Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lun mula' ineh pana' nudur idi nenguit Yésus amé' matun Pilatus,
2 idi amung-amungdeh nengimun ngadu' Neneh, keburi'deh, "Kai nekali' lemulun ini nengeraruh pupu kai, idi nemebpeng lemulun na maré acam kuan raca' Rum, idi nemala bururNeh Keristus, seburur raca'."
3 Idi Pilatus pana' nengitun Neneh, keburi'neh, "Ikoké Raca' lun Yahudi?" Idi Yésus nengor balaneh, keburi'Neh, "Mepad kudeng balamu."
4 Idi kebala Pilatus kuan imam-imam rayeh idi lun mula' ineh teh, "Ui kali' lemulun ini na sala' anun-anun pana'!"
5 Idi meluun tueh lun mula' mesaad, keburi'deh, "Ieh ngagau pupu ini idi mada' lemulun libut-libut tana' Yudia rat Galilia macing su ini."
6 Kareb Pilatus neninger ratnan ineh, idi ieh nengitun kudeng lemulun ini lun Galilia.
7 Kareb ieh nekali' Yésus ineh iniap bang imet Herodés, idi ieh nengecuk nguit Neneh amé' matun Herodés luk idi déi' Yerusalim bang kareb ineh.
8 Kareb Herodés nenier Yésus, ieh pelaba awang niat, ngaceku pangeh mio ieh sikal nier Neneh, ngaceku ieh pangeh neninger mula' bala ratnan Ieh idi merapet miak nier aceh tanu' luk pangeh inau'Neh.
9 Idi Herodés nengitun Yésus tuda'-tuda' itun, iamo' Yésus na nengor sebila' bala pana'.
10 Imam-imam rayeh, idi guru-guru Ukum ineh iné' muneng idi nengadu' Yésus dengan tuda'-tuda' adu' luk meberat.
11 Herodés dengan lun pebunu' ineh pana' nengedat idi nesitunga Neneh. Idi ideh nengayung Neneh ku ayung luk do', idi nengecuk nguit Neneh lemubed amé' ni Pilatus.
12 Idi rat aco sineh teh Herodés idi Pilatus neperurum seburur dengan seburur ngaceku atun inan kedaluh arang didueh.
13 Pilatus nenawar imam-imam rayeh idi lun rayeh-rayeh idi lun mula' nepamung,
14 keburi'neh nedeh, "Muyuh pangeh nenguit lemulun ini kuanku ayu-ayu Ieh kudeng selemulun luk ngeraruh pupu ini, idi ui pangeh nengelio Neneh pa kiung muyuh, iamo' sebuleng sala' pana' nateh nekali'ku inau'Neh maya' kudeng luk inadu' muyuh.
15 Herodés pana' nateh nekali' sala'Neh, ngaceku ieh pana' nemaré Neneh lemubed amé' netau. Na luk inau' lemulun ini pad Ieh ngalap ukum maté.
16 Ngaceku ineh nekini ui miak ngecuk nelun mebal Neneh idi muit Neneh."
17 Anid Irau Paska Pilatus megéi muit seburur lemulun luk tinutup kuandeh.
18 Iamo' lun mula' nengitang, keburi'deh, "Ngaté lemulun ini, idi muit Barabas kuan kai!"
19 (Idi Barabas ineh seburur lemulun luk tinutup ngaceku ieh nenganau' mula' ria' bang bawang ineh ngaceku ngaté lemulun.)
20 Idi sekua' teh Pilatus nepebala kuandeh, ngaceku pianneh muit Yésus.
21 Iamo' ideh nengitang, keburi'deh, "Nalib Neneh! Nalib Neneh!"
22 Idi keteluh kua' Pilatus nengitun nedeh, "Dat anunké luk inau'Neh? Ui na kali' sebuleng sala'Neh pana', pad Ieh ngalap ukum maté. Ui miak ngecuk nelun mebal Neneh idi muit Neneh."
23 Iamo' ideh pelaba saad ngitang mutuh Neneh ruen nalib. Idi piandeh luk binaya' peh.
24 Pilatus nemaré ukum maté kuan Yésus maya' putuhdeh ineh.
25 Ieh nemuit lemulun luk tinutup ngaceku ieh nenganau' mula' ria' idi ngaté lemulun, maya' kudeng luk pinutuhdeh, iamo' Yésus biréneh maya' luk pian niatdeh.
26 Ideh nenguit Yésus nalan. Idi kareb ideh nalan, ideh nepapu' seburur lun Kiréni, ngadanneh Simun, luk nacing rat mado. Ideh nengakem neneh, idi nengerareng salib luun tudungneh, pad ieh maan ineh maya' puet Yésus.
27 Idi pelaba ula' lemulun nemaya' Neneh. Idi inan teh tuda'-tuda' decur luk netemido idi nangi' Neneh.
28 Iamo' Yésus nelumi nedeh idi nepebala, "O anak decur Yerusalim, aleg muyuh nangi' Negku, iamo' do' muyuh nangi' burur muyuh sebuleng idi anak-anak muyuh teh.
29 Ngaceku aconeh miak macing kareb lemulun pebala, 'Samal kuan decur luk na anak idi nakan luk na miak mali', idi iti' luk na tiniti' anak!'
30 Kareb ineh teh lemulun miak pebala kuan pegkung, 'Ngeritep nekai!' idi kuan surud-surud, 'Ngakeb nekai!'
31 Ngaceku kudeng kekamen ini mangun kareb kayuh mebata', anunké luk mangun kareb kayuh ineh tekering?"
32 Idi ideh nenguit dueh burur lemulun luk dat pad didueh pitayen dengan Yésus.
33 Kareb ideh nacing su luk inan ngadanneh Perupuk Uluh, idi ideh nenalib Yésus pad-pad dengan dueh burur lemulun luk dat ineh, sebuleng pa tinuehNeh idi sebuleng pa kabing.
34 Idi kesembayang Yésus, "O Ama', maré do' kuan lemulun ineh ngaceku na ideh kali' luk inau'deh. Idi ideh nenala' udi idi nemabpat ayungNeh arangdeh.
35 Lun mula' ineh netuped nier. Iamo' lun rayeh lun Yahudi nesitunga Neneh, keburi'deh, "Ieh pangeh nengulun lun baken, nekini nima' Neneh ngulun bururNeh sebuleng, kudeng matu Ieh Keristus Allah luk pinili'."
36 Idi lun pebunu' pana; nesitunga Neneh. Ideh iné' Neneh idi nemaré abpa' luk malam kuanNeh,
37 kebaladeh, "Kudeng Iko Raca' lun Yahudi, do' ngulun bururMu sebuleng!"
38 Idi inan aceh bala inayud pa luunNeh kudeng ini, "Ini Raca' lun Yahudi."
39 Idi seburur ratnan lemulun luk dat luk tekito denganNeh ineh nenguyo Neneh, "Bakenké Iko ini Keristus? Ngulun bururMu sebuleng idi kai pana'!"
40 Iamo' luk baken ineh nemebpeng neneh, keburi'neh, "Naké iko matot inan Allah? Amung tau pangeh inukum maté.
41 Kiteh kali' rungen inukum dengan matu, ngaceku kiteh ngalap ua' luk petulu dengan kekamen kiteh; iamo' lemulun ini sebuleng pana' nateh sala'Neh."
42 Idi keburi'neh nan Yésus, "O Yésus, do' ngerawé negku kareb Iko macing mangun ku Raca'."
43 Idi kebala Yésus neneh, "Ui pebala namu, aco sini teh iko idi pad-pad denganKu bang Pirdaus."
44 Kareb lélé muned aco, idi rasat mateh aco mekilep, idi aput tana' ini medacem pad macing tangal musul aco.
45 Idi dicing luk tekito bang Ruma' Allah nedarak upa dueh.
46 Yésus nengitang, kesembayangNeh, "O Ama', Ui maré rohKu bang paladMu." Pangeh Ieh nemala kudeng ineh, idi niatNeh neputut.
47 Kareb lun rayeh lun pebunu' nenier luk mangun ineh, idi ieh pana' nengerayeh Allah, keburi'neh, "Matu lemulun ini seburur lemulun luk matu."
48 Kareb lun mula' luk nepamung nenier ineh nekali' luk mangun ineh, idi ideh nuli' dengan nemepag ruukdeh.
49 Idi amung-amung lun denganNeh idi decur luk pangeh nemaya' Yésus rat Galilia netuped nier amung ideh rat mado.
50 Inan seburur lemulun, ngadanneh Yusup, rat Arimatia aceh bawang lun Yahudi. Ieh seburur lemulun luk mepiteb idi matu, idi ieh nenganét acing Imet Allah. Sagan pana' ieh seburur lun tebubpun besara', na ieh nengamo maya' luk pinutut idi luk inau'deh ineh.
51 (23:50)
52 Idi ieh iné' matun Pilatus idi nemutuh butung Yésus.
53 Idi ieh nenurun butung ineh idi nengelilib neneh ku kibung luk do'. Pangeh ineh ieh nenganau' butung bang tanem luk pangeh kinuer ratnan batu, idi luk nateh pikai atun.
54 Ieh ineh aco limeh, idi Aco luk inan Mudeng pangeh muneng.
55 Idi decur-decur luk nemaya' Yésus rat Galilia, nemaya' ni Yusup idi nenier tanem ineh idi kudeng apeh butung Yésus rireng bang ineh.
56 Idi ideh nuli' idi nenganau' temina' amung-amung luk do' buen idi umau luk do' buen teh. Kareb Aco luk inan Mudeng, idi ideh nucu' maya' ukum Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA