Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo, Deside Isa kenyeke ngajahang dait nyampẽang Kabar Solah lẽman Allah tipaq dengan-dengan saq araq lẽq dalem Gedẽng Allah. Imam-imam kepale, ahli-ahli Taurat dait pemimpin-pemimpin Yahudi parek

² dait metakẽn lẽq Deside Isa, "Tunas Pelungguh sampẽang lẽq tiang pade atas dasar napi Pelungguh ngelaksaneang selapuq hal niki? Sai saq aturin Pelungguh kuase nike?"

³ Jawab Deside Isa, "Tiang ẽndah mẽlẽ beketuan. Tunas side pade badaq Tiang,

⁴ Yahya baptis dengan siq kuase sai? Kuase Allah atao kuase manusie?"

⁵ Beterus ie pade mulai berunding, dait bebase, "Lamun ite jawab siq kuase Allah, Ie gen bemanik, 'Kembẽq side pade ndẽq percaye lẽq Yahya?'

⁶ Laguq lamun ite jawab, 'Siq kuase manusie,' selapuq dengan gen melẽwas ite siq batu, sẽngaq ie pade percaye bahwe Yahya nike nabi."

⁷ Jari jawab ie pade, "Mindah tiang."

⁸ Terus Deside Isa bemanik lẽq ie pade, "Lamun maraq nike Tiang ẽndah ndẽq gen badaq side pade siq kuase sai Tiang laksaneang selapuqne niki."

⁹ Deside Isa nyeriteang perumpamean niki lẽq dengan-dengan nike, "Araq sopoq dengan saq nalet anggur lẽq kebonne. Sẽweangne kebon anggur nike ojok penyakap-penyakap, terus ie lumbar ojok negeri lain, dait ndot ngonẽq lẽq derike.

¹⁰ Sewaktu dateng musim buaq anggur, ẽpẽn dowẽ kebon nike ngutus pelayanne ojok penyakap-penyakapne nike jari nerimaq bagianne. Laguq penyakap-penyakap nike ngempuk pelayan nike dait suruqne ie pade ulẽq ndẽq jauq napi-napi.

¹¹ Sesampun nike ẽpẽn dowẽ kebon nike ngutus malik pelayanne saq lain; laguq pelayan nike ẽndah tempuk dait tehine terus suruqne ulẽq ndẽq jauq napi-napi.

¹² Terus ẽpẽn dowẽ kebon nike ngutus malik pelayan saq ketelu. Laguq pelayan nike ẽndah tempuk dait tetetẽh ojok luah kebon anggur nike.

¹³ Ahirne ẽpẽn dowẽ kebon nike bebase, 'Napi saq harus tiang piaq malik? Tiang gen ngutus anak tiang mẽsaq saq tiang tunah gati, pasti ie pade gen hormatin anak tiang!'

¹⁴ Laguq sewaktu penyakap-penyakap kebon nike serioq bije ẽpẽn dowẽ kebon nike, ie pade berunding, 'Niki ie ahli warisne, silaq ite matẽq ie, adẽq ite mauq warisanne.'

¹⁵ Make orosne ie sugul ojok luah kebon nike terus ie tematẽq." Beterus Deside Isa beketuan, "Lamun ẽpẽn dowẽ kebon nike tulak, napi saq gen ie piaq tipaq penyakap-penyakap nike?

¹⁶ Pasti ie gen dateng dait nyematẽq penyakap-penyakap nike, beterus nyerahang kebon nike ojok penyakap-penyakap saq lain." Dengah hal nike, ie pade matur lẽq Deside Isa, "Sampunang gati jangke maraq nike!"

¹⁷ Deside Isa merhatiang ie pade, terus bemanik, "Lamun maraq nike napi artine ayat Kitab Suci niki? 'Batu saq tetetẽh siq tukang bangunan, sampun jari batu saq paling utame.'

¹⁸ Sai-sai saq geriq lẽq batu nike gen ancur, dait sai-sai saq tendet siq batu nike, ie gen remuk."

¹⁹ Ahli-ahli Taurat dait imam-imam kepale nenaoq bahwe perumpamean nike tetujuang tipaq ie pade siq Deside Isa. Keranaq nike ie pade mẽlẽ bau Deside Isa waktu nike ẽndah, laguq ie pade takut lẽq dengan luwẽq.

²⁰ Jari ie pade boyaq kesempatan saq solah. Ie pade upaq dengan adẽqne puraq-puraq jari dengan jujur, dait suruqne dengan-dengan nike boyaq-boyaq kesalaqan Deside Isa siq care besoal jawab, adẽq ie pade bau serahang Deside Isa ojok gubernur.

²¹ Beterus dengan-dengan saq teupaq nike matur lẽq Deside Isa, "Paq Guru, tiang pade nenaoq bahwe selapuq saq Pelungguh manikang dait ajahang nike kenaq. Tiang pade nenaoq ẽndah bahwe Pelungguh ngajahang secare terus-terang mengenai langan saq kenaq tipaq Allah, sẽngaq Pelungguh nẽnten pilẽq kasih.

²² Keranaq nike, tunas Pelungguh sampẽang lẽq tiang pade, menurut aturan agamente, kanggo napi nẽnten bayah pajek lẽq Kaisar?"

²³ Laguq Deside Isa wikan tipu muslihat ie pade. Keranaq nike Ie bemanik,

²⁴ "Cobaq petitoqang lẽq Tiang sopoq kẽpẽng perak. Gambar dait aran sai niki?" "Kaisar!" jawab ie pade.

²⁵ Make Deside Isa bemanik tipaq ie pade, "Lamun maraq nike, serahang ojok Kaisar, napi saq jari dowẽn kaisar, dait tipaq Allah napi saq jari dowẽn Allah."

²⁶ Ternyate lẽq julun dengan luwẽq nike ie pade ndẽq iniq mauq sopoq juaq kesalaqan Deside Isa. Ie pade cume tedoq dait bengaq siq manik Deside Isa nike.

²⁷ Dengan-dengan lẽman golongan Saduki parek ojok Deside Isa. (Ie pade golongan saq bedowẽ pendapet bahwe dengan ninggal ndẽq gen idup malik). Ie pade metakẽn lẽq Deside Isa,

²⁸ "Bapaq Guru, Musa nulis hukum niki tipaq ite: Lamun sopoq dengan mame ninggal dait ie ndẽq bedowẽ bije, make semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike.

²⁹ Araq pituq dengan besemetonan. Saq sengake merariq, terus ninggal ndẽq bedowẽ bije.

³⁰ Beterus saq kedue merariq kance bebalune, laguq ie ẽndah ninggal ndẽq bedowẽ bije.

³¹ Maraq nike ẽndah telaksane lẽq semetonne saq ketelu dait seterusne jangke saq kepituq.

³² Ahirne dengan nine nike ẽndah ninggal.

³³ Lẽq jelo dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie."

³⁴ Jawab Deside Isa, "Dengan-dengan saq idup mangkin niki merariq,

³⁵ laguq dengan-dengan saq patut teidupang malik lẽman ninggal dait idup lẽq akhirat, ie pade merariq malik.

³⁶ Keadaan ie pade maraq malaẽkat, dait ndẽq iniq ninggal. Ie pade nike bije-bije dowẽn Allah, sẽngaq ie pade sampun teidupang malik lẽman ninggalne.

³⁷ Musa mẽsaq secare jelas nyatayang bahwe dengan ninggal gen teidupang malik. Dalem tulisanne mengenai bebenes saq nyale, ie sebut Tuhan nike 'Allahne Ibrahim, Allahne Ishak dait Allahne Yakub'.

³⁸ Allah nike nẽnten Allah dengan ninggal, laguq Allah dengan saq idup! Sẽngaq lẽq arepan Allah, selapuq dengan idup."

³⁹ Ahli-ahli Taurat matur, "Jawaban Paq Guru solah gati."

⁴⁰ Keranaq nike ie pade ndẽq bani malik metakẽn napi-napi lẽq Deside Isa.

⁴¹ Deside Isa beketuan lẽq ie pade, "Berembẽ dengan-dengan iniq paran bahwe Almasih nike keturunan Daud?

⁴² Padahal Daud mẽsaq bebase lẽq dalem kitab Zabur, 'Tuhan bemanik lẽq Junjungan Tiang: Melinggih lẽq sedi kanan Tiang,

⁴³ jangke Tiang piaq musuh-musuh Deside takluk lẽq Deside.'

⁴⁴ Jari, lamun Daud nyebut Almasih nike 'Junjungan Saq Mulie', segerah Ie keturunan Daud?"

⁴⁵ Sewaktu dengan luwẽq kenyeke dengahang Deside Isa bebaos, Ie bemanik lẽq pengiring-pengiring-Ne,

⁴⁶ "Onyaq-onyaq lẽq ahli-ahli Taurat. Ie pade seneng lampaq-lampaq kadu jubah saq bẽlo, dait seneng tehormatin lẽq peken-peken. Ie pade seneng melinggih lẽq kursi saq paling julu lẽq balẽ-balẽ ibadah dait seneng melinggih lẽq taoq saq paling tehormat lẽq taoq-taoq gawẽ.

⁴⁷ Ie pade nipu bebalu-bebalu dait ngerampas balẽne. Dait jari seboq kejahatanne nike, ie pade bedo'e bẽlo-bẽlo! Pasti ie pade gen nerimaq hukuman saq beratan!"

Lukas

Video Lukas 20

Ikuti Kami:

KONTAK | PARTISIPASI | DONASI