Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tempo etu re’e tau to mangansaritaka resi i Yesu mangkonong tau Galilea to napopate yau i ngGubernur Pilatus. Tau etu rapopate yau tongo-tongonya sira mampampueka pampuenya resi i Pue Allah. See naka raa nsira nasigalo pei raa binatang to napampueka nsira etu.
2 Wali i Yesu manganto’oka sira, “Wimba ane ewa pampobuuka ngkomi, tau Galilea to rapopate yau etu bara sira semo to bae-bae dosanya pei tau Galilea to yusa see naka sira mangarata kasesa ewa wetu?
3 Taa kojo! Pei Aku manganto’oka komi, ane komi taa majea, komi samparia darapakaja’aka yau seja sewaju pei sira.
4 Pasi wimba ane rapanya tau sampuyu pei wayu to mate tetampok tempo toal to malangan mapuka yau ri lipu Siloam to nda’a kota Yerusalem. Wimba ane ewa pampobuuka ngkomi, tau to mate yau etu bara sira semo to baebae dosanya pei tau to yusa to maroo nda’a Yerusalem?
5 Taa seja! Pei Aku manganto’oka komi, ane komi taa majea, komi samparia darapakaja’aka yau seja sewaju pei sira.”
6 Wali yako etu i Yesu manganto’oka tau boros etu rapa. Ia manganto’o, “Rapanya re’e samba’a tau to mampomuya kaju ara nja’u raya nawu anggur to si ia. Yako etu, ponto to’u ane ratamo temponya, ia yau mangalo’a kaju etu bara re’e wuanya, pei taa kojo re’e.
7 See naka ia manganto’oka tau to mampasilonga nawu anggur etu, ia manganto’o, “Togo nto’umo aku ma’i mangalo’a wua kaju ara si’i pei taa kojo re’e. Wali towo yau, apa tare batuanginya kaju si’i mangampake yau boko ntana ane taa damawua.”
8 Pei tau to mampasilonga nawu etu manganto’o, ‘Pa’a, biakamo ruyu santo’uwa kasaenya. Aku damangkeke ri awe ngkalenya pasi mamposaka pupuk re’e ria.
9 Wali roo see ane mawua ri to’u ri tango matao. Pei ane taa mawua panewa towo yau.’” Etu semo rapa to nato’oka i Yesu tau boros apa Ia rani sira mangansani to lino taa mansaka nahuku i mPue Allah, tiroo rawaika temponya damajea ruyu.
10 Wali yako etu re’e seore, ri Eo Rapandoo, i Yesu mampotundeka tau nja’u banua to napampotunde nto Yahudi.
11 Nja’u ria re’e samba’a tau we’a to naposuak measa see naka sampuyu pei wayu nto’u kasaenya ia masaki. Ia bonggo pei taa kojo nakoto makore manoto.
12 Wali i Yesu mangkita tau we’a etu pei manganto’oka ia ma’i ri aweNya panewa manganto’oka ia, “Indo, korom tilapamo yako ri panyakimu etu.”
13 Ojo karoonya i Yesu manganto’o gombo etu Ia mampotaka tau we’a etu panewa tau we’a etu mansaka manoto makore pasi mangabarong i Pue Allah.
14 Pei re’e samba’a tau tu’a nto Yahudi, ia maja’a rayanya mangkita i Yesu mampakatao muni tau ri Eo Rapandoo. See naka ia manganseko tau boros, ia manganto’o, “Re’e ono eo to masipato tau mapalaong. Wali ma’i ri eo to etu ane rani rapakatao muni, si’a ri Eo Rapandoo!”
15 Pei i Pue mangansono, Ia manganto’o, “Gete korom, ojo gombomu manoto! Tare pasi samba’a komi to taa mapalaong ri Eo Rapandoo! Apa komi mangalede yau taka nu sapi bara keledai ngkomi ri Eo Rapandoo pei mangkeni rapoinu.
16 Wali taa manto’o tau we’a si’i! Ia wiyaa i Abraham, pasi sampuyu pei wayu nto’umo ia ewa nataka i ngKepala Measa apa ia naposuak measa. Wali gete, bara taa masipato ia ralapa muni yako ri takanya etu ri Eo Rapandoo?”
17 Wali tau to mangewa i Yesu, sira mea mangandonge pasonoNya etu. Pei ane tau boros, sira ndende kojo rayanya mangkita samparia palaong to magaya kojo to inikaNya.
18 Wali yako etu i Yesu manganto’oka wo’u tau boros, Ia manganto’o, “Wimba daraika mampakanasaka komi ewa wimba palaong to naika i mPue Allah ri lino see Ia maya mawali Makole nto lino? Wimba daKuika mangamporapaka?”
19 Panewa i Yesu manganto’o, “Palaong to naika i mPue Allah ri lino see Ia maya mawali Makole nto lino maya raporapaka ewa si’i. Rapanya re’e wua mpinumuya to rato’oka sesawi to nasawu nto panawu nja’u nawunya. Wali wua sesawi etu mayunu kojo tempo rasawu pei yako etu sesawi etu tuwu pei mawali kaju to bae see naka tonsi maya mangika sea nja’u oyo nda’anya.” Wali ewa wetu nato’o i Yesu mangkonong i Pue Allah mawali Makole ri lino. Tempo si’i tawa boros tau to Ia Makolenya, pei kanjo’u-njo’u kaboro-boros tau to mawali Ia Makolenya.
20 Pasi i Yesu manganto’o wo’u, “Wimba wo’u dakuika mampakanasaka komi mangkonong palaong to mawali tempo Pue Allah mawali Makole nto lino?
21 Palaong etu maya raporapaka ewa ragi to napake ntau mangika roti. Wali rapanya re’e tau we’a to rani mangika roti, see naka ia mangoko sangkodi ragi pei mangagaloka tarigu opo mpuyu liter. Wali nempo ojo sangkodi ragi etu pei roti etu mawali mone.” Wali ewa wetu wo’u nato’o i Yesu mangkonong tau to mawali tau to Makolenya i Pue Allah, apa kanjo’unjo’u kaboro-boros tau to etu.
22 Wali yako etu i Yesu polas dayau ndeku kota Yerusalem. Pei ri raya mpalinjaNya yau nto’u ria Ia liu mandoo ri kota-kota pasi ri kampukampu to re’e ri jaya. Tempo Ia mandoo ri lipu-lipu etu Ia mampotunde tau.
23 Wali re’e samba’a tau to mampotanaka resi Ia, manganto’o, “Wimba Pue, bara ojo sangkodi tau to darapalaes?” Wali i Yesu manganto’oka samparia tau to mangandonge, to’oNya,
24 “Jaya to rapangarata katuwu maya raporapaka ewa wombo to kodi katawaanya. Wali pakadota mampeyaa masua ri wombo to kodi etu. Apa ane ratamo temponya tau pue banua roomo mambangu pei mangaba’a wombo etu, Aku manganto’oka komi, boros tau to damampeyaa masua pei taa danakoto. Wali tempo etu ane komi tawa masua, komi daraporapaka ewa tau to makore ri sambali mbombo to mangadekek ba’a mbombo pei mampokio, manganto’o, ‘Pa’a, lokaka kami wombo si’i!’ “Pei tau pue banua damanganto’o, ‘Aku taa kunsani komi pasi taa seja kunsani yako imbare kama’i ngkomi.’
25 (13:24)
26 “Wali tempo etu komi damanganto’oka tau pue banua etu, ‘Seore kami re’e mangkoni pasi manginu sindara-ndara pei komi. Pasi komi re’e mampotunde ri lipu mami.’
27 “Pei tau pue banua tiroo damanganto’o, ‘Aku taa kunsani komi pasi taa seja kunsani yako imbare kama’i ngkomi. Wali piyai yako resi aku komi samparia to maja’a lengkomu.’ Ewa see danato’o ntau pue banua.
28 “Wali ane ewa see, tempo to darata komi damangkita i Abraham, i Ishak pasi i Yakub pasi samparia to pantuntu tuntu i mPue Allah, sira paka re’e ri oyo ntau to i Pue Allah Makolenya. Pasi komi datumangi-mangi pasi sakangke’i bagangimu apa komi dararubak yau yako ri oyo ntau to etu.
29 Pei boros tau to yusa to ri oyo ntau to i Pue Allah Makolenya etu apa dama’i tau yako ri tondo mata nu eo, pasi yako ri tondo kasoyo nu eo, pasi yako ri tondo utara pasi selatan. Tau etu darata panewa damantako seja ri roa ri temponya i Pue Allah mawali Makole ri lino.
30 Wali tau to kodi kojo angganya ri tempo si’i, tempo to darata tau etu damawali bose kojo angganya. Pasi tau to bose kojo angganya ri tempo si’i, sira damawali kodi kojo angganya.”
31 Wali tempo i Yesu manganto’o gombo etu, tempo etu ma’i bara sawei mba’a to Yahudi to aliran Parisi, ma’i mangampago i Yesu. Ojo karata nsira resi Ia, sira manganto’oka Ia, “Piyaimo ri lipu si’i pei pago lipu to yusa. Apa i Makole Herodes rani mampopate yau Korom.”
32 Wali i Yesu manganto’oka to Parisi etu, “Inta pei to’oka to pantipu etu, ‘Seo si’i pasi nile Aku damangarubak measa pasi mampakatao muni tau to masaki, panewa ri eo katogo Aku damampakaroo palaongingKu.’
33 Wali Aku damampakapolas palinjangKu seo si’i pasi nile pasi saneonya. Tare kesaa to damawali resi Aku rire apa nda’a Yerusalem semo to pantuntu tuntu i mPue Allah biasa napopate yau ntau, wali taa masipato to pantuntu tuntu i mPue Allah darapopate yau ane si’a ri kota Yerusalem.”
34 Wali yako etu i Yesu magombo wo’u, Ia mawo rayaNya manganto’o, “Kuporayang kojo komi to Yerusalem! Komi yako tempo owi rataka ri tempo si’i komi mampopate yau to pantuntu tuntu i mPue Allah. Pasi tau to napokau i mPue Allah resi komi, tau etu natasoka yau ngkomi watu. Pei nempo ewa see, mandudu ngkani Aku rani mampasiromunaka samparia komi ri awengKu ewa naika manu mampasiromunaka ananya ri ara mpaninya. Pei komi taa rani.
35 Wali kota ngkomi danapiyaika yau i mPue Allah pei darapakaja’aka yau. Wali Aku manganto’oka komi, tempo Aku yau, roo see komi tawa damangkita wo’u Aku sampe rata temponya komi damangantabe Aku, manganto’o, ‘Barong Ia to ma’i napokau i mPue!’”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA