Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus nopaḷut nopoyaput ing koyow tatua kom murí-Nya mita tatua, nobuatdon Sia nongkon tua bo minayak notundú poḷat nopota'au in Habar Mopia kom bonu ing kotá mita monia.
2 Ki Yohanes inta kom bonu im panjara aindon nokodongog kon onu in inaidan i Kristus,
3 dá sia nopotabádon kom murínya mita nolibó ko'i-Nia nana'a: "Degá Ikowdon intau inta mamangoi podudui in dandi i Allah, andeka mogoḷatpa degá bui ing kami kon intau ibanea?"
4 Dá ki Yesus noguman ko'i monia, "Bayakdon bo poguman ko'i Yohanes onu inta ain dinongog bo inontong monimu.
5 Mo'ikow ain noko'ontong: intau biḷog moko'indoi, intau lempeng mokobayak, intau pinanyaki kusta inta moko'ondok nopia, intau bongoḷ mokodongog, intau minatoi nobangon bo Habar Mopia pinoyaput kon intau mita bogá.
6 Bo mosanangdon totok in intau inta totu-totu'u mopirisaya ko'i-Nakó."
7 Naonda im murí mita i Yohanes nobui, ininsilangandon i Yesus kon intau moántó tatua mongo ki ine ing ki Yohanes, kai-Nia: "Onubí i mangalenya mo'ikow mayak im padang gurun? Degá mo'indoi kom bonok inirup in tompot po'uik-po'untag?
8 Andeka mo'ikow mayak mongonu? Degá mo'indoi kon intau inta nogiḷambung mogagah? Intau inta nogiḷambung mogagah tampatnya kong karaja'anbí.
9 Dá degá onu mangale im baya'an monimu? Mo'indoi degá kon nabi? Totu'u! Poguman-Ku ko'i monimu, sia tua in no'iliubí kon nabi.
10 Sin sia tua inta aim pinais kom bonu im Buk Mosuci nana'a: Indoiai, Aku'oi ain nopotabá mangoi kon totabá-Ku umuna ko'ini-Mu, simbá sia momontang kon daḷan baya'an-Mu."
11 Poguman-Ku ko'inimu: "Kon sigad monia inta pinolahir im bobay diápa in no'iliu kong kokawasa i Yohanes mobobaptis tongá inta inanggap in intau mo'ompá kom bonu in dunia mobagu i Allah, kawasa-Nya in no'iliu ko'i Yohanes.
12 Mulaipa ki Yohanes Mobobaptis nogaid no'iyaput im masaín na'a, habar kon ki Allah mamangoi momarentah saḷaku raja sinokobayowan i intau mita inta mo'ibog monguasa.
13 Sing komintan nabi, bo kom bonu im buk i Musa aindon nopota'au kon onu inta mobalí, nodapot ing kinoángoian i Yohanes.
14 Bo -- aka mo'ikow mopirisaya -- siata ing ki Elia inta koángoiannya aim pinota'au muna.
15 Ki ine ing kobongoḷan, yo pokidongog.
16 Onu degá im mota'au-Ku popo'umpama'an kon intau masai na'a? Mosia tua náonda bo mongoádí mita inta limitú makow kom pasar inta momaḷú kon yobayat mita monia ibanea.
17 'Mo'ikow pogirupan nami kom bansí, ta'e mo'ikow doí motayok, pomanyanyian nami in lagu kinopatoian, tongá mo'ikow doíbí mongombaḷ.'
18 Ki Yohanes namangoi, sia diá nongaan bo diá nonginum kon anggur, ta'e kai monimu sia kinotoḷangan in dimbuḷó.
19 Onda intua Adí Intau namangoi, Sia nonga'an bo nonginum kon anggur, ta'e kai monimu, 'Indoaikah, Sia intau moturá bo yobayat im mo'o'igum kom pajak bo intau inta baradosa.' Ta'e kawasa i Allah pinoponyata ko'i-Nia."
20 Ki Yesus nomangkoi noningkule kong kotá mita, kotá inta mokakit totok pomiaan i Yesus kon soáḷ mita inta mokoherang. Sin intau mita kong kotá mita tatua doí mogogai im mogaid kon dosa mita monia.
21 (Ki Yesus noguman.) Koboditodon ikow Khorazim! Koboditodon ikow Betsaida! Sin aka intau in Tirus bo Sidon in noko'ontong kon soáḷ mita inta mokoherang inta ain nobalí kon yuá-yuák monimu, yo no'onggotdon mosia in nogogai nogaid kon dosa mita monia takin nomaké in ḷambung kinopatoian.
22 Tongá pokotoropdon, "Kon singgai pohakiman, hukuman kon intau mita in Tirus bo Sidon im moga'a-ga'an nongkon hukuman ko'i monimu.
23 Bo ikow Kapernaum, degá kaínimu kamai ikow diaanbí mamonik in ḷangit? Diápa ing kai-Nakó, ikow papoponag modapot in tampat inta diá ing kobiagan! Sin aka soáḷ mita inta mokoherang inta ain nobalí kon yuá-yuák monimu bo nobalí kon Sodom, yo kotá tatua in umuranpabí oyúon nodapot im masai na'a."
24 Manangka intua poguman-Ku ko'i monimu: "Kon singgai im pohakiman, hukuman kon intau mita in Sodom moga'a-ga'an nongkon hukuman ko'i monimu."
25 Ko wakutu intua nosingogdon ki Yesus kai-Nia: "Aku'oi mosukur ko'i-Nimu, Amá, Tuhan in ḷangit bo butá, sim bayongan intua binuni-Mu kon intau mita inta mobijaksana bo kon intau inta mopandoi, ta'e pinoponyata-Mu kon intau inta moyangkó.
26 Oh, Amá, tuata ing kino'ibog-Mu."
27 "Tua komintan aindon pinosarakan i Amá-Ku ko'i-Nakó, bo diá doman tobatúmai nonota'au kon Adí kolikudbí ing ki Amá, bo diá doman tobatúmai intau in nonota'au ko'i Amá kulikudbí in Adí bo intau inta kino'ibog in Adí popo'ontongan.
28 Koligaidon ko'i-Nakó, im bayongan intau inta nongoḷopídon bo intau inta kopota-pota'an im mosibuḷ, simbá ogoian-Ku ing kasanangan mo'ikow.
29 Aidaidon onu inta pinokíaid-Ku ko'inimu, bo duduidon kon oáid-Ku, mokopo'ompá kon dodia bo mokopoáḷus kon pososingog, dá ikow mokodungkuḷ kong kopia'an.
30 Sim parentah inta pinoguman-Ku im mopia, bo inta pinokíaid-Ku in diábí mororiga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA