak nike?

¹² Nah, manusie belẽqan ajine ketimbang dombe! Jari lamun maraq nike kanggo gawẽq hal saq solah lẽq jelo Sabat!"

¹³ Beterus Deside Isa bemanik lẽq dengan saq matẽ setowẽq imene nike, "Ulurang imende." Dengan nike ngulurang imene, beterus imene selah maraq saq setowẽq.

¹⁴ Laguq dengan-dengan Parisi bilin balẽ ibadah, terus ie pade mupakat gen nyematẽq Deside Isa.

¹⁵ Deside Isa wikan bahwe dengan-dengan Parisi nike bedowẽ niat jahat lẽq Ie. Jari Ie lumbar lẽman taoq nike, dait luwẽq dengan ngiring Ie. Beterus Deside Isa nyelahang selapuq dengan saq sakit.

¹⁶ Laguq Deside Isa balaq ie pade betutur mengenai Ie tipaq dengan lain.

¹⁷ Siq care nike telaksane napi saq sampun temanikang siq Allah langan Nabi Yesaya,

¹⁸ "Niki utusan Tiang saq Tiang pilẽq, Dengan saq Tiang kasihin dait saq nyenengang angen Tiang. Roh Tiang gen Tiang toloq lẽq Ie, keadilan Tiang gen Ie beriteang tipaq bangse-bangse.

¹⁹ Ie ndẽq gen betungkasan atao nyurak, atao pidato lẽq rurung-rurung belẽq.

²⁰ Terẽng buloq saq empak ndẽq gen Ie polakang, dilah saq gen pedaq ndẽq gen Ie pedaqang. Ie gen terus bejuang jangke keadilan telaksaneang;

²¹ selapuq bangse gen beharep lẽq Ie."

²² Beterus araq dengan-dengan parek tipaq Deside Isa jauq dengan bute dait pakoq lantaran tekuasein siq sẽtan. Deside Isa nyelahang dengan nike sehingge ie tao nyerioq dait ngeraos malik.

²³ Selapuq dengan saq nyaksiang peristiwe nike jari bengaq, dait bebase, "Sang Ie niki keturunan Daud?"

²⁴ Sewaktu dengan-dengan Parisi pireng hal nike, terus ie pade nimbal, "Dengan niki cume tao sediq sẽtan lantaran Beelzebul, datune sẽtan saq sampun ngebẽng Ie kuase nike."

²⁵ Deside Isa wikan pikiran dengan-dengan Parisi nike, jari manik Deside Isa lẽq ie pade, "Lamun sopoq negare lẽq dalemne araq golongan-golongan saq saling bemusuhan, pasti negare nike ndẽq bau tahen ngonẽq. Dait sebilang kote atao keluarge saq saling bemusuhan sopoq kance saq lain, pasti ndẽq gen tahen ngonẽq.

²⁶ Maraq nike ẽndah lẽq dalem kerajaan Belis; lamun sopoq kelompoq sediq kelompoq saq lain, make kerajaan Belis nike sampun saling bemusuhan dait ndẽq gen tahen ngonẽq.

²⁷ Side pade bebase bahwe Tiang sediq sẽtan siq kuase Beelzebul. Lamun maraq nike siq kuase sai pengiring-pengiringde sediq roh jahat? Pengiring-pengiringde mẽsaq saq buktiang bahwe side pade salaq!

²⁸ Laguq setetune Tiang sediq sẽtan kadu kuase Roh Allah. Nike artine bahwe Kerajaan Allah sampun rauh lẽq side.

²⁹ Berembẽ dengan bau tame ojok dalem balẽ sopoq dengan saq kuat, jari ngerampas dowẽne lamun ie ndẽq juluan sẽkoq dengan saq kuat nike? Sesampun sẽkoqne, baruq ie bau ngerampas dowẽ dengan nike.

³⁰ Dengan saq ndẽq bepihak lẽq Tiang, setetune ie ngelawan Tiang. Dait dengan saq ndẽq nulung Tiang setetune ie sẽdaq karye Tiang!

³¹ Keranaq nike Tiang badaq side pade: Lamun dengan gawẽq dose atao menghine dengan lain, ie masih bau teampunin! Laguq lamun ie menghine Roh Allah, ie ndẽq gen teampunin!

³² Lamun dengan ngucapang sopoq hal ngelawan Bije Manusie, ie bau teampunin, laguq lamun ie menghine Roh Suci, ie ndẽq gen teampunin, timaq mangkin atao ẽraq lẽq jaman saq mudian!"

³³ "Adẽq temauq buaq saq solah, lolone harus solah. Lamun lolone ndẽq solah buaqne ẽndah ndẽq gen solah. Jari, solah atao ndẽq lolone nike bau tetaoq lẽman buaqne.

³⁴ Side dengan jahat, berembẽ side bau ngucapang hal-hal saq solah lamun side jahat? Sẽngaq napi saq teucapang lẽq biwih tetentuang siq isi atẽne!

³⁵ Hal-hal saq solah sugul lẽman dengan saq solah sẽngaq ie penoq siq hal-hal saq solah. Laguq hal-hal saq jahat sugul lẽman dengan saq jahat sẽngaq ie penoq siq hal-hal saq jahat.

³⁶ Laguq Tiang badaq side: Lẽq jelo Penghakiman ẽraq, sebilang dengan harus betanggung jawab lẽq ucapan-ucapanne saq ndẽq araq manpaatne.

³⁷ Sẽngaq setetune, napi-napi saq sampun teucapang gen tekadu jari nentuang side salaq atao ndẽq."

³⁸ Beterus ahli-ahli Taurat dait dengan-dengan Parisi matur lẽq Deside Isa, "Paq Guru, tiang pade melẽt serioq sopoq tande lẽman Pelungguh."

³⁹ Laguq jawab Deside Isa, "Jahat gati dait durhake dengan-dengan lẽq jaman niki! Side pade mẽlẽ serioq Tiang miaq tande? Tipaq side pade ndẽq gen teicanin sopoq juaq tande kecuali tande Nabi Yunus.

⁴⁰ Sẽngaq pade maraq Nabi Yunus ndot lẽq dalem tian empaq saq belẽq telu jelo telu kelem ngonẽqne. Maraq nike ẽndah Bije Manusie gen ndot lẽq dalem tian gumi telu jelo telu kelem.

⁴¹ Lẽq jelo Penghakiman, penduduk kote Niniwe gen teidupang bareng kance dengan-dengan jaman niki, dait nuduh ie pade. Sẽngaq dengan-dengan Niniwe nike betobat lẽman dose-dosene sesampun ie pade dengah hotbah Nabi Yunus. Laguq mangkin lẽq deriki setetune araq saq belẽqan lẽman Nabi Yunus!

⁴² Lẽq jelo Penghakiman, ratu lẽman negeri Lauq gen teidupang bareng kance dengan-dengan jaman niki, dait nuduh ie pade. Sẽngaq jari dengahang pengajahan Nabi Sulaiman saq bijaksane, ratu nike dateng lẽman poton gumi. Laguq mangkin lẽq deriki setetune araq saq belẽqan lẽman Nabi Sulaiman!"

⁴³ "Lamun roh jahat sampun sugul lẽman manusie, roh nike begelining ojok taoq-taoq saq gero jari boyaq taoq mentelah, laguq ie ndẽq mauq.

⁴⁴ Keranaq nike ie gen muni, 'Tiang gen tulak ojok balẽ saq sampun tiang bilin.' Waktu ie dateng lẽq derike, daitne balẽ nike sampun kosong, bersi dait teratur.

⁴⁵ Beterus ie lalo dait jauq pituq roh lain saq jahatan lẽman ie. Terus ie pade tame ojok dalem dengan nike dait ndot lẽq derike. Dait ahirne keadaan dengan nike jari lengẽan lẽman saq mule. Hal saq maraq nike ẽndah gen telaksane tipaq dengan-dengan jahat jaman niki."

⁴⁶ Lẽq waktu Deside Isa masih bebaos kance dengan luwẽq nike, sanak-sanak kance mamiq bini Deside Isa dateng. Ie pade nganjeng lẽq luah sambil berusahe adẽqne bau bebaos kance Deside Isa.

⁴⁷ Sopoq lẽq antare dengan luwẽq nike matur lẽq Deside Isa, "Silaq cingakin mamiq bini dait sanak-sanak Pelungguh araq lẽq luah, ie pade gen bebaos kance Pelungguh."

⁴⁸ Laguq jawab Deside Isa, "Sai mamiq bini Tiang? Sai sanak-sanak Tiang?"

⁴⁹ Beterus Deside Isa nijoqang pengiring-pengiring-Ne dait bemanik, "Niki inaq dait semeton Tiang.

⁵⁰ Dengan-dengan saq ngelaksaneang pekayunan Bapa Tiang saq lẽq sorge ie saq jari semeton mame dait semeton nine serte inaq Tiang."

Matius

Video Matius 12

Ikuti Kami:

KONTAK | PARTISIPASI | DONASI