Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wakisibesesongo 'iduanga wi do-domoteke yamogiooko de modidika, de wotagi wodotoko de wosihabari ma Jo'oungu ma Dutu wi demo 'o soa-soana gee kage'ena ma kakadate-dateoka.

² 'O Yohanes Wo'osi-'osiki 'o buioka de wogi'isene ma Kristus wi manarama, de wi do-domoteke yamuruo naga wakisuloko yaika yosano,

³ "'Aba, ngonau ne'ena? gee ma Jo'oungu ma Dutu wojajiokau 'ato dua wimoi woboa? Bolo salingou 'o nyawa 'ireguosi miodamaa?"

⁴ De 'o Yesus wosango 'onaka, "Niolio 'o Yohanesika de niosidemo 'okia niamake de nio'isene,

⁵ ma ngale yopilo-piloko yomasimake, yolugu-lugu 'idadi yotagi, yakipado-pado manga panyake 'i'aiki, de yakito-topongono yomasi'isene, yosonge-songenuku yomomiki, de yosusa-susaka 'o Habari ma Owa ma Jo'oungu ma Dutuno 'isitotara.

⁶ Yosanangioka 'o nyawa gee manga singina koikapulawa ngoino so koiitomuwa!"

⁷ 'O Yohanes wi do-domoteke yolioka, de 'o Yesus wokurue wobicara 'o nyawa yoku-kudaika ma ngale 'o Yohanes, wongose 'ato, "Tosanosi nginika! Ngini niotagi 'o tonaka 'ika-kakasaka ma ngale 'okia niodo'oa? Winilega 'o nyawa wimoi 'awi singina kairiiduwa 'isoka 'o 'ubutu 'o dadoko yauwa-uwaka? Ma rai ko'uwa!

⁸ Bolo niotagi 'okia nialega? Wimoi wi baju 'isure-sure? 'O nyawa manga baju 'isure-sure ge'ena yogogere 'o kadatoka!

⁹ So 'okia niodo'oa ngini niotagi? Winilega 'o nabii wimoi? Ma goungu, 'unasi 'ifoloi woamoko de 'o nabii.

¹⁰ Sababu 'o Yohanesikau ma dumutu 'o Buku 'Itebi-tebinoka 'ingose, 'Nu'una to ngoi 'ai demo wositota-totara, 'una towisuloko wosirano de de ngona, la ni ngekomo woniditiai.'

¹¹ Niongano-nganono! 'O duniaka ne'ena komoiwa moi 'ifoloi yoamoko de 'o Yohanes Wo'osi-'osiki. Ngaro koge'ena, ma 'o nyawa gee 'ifoloi yotingoono ma Jo'oungu ma Dutu wi pareta ma sigoronaka, 'ona 'ifoloi yoamoko de 'o Yohanes.

¹² Kaikurue 'o Yohanes wosihabari 'awi do-dotoko sigado ne'ena naga munuka yokiniiki ma ngale yomau 'itaiti yosigokoli ma Jo'oungu ma Dutu wi pareta.

¹³ Sigado 'o Yohanes Wo'osi-'osiki woboa, 'iodumu 'o Musa wi besesongo de 'o nabii manga do-dotoko 'isidemosirakau 'okia naga gee salingou 'idadi.

¹⁴ De nako ngini niomau niongaku, 'o Yohanes ge'ena la 'o Elia, gee wi bo-boa 'isidemosirakau.

¹⁵ Nako de nia ngaukoka, nio'isenika!

¹⁶ De 'okia salingou tositero 'o nyawa ma 'orasi ne'ena? 'Ona 'isoka 'o ngowa-ngowaka yogogerie 'o pasarioka. 'O bolu moi yongose 'ireguka,

¹⁷ 'Ngomi minidababoka 'irame-rame ma ngini koniosodawa! Ngomi mionyanyi 'o balisa ma nyanyi ma ngini koniobalisawa!'

¹⁸ 'O Yohanes woboano 'ijaga wopuasa. 'Una 'o 'anggur kowa'oke-'okeruwa. De 'o nyawa yongose 'ato, ''Una 'o tokata widongosamuku.'

¹⁹ Ne'ena 'o Nyawa ma Ngowaka woboano, 'una wo'odomo ma de wo'okere de yongose, 'Winimake 'o nyawa gu'una! 'Una witopokana de witaba'eto. 'Una 'o balasitengi yoga-ga'asoko de yosowo-sowono manga manai.' Ngaro koge'ena, ma 'o di-dibangi 'isure-sure ma Jo'oungu ma Dutuno, 'inyata naga 'o nyawa manga gokoieka."

²⁰ Ge'enaka de 'o Yesus wokurue wakisitobionika 'o kota-kotaka gee koyotoba-tobawa 'o sowono yodiai, ngaro ge'enaka 'ifoloi 'ikudai 'o no-nako 'ihera-herangi wodiai ma.

²¹ "Niotorouoka ngini 'o Korazim ma nyawa de 'o Betsaida ma nyawa! Sababu nako 'o no-nako 'ihera-herangi 'isoka nginioka ne'ena la 'idadiokau 'o Tirusoka de 'o Sidonioka, tanu 'ona ma do'ingou yotoba 'o sowono yodiai de yomasinoa 'o balisa ma pakeangi de manga mumuoka 'o kakawo yodonoaku.

²² Niongano-nganono! 'O dunia ma do-dogumoka dua, 'o Tirus de 'o Sidon 'ifoloi 'iku'arene manga hukumani de to ngini ne'ena!

²³ De ngini 'o Kapernaumoka! Ngini dua dakuou sigado 'o diwangoka? Ko'uwa! So 'ena dua 'o narakaka ni'umo. Sababu nako 'o Sodomioka la 'idadiokau 'o no-nako 'ihera-herangi gee 'isoka nginioka, tanu 'o kota ge'ena sigado ne'ena ka de ma 'enasi!

²⁴ Niongano-nganono! 'O dunia ma do-dogumoka dua 'o Sodom ma nyawa 'ifoloi 'iku'arene manga hukumani de to ngini ne'ena!"

²⁵ Ma 'orasi ge'ena 'o Yesus wolahidoa, "'Aba Jou, gee napareta 'o diwanga de 'o dunia! Ngoi to'alele, sababu 'iodumu ne'ena ngona konosidumutuwa 'o nyawaka gee yomamaoku yobarija de yanako 'o sagala moi-moi, ma ngona nosidumutu kiaka naga gee 'o nyawa yakimakeka koyoba-barijawa.

²⁶ Ge'enau 'ani singina yadaene 'Aba."

²⁷ Ge'enaka de 'o Yesus wongose, "'O sagala moi-moi 'ai Dea woisidukulakau. De komoiwa moi ngoi 'inako, duga ka 'ai Dea. De komoiwa moi 'ai Dea winako duga ka 'awi Ngowaka, de nago'ona gee 'o Ngowaka gu'una wakisinako.

²⁸ Nou, niaino ngoino nioodumu gee nioka-kangela de niamao nia gina 'itu-tubuso. Ngoi 'asa tinisisanangi.

²⁹ Niamoteke 'ai pareta de nimadotoko ngoino. Sababu ngoi 'ai singina 'ima'ai, so ngini 'asa niamao niosanangi.

³⁰ Sababu 'ai pareta ge'ena nisisanangi de nia gina tinikula mita 'iku'arene."

Matius

Video Matius 11

Ikuti Kami:

KONTAK | PARTISIPASI | DONASI