Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karoonya i Yesu mampotundeka kami to anaguruNya to sampuyu pei dua etu pei mampokau kami yau, panewa Ia mayoko seja yako nja’u ria. Ia yau mangampotundeka pasi mampakarebaka tau tuntu i mPue Allah nja’u kota-kota to ri awenya.
2 Wali ri tempo etu i Yohanes to Pombaptis re’e ri raya ntarungku, pasi nja’u ria ia re’e mangandonge kareba mangkonong palaong to naika i ngKerisitu. Wali see naka ia mampokau anaguru to si ia yau resi i Yesu
3 damampotanaka resi Ia. Wali sira yau, panewa rata resi i Yesu sira mampotanaka, “Wimba koti Komi semo i Makole to dama’i ewa to room naparajanjika i mPue Allah, bara tiroowa re’e tau to yusa to kami damampeas?”
4 Wali i Yesu mangansono, to’oNya, “Pawolili muni pei pakarebaka resi i Yohanes gombo to nudonge ngkomi pasi palaong to nukita ngkomi.
5 To’oka ia tau to buta rapakatao muni matanya see mangkita muni rao. Pasi tau sampungku rapakatao muni witinya see maya malinja. Pasi tau to masaki malobo rapakatao muni yako ri panyaki etu. Pasi tau to wongo rapakatao muni talinganya see mangandonge muni rao. Pasi tau mate rawangu muni yako ri kapatenya. Pasi tau to masiasi rapakarebaka kareba to matao.
6 Pasi to’oka seja i Yohanes, ‘Masanang tau to taa mawali bata-bata rayanya mangkonong Aku. Apa monso pu’u Aku Makole parajanji i mPue Allah.’”
7 Wali yako etu anaguru i Yohanes mawolili muni resi ia. Ojo payoko nsira etu, i Yesu mampogomboka tau boros mangkonong i Yohanes. Ia manganto’o, “Tempo komi yau mampago i Yohanes nja’u pada bone seore, i sema to komi yau mangalo’a? Komi taa yau mangalo’a tau to duadua rayanya to raporapaka ewa santoko loe ntibu to tilengko-lengko natawuis nu ngoyu!
8 Pasi komi taa seja yau mangalo’a tau to magaya kojo pakenya, apa ane tau to magaya kojo pakenya, tau etu maroo nja’u banua makole, si’a nja’u pada bone.
9 Wali i sema kamonsonya nulo’a ngkomi? To pantuntu tuntu i mPue Allah semo to nulo’a ngkomi! Pei Aku manganto’oka komi, palaong to si ia bae wo’u batuanginya pei palaong nto pantuntu tuntu i mPue Allah to biasa, apa ia semo to napokau i mPue Allah damampatiruyu pei Aku, Makole parajanjiNya.
10 Wali mangkonong i Yohanes etu, re’e gombo i mPue Allah resi Aku, Makole parajanjiNya. Gombo etu ratulis ri raya ntuntuNya. Wali Ia manganto’o, ‘Aku damampokau tau to damangkeni gombongKu. Wali ewa naika ntau mampasilongaka yami i makole jaya see taa masuli palinjanya, ewa wetu seja tau to dakupokau etu damampatiruyu pei Komi damampasilonga raya ntau see sira damangaya Komi.’ Etu semo to nato’o i mPue Allah mangkonong palaong to naika i Yohanes.
11 “Wali Aku manganto’oka komi, monso pu’u tare pasi samba’a to lino to bae-bae wo’u angganya pei i Yohanes to Pombaptis. Pei nempo ewa see, ane ri tempo to darata, tempo i Pue Allah mawali Makole nto lino, tempo etu tau to kodi kojo angganya, tau etu bae wo’u angganya pei i Yohanes.
12 Pasi yako ri temponya i Yohanes to Pombaptis mamula mampotundeka tau mangkonong i Pue Allah seore rataka ri tempo si’i, boros kojo tau to mawali tau to Makolenya i Pue Allah. Pei re’e seja tau to yusa to mampobuuka matao nempo mangamusu tau see tau etu darapakasaaka mawali tau to Makolenya i Pue Allah. Pei sala pampobuuka ntau etu.
13 Apa samparia tuntu i mPue Allah to natulis i Musa tempo owi pasi to natulis nto pantuntu tuntunya yako tempo owi, samparia to etu paka manganto’o yami mangkonong palaong to damawali ri temponya i Pue Allah mawali Makole ri lino. Pasi i Yohanes mampotundeka seja tau mangkonong tempo etu.
14 Wali to pantuntu tuntu i mPue Allah tempo owi etu, sira manganto’o i Elia dama’i wo’u. Wali ane komi rani mansarumaka gombongKu, Aku manganto’oka komi, i Elia to nato’o nsira etu ia roomo nama’i wo’u. Apa i Yohanes, ia semo to nato’oka ntau tempo owi etu i Elia.
15 Wali i sema to nadonge ntalinganya, padongeka kojo.”
16 Wali yako etu i Yesu manganto’o wo’u, to’oNya, “Wali ewa si’i daKuika mamporapaka komi to tuwu ri tempo si’i to bo’onya mampodongeka kami dua i Yohanes. Komi raporapaka ewa ngana mayunu to mawongo-wongo nja’u pasar. Wali singga’a ngana mayunu etu maroso loonya manganto’oka galung nsira, ngana mayunu etu manganto’o,
17 ‘Tempo kita mawongo-wongo, tempo etu kami mampolengkoka lengko ntau to ndende rayanya tempo roa mpaporongo, pei komi taa rani mangika lengko ntau ndende raya sindarandara pei kami. Wali roo see kami sakawoo mampolengkoka wo’u lengko ntau to kawoowoo tumangi ri tempo re’e tau to mate, pei tempo etu komi taa seja rani kawoo-woo sindara pei kami.’ Etu semo gombo nu ngana mayunu to mawongo resi galung nsira nja’u pasar.
18 “Wali kami dua i Yohanes, kami raporapaka ewa ngana mayunu to rani mawongo, pasi komi maya kojo raporapaka ewa galunginya to taa rani mangalulu songka nsira etu. Apa tempo i Yohanes nama’i ia re’e mangorop pasi ia tare manginu tule anggur, wali komi taa rani mangalulu ia. Komi ojo manganto’o, ‘Ia napasuak measa!’
19 Roo see Aku, Wiyaa nto Lino, ma’i seja. Aku re’e mangkoni pasi manginu, pei komi taa seja rani mangalulu Aku. Komi ojo manganto’o, ‘Lo’a tau etu! Ia madoko pasi to panginu. Pasi Ia galungiNya tau to pantagi asele pasi tau to yusa to madosa.’ Ewa see nuto’o ngkomi to tuwu ri tempo si’i mampobo’o anu to napotundeka mami dua i Yohanes. Pei saba yako lengko to matao to naika ntau to mangalulu kami dua, yako etu miyala lengko ngkatuwu mami dua etu monso pu’u yako kapande i mPue Allah.”
20 Wali yako etu i Yesu mamula manganseko tau ri kota-kota to napongika i Yesu kaborosinya palaong to taa rapobiasa seore. Naka pei Ia manganseko sira apa nempo mangkita palaong to taa rapobiasa etu, sira bo’onya majea.
21 Wali i Yesu manganto’o, “Kasesa danurata ngkomi to yako ri kota Korasim! Kasesa danurata ngkomi to yako ri kota Betsaida! Apa komi taa majea nempo mangkita palaong to taa rapobiasa. Pei pobuuka kota Tirus pasi Sidon tempo owi. Kota etu maja’a kojo lengko ntaunya. Pei ane rapanya tempo owi etu Aku bara mangika palaong to taa rapobiasa nja’u kota etu, ane rapanya ewa see, tau ri kota etu majoli kojo damajea. Sira damamposunsuka kain karu pasi mangkaku awu pei mansambuetaka nto’u wawo mbo’onya apa soso kojo raya nsira mampobuuka dosanya. Ewa wetu ane rapanya tau etu mangkita palaong to inika ngKu.
22 Pei komi taa majea. Wali Aku manto’oka komi, ane tempo to darata, tempo i Pue Allah mangabotus to lino, tempo etu komi semo to pari-pari huku to danurata pei tau Tirus pasi Sidon etu.
23 Pasi komi to yako kota Kapernaum, wimba pampobuuka ngkomi? Wimba, ane tempo to darata komi bara daraokotaka mawali bae angga ndate saruga? Taa kojo! Komi darapakakodi angga la’u lipu ntau mate. Apa boros seja palaong to taa rapobiasa to roomo raika nja’u kota ngkomi pei komi taa seja majea. Pei ane rapanya palaong etu roomo raika nja’u kota Sodom tempo owi, ane rapanya ewa see tau Sodom etu matantu majea.. Wali ane ewa see, kota Sodom etu matantu tiroowa re’e ri tempo si’i.
24 Pei komi taa majea wali ane ratamo temponya i Pue Allah damangabotus to lino, tempo etu komi semo to pari-pari huku to danurata pei tau Sodom etu.”
25 Wali ri tempo etu i Yesu makai-kai resi i Pue Allah, Ia manganto’o, “O Pa’a, Pue nu yangi pasi lino, Aku mangabarong Komi apa Komi mangawunika yau anu to monso see taa nansani ntau to manga’angga kapande ngkoronya. Pei anu to monso etu Komi roomo mampaponsanika resi tau to tawa pande kojo ane ri pangkita nto lino.
26 Ewa see songka ngKomi, Pa’a, apa etu semo to mampakasanang rayaMu. Wali see naka Aku mangabarong Komi.”
27 Wali yako etu i Yesu manganto’o wo’u, “Samparia anu to re’e roomo nasarumakaka mPa’angKu resi Aku. Wali tare to maya mangansani kojo Aku, Ana i mPue Allah, kasimbalinya yako Pa’angKu. Pasi tare to maya mangansani kojo i Pue Allah, Pa’angKu, kasimbalinya yako Aku to AnaNya. Pei ane mangkonong tau, ojo tau to Aku rani mampaponsanika mangkonong Pa’angKu, ojo tau etu maya mangansani seja Ia.
28 “Wali samparia komi to manganga pasi to re’e kasusa to mabeu, mai resi Aku, panewa Aku damangawaika komi kalindo ndaya.
29 Lulu anu to Aku mampotundeka komi pei powali anagurungKu, apa Aku taa makasar pasi taa bae-bae rayangKu. Wali ane komi ma’i resi Aku, komi damangarata kalindo ndaya.
30 Apa anu to Aku mampotundeka komi etu taa masuli ralulu. Pasi palaong to Aku mangawaika komi, palaong etu raporapaka ewa kalemba to taa mabeu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA