Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Selapuq dengan saq araq lẽq sidang nike nganjeng, terus Deside Isa tejauq ngadep Pilatus.

² Lẽq derike ie pade mulai tuduh Deside Isa, basen ie pade, "Tiang pade ndait Dengan niki nyesatang rakyat. Ie balaq dengan bayah pajek lẽq Kaisar, sẽngaq Ie badaqang diriqne Almasih, sopoq Raje."

³ Terus Pilatus metakẽn lẽq Deside Isa, "Napi tetu Pelungguh raje dengan Yahudi?" Jawab Deside Isa, "Maraq nike basen Pelungguh."

⁴ Make Pilatus bebase lẽq imam-imam kepale dait dengan luwẽq nike, "Tiang ndẽq ndait sopoq juaq kesalaqan lẽq Dengan niki."

⁵ Laguq ie pade sayan maksaq dait bebase, "Siq pengajahan-Ne Ie hasut dengan lẽq selapuq Yudea; penembẽqne lẽq Galilea dait mangkin sampun dateng deriki."

⁶ Sewaktu Pilatus pirengang hal nike, ie beketuan, "Napi Dengan niki dengan Galilea?"

⁷ Dait sewaktu ie nenaoq bahwe Deside Isa asalne lẽman daẽrah kekuasean Herodes, Pilatus prẽntah dengan adẽqne jauq Deside Isa ojok Herodes, saq waktu nike araq ẽndah lẽq Yerusalem.

⁸ Herodes seneng gati waktu nyereminang Deside Isa, sẽngaq sampun ngonẽq gati ie pireng mengenai Deside Isa, dait melẽt sereminang Deside Isa. Herodes beharep mauq nyaksiang Deside Isa piaq muqjizat.

⁹ Keranaq nike Herodes beketuan luwẽq hal lẽq Deside Isa, laguq Deside Isa nẽnten bejawab napi-napi.

¹⁰ Imam-imam kepale dait ahli-ahli Taurat nganjeng dait nyampẽang tuduhan-tuduhan saq berat tipaq Deside Isa.

¹¹ Make Herodes dait prajurit-prajuritne ngoloq-oloq dait menghine Deside Isa, terus kaduangne jubah kehormatan, dait jauq Ie tulak ojok Pilatus.

¹² Lẽq jelo nike ẽndah Herodes dait Pilatus, saq sendẽqmanne bemusuhan jari besahabat.

¹³ Pilatus ngumpulang imam-imam kepale, pemimpin-pemimpin dait rakyat,

¹⁴ dait bebase lẽq ie pade, "Side pade jauq dengan niki ojok tiang dait paran Ie nyesatang dengan-dengan lain. Mangkin lẽq julu side pade sampun tiang periksaq Ie, dait selapuq kesalaqan saq side pade tuduhang tipaq Ie ndẽq araq saq tiang ndait lẽq Ie.

¹⁵ Maraq nike ẽndah pendapet Herodes, sẽngaq ie ẽndah sampun suruq dengan jauq Deside Isa nike tulak ojok tiang pade. Ndẽq araq sopoq juaq kesalaqan-Ne saq miaq Ie patut tehukum matẽ.

¹⁶ Keranaq nike, tiang gen pecut Ie dait bẽbasang Ie."

¹⁷ [Sebilang perayaan Paskah, Pilatus bẽbasang sopoq tahenan tipaq rakyat.]

¹⁸ Selapuq dengan saq bekumpul lẽq derike nyurak, "Matẽq Ie! Bẽbasang Barabas tipaq tiang pade!"

¹⁹ (Barabas tebui lantaran miaq keributan lẽq dalem kote dait nyematẽq dengan.)

²⁰ Pilatus kayun bẽbasang Deside Isa, keranaq nike ie bebase karing sekali tipaq dengan luwẽq nike.

²¹ Laguq ie pade nyurak, "Pakuq Ie lẽq kayuq salib! Pakuq Ie lẽq kayuq salib!"

²² Terus saq ketelu kaline Pilatus bebase lẽq ie pade, "Laguq pegawẽan jahat napi saq sampun Ie piaq? Tiang ndẽq ndait sopoq kesalaqan lẽq Ie saq miaq Ie patut tehukum matẽ. Tiang gen pecut Ie, terus gen tiang bẽbasang Ie!"

²³ Laguq ie pade tetep nyurak sekuat-kuatne bahwe Deside Isa harus tepakuq lẽq kayuq salib. Dait ahirne surakan ie pade menang.

²⁴ Beterus Pilatus mutusang adẽq tuntutan ie pade tekabulang,

²⁵ dait bẽbasangne dengan saq tebui lantaran pemberontakan dait nyematẽq dengan pade maraq saq tetuntut siq ie pade. Terus Deside Isa teserahang tipaq ie pade jari teperlakuang semẽlẽ ie pade.

²⁶ Beterus Deside Isa tejauq siq ie pade. Lẽq tengaq kelampanne, ie pade bedait kance sopoq dengan aranne Simon, saq asalne lẽman Kirene, saq kenyeke tame kote. Ie pade paksaq Simon ngelẽmbah kayuq salib nike dait lampaq lẽq mudi Deside Isa.

²⁷ Luwẽq dengan ngiring Deside Isa; lẽq antarene araq ẽndah dengan-dengan nine. Dengan-dengan nine nike ngerung dait tangisin Deside Isa.

²⁸ Laguq Deside Isa ngẽngat andang ie pade dait bemanik, "Hai, putri-putri Yerusalem! Ndaq tangisin Tiang. Laguq tangisin diriqde mẽsaq dait bije-bijende.

²⁹ Sẽngaq gen dateng waktune dengan gen bebase, 'Aget gati dengan-dengan nine saq ndẽq uwah betian, saq ndẽq uwah bedowẽ bije dait ndẽq uwah penyusuq bebẽaq!'

³⁰ Lẽq waktu nike ẽndah dengan gen bebase tipaq gunung-gunung, 'Silaq ndet tiang pade!' Dait tipaq bukit-bukit, 'Silaq tumput tiang pade!'

³¹ Sẽngaq lamun lẽq kayuq saq masih idup, dengan sampun piaq maraq niki, lebih-lebih saq gen ie pade piaq lẽq kayuq saq gero!"

³² Araq ẽndah due dengan lain -- deduaqne dengan jahat -- saq ie pade jauq jari tehukum matẽ bareng kance Deside Isa.

³³ Sesampun dateng lẽq taoq saq tearanin, "Jerangkong", ie pade pakuq Deside Isa lẽq kayuq salib bareng-bareng kance due dengan jahat nike -- sopoq lẽq sedi kanan dait sopoqne malik lẽq sedi kiri-Ne.

³⁴ Beterus Deside Isa bedo'e, "Bapa, ampunin ie pade! Sẽngaq ie pade ndẽq ngerti napi saq ie pade piaq." Ie pade bagi kuace Deside Isa kadu undian.

³⁵ Dengan luwẽq nganjeng lẽq derike sambil manto, lẽq waktu nike ẽndah pemimpin-pemimpin Yahudi ngoloq-oloq Deside Isa, dait bebase, "Ie sampun selametang dengan lain; dait mangkin alurang Ie selametang diriq-Ne mẽsaq. Tekan Ie Almasih, saq tepilẽq siq Allah?"

³⁶ Prajurit-prajurit ẽndah ngoloq Deside Isa. Ie pade dateng dait ngebẽng Deside Isa aiq anggur saq pedis

³⁷ dait bebase, "Lamun Side raje dengan Yahudi, selametang diriq-De."

³⁸ Lẽq bagian atas kayuq salib Deside Isa, tetoloq tulisan: "Niki Raje Dengan Yahudi."

³⁹ Salaq sopoq penjahat saq bareng tepakuq lẽq kayuq salib menghine Deside Isa. Ie bebase, "Tekan Side Almasih? Nah, selametang diriq-De dait tiang pade!"

⁴⁰ Laguq penjahat saq sopoqne malik peringet baturne nike, "Napi side ndẽq takut lẽq Allah sẽngaq side ẽndah tehukum matẽ pade maraq Ie.

⁴¹ Hukumante kance due mule setimpal kance perbuatante, laguq Ie niki, ndẽq araq perbuatan-Ne saq salaq!"

⁴² Terus ie bebase, "Deside Isa, iling lẽq tiang lamun Pelungguh rauh jari Raje!"

⁴³ Manik Deside Isa, "Tiang badaq side, setetune jelo niki ẽndah side gen bareng kance Tiang lẽq Pirdaus."

⁴⁴ Kire-kire jam due olas tengari, ndẽq araq sinar jelo, dait selapuq negeri nike jari peteng gati jangke jam telu kebian.

⁴⁵ Kelambu saq araq lẽq dalem Gedẽng Allah, soẽk jari due.

⁴⁶ Beterus Deside Isa bekuih keras-keras, "Bapa! Lẽq gading Deside Tiang serahang nyawe Tiang!" Sesampun bemanik maraq nike, Ie nyerahang nyawe-Ne.

⁴⁷ Waktu kepale pasukan serioq hal nike, ie mulieang Allah. Terus ie bebase, "Setetune Deside Isa ndẽq salaq!"

⁴⁸ Dengan luwẽq saq dateng manto lẽq derike, serioq selapuq saq telaksane. Beterus selapuqne pade ulẽq dait nyesel gati angenne.

⁴⁹ Dait selapuq kenalan Deside Isa lantong dengan-dengan nine saq ngiring Ie lẽman Galilea, nganjeng lẽman jaoq dait serioq selapuqne nike.

⁵⁰ Araq sopoq dengan aranne Yusup, asalne lẽman kote Arimatea lẽq negeri Yudea. Yusup niki dengan solẽh saq tehormatin siq dengan, dait saq kenyeke ngantos Kerajaan Allah. Timaq ie anggote Mahkamah Agame, ie ndẽq setuju siq keputusan dait tindakan mahkamah nike.

⁵¹ (23:50)

⁵² Yusup niki lumbar ngadep Pilatus dait tunas adẽq jenazah Deside Isa teserahang lẽq ie.

⁵³ Terus ie turunang jenazah Deside Isa lẽman kayuq salib, dait bungkusne kadu kain lẽnen alus saq putẽq. Sesampun nike, toloqne jenazah Deside Isa lẽq makam saq tepiaq lẽq dalem bukit batu -- makam nike ndẽq uwah tekadu.

⁵⁴ Jelo nike jelo persiepan; sẽngaq jelo Sabat gen mulai.

⁵⁵ Dengan-dengan nine saq ngiring Deside Isa lẽman Galilea turut Yusup dait serioq makam nike. Ie pade serioq ẽndah berembẽ entan jenazah Deside Isa tetoloq lẽq dalem makam.

⁵⁶ Terus ie pade ulẽq dait siepang ramuan-ramuan dait minyak sengẽh jari minyakin jenazah Deside Isa. Lẽq jelo Sabat, ie pade mentelah begawẽan jari taat lẽq Hukum Taurat.

Lukas

Video Lukas 23

Ikuti Kami:

KONTAK | PARTISIPASI | DONASI