Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pado suatu ari, Isa Almasih sadang ma aja, sarato mancuritokan tantang Injil nan dari Allah, kabake urang-urang nan di dalam Rumah Tuhan. Imam-imam kapalo, guru-guru agamo, samo-samo jo pamimpin-pamimpin Yahudi bagai, bi tibo

² sambia bakato kabake Baliau, "Cubolah curitokan kabake kami, jo kuwaso apo Angkau mampabuwek sagalo sasuatunyo tu? Siya nan mambarikan kuwaso tu kabake Angkau?"

³ Isa Almasih manjawab, "Ambo iyo nak batanyo pulo kabake angku-angku. Cubo pulolah curitokan kabake Ambo,

⁴ jo kuwaso dari siya tu, Nabi Yahya mampamandikan urang? Jo kuwaso dari Allah atau jo kuwaso dari manusia?"

⁵ Mako bi barundianglah urang-urang tu, "Jikok kito katokan, 'Jo kuwaso dari Allah,' baiko ka Inyo tanyokan kabake kito, 'Jikok baitu, baa mangko angku-angku indak bi picayo ka Nabi Yahya?'

⁶ Tapi jikok kito katokan, 'Jo kuwaso dari manusia,' mako kasadonyo urang ka mambae kito jo batu, dek karano, urang nan banyak picayo, baraso Yahya adolah surang nabi."

⁷ Akienyo urang-urang tu bi manjawab, "Iyo indak tantu di kami doh."

⁸ Mako bakatolah Isa Almasih kabake urang-urang tu, "Jikok baitu, Ambo iyo indak ka mangatokan pulo doh kabake angku-angku, jo kuwaso siya Ambo mampabuwek sagalo sasuatu."

⁹ Isa Almasih mancuritokan kabake urang-urang tu, parumpamoan nan bakcando iko, "Adolah surang urang nan mananami satumpak parak anggur. Inyo mampasewokan parak tu kabake babarapo urang pakarajo, sudah tu inyo barangkek ka nagari lain, cukuik lamo inyo tingga disinan.

¹⁰ Kutiko lah tibo masonyo untuak ka ma ambiak buwah anggur, mako nan punyo parak tu manyuruah palayannyo payi kabake urang-urang nan bakarajo tu, untuak mamintak pambagiannyo. Tapi, urang-urang nan bakarajo tu manangani palayan tu, sudah tu disuruahnyo babaliak pulang, indak mambawok sabuwah alah joh.

¹¹ Sasudah tu, nan punyo parak tu manyuruah pulo surang lai palayannyo nan lain; tapi, palayan nan itupun dilakak-i pulo, sarato dihino dek urang-urang nan bakarajo tu, sudah tu disuruah babaliak pulang, indak pulo doh mambawok apo-apo.

¹² Kudian nan punyo parak tu, manyuruah palayannyo nan katigo. Tapi, palayan nan katigo ko pun dilakak-i pulo dek urang-urang nan bakarajo tu, sarato di ambuangkannyo kaluwa dari parak tu.

¹³ Akienyo nan punyo parak tu mangatokan, 'Apo lai nan musti ambo pabuwek? Eloklah anak kanduang ambo bana nan ambo kasiahi, nan ka ambo suruah. Lah jaleh inyo ka di aromaik-i dek urang-urang nan bakarajo tu!'

¹⁴ Tapi, dikutiko urang-urang nan bakarajo di parak tu, maliyek anak nan punyo parak tibo, mako inyo bi mangecek sasamo inyo, 'Suwarihnyo bana komah nan tibo. Rancak kito bunuah paja ko, buliah kito mandapek arato pusakonyo.'

¹⁵ Mako urang-urang tu manjaranjangkan anak nan punyo parak tu kaluwa, sudah tu dibunuahnyo." Sudah tu Isa Almasih batanyo, "Nah, jikok nan punyo parak tu lah babaliak dari marantau, apo kiro-kiro nan ka dipabuweknyo kabake urang-urang pakarajo tu?

¹⁶ Lah jaleh kasadonyo urang-urang pakarajo tu ka dibunuahnyo, sudah tu paraknyo, inyo sarahkan kabake urang pakarajo nan lain." Dek mandangakan nan baitu, mako bi mangeceklah urang-urang tu kabake Isa Almasih, "Kok dapek janlai tajadi nan bakcando itu!"

¹⁷ Isa Almasih mancaliak kabake urang-urang tu sambia bakato, "Jikok baitu, apo aratinyo ayaik Alkitab nan tatulih bakcando iko? 'Batu nan indak tapakai dek urang tukang, lah manjadi batu pinjuru.'

¹⁸ Satiyok urang nan jatuah ka ateh batu tu, badannyo ka ramuak; baitu pulo, satiyok urang nan di ampok dek batu tu, mako badannyo ka lumek manjadi abu."

¹⁹ Guru-guru agamo jo imam-imam kapalo tu tawu, baraso parumpamoan tu ditujukan dek Isa Almasih kabake dirinyo. Dek karano itu, urang-urang tu nak ka manangkok Baliau sakutiko tu juwo, tapi inyo takuik kabake urang banyak.

²⁰ Mako inyo ba usawo untuak mancari kutiko nan elok. Inyo ma agiah urang pitih, untuak mambuwek icak-icak bakcando urang nan luruih, sudah tu, inyo manyuruah urang-urang tu untuak manjarek Isa Almasih, jo sagalo macam tanyo nan mambalik, supayo inyo dapek caro untuak ka manyarahkan Isa Almasih kabake panguwaso, atau gubenur.

²¹ Mako urang-urang nan lah di agiah pitih tu, bi bakato kabake Isa Almasih, "Ngku Guru, kami tawu, baraso kasadonyo nan Angku katokan, sarato jo nan Angku ajakan tu batua. Kami tawu pulo, baraso Angku ma aja sacaro taruih tarang, tantang apo nan katuju dek Allah untuak manusia, dek karano, Angku indak niyo pa ambiak muko.

²² Dek karano itu, cubolah Angku katokan kabake kami, manuruik paratuaran agamo kito, layikoh buliah kito mambayie pajak kabake Kaisar, atau indak?"

²³ Tapi Isa Almasih mangatawui tanyo nan manjarek dari urang-urang tu. Dek karano itu Baliau mangatokan,

²⁴ "Cubolah paliyekkan pitih perak tu agak ciyek kabake Ambo. Gambar siya ko, namo siya ko nan ado di pitih ko?" "Gambar Kaisar jo namo Kaisar!" kecek urang-urang tu.

²⁵ "Jikok baitu," kecek Isa Almasih kabake urang-urang tu, "barikanlah kabake Kaisar, apo nan manjadi miliak Kaisar, baitu pulo, barikanlah kapado Allah, apo nan manjadi miliak Allah."

²⁶ Tanyato di adok-an urang nan banyak tu, urang-urang tu indak dapek ciyek juwo doh, mancari kasalahan Isa Almasih. Urang-urang tu bi anok sajo, sarato tacangang mandangakan jawaban dari Baliau.

²⁷ Babarapo urang dari golongan urang Saduki, bi tibo kabake Isa Almasih. (Urang-urang tu adolah golongan urang nan bapandapek, baraso urang-urang nan mati, indak ka di iduikkan doh baliak.) Inyo bi batanyo kabake Baliau,

²⁸ "Angku Guru, Nabi Musa manulihkan paratuaran nan bakcando iko untuak kito: Jikok ado surang urang laki-laki nan mati, tapi inyo indak maninggakan anak, mako dunsanaknyo nan laki-laki, musti mampabini jandonyo tu, supayo untuak manyambuang katurunan dari urang nan mati tu.

²⁹ Dawulu ado tajadi nan bakcando iko, ado tujuah urang laki-laki nan badunsanak. Nan paliang tuwo babini, sudah tu inyo mati, indak maninggakan anak.

³⁰ Kudian dunsanaknyo nan kaduwo, mampabini jandonyo tu, tapi dunsanaknyo tu pun mati pulo, indak maninggakan anak.

³¹ Kajadian nan sarupo itu, tajadi pulo jo dunsanaknyo nan katigo, sampai jo dunsanaknyo nan katujuah.

³² Akienyo padusi tu pun mati pulo.

³³ Isuak, di kutiko urang-urang nan mati di iduikkan baliak, jadi bini siyakoh urang padusi tu? Dek karano lah katujuah-tujuahnyo laki-laki nan badunsanak tu lah samo-samo mampabini inyo."

³⁴ Isa Almasih manjawab, "Urang-urang nan iduik kiniko inyo bi barumah tanggo,

³⁵ tapi urang-urang nan patuik di iduikkan baliak sasudah mati, sarato jo urang-urang nan iduik dijaman sasudah kiyamaik, inyo indak ka bi barumah tanggo doh.

³⁶ Ka adaan urang-urang tu sarupo jo malekaik, inyo indak ka mati-mati lai sampai salamo-lamonyo. Inyo adolah anak-anak Allah, dek karano inyo lah di iduikkan baliak dari kamatian.

³⁷ Nabi Musa sandiri lah manyatokan sacaro jaleh, baraso satiyok urang nan mati ka di iduikkan baliak. Nan tatulih di kitab nan disurekkannyo, tantang rimbo talawu nan tarang manyalo, inyo mangatokan baraso Tuhan tu adolah sabagai 'Allah Nabi Ibrahim, Allah Nabi Ishak sarato Allah Nabi Yakub'.

³⁸ Nah, Allah tu indak Allah urang mati doh! Tapi Baliau tu adolah Allah urang-urang nan iduik! Dek karano di Allah, kasadonyo urang iduik."

³⁹ Babarapo urang guru agamo bi mangatokan, "Jawab Angku Guru tu, iyo sabana tapek."

⁴⁰ Dek karano itu, indak talok lai di urang-urang tu untuak mananyokan sagalo sasuatu kabake Isa Almasih.

⁴¹ Isa Almasih batanyo kabake urang-urang tu, "Baa pulo tu, kok urang bi mangatokan baraso Rajo Panyalamaik tu adolah katurunan Nabi Daud?

⁴² Padohal Nabi Daud sandiri mangatokan di kitab Zabur, 'Tuhan bakato kabake Tuhan ambo: Duduaklah di sabalah suwok-Den,

⁴³ sampai Den pabuwek musuah-musuah Angkau manyarah kabake Angkau.'

⁴⁴ Jadi, jikok Nabi Daud sandiri mangatokan baraso Rajo Panyalamaik tu adolah 'Tuhan', dima pulo tu ka mungkin Inyo katurunan Nabi Daud?"

⁴⁵ Samantaro urang bi mandangakan Isa Almasih mangecek, Baliau bakato kabake pangikuik-pangikuik-Nyo,

⁴⁶ "Ingek-ingeklah taradok ka guru-guru agamo. Inyo suko bajalan-jalan, jo mamakai jubah nan marewok tanah, suko di aromaik-i urang di tangah pasa. Inyo suko duduak di tampaik nan ta aromaik di dalam rumah ibadaik, baitu pulo di tampaik-tampaik urang baralek.

⁴⁷ Guru-guru agamo tu, bi mangicuahi urang-urang marando, sarato ma ambiak-i rumahnyo. Sudah tu, untuak panyawok-i parangai buruaknyo tu, inyo bae badowa sapanjang tali baruak! Isuak, barek ukunan nan ka ditarimonyo!"

Lukas

Video Lukas 20

Ikuti Kami:

KONTAK | PARTISIPASI | DONASI