Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani na sadari, sanggah na mangajari halak na mabuei ai Ia i rumah panumbahan, anjaha mangambilankon Ambilan Na Madear, roh ma marayak-Si sintua ni malim pakon sibotoh surat ampa pangintuai-pangintuai,
2 anjaha nini sidea ma hu Bani, “Hatahon Ham ma bannami: Marhitei kuasa ja do ibahen Ham in? Atap: Ise do na mambere kuasa in Bamu?”
3 Jadi nini ma mambalosi, “Ahu pe, adong do sisungkunon-Ku bani nasiam. Hatahon nasiam ma Bangku.
4 Ia pandidion ni si Johannes, na hun surga do ai, atap humbani jolma?”
5 Jadi martimbang ma sidea samah sidea, “Anggo ihatahon hita: Hun surga, gabe hatahonon-Ni ma hu banta: Mase ma lang porsaya nasiam bani?
6 Tapi anggo ihatahon hita: Hun bani jolma do, pargijigon ni halak na mabuei in ma hita bani batu, ai porsaya do sidea, nabi do si Johannes.”
7 Jadi ibalosi sidea ma, “Seng ibotoh hanami, atap na hunja do ai.”
8 Jesus pe ihatahon ma bani sidea, “Ahu pe seng patugahon-Ku bani nasiam, atap marhitei kuasa ja Hubahen in.”
9 Anjaha ihatahon ma limbaga on bani halak na mabuei ai, “Adong ma sada halak na mambuka pohon anggur, jadi ipasewahon ma ai bani piga-piga halak parjuma-juma, dob ai laho ma ia hu nagori na legan, mardokah-dokah.
10 Bani panorangni isuruh ma juakjuakni bani parjuma-juma ai, ase ibere sidea deba gogoh ni pohon anggur ai bani. Tapi ibogbogi parjuma-juma ai do ia, anjaha isuruh ma ia mulak sonin.”
11 Jadi isuruh use ma juakjuakni na legan; tapi ia pe homa hona bogbog anjaha bador do ibahen sidea, anjaha isuruh ma ia mulak mangambei tangan tumang.
12 Isuruh ma use na patoluhon, tapi ia pe hona ugahan do anjaha hona usir.
13 Dob ai nini simada pohon anggur ai ma, ʻAha ma sibahenonku? Husuruh ma anak haholongan ni uhurhin, ra malang do sidea bani.ʼ
14 Tapi dob ididah parjuma-juma ai ia, manriah ma sidea, nini ma samah sidea, ʻOn do sipanean ai. Bunuh hita ma ia, ase hita simada parbagiananni ai.ʼ
15 Jadi isarad sidea ma ia hu darat ni pohon ai, lanjar ibunuh ma. Aha ma nani bahenon ni simada pohon ai bani sidea?
16 Na roh ma ia mamunuh parjuma-juma ai, anjaha ondoskononni ma pohon anggur ai bani halak na legan.” Tapi manangar ai, nini sidea ma, “Palis ma in!”
17 Tapi ikawahkon ma sidea, lanjar nini ma, “Ai aha do arti ni na tarsurat on: Batu na niambukkon ni tukang rumah in, ai do gabe batu palas parsuhi-suhi.
18 Marosak do sagala na dabuh bani batu in, anjaha maropuk sagala na nidabuhanni.”
19 Jadi ipindahi sibotoh surat ampa sintua ni malim ma dalan, laho manangkap-Si bani panorang ai, ai ibotoh sidea, sidea do tinuju ni limbaga ai, tapi mabiar do sidea bani halak na mabuei ai.
20 Laho manggompangi-Si, isuruh sidea ma mata-mata, na maruhur sipakulah-kulah, andohar tartangkap sidea Ia marhitei parsahap-Ni, ase tarondoskon sidea Ia bani pamarentah, bani kuasa ni panguhum ai.
21 Jadi nini sidea ma manungkun-Si, “Guru, ibotoh hanami pintor do parsahap-Mu ampa pamodahion-Mu, anjaha seng sididah bohi Ham, sintong do tene ipodahkon Ham dalan ni Naibata.
22 Patut do bereonta balasting bani kesar, atap lang?”
23 Tapi ibotoh Jesus do akal ni sidea ai, gabe nini dompak sidea,
24 “Patuduh nasiam ma Bangku sada dinar! Gambaran pakon surat ni ise do on?” Jadi nini sidea ma, “Gambaran ni kesar.”
25 Gabe nini ma dompak sidea, “Anggo sonai, bere nasiam ma bani kesar na kesar simadasi, anjaha bani Naibata na Naibata simadasi.”
26 Ase seng mangasup sidea, mambahen halilitan Ia marhitei sahap-Ni i lobei ni halak na mabuei in. Tapi longang do sidea halani balos-Ni ai, lanjar sip mando sidea.
27 Gabe roh ma deba halak Sadukei, ai ma na so marhatongonkon adong parpuhoon humbani na matei, jadi isungkun sidea ma Ia,
28 “Gurunami, isuratkon si Musa do bannami: Anggo matei sada halak na dob marhajabuan, tapi lang martinading, maningon paganjangon ni anggini do parinangon ai, laho pajongjong ginompar bani saninani ai.
29 Ase adong ma pitu halak na marsanina. Mompo ma sikahanan, dob ai matei ma ia, seng martinading.
30 Dob ai ipaganjang na paduahon ma naboru ai,
31 dob ai na patoluhon, sonai torus das bani na papituhon. Seng martinading sidea bani parmatei ni sidea.
32 Dobni naboru ai pe matei ma.
33 Ai pe, bani parpuhoon ai, ise ma humbani sidea simada parinangon ai, ai hapitusi do sidea marjolmahonsi.”
34 Jadi nini Jesus ma bani sidea, “Anak ni dunia on do na mompo anjaha na laho,
35 tapi halak na dob talup hu hagoluhan simagira ampa hu parpuhoon humbani na matei, seng marunjuk barang laho be.
36 Ai seng tarbahensi be matei, usih ma sidea bani malekat, anjaha anak ni Naibata ma sidea, dob parrupei sidea bani parpuhoon ai.
37 Paboa sipapuhoon do magira na dob matei ai, si Musa pe itarsingati do pasal ai, sanggah bani naporon na sampurguk ai, ai igoran do ijai Tuhan in ʻNaibata ni si Abraham, Naibata ni si Isak anjaha Naibata ni si Jakob.ʼ
38 Sedo Naibata ni na matei Ia, Naibata ni na manggoluh do, ai haganup do sidea manggoluh Bani.”
39 Jadi nini deba sibotoh surat ma mambalosi, “Sintong do hata-Mu ai!”
40 Anjaha seng be pag sidea manungkun atap aha pe Bani.
41 Jadi nini Jesus ma dompak sidea, “Mase ma adong na mangkatahon, anak si Daud do Kristus in?
42 Ai si Daud sandiri do mangkatahon bani buku Psalmen, ʻNini Tuhan in do bani Tuhanku, hundul ma Ho hu siamunkon,
43 paima Hubahen sagala munsuhmu gabe sidogeian ni naheimu.ʼ
44 Ase igoran si Daud do Ia Tuhan, mase ma anakni Ia?”
45 Jadi sanggah na tangi halak na mabuei ai haganup, nini ma hubani susian-Ni ai,
46 “Jaga ma hanima mangidah sibotoh surat, na marosuh medang-edang marbaju ganjang, na sihol hona tabi i tiga, na mangkaporluhon hundul i lobei-lobei i parguruan ampa bani ianan sisangapan i parpestaan.
47 Ibondut sidea do rumah ni na mabalu marhitei tonggo sipakulah-kulah na ganjang. Uhum siboratan do jaloon ni sidea use.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA