Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de 'o 'Agamaka ma Hakimi yomalomu-lomuno go'ona yomakoki'oko de 'o Yesus wi'asa wisitaari 'o Pilatusika.

² Ge'enaka dau de 'ona wikalaki kayongosekau, "Ngomi mimake 'o nyawa nu'una 'o kawasa wakisi'asa 'isowo-sowonika. 'Una wakibaja la 'ona 'uwa yofangu 'o pajaki ma Kaisarika. De wongose 'ato 'una ge'ena ma Koana 'o Nyawa Wosilaha-laha gee ma Jo'oungu ma Dutu Wiiri-iriki gu'una."

³ Ge'enaka de 'o Pilatus wosano 'o Yesusika, "Ma goungu ngona 'o Yahudioka manga koana?" 'O Yesus wosango, "Ia, 'isoka to ngona 'ani demo."

⁴ So 'o 'imam ma sae-saekika de 'o kawasaka 'o Pilatus wakidongose 'ato, "Ma ngale powihukumu 'o nyawa nu'una, ge'ena ngoi ka moi ma kotodamakewa to 'una 'awi so-sowono."

⁵ Ma 'ona 'ifoloiosi yosigegoto yongose 'ato, "'O nyawa 'o Yudeaka wakisisau-sauku de to 'una 'awi do-dotoko la yomalawani. Wokurue 'o Galileaka de ne'ena wototarinou ne'enaka."

⁶ 'O Pilatus gee wo'isenoka ge'ena, de wosano, "'O nyawa nu'una 'o Galilea ma nyawa?"

⁷ Gee wisidemoka 'ato 'o Yesus wi 'asali 'o Galileano ge'ena la ma Koana 'o Herodes 'awi daeraano, so ge'enaka de 'o Pilatus 'o Yesus wisidingoto 'o Herodesika ma ngale 'una wihakimi. Ma 'orasi ge'ena 'o Herodes ge'ena 'o Yerusalemuoka mita.

⁸ 'O Herodes womorene ma sala gee wimake 'o Yesus, sababu 'o do'ingou wigi-gi'isene de womau wimake. 'Una wongano-nganonou 'ato dua 'o Yesus wodiai 'o no-nako 'ihera-herangi gee 'idadi wamake.

⁹ Sababu ge'ena 'o Herodes 'o gudai wokasano-sano 'o Yesusika, ma 'o Yesus ka ma eta ma kowosangowa.

¹⁰ 'O 'imam ma sae-saeke de 'o 'agamaka yodoto-dotoko mita yaika 'o Yesus wikalaki posironga wikuatoka.

¹¹ 'O Herodes de 'awi solodado wisisasaru de wisimae-maeke 'o Yesus de wisiawenuku 'o koana ma baju. Ge'enaka de wisidingotoli 'o Pilatusika.

¹² Ma wange ge'ena mita ma sira 'o Herodes de 'o Pilatus yomakadu-du'uduku ma yomagiamanaiokali.

¹³ 'O Yesus wisidingotikali 'o Pilatusoka, so 'o Pilatus, 'o 'imam ma sae-saeke de 'o 'agama ma balu-balusu de 'o kawasa wakipolu.

¹⁴ De wongose 'onaka, "'O nyawa nu'una wini'asano ngoioka de niongose bari 'o kawasa wakisiliba. Ma to ngini nia bionoka ne'ena ngoi towilega ma diaiokau ma ka moi ma kotodamakewa to 'una 'awi dingkai gee ngini nioka-kalaki.

¹⁵ Koge'enali mita 'o Herodes 'awi di-dibangi, sababu 'una mita wisidingotokali 'o Yesus ngomino. 'O nyawa nu'una koyadaenuwa powihukumu powiso-songene, sababu koi'iwa wadiai gee yadaene powihukumu koge'ena.

¹⁶ So dua ngoi tosuloko wipa'asanoka deika towipidilikau."

¹⁷ [Moteke to 'ona manga 'adati, Wakisisupu ma Wange ma Amoko 'isinoimi 'o Pilatus salingou 'o bui ma nyawa moi wosisupu, so 'o Pilatus tanu 'o Yesus wipidili.]

¹⁸ Ma 'o nyawa yomato-toomuno ge'enaka yoodumu yoma'orese yongose 'ato, "Winito'oma! De 'o Barabas winisisupuno ngomino!"

¹⁹ 'O Barabas wibuika sababu 'unau so 'ikaruahe, ma de 'idadi 'o do'oma 'o kotaka.

²⁰ 'O Pilatus womau 'o Yesus wipidili, so ma moiosi wobicara 'o nyawa yoku-kudaika go'ona.

²¹ Ma 'ona yosigaso-gasoko, "Powisidele 'o salipoka! Powisidele 'o salipoka!"

²² Ge'enaka de ma warasa ma sa'ange wongose 'onaka, "Ma 'okia 'awi dingkai? Ngoi ka moi ma kotodamakewa 'awi sala gee yadaene powihukumu powiso-songene! So ngoi dua tosuloko 'o nyawa wipa'asanoka deika towipidili."

²³ Ma 'ona koyomaogoruwa yomapoaka manga guata ma yodobootoka 'ato 'o Yesus salingou powisidele 'o salipoka. De ma duanguku manga ga-ga'asoko ge'ena 'o Pilatus wosimoteke.

²⁴ So ma rai 'o Pilatus wosiputusu 'o Yesus wiso-songene moteke 'o nyawa go'ona manga mau,

²⁵ de wisisupu 'o nyawa gee moteke to 'ona manga ga-ga'asoko, ge'ena la 'o Barabas gee wibuika sababu 'o dingkai de 'o do'oma wosi'asa-'asa. Ge'enaka de 'o Yesus wisisarakani 'onaka la wikadiai moteke to 'ona manga mau.

²⁶ Ge'enaka de 'o solodado wi'asa 'o Yesus ma ngale wisidele 'o salipoka. 'O ngekomo ma goronaka de yomakamake de wimoi wi ronga 'o Simon, 'awi 'asali 'o Kireneno, gee 'awi soanoka de waino so wowosamou 'o kotaka. De witagoko so wisahu wamoku 'o salip ge'ena 'o Yesus widudunino wotu-tu'uru.

²⁷ 'O nyawa manga gudai 'o Yesus wisidu-du'uru, ge'enaka dau mita 'o nge-ngeweka yamuruo naga gee 'o Yesus widagari de widoto-tora.

²⁸ Ma 'o Yesus womapulutuoko 'onaka de kawongosekau, "Ee ngini 'o Yerusalemuoka ma nge-ngeweka! 'Uwa nidagari ngoi. Nimadagari ngini ma sirete de nia ngowa-ngowaka.

²⁹ Sababu dua 'asa ma 'orasi ya'adono, 'o nyawa 'asa yongose 'ato, 'Yosanangioka 'o nge-ngeweka gee koma'iwa manga roesoka, gee koma'iwa de manga ngowakoka, de koma'iwa manga ngowaka yosisusu!'

³⁰ Ge'enau ma 'orasi 'o nyawa 'asa yongose 'o gi-gigieka, 'Minitapadu ngomiku!' de 'o diko-dikoka yongose, 'Minididumu ngomiku!'

³¹ Sababu ngoi 'ai so-sowono koi'iwa ma 'idiaiokau kone'ena, ge'ena dua 'ifoloiosi 'itorou yakidiai 'o nyawa gee yosowo-sowonika!"

³² Gee 'o Yesus wi'asa ma ngale wisidele, de naga yoti-tingkai yamididi mita yaki'asa ma ngale yakisiduhukumu yakiso-songene de 'o Yesus.

³³ Gee ya'adono 'o ngii moi ma ronga "'O Saeke ma Kobongo ma Ngii", de 'o Yesus wisidele 'o salipoka. De yamididi yoruta-ruta go'ona mita yakisidele, wimoi 'o Yesus 'awi giniraoka de wimoi 'awi gubalioka.

³⁴ Ge'enaka de 'o Yesus wolahidoa ma Jo'oungu ma Dutude, wongose 'ato, "'Aba, 'uwa nosi-singina 'o nyawa gee 'isisa-sangisara no'ona manga di-diai! Sababu 'ona koyanakowa 'okia yodiai." 'O solodado gee 'o Yesus wiside-sidele 'o ngi-ngiriki yodiai la 'o Yesus 'awi pakeangi yomasibula.

³⁵ 'O nyawa manga gudai yoma'oko-'okode ge'enaka de youngi-ungini, 'ena 'o Yahudioka manga balu-balusu wisimae-maeke 'o Yesusika kayongosekau, "'Una wosilahakau 'o nyawa 'iregu; bika ne'ena 'unali ma sirete womasilaha nako la ma gou-goungu 'una 'o Koana 'o Nyawa Wosilaha-laha gee ma Jo'oungu ma Dutu Wiiri-iriki."

³⁶ 'O tentara mita yositi-tingoono 'unaka. 'Ona yaino de wikula 'o daluku ma cuka

³⁷ de kayongosekau, "Nako ngona 'o Yahudioka manga koana, bika ngona ma sirete nomasilaha!"

³⁸ 'O Yesus 'awi si-sideloka 'awi saeke ma dekude 'isilefoka konee, "Nu'una 'o Yahudioka manga Koana."

³⁹ Woti-tingkai wimoi gee wisidelika 'o Yesus wi dateoka, wositi-tingoono 'o Yesusika kawongosekau, "Ngona ne'ena 'o Koana 'o Nyawa Wosilaha-laha gu'una, bolo? Bika ngona ma sirete nomasilaha ma de minisilaha ngomi mita!"

⁴⁰ Ma woti-tingkai wimoioli witawanono 'unaka, wongose 'ato, "Ngona konimodonguawa ma Jo'oungu ma Dutuka? Ngona mita nihukumu niso-songene 'isoka 'unali,

⁴¹ duga to ngone 'inamididi nanga hukumani 'imakadaene de nanga di-diai. Ma 'una 'awi so-sowono ka ma eta ma koi'iwa!"

⁴² Ge'ena 'iduanga de wongoseli, "Ee Yesus, noisi-singina dua gee noboali ma ngale nokoana de nopareta!"

⁴³ De 'o Yesus kawongosekau 'unaka, "Ma goungu, ne'ena ma wange dua ngona de de ngoi 'o ngii yaowa-owaka ge'ena la 'o sorogaaka."

⁴⁴ Poilia 'o wange 'ikorona de ma daeraa ge'ena 'itarusu ka ma moiku sigado 'o wange 'ilengeka, sababu 'o wange koisiwaruwa so.

⁴⁵ De ma Jo'oungu ma Dutu 'awi Ngii ma da-datoko 'iside-sideluku ge'ena 'iracanga 'itaga modidioka.

⁴⁶ Ge'enaka de 'o Yesus womasigasoko waamo-amokie, "'Aba, tomasisarakani ngonaka!" Koge'ena wongoseka de wosongenokau.

⁴⁷ 'O tentara manga balusu gee wamake 'okia naga 'idadiokau, de wisiarene ma Jo'oungu ma Dutu. Ge'enaka de kawongosekau, "Ma gou-goungu to 'una 'awi sala koi'iwa!"

⁴⁸ 'O nyawa yoku-kudai yoboa-boano youngi-ungini ge'enaka gee yakokimake 'okia naga 'idadi-dadiokau. So gee yolio de yosigari-gari sababu manga singina posironga 'isusaka.

⁴⁹ De 'o Yesus 'awi ma-manai de ma nge-ngeweka 'o Galileano gee wimote-motekino, 'ona yoodumu yomatingaika yoma'okode 'o gurutika de yolega-lega 'iodumu gee 'idadi-dadi ge'ena.

⁵⁰ Naga wimoi 'awi ronga 'o Yusuf, 'awi 'asali 'o Arimatea ma soanino 'o Yudea ma daeraaka. 'Una 'awi singina 'itiai de 'o nyawa wihoromati, de womada-damaa ma 'orasi ma Jo'oungu ma Dutu wopareta ma ngale wokoana. Ngaro 'una ge'ena 'o 'Agamaka ma Hakimino mita, ma 'una kowosimotekuwa manga butusangi de manga di-diai ma ngale 'o Yesus wihukumu wiso-songene.

⁵¹ (23:50)

⁵² 'Una waika 'o Pilatusika woga'asoko 'o Yesus 'awi songene la wipo'osuku.

⁵³ 'O Pilatus wosimoteke so 'o Yusuf wotagi wosiguti 'o Yesus 'awi songene 'o salipoka de 'o songene ma sa-sao 'o mosa 'i'are-'arese wosisaono. Ge'enaka de wanoaku 'o bo'osuku ma sungioka gee komoiwasi yakidobo'osuku. Ma bo'osuku ge'ena 'o tetoka yodosonotoika.

⁵⁴ Ge'ena ma wange 'o Juma'ati ma wange, ma ngale Pomaoma-omasa ma Wange rekeni 'ikuruekau.

⁵⁵ 'O nge-ngeweka 'o Galileano yoboa-boano de 'o Yesus, yomoteke de 'o Yusuf, yalega 'o bo'osuku ge'ena. 'Ona yalega mita kokia wanoa 'o Yesus 'awi maieti ge'ena 'o bo'osuoka.

⁵⁶ Ge'enaka de yolio yokalari 'o goooro de 'okia sonaa ma bounu yaowa-owa la yosiesaka 'o Yesus 'awi songenika. Ma Pomaoma-omasa ma Wangeka, 'ona yomaogoroka yomanarama, ma ngale yosingounu to 'ona manga 'agama ma 'atorangi.

Lukas

Video Lukas 23

Ikuti Kami:

KONTAK | PARTISIPASI | DONASI