Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bo sinimindogdon in intau mita kon tua bo nodia ko'i Yesus pinobayak kon tayowon i Pilatus.
2 Kon tua mosia mulaidon bo moponapud in tosingogon diaí totu'u ko'i-Nia. Mosia noguman, "Kino'kadapatandon nami intau tana'a notunduí kon diaí totu'u kon intau moaíntoí. Bo bayongan intau daiton-Nya pongaruon simbaí doií moguboli kom pajak ko'i Kaisar, sing kai-Nia Sia in tobatuí Raja Mopoposaḷamat."
3 Daí ki Pilatus noliboí ko'i Yesus, "Degaí totu'u kon Ikow Raja in intau Yahudi?" Tubag i Yesus, "Ikowdon tontanií in noguman."
4 Daí ki Pilatus nogumandon kon imang mita itoi bo intau mita inta kon tua, "Diaíbií kino'uliíanku kon taḷaí tobatuímai in intau tana'a inta mota'an baliíonku dodoyonan pohukuman ko'i-Nia."
5 Ta'e tantuí domandon monia ramijion kom baí hukumon in Sia, mosia noguman, "Tontunduí-Nya mita totok im mokopongaruh kom bayongan intau Yudea. Pinangkoipamai kong Galilea bo tana'a nodapotdon kon na'a."
6 Naonda ing ki Pilatus nokodongog kon singog monia tatua, sia noliboí ko'i monia, "Degaí Sia na'a intau ing Galilea?"
7 Naonda ing kinota'auannyadon kong ki Yesus intaubií nongkon wilayah i Herodes, baḷuínya bo pinokidia in Sia minayak ko'i Herodes. Wakutu intua ki Herodes kon Yerusalem doman.
8 Nopia totok ing gina i Herodes noko'ontong makow ko'i Yesus. Sin no'onggotdon sia in nokodongog kon o'uman soaáḷ ki Yesus bo mo'ibogdon totok moyodungkuḷ-Nya.
9 Tuamai onda in noyodungkuḷ, totoknya im pinolibo-liboíanmai in Sia, ta'e diaí tobatuímai in sinubagan i Yesus.
10 Imang mita itoi bo mototunduí mita kon agama minayak doman sinumayow kon tua bo totok moponapud ko'i Yesus in tosingogon uboḷ.
11 Ki Herodes bo tontaranya mita nopoyambaí bo noningkule ko'i Yesus. Pinopopakeían monia in ḷambung Raja in Sia, onda intua pinokidia bui monia minayak ko'i Pilatus.
12 Kon singgaipa doman intua ki Herodes bo ki Pilatus noyobayatdon bui, padahaḷ no'onggotdon taya dua tua in nosisaturuan.
13 Ki Pilatus nosipun kon imang mita itoi, bo itoi mita intau Yahudi, bo intau mita,
14 bodongka noguman ko'i monia, "Mo'ikow nodia mangoi kon intau tana'a ko'inakoí poḷat noguman kon intau tana'a aindon notunduí kom mokopoḷangkam kom bayongan intau. Tana'a aim pinirikisaku in Sia kon tayowon monimu tontanií, ta'e diaíbií tobatuímai in no'uliíanku oaíid mora'at inta naí pinonapud monimu ko'i-Nia.
15 Natua doman ing kai Herodes, tuamai pinokidianyadon bui mangoi ko'i nami in Sia. Intau tana'a diaíbií nogaid kon tobatuímai in soaáḷ inta mota'au baliíon dodoyonan pohukuman ko'i-Nia modapot im matoi.
16 Tuamai aku'oi mosambok ko'i-Nia bodongka bulian.
17 [Kom pomuḷoi in singgai porayaan kom Paskah, ki Pilatus musti momuli kon tobatuí intau inta pinonjara bo posarahkan kon intau moaíntoí.]
18 Bayongan intau inta nosipun kon tua umuran momaḷuí, "limodon in Sia, bo poḷuaidon ing ki Barabas ko'inami!"
19 (Ki Barabas na'a pinonjara lantaran pinomarontakkan bo lantaran pinolimodan.)
20 Ki Petrus mo'ibog mopobebas ko'i Yesus, tuamai iliboínya bui kon intau moaíntoí kon tua.
21 Ta'e mosia umuran doman momaḷuí, "Popopakudon in Sia kong kayu pinoyotalempang!"
22 Bo nogintoḷunyadon ki Pilatus noliboí ko'i monia, "Ta'e onubií in taḷaí-Nya? Aku'oi in diaíbi noko'ulií kon taḷaí-Nya tobatuípamai inta mota'au baliíon dodoyonan pohukuman ko'i-Nia dapot im matoi! Aku'oi im mosambokdon ko'i-Nia, bodongka mopobebas ko'i-Nia."
23 Ta'e umuran doman momaḷuí im mosia simbaí ki Yesus popopakuídon kong kayu pinoyotalempang. Daí pangabisannya dinuduiandon i Pilatus in ibog monia tua.
24 Ki Pilatus nopoḷabuídon in hukuman matoi ko'i Yesus naí inta ibog in intau mita tatua.
25 Bo pinobebasnyadon intau inta inigum monia. Tobatuí intau inta pinonjara lantaran pinomarontakkan bo pinolimodan. Onda intua ki Yesus pinosarahkannyadon ko'i monia sim aidanmai podudui in ibog intau mita tatua.
26 Daí ki Yesus diniadon monia. Kon daḷan mosia noyodungkuḷ in tobatuí intau, tangoinya ki Simon. Sia nongkon lipuí ing Kirene bo mopobayak ing kotaí tatua. Dinomok monia in sia bo pinakisa pinokipota'anan ing kayu pinoyotalempang bo dumuduianmai kon tumi i Yesus.
27 Mobarong totok intau in dumuduianmai ko'i Yesus -- kon sigad monia tua oyuíon doman tongonumai im bobay. Bobay mita tatua umuran mongombaḷ bo mogamui ko'i Yesus.
28 Ta'e ki Yesus nobobui ko'i monia bo noguman, "Ule bobay mita in Yerusalem! Dona'aidon ombaḷan in Aku'oi, ombaḷaidon in awak monimu tontanií bo ki adií mita monimu.
29 Sim mo'iangoibií in wakutunya intau mosingog nana'a, 'Nomujur totok im bobay mita inta diaí dodai onda in nononggadií bo inta diaí doman dodai onda in nopoteteí!'
30 Ko wakutu intua intau mita moguman kom buḷud mita nana', 'Kodantugdon monag ko'inami na'a!' Bo moguman doman im mosia kom butaí mita inta nongo notombuḷud, 'Bumbunaidon mangoi ing kami na'a!'
31 Sin kong kayupa inta nobiagpa, pinomiadon intau nana'a, apapa doman kong kayu inta no'ingkagdon! Onudon im pomia'an monia?"
32 Kon tua oyuíon doman doyowa intau. Taya dua tua tumpaḷa intau mora'at inta dinia doman monia sin hukumon dapot motoi poyotakinon i Yesus.
33 Naonda in no'idapotdon kon tampat inta sinangoian "Tengkorak", pinopopakuídon monia kong kayu pinoyotalempang ing ki Yesus takin intau mora'at doyowa tua. Tobatuí kon dotaí ing koḷanan bo tobatuí kon dotaí ing koḷoigi i Yesus.
34 Bo ki Yesus nosambayang, nana'a, "Amaí ampungaidon im mosia sin diaíbií kinota'auan monia onu inaidan monia na'a." Onda intua, pakeang i Yesus sinilaidon monia kon tua ta'e munapa inundi.
35 Intau mita sinimindog kon tua bo mo'indoimai. Itoi mita intau Yahudi umuran morebeg ko'i-Nia takin mosingog, "Sia ain noposaḷamat kon intau ibanea; diaíbií bo tungkulan-Nya in tana'a makow bo posaḷamaton in awak-Nya totonií aka totu-totu'ubií in Sia Raja Mopoposaḷamat inta pinilií i Allah!"
36 Tontara mita namangoi doman bo moporupa-rupamai ko'i-Nia. Inogoian monia in anggur nobo'il in Sia, poḷat noguman,
37 "Aka Ikow Raja Intau Yahudi, yo posaḷamatdon in awak-Mu tontanií!"
38 Kon uḷuanmai i Yesus pinaisan nana'a, "Na'adon Raja Intau Yahudi."
39 Tobatuí intau mora'at inta pinopopakuí kong kayu pinoyotalempang kon tua, morebeg doman ko'i Yesus, kai-nia, "Ikow Raja Mopoposaḷamat, toh? Yo posaḷamat kadon in awak-Mu bo kami na'a!"
40 Ta'e intau mora'at tobatuí sinumoruí kon yobayatnya tatua, "Diaí degaí ikow mo'ondok ko'i Allah? Ikow hukumon doman matoi naí Sia.
41 Tongaí aka hukuman ko'i natonda im patusbií tarimaan podudui in oaíid naton, ta'e Sia na'a im beresibií diaí kotaḷaí."
42 Nosingog makow natua, sia noguman ko'i Yesus, "Yesus, toropdon in aku'oi aka ikow mamangoidon saḷaku Raja!"
43 Daí kai Yesus doman, "Popirisayadon! Singgaipa doman na'a ikow moyotakin-Ku kom Pirdaus."
44 Degaí jamdon dua belas mo'utu in singgai, mata in singgai diaídon nonindar, bo bayongan lipu kon tua sinimindipdon dapot in jam tiga ḷoḷabungea.
45 Bo kon dodai doman intua gorden kom Baḷoi Tuhan nobisik nosilai doyowa.
46 Bo ki Yesus nomaḷuí noropot totok, kai-Nia, "Amaí! kom bonu ing kawasa-Mu, posarahkan-Kudon in nyawa-Ku." Nosingog makow natua Sia minatoidon.
47 Naonda itoi in tontara noko'ontong kon onu inta ain nobalií tatua, sia nodayow ko'i Allah, kainia, "Totu'u, Sia na'a in diaíbií kotaḷaí!"
48 Intau moaíntoí inta namangoi kon tua sim mo'indoi, noko'ontong domandon kon onu inta nobalií. Mosia komintan nobui takin nomanyasaḷ.
49 Bo bayongan intau inta nogoginta'auan mita i Yesus, termasuk bobay mita inta dinumudui ko'i-Nia nongkon Galilea, sinimindog nongkon moyayuk bo no'indoi kom bayongan inta ain nobalií.
50 Oyuíon tobatuí intau, ki Yusup in tangoinya. Sia nongkon kotaí in Arimatea kom butaí in Yudea. Sia tua intau mopia bo mobanar inta umuran mogoḷat makow kon wakutu koaíngoian i Allah momarentah saḷaku Raja. Umpakahbií sia tobatuí mahkama agama, ta'e sia na'a in diaíbií nosotuju kong kaputusan bo gogutu im mahkama agama ibanea tua.
51 (23:50)
52 Sia minayak kon tayowon i Pilatus bo no'igum kom mayat i Yesus.
53 Naonda intua, pinoponagnyadon im mayat i Yesus bo binakutnya in daing inta totok im moaáḷus bo inta totok in nomahaḷ. Nopaḷut makow kon tua inulidnya kom bonu ing kuburan inta pinomia kom bonu im buḷud batu. Kuburan tatua diaípa dodai onda pinakeí pinoḷobongan.
54 Singgai tua, singgai in Juma'at; singgai Sabat diaídon mo'onggot.
55 Bobay mita inta namangoi noyotakin i Yesus nongkon Galilea, dinumudui no'indoi kong kubur tatua poḷat nonarukiramai mongo inulid naíonda im mayat-Nya tatua.
56 Onda intua, nobui im mosia bo nosadia kom bahan mita inta biasamai pakeíon pomondu kom mayat. Mosia nosadia doman kon ḷana mobondu sim poḷana kom mayat i Yesus. Kon singgai in Sabat mosia nogogai nogaid podudui in hukum agama.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA