1 Kom Baḷoi Tuhan tatua, ki Yesus noko'ontong kon intau mita inta no'oyuíon nopobonu in doit kong kas inta pobobonuan kon sosumbah.
2 Sia noko'ontong doman kon intau boba-bobay bo bogaí nopobonu in doit kom bonu ing kas tatua.
3 Daí ki Yesus nosingog nana'a, "Aku'oi im moguman ko'i monimu: inta inogoi im boba-bobay tana'abií im mobayo-bayong nongkon inta inogoi in intau mita ibanea kon na'a.
4 Sim mosia tua nobogoi in sosumbah nongkon kalebean ing kapunya'an monia. Ta'e intau boba-bobay tana'a, umpakahbií sia nobiag nobogaí totok, ta'e sia nobogoibií im bayongan inta onu ing ko'inia inta sabanarnya totokpabií im paraḷunya pakeíon kong kobiagannya."
5 Naonda intau mita nongonguman kong kogogagah im Baḷoi Tuhan inta ain ilamba'an im batu mogagah mita takin pakakat mita inta aim pinosumbah ko'i Allah. Daí ki Yesus noguman ko'i monia,
6 "Oyuíonbií i wakutunya porumbunan kon onu inta inontong monimu tanion. Diaíbií in tobatuímai batu im pomayakpa makow im mo'iguntuḷ motompia kon tampatnya inta muna!"
7 Mosia noliboí ko'i Yesus, "Pak Guru, to'onu intua mita bo mobalií? Bo onu in tandanya kobaliían tua komintan?"
8 Ki Yesus noguman, "Mokopo'ingatdon, simbaí mo'ikow diaí koakaḷan. Moaíntoí in intau mamangoi momakeí in tangoi-Ku bo moguman, 'Aku'oi in Sia!' bo 'Wakutunyadon.' Ta'e dikabií indongogan monimu im mosia.
9 Bo dikabií mo'ondok aka mo'ikow bo mokodongog kon habar poparangan bo pomarontakan. Sin tua komintan im mustibií kom mobaliípa muna. Ta'e tua in de'emanpabií wakutunya."
10 Ki Yesus noguman doman nana'a, "Bangusa tobatuí moparang doman takin bangusa ibanea, bo negara tobatuí mayak monubuh kon negara doman ibanea.
11 Kom bayongan tampat mobalií in yagi-yagi. linug inta moropot totok, malarat moḷoben bo panyaki mita. Kon ḷangit mobalií in soaáḷ mita inta totok im mokodo'it.
12 Ta'e kon wakutu in diaípa mobalií intua komintan, mo'ikow in domokondon muna monia bo pogutuíon. Mo'ikow in diaan monia pobayak im baḷoi pososambayangan bo adilon poḷat potuoton kom ponjara. Diaan potayow kon raja bo ponguasa sim mo'ikow im murií-Ku.
13 Tua ing kasampatan monimu mopoyaput in Habar Mopia inta nongkon i Allah.
14 Tuamai mokopotantuí kong gina bo dikabií mohawatir im momikir mongo onu im potubag monimu aka polibo-liboían monia.
15 Baí kota'auan monimu kon Aku'oibií im moguman kon onu inta musti potubag monimu, sahingga saturu mita monimu tua, diaí mokoḷawang ande mokobayow kon onu in singogon monimu.
16 Mo'ikow posarahkan ing guyangamu, i utatmu, i yobayatmu mita bo im bayongandon ginaḷummu. Bo ibanea in toko'limodon.
17 Mo'ikow saturuon im bayongan intau sim mo'ikow murií-Ku.
18 Ta'e diaíbií to'ugatmai im bu'ok kon uḷumu im moḷabuí.
19 Aka mo'ikow monahang bo mokosabar, yo mosaḷamatbií."
20 "Aka ontongon monimu bo Yerusalem kopungondon in tontara mita, yo kota'auandon monimu kon diaídon mo'onggot bo poguya'atondon ing kotaí tatua.
21 Ko wakutu intua, intau mita inta kon Yudea musti moḷagui mayak im buḷud, bo intau mita inta kong kotaí musti momamping andeka musti monaḷaímai kong kotaí tatua, bo intau kon lipuí dikabií mamangoi ing kotaí.
22 Sin singgai mita tatua, 'Singgai bidon Pohukuman', simbaí mobaliídon onu inta aim pinais kom bonu im Buk Mosuci.
23 Moko'ondok in singgai mita tatua aka kon bobay inta sidia bo inta kogadiípa kom mo'intok! Kotaí tana'a koaíntugan in roriga moḷoben bo hukumon i Tuhan.
24 Oyuíon in limodon, oyuíon doman in diaan naí intau inta pinonjara bo pobayak in lipu-lipuíannya; bo intau inta diaí mopirisaya momoguya'at kon Yerusalem modapot mopaḷut in wakutu inta sinantuí i Tuhan ko'i monia."
25 "Bo tandanya ing ko'ontonganbií kom mata in singgai, kom buḷan bo kon tundi. Kon dunia na'a, bayongan intau mongo'ondok bo mongobingung im moko'ontong bo mokodongog kon singog im bokoḷ.
26 Intau mita mo'ondok totok moyogintayow in onu inta mobalií kon dunia na'a, bo bayongan kawasa kom baḷangon motomba'uk.
27 Kon dodai in tuata mamangoi ing ki Adi Intau kon yuaí-yuaík ing goḷom takin kawasa bo kamulia'an inta totok im moḷoben.
28 Aka tua bo mobaliídon, yo pobangondon bo ḷangag kon ḷangit, sin diaídon mo'onggot bo posaḷamaton im mo'ikow."
29 Ki Yesus nongonguman kom porumpama'an ko'i monia nana'a, "Tarukirakah pangkoi in ara bo pangkoi ibanea makow!
30 Aka tubuínya bo mulaidon ontongon, yo kota'auan bidon monimu kon diaí bidon mo'onggot bo sempdon im pomomunak.
31 Natua doman, aka mo'ikow bo moko'ontongdon kong kobaliían intua komintan, daí kota'auan bidon monimu kon ki Allah in ḷagi bidon momarentah saḷaku Raja.
32 Pokota'audon im mo'ikow! Soaáḷ mita tatua im mobaliíbií ko wakutu intau mita inta nobiag masa in na'a, diaípa modait matoi.
33 ḷangit bo butaí in diaíbií mononoi, ta'e singog-Ku im mononoibií."
34 "ḷukadai in awakmu bo dika tongaí umuran momikir kon rame bo monginum kon o'inumon inta mokoḷoḷangu andeka tongaí umuran momikir kong kobobiagmu, sahingga in aka wakutu-Nya bo dalií mo'iangoi, yo diaí mokopobasadia im mo'ikow.
35 Sin singgai tatua im mo'iangoi naíonda bo poyogaḷap kom bayongan intau kon dunia na'a.
36 Tuamai umuran kiḷuka-ḷukadmai bo posambayang simbaí umuran moropot im mo'ikow bo mokobalií simindog kon tayowon Adií Intau."
37 Aka singgai, ki Yesus motunduí kom bonu im baḷoi pososambayangan, ta'e aka doḷom, sia mayak im Buḷud Zaitun mogutun kon tua.
38 Pomuḷoi in doḷo-doḷom, intau mamangoi in baḷoi pososambayangan sim mokidongog kon totunduí mita i Yesus.

Studi Alkitab lengkap, silahkan lihat Alkitab SABDA :: Lukas 21
Studi Alkitab mobile, silahkan lihat Alkitab Mobi :: Lukas 21
Studi Alkitab dengan Video LUMO, silahkan lihat LUMO Indonesia :: Lukas

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke