Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba Nomo Lowalangi, I'ila Yesu niha si kayo same'e kefe bakha ba naha game'ela ba Nomo Lowalangi.
2 I'ila gõi samõsa lakha mbanua same'e dombua ngawua gefe side'ide.
3 Imane Yesu, "Mitõngõni da'e: abõlõ ebua nibe'e lakha mbanua andrõ moroi ba niha bõ'õ.
4 Bõrõ me fefu ira labe'e, ba lõ tobali ambõ ira bõrõ da'õ. Ba ira alawe andrõ, numana sibai ia. Ba hew̃a'ae si manõ, ibe'e fefu zi so khõnia ni'oguna'õnia ba wa'aurinia."
5 So zanutunõ hewisa wa'asõkhi Nomo Zo'aya nifa'anõ faoma kara si sõkhi awõ gamagama nibe'e khõ Lowalangi. Imane khõra Yesu,
6 "So ginõtõnia dania, tedudugõ fefu ni'ilami andre ba lõ hadõi dania kara si torõi ba nahiania!"
7 Lasofu khõ Yesu, "He Guru, hawa'ara dania alua da'õ? Hadia dandra wa no irugi inõtõ wa'alua zi manõ?"
8 Imane Yesu, "Mi'angelama, bõi lalimo ami. Bõrõ me ato niha si tohare dania sangoguna'õ tõi-Gu. Lamane dania, 'Ya'odo andre ia!' ba 'No irugi inõtõ.' Bõi mi'o'õ ira.
9 Bõi ata'u ami na mirongo duria wasuwõta ba folaw̃a. Bõrõ me alua da'õ fefu ua. Ba hiza tenga wa no ahatõ luo safuria."
10 Itohugõ huhuo-Nia Yesu. Imane, "Faoma la'uduni nawõra dozi soi ba faoma fasuwõ ira.
11 Gofu heza alua ndruru danõ sabõlõbõlõ. So mbaw̃a lofo awõ mbaw̃a wõkhõ sabõlõbõlõ. Alua gõi zihokha mbu niha awõ zahõlihõli dõdõ moroi ba mbanua si yaw̃a.
12 Ba fatua lõ alua da'õ fefu, lara'u dania ami ba lafakao. La'etu'õ huku khõmi ba nomo wangandrõ ba labe'e ami ba gurunga. Ba la'ohe ami fõna Razo awõ zamatõrõ bõrõ Ndra'o.
13 Da'õ ginõtõ si sõkhi khõmi wanuriaigõ Turia Somuso Dõdõ soroi Lowalangi.
14 Mihalõ gangetula samõsa ba dõdõmi, wa lõ abu dõdõmi ba ngawalõ hadia niw̃a'õmi ba wobelegõ ya'ami.
15 Ya'odo samõsa zame'e khõmi fehede ba angetula andrõ, irege samõsa lõ ba gotalua nudumi si tola molaw̃a awõ wangosilõ'õgõ niw̃a'õmi.
16 La'a mbõlimi ira satuami, awõ ndra soroiyomomi, ira talifusõmi ba awõmi. So õsa ba gotaluami nibunura.
17 La'afõkhõi tõdõ ami niha fefu bõrõ Ndra'o.
18 Ba sara rozi mbu lõ taya khõmi.
19 Ba wa'anau gõlõ awõ wa'ebolo dõdõmi, tola te'orifi ami dania."
20 "Na mi'ila lafasui saradadu Yeruzalema, ba ginõtõ da'õ dania mi'ila wa lõ ara tõ tekiko mbanua andrõ.
21 Ba ginõtõ da'õ lalau moloi ba hili sowanua ba Yudea. Larõi fasa niha si so ba fasa, ba si so baero fasa bõi ya momõi bakha ba fasa.
22 Da'õ ginõtõ 'Ngaluo Wamalua Fanguhuku', andrõ ena'õ alua zi no tesura bakha ba Mbuku Ni'amoni'õ.
23 Alai ngaluo andrõ ba ndra alawe sanabina, awõ ndra alawe si so ono sawuyu! Alua wamakao sebua ba mbanua andre ba ihuku soi da'e Lowalangi.
24 So nibunu faoma fõda, ba so gõi ni'ohe tobali sawuyu misa ba mbanua niha; ba soi niha baero lahundrahundra dania Yeruzalema andrõ soi niha baero, irege ahori ginõtõ si no Ihonogõi So'aya khõra."
25 "So dania dandratandra ba luo, ba mbaw̃a awõ ba ndrõfi. Ba gulidanõ andre, dõrõhõw̃a soi ba wa'ata'u bõrõ we'ugu'ugu nasi awõ ndrulu.
26 Oi so wa'ata'u niha wombaloi salua ba zi sagõrõ ulidanõ. Bõrõ fawuka dania mbanua si yaw̃a.
27 Ba ginõtõ andrõ dania tohare Nono Niha ba lawuo si fao lakhõmi awõ kuaso sebua.
28 Na alua da'e, mifaoso ba mifazaw̃a hõgõmi, bõrõ me ba zi lõ ara tõ te'orifi ndra'ugõ."
29 Aefa da'õ itutunõ khõra Yesu gamaedola andre. Imane Yesu, "Mifaigi dõla geu ara andrõ awõ dõla geu tanõ bõ'õ.
30 Na mi'ila alua lewiõ, aboto ba dõdõmi wa lõ ara tõ mbaw̃a lõkhõ.
31 Si manõ gõi na mi'ila alua fefu niw̃a'õ-Gu no mege, aboto ba dõdõmi wa lõ ara tõ Ifasindro wamatõrõ-Nia Lowalangi.
32 Ya faduhu dõdõmi! Lõ mate nasa niha sauri iada'e, fatua lõ alua da'õ fefu.
33 Taya mbanua awõ gulidanõ, ba lõ taya dania wehede-Gu."
34 "Mifa'anõ ami, bõi mirõrõ ami ba wolau owuloa awõ wemabumabu, ma zui fangerangera fa'aurimi, irege lõ si te'anõ ami na i'anema'õ irugi inõtõ andrõ.
35 Bõrõ me hulõ gu'õ wa'atohare ginõtõ andrõ ba niha gulidanõ andre.
36 Mi'ama'anõ ba bõi mibõhõi wangandrõ ena'õ abõlõ ami wolaw̃a fefu salua andrõ ba tola mõi ami fõna Nono Niha."
37 Mamahaõ Yesu ba Nomo Zo'aya ba zi ma'õkhõ, ba ba zi bongi numalõ Ia ba Hili Zaitu ba torõi Ia ba da'õ.
38 Ero sahulõ wongi tohare fefu niha ba Nomo Zo'aya ba wamondrondrongo famahaõ-Nia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA