Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq Gedẽng Allah, Deside Isa cingakin dengan-dengan sugih tamaq kẽpẽng ojok dalem kotaq persembahan.

² Ie cingakin ẽndah sopoq bebalu saq miskin gati, tamaq due kẽpẽng tembage.

³ Beterus Deside Isa bemanik, "Tiang badaq side: Setetune bebalu niki namaqang luwẽqan tebanding selapuq dengan saq lain.

⁴ Sẽngaq ie pade selapuq ngebẽng lẽman kelebihan dowẽne. Laguq bebalu niki, timaq miskin gati, ie ngebẽng selapuq saq araq lẽq ie, malahan saq ie perluang jari biaye idup."

⁵ Araq dengan-dengan saq ngeraos mengenai berembẽ solahne Gedẽng Allah tepayas siq batu saq solah-solah dait siq barang-barang saq teaturang tipaq Allah. Beterus Deside Isa bemanik lẽq ie pade,

⁶ "Laun araq waktune, selapuq saq side pade serioq niki gen terobohang; ndẽq araq sopoq juaq batu lẽman bangunan-bangunan nike saq masih beronjoq maraq bẽngan!"

⁷ Pengiring-pengiring Deside Isa metakẽn lẽq Deside Isa, "Bapaq Guru, piran selapuqne nike gen telaksane? Dait napi saq jari tandene bahwe sampun dateng wayene hal nike gen telaksane?"

⁸ Deside Isa bemanik, "Pade waspade, ndaq jangke side pade tetipu. Luwẽq dengan gen dateng kadu aran Tiang, dait bebase, 'Tiang niki Ie!' dait 'Sampun wayene.' Laguq ndaq side pade turut ie pade.

⁹ Ndaq ẽndah takut lamun side pade dengah berite mengenai perang dait pemberontakan. Selapuqne nike harus telaksane juluq. Laguq nike ndẽq berarti bahwe sampun wayene kiamat."

¹⁰ Beterus Deside Isa bebaos malik, "Bangse saq sopoq gen perang ngelawan bangse saq lain dait negare saq sopoq gen nyerbu negare saq lain.

¹¹ Lẽq mbẽ-mbẽ gen araq lindur saq belẽq, kelapahan dait wabah penyakit. Gen araq hal-hal saq nakutang dait luar biase lẽq langit.

¹² Laguq sendẽqman selapuqne telaksane, side pade gen tebau dait teaniaye. Side pade gen teadilin lẽq balẽ-balẽ ibadah dait tetamaq ojok dalem bui. Dait side pade gen teoros ojok arepan raje-raje dait penguase-penguase lantaran side pade pengiring Tiang.

¹³ Nike kesempatande ngebẽng kesaksian.

¹⁴ Keranaq nike teguqang angende bahwe side pade ndẽq gen kuatir mengenai napi saq harus side pade sampẽang jari bẽle diriq.

¹⁵ Tiang mẽsaq gen ngebẽng side kemampuan ngeraos secare bijaksane, sehingge ndẽq araq sopoq dengan juaq lẽman musuh-musuhde bau ngelawan atao nilas raosde.

¹⁶ Side pade gen tehianat siq inaq amaqde, siq semeton-semetonde, siq kadang jarinde dait siq batur-baturde. Separo lẽman side pade gen tematẽq siq ie pade.

¹⁷ Side pade gen temeriq siq selapuq dengan lantaran side pade jari pengiring Tiang.

¹⁸ Laguq timaq seuwat bulu saq araq lẽq ulunde ndẽq gen telang.

¹⁹ Lamun side pade tetep tahen dait sabar, side pade gen selamet."

²⁰ "Lamun side pade serioq Yerusalem tekepung siq tentere, side pade gen nenaoq bahwe kote nike ndẽq ngonẽq malik gen temusnahang.

²¹ Lẽq waktu nike dengan saq araq lẽq Yudea harus pelai ojok pegunungan. Ie pade saq araq lẽq dalem kote harus bilin kote, dait ie pade saq lẽq luah kote, ndaq tame ojok dalem kote.

²² Sẽngaq jelo-jelo nike 'Jelo-jelo Pembalesan', adẽq siq care nike telaksane napi saq sampun tetulis dalem Kitab Suci.

²³ Celake inaq-inaq saq kenyeke betian atao saq masih penyusuq bebẽaqne lẽq waktu nike! Negeri niki gen ngalamin kesusahan saq belẽq, dait murke tipaq bangse niki.

²⁴ Araq saq gen tematẽq kadu klẽwang, araq ẽndah saq gen tejauq jari tawanan ojok negeri-negeri dengan; dait bangse-bangse saq ndẽq kenal kance Allah gen ngicaq-icaq Yerusalem jangke tutuq waktu saq sampun tetentuang Tuhan tipaq ie pade."

²⁵ "Laun gen penggitan tande-tande lẽq jelo, bulan, dait bintang-bintang. Lẽq gumi bangse-bangse gen takut dait bingung hadepin suare angin dait suare umbak saq belẽq.

²⁶ Manusie gen takut gati hadepin napi saq gen telaksane lẽq seantẽro dunie niki, sẽngaq selapuq kuase saq araq lẽq langit jari biur lantur.

²⁷ Lẽq waktu nike Bije Manusie gen rauh lẽq dalem awan siq kuase dait kemuliean saq belẽq.

²⁸ Lamun hal-hal nike mulai telaksane, pade ures dait petitoqang muende, sẽngaq ndẽq ngonẽq malik side pade gen teselametang."

²⁹ Beterus Deside Isa nyeriteang tipaq ie pade perumpamean niki, manik-Ne, "Pade perhatiang lolo are dait selapuq lolo saq lain.

³⁰ Lamun pusuk-pusukne mulai penggitan, side pade nenaoq bahwe sampun rapet musim panas.

³¹ Maraq nike ẽndah lamun side pade serioq hal-hal nike telaksane, side pade gen nenaoq bahwe Kerajaan Allah sampun rapet.

³² Tiang badaq side: Setetune hal-hal nike gen telaksane sendẽqman dengan-dengan saq idup mangkin niki ninggal selapuqne.

³³ Langit dait gumi gen musnah, laguq manik Tiang gen kekel selaẽq-laẽqne."

³⁴ "Pade jagaq diriqde, ndaq jangke side pade rẽpot gati siq beseneng-seneng jangke liwat bates dait nginem ineman keras, atao mikirang gati soal-soal idupde, sehingge side pade ndẽq siep sewaktu jelo Tuhan nike selung-selung dateng.

³⁵ Sẽngaq Jelo nike gen dateng maraq perangkep tipaq selapuq dengan lẽq gumi niki.

³⁶ Pade bejage-jage dait tetep bedo'e adẽq side pade luput lẽman selapuq hal saq gen telaksane dait side pade bau ngadep Bije Manusie."

³⁷ Deside Isa ngajahang lẽq Gedẽng Allah waktu kenjelo, dait kelemne Ie lumbar ojok Bukit Zaitun dait mererepan lẽq derike.

³⁸ Sebilang kelẽmaq selapuq dengan dateng ojok Gedẽng Allah jari dengahang pengajahan Deside Isa.

Lukas

Video Lukas 21

Ikuti Kami:

KONTAK | PARTISIPASI | DONASI