Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Piạ sěnsul᷊e su ěllon Sabatẹ̌, piạ e Mawu Yesus simahe wael'u gandung, manga murit'E e nanětạe němpaměnsạ gandung, kụ nahungkaěng batụ u kai seng kinal᷊unusang.
2 Sarangke kinasilon tau Farisi e ute i sire němpẹ̌berạe si Sie, "Kěllạe! Manga murit'U e limawang torat'i kitẹ dingangu němpẹ̌koạbe apan isẹ̌sěding su ěllon Sabatẹ̌."
3 Mawu Yesus simimbang, "I kamene kai ta nakạbasa apa kinoạ i Daud piạ i sie ringangu manga taumatane kinal᷊unusang?
4 I sie kawe simuẹ̌ su ral᷊ungu Wal᷊em Mawu Ruata; mase kimaěng borotẹ̌ nạung seng nakoạ sasěmba su Mawu. Sěmbal᷊iau tumuhụ torat'i kitẹ e, i sire sěndinganenge kawe pělli mahungkaěng borotẹ̌ ene kaiso mantịewen manga imange wotonge.
5 Arau kai wědang ta nakạbasa i kamene su ral᷊ungu torat'i Musa u apang ěllon Sabatẹ̌ e manga imang mẹ̌munara su Wal᷊em Mawu, kụ lụl᷊ampa atorang'u ěllon Sabatẹ̌, kai tawe nipẹ̌sal᷊a?
6 Tatingangko apa takụ niwera ini: ěndaị kai piạ limembong kasěllahe wọ'u Wal᷊em Mawu e.
7 Su ral᷊ungu Winohẹ Susi e mạbawohẹ: I kẹ̌kapuluku e kai pẹ̌kakakěndagẹ̌ e, wal᷊inewe sasěmba binatang. Kereu i kamene kahěnga-hěngang nakaěnna waweraku e, ute mambeng tawe sarung mapẹ̌sal᷊ang apan tawẹ sal᷊ane.
8 Baugu Ahus'u Taumata e kai kawasa su ěllon Sabatẹ̌ e."
9 Mawu Yesus naněntangken tampạ ene kụ simuẹ̌ su wal᷊em pẹ̌kakal᷊iomanengang.
10 Akutẹu sene kai piạ tau l᷊imane sěmbẹ̌ka nipatene. Pirang katau mědẹ̌deạ aị u mapẹ̌sẹ̌sal᷊a Mawu Yesus kụ měmpạkibal᷊o si Sie, "Botonge mapakapian masasakị su ěllon Sabatẹ̌?"
11 Mawu Yesus simimbang, "Mangawe piạ u sěngkatau wọu tal᷊oarang kamene piạ dombane, kụ su ěllon Sabatẹ̌ domba ene nataho su wangka maral᷊ung; kụ kereapa wue taghuang'u domba e tawe měněngal᷊ẹ̌ kụ mamatung domba e wọu lohange?
12 Kutẹu taumata e kawe limembom mạarěga wọu domba e! Kụ mạeng kerene, botonge wue mẹ̌tul᷊ungu taumata su ěllon Sabatẹ̌."
13 Bọu e i Yesus nẹ̌bera su tau limane nipatene sěmběka e, "Ul᷊uhẹ̌ko limanu." Tau ene něngul᷊uhẹ̌ limane, kụ lima ene napia kere limane sěmběka.
14 Arawe taumata'm Farisi e nahunsẹ̌bangke wọu wal᷊en pẹ̌kakal᷊iomanengange, mase němpẹ̌kakirẹ e mẹ̌deạu mamate.
15 Mawu Yesus nakahěngangke u tau Farisi e piạ dial᷊e rumokạ si Sie. I Sie rimal᷊engke wọu ene kutẹu kai nitol᷊eěngu taumata l᷊awọ-l᷊awọ, kụ i Sie napakapian kal᷊awọu masasakị.
16 Kụ i Sie nẹ̌sẹ̌dingken sire měmpẹ̌bawěken Sie su taumata wal᷊ine.
17 Ual᷊ingu ene ute nisěhụe apang pinẹ̌hengetang'u Mawu Ruata kere těbal᷊u Nabi Yesaya,
18 "Kai ini e rarolohang-Ku Takụ pinile, i Sie ikẹ̌kěndagẹ̌-Ku ringangu mětẹ̌tatal᷊ahino su naung-Ku e. Rohkẹ̌-Ku e Takụ isarakang si Sie, kal᷊aadilẹ̌-Ku e sarung ipakasingkạ su patikụ bansa.
19 I Sie tawe sarung manitori arau měmansagẹ̌, arau mẹ̌tahawerang su manga ral᷊eng gaghuwạ.
20 Hiung napěkuhẹ̌ e tawe pědiang'E ringangu sol᷊o mědẹ̌dusẹ̌ e tawe tiukang'E. I Sie sarung mẹ̌tatětol᷊ẹ̌ sarang makawunạ u kạadilẹ̌;
21 patikụ bansa e samatang mělẹ̌harapẹ̌ si Sie."
22 Ene niěntude su anun Yesus sěngkatau wuta ringangu ta kawawera ual᷊ingu pinẹ̌kawasaěngu rohkẹ̌ dal᷊akị e. Mawu Yesus napakaul᷊en tau ene hakịu i sie nakawera ringangu nakasilo.
23 Kal᷊awọu taumata e něngkaherang kụ němpẹ̌bera u, "Wal᷊inewe i Sie ini ngae Ahus'i Daud kere nạung su kẹ̌do e?"
24 Arawe tau Farisi nạung makạdingihẹ̌ ene, i sire němpẹ̌simbah'u, "Tau ěndaịe kětạeng makạpanokol᷊ẹ̌ rohkẹ̌ dal᷊aị e ual᷊ingu i Beelzebul, těmbonangu manga rohkẹ̌ dal᷊aị e, seng nangonggọu kawasa si Sie."
25 Mawu Yesus masingkạu tiněnnan tau Farisi e, kụ i Sie něhengetang si sire, "Kamageng kararatuang sěmbaụ mapahiạ pirang kamonaěng, mase sěmbaụ dingangu wal᷊ine mẹ̌daral᷊aị, ute kararatuang ene tawe tumei, kaiso mang maromba. Dingangu soa sěmbaụ arau wọu tal᷊oarang anạ u sěngkatau e mẹ̌kal᷊iaesẹ̌ kụ měmpẹ̌sẹ̌dụ sěmbaụ su wal᷊ine ute mang maghoghahẹ̌.
26 Kerene lai su ral᷊ungu kararatuang'u setang; kereu kamonaěng sěmbaụ měndal᷊aị kamonaěng bal᷊ine ute, kararatuang'u setange seng napahiạ-pahiạ kụ mang sarung magholang.
27 I kamene měbẹ̌bera u Iạ mạnokol᷊ẹ̌ rohkẹ̌ dal᷊aị ual᷊ingu kawasam Beelzebul. Kamageng kerene ute, kai ual᷊ingu kawasan sai tumatol᷊e si kamene e měmpanokol᷊ẹ̌ rohkẹ̌ dal᷊aị? I sire apan tumatol᷊e si kamene hala e mapẹ̌sẹ̌sal᷊an kamene!
28 Arawe Iạ e kawe mạnokol᷊ẹ̌ rohkẹ̌ dal᷊aị ual᷊ingu kawasan Rohkẹ̌ u Ruata. Kụ ene mangal᷊ene ute, Mawu Ruata e seng manětạ mẹ̌parenta su tal᷊oarang kamene!
29 Kereapa tangu makakasuẹ̌ su wal᷊en sěngkatau taumata matoghasẹ̌ kụ mamul᷊aho rarotonge, kereu i sie tawe mangikị tau matoghasẹ̌ e kal᷊imona? Mase wọu ene i sie wuhụe makapul᷊aho rarotonge.
30 I sain tawe manumbẹ̌ka wọu Iạ e ute nal᷊ahẹu i sie rumokạ si Siạ. Dingangu i sai tawe mẹ̌sumbala Siạ e ute, mambeng těngadẹ̌ makagholang hal᷊ẹ̌-Ku!
31 Ual᷊ingu ene ute, kěngkasingkạko, kereu i sai měkẹ̌koạ dosa ringangu měbẹ̌berang lahinakang, i sie wotonge i kaampung. Kai kamageng i sie měhinakang Rohkẹ̌ u Ruata e i sie tawe ikaampung!
32 Arawe kereu i sie kawe mẹ̌bẹ̌berang bawera ipěndokạ Ahus'u Taumata, i sie wotonge kaampung, arawe kamagengu i sie kawe měhinakang Rohkẹ̌ u Ruata ute, i sie tawe kaampungang, baẹ orasẹ̌ ini kerene lai su aheratẹ̌ e!"
33 "Mědeạu makahombangbe wuang kalu mapia e ute kalune harusẹ̌be lai mapia. Kereu kalune ral᷊akị, ute wuane mal᷊aing dal᷊akị. U kai wọu wuane kapẹ̌kiral᷊aěng kalune.
34 I kamene taumata ral᷊aị, i kamene kai makapẹ̌berawen mapia kereapa, kereu i kamene kawe ral᷊aị? Apang iwẹ̌bera'm mohong, ute ene kai tụtompẹ bọu ral᷊ungu naung!
35 Taumata mapia e kai měbẹ̌bera manga hal᷊ẹ̌ mapapia e batụ u i sie kai napenẹ u kapia. Arawe taumata ral᷊aị kawe mẹ̌bẹ̌bera manga hal᷊ẹ̌ daral᷊aị e batụ u i sie kai napenẹ u karal᷊aị.
36 Kụ pẹ̌tahěndungko: u su Ěllong Kiamatẹ̌, sěngkatau-sěngkatau e měnal᷊ud'u apam bawerane kụ tawe mẹ̌tatal᷊ahino.
37 U kai wọu manga waweranu hala e kụ sarung ipakẹ ipěnilakehu i kau měnsang nẹ̌sal᷊a arau nihino."
38 Bọu e pirang katau mananěntiro agama ringangu manga tau Farisi e němpẹ̌bera, "Tuang Guru, i kami kai mapulu reng makasilo si Tuang mẹ̌koạ tanda makạl᷊aherang."
39 "Apạe karal᷊aị dingangu kạduruhakane manga taumata tempo ini!" angkuěng u Mawu Yesus. "I kamene mědẹ̌dorong si Siạ pẹ̌koạ tanda makạl᷊aherang? I kamene tawe ghělirang u tanda makal᷊aherange maninglai tumbạu sěmbaụ, tabeạu katewe tanda makal᷊aherang i Nabi Yunus.
40 I Yunus e nạung těllu ěllo těllu hěbi su ral᷊ungu tiangu kinạ gẹ̌guwạ. Kerene lai Ahus'u Taumata e mal᷊aing těllu ěllo těllu hěbi su ral᷊ungu unid'u dunia.
41 Su Ěllong Kiamatẹ̌ tumanạ u Niniwe sarung měmpẹ̌bangung dingangu taumatang orasẹ̌ ini kụ měmpẹ̌hukung i sire. U taumatan Niniwe e kai seng němpẹ̌tobatẹ̌ bọu kal᷊awọu rosan sire, piạ i Yunus e seng měnẹ̌nasẹ̌ si sire. Kaiso orasẹ̌ ini e ěndaị piạkong lai nangělembong kasěllahe wọ'i Yunus e!
42 Su Ěllong Kiamatẹ̌ e, datu wawine wọu wanuan sěmběkang timuhẹ̌ e sarung mẹ̌bangung dingangu taumata orasẹ̌ ini e kụ měhukung i sire. U i sie riměnta wọu pondol᷊'u dunia e mědeạu makaringihẹ̌ kapanden Salomo. Kutẹu ěndaịe kawe piạ nangělembong kasěllahe wọ'i Salomo!"
43 "Kamageng rohkẹ̌ dal᷊aị e měmpẹ̌sěbang bọu pẹ̌sěngkatau, ute rohkẹ̌ ene měpẹ̌paiwuhị banua mamara mědeạu pěngirul᷊eěng, kaiso tawe makal᷊ahombang.
44 Ual᷊ingu ene i sie nẹ̌berau, 'Iạ sarung mẹ̌bal᷊ị kạpia su wal᷊e kụ seng takụ nitěntang.' Ene i sie nasongọe sene, kutẹu wal᷊e e kawe tạ taune, wurẹ̌si ringangu mahundugẹ̌.
45 Mase i sie rimal᷊eng kụ němaringang si sire pitu rohkẹ̌ bal᷊ine kụ limembong karal᷊aịe wọ'i sie. Bọu e i sire simuẹ̌ su tau ene, kụ nẹ̌tumanạ sene. Kụ pangěnsueěnge kakakoạu tau ene napal᷊iung karal᷊akịe wọu kal᷊amona. Kụ kerene lai sarung mariadi su taumata raral᷊aị orasẹ̌ ini."
46 Ene Mawu Yesus bẹ̌dang kạpěhengetange su taumata l᷊awọ-l᷊awọe, tangu narěntạe i ninang'E ringangu anạ u sěmbaụ'E. I sire mạhundarisị su l᷊ikude mědeạu mẹ̌bisaran Sie.
47 Sěngkatau wọu tal᷊oaran taumata l᷊awọe nẹ̌berạe si Yesus, "Tuang, i ninang dingangu manga anạ u sěngkataun Tuang e ene wawa su l᷊ikudẹ̌. I sire mapulu mẹ̌bisaran Tuang."
48 Mase Mawu Yesus simimbang, "I sai i ninang-Ku? I sai manga anạ u sěngkatau-Ku?"
49 Bọu e i Sie naněbọ su manga murit'E ringangu nẹ̌bera u, "Kakěllạe, kai ini e i ninang-Ku ringangu manga anạ u sěngkatau-Ku.
50 Taumata apam měmpẹ̌kẹ̌koạ kapulung Amang-Ku su Sorga, ute i sie anạ u sěngkatauku esẹ, anạ u sěngkatauku wawine ringangu i ninangku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA