Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu nike ẽndah araq dengan saq nyampẽang tipaq Deside Isa mengenai dengan-dengan Galilea saq tematẽq siq Pilatus, sewaktu ie pade kenyeke ngaturang kurban tipaq Allah.

² Deside Isa jawab ie pade, "Napi lantaran maraq nike entan dengan-dengan Galilea nike tematẽq maraq nike, side pade paran nike buktine ie pade belẽqan dosene tebanding selapuq dengan Galilea saq lain?

³ Tiang badaq side: Pasti Ndẽq! Laguq lamun side ndẽq betobat lẽman dose-dosende, side pade selapuq gen binase ẽndah, maraq ie pade.

⁴ Berembẽ dengan saq baluq olas saq ninggal ẽndah sewaktu ie pade tetimpe siq menare lẽq Siloam? Side pade paran nike buktine ie pade belẽqan dosene tebanding selapuq dengan-dengan lain saq ndot lẽq Yerusalem?

⁵ Tiang badaq side: Pasti ndẽq! Laguq lamun side pade ndẽq betobat lẽman dose-dosende, side pade selapuq gen binase ẽndah maraq ie pade."

⁶ Sesampun nike Deside Isa nyeriteang perumpamean niki, "Araq dengan nalet sopoq lolo are lẽq kebon anggurne. Lẽq sopoq jelo, ie lumbar boyaq buaq lolo are nike, laguq sopoq-sopoq ndẽq araq buaqne.

⁷ Jari, ie bebase lẽq penyakapne, 'Sampun telu taun tiang dateng boyaq buaq lolo are niki, laguq sopoq-sopoq ndẽq araq buaqne. Silaq pade rebaq lolo nike! Ie cume nyembih sari kakenan lẽman tanaq!'

⁸ Laguq jawab penyakap nike, 'Paq, alurang baẽ ie karing setaun. Tiang gen romboq tanaq lẽq sekiterne dait toloqang raboq.

⁹ Sang iniq bebuaq taun mudi. Laguq lamun ndẽq bebuaq, silaq pelungguh rebaq ie.'"

¹⁰ Lẽq sopoq jelo, waktu nike jelo Sabat, Deside Isa ngajahang lẽq salaq sopoq balẽ ibadah.

¹¹ Lẽq derike araq sopoq dengan nine saq sampun baluq olas taun ngonẽqne sakit, sẽngaq araq roh jahat lẽq dalem diriqne. Dengan nine nike bongkok dait tetu-tetu ndẽq tao panjeng.

¹² Sewaktu Deside Isa cingakin dengan nine nike, Deside Isa bemanik lẽq ie, "Inaq, penyakitde sampun selah!"

¹³ Beterus Deside Isa noloq gading-Ne lẽq atas dengan nine nike, dait waktu nike ẽndah ie panjeng, terus mulieang Allah.

¹⁴ Kepale balẽ ibadah nike sili, sẽngaq Deside Isa nyelahang dengan lẽq jelo Sabat, keranaq nike ie bebase lẽq dengan-dengan, "Araq enem jelo jari begawẽan, pade dateng lẽq jelo-jelo nike jari teselahang, ndaq lẽq jelo Sabat!"

¹⁵ Junjungan Saq Mulie bemanik, "Side pade munapik! Lẽq jelo Sabat selapuq dengan ngelepas sampi atao bagalne lẽman barene, dait jauqne sugul terus tebẽng nginem.

¹⁶ Nah, lẽq deriki mangkin araq sopoq dengan nine keturunan Ibrahim, saq sampun baluq olas taun tekuasein siq Belis. Napi ndẽq kanggo tebẽbasang lẽman kuase nike lẽq jelo Sabat?"

¹⁷ Jawaban Deside Isa nike piaq musuh-musuh-Ne jari ilaq gati; laguq selapuq dengan-dengan saq lain seneng serioq selapuq muqjizat saq tepiaq siq Deside Isa.

¹⁸ Deside Isa beketuan, "Mengenai Kerajaan Allah berembẽ keadaanne? Napi siq Tiang kadu bandingang ie?

¹⁹ Keadaanne maraq perumpamean niki. Sopoq tolang sawi tebait siq dengan terus tesawur lẽq kebonne. Tolang sawi nike tiwoq terus jari lolo, dait kedit-kedit piaq kesebu lẽq pẽmpangne."

²⁰ Deside Isa bemanik malik, "Kadu napi malik gen Tiang umpameang hal Kerajaan Allah?

²¹ Keadaanne pade maraq ragi ruti saq tebait siq sopoq dengan nine terus teadon kance petang dase liter tepung terigu, jangke mbal selapuqne."

²² Dalem pemargian-Ne ojok Yerusalem, Deside Isa liwat langan kote-kote dait kampung sambil ngajahang.

²³ Beterus araq dengan metakẽn lẽq Deside Isa, "Paq, napi cume sekediq doang dengan saq gen teselametang?" Jawab Deside Isa,

²⁴ "Pade berusahe tame langan lawang saq supit. Tiang badaq side, luwẽq dengan berusahe tame laguq ndẽq bau.

²⁵ Sewaktu ẽpẽn balẽ ures dait ngimpet lawangne, side pade nganjeng lẽq luah dait mulai ketok-ketok lawang sambil bebase, 'Paq, bukaqang tiang lawang!' ~Epẽn balẽ nike gen bejawab, 'Tiang ndẽq nenaoq side lẽman mbẽ!'

²⁶ Side pade gen bejawab, 'Tiang pade sampun bekelor dait nginem kance Pelungguh, dait Pelungguh ẽndah sampun ngajahang lẽq rurung-rurung saq araq lẽq kote tiang pade!'

²⁷ Laguq ẽpẽn balẽ nike gen bejawab malik, 'Tiang ndẽq nenaoq side pade lẽman mbẽ! Pade nyedi lẽman taoq niki, side pade saq gawẽq jahat!'

²⁸ Sewaktu side pade serioq Ibrahim, Ishak dait Yakub serte selapuq nabi besukecite lẽq dalem Kerajaan Allah, side pade gen nangis dait menderite, sẽngaq side pade tetundung ojok luah!

²⁹ Dengan-dengan gen dateng lẽman Timuq, Bat, lẽman Lauq dait Daye, dait gen besukecite lẽq dalem Kerajaan Allah.

³⁰ Setetune, araq dengan saq penutuq gen jari dengan penembẽq, dait dengan saq penembẽq gen jari saq penutuq."

³¹ Lẽq waktu nike ẽndah araq dengan-dengan Parisi parek ojok Deside Isa dait matur, "Sampunang Pelungguh meneng lẽq deriki, silaq Pelungguh lumbar ojok taoq saq lain, sẽngaq Herodes beniat nyematẽq Pelungguh."

³² Jawab Deside Isa, "Silaq lumbar dait sampẽang ojok dengan saq ndẽq araq manpaatne nike, 'Jelo niki dait jemaq Tiang gen sediq roh jahat dait nyelahang dengan sakit, laguq lẽq jelo ketelu, Tiang gen nutuqang karye Tiang.'

³³ Timaqne maraq nike Tiang harus nerusang ẽndah kelampan Tiang, jelo niki, jemaq dait sulẽqne, sẽngaq sopoq nabi ndẽq kanggo tematẽq lẽq luah Yerusalem.

³⁴ Yerusalem, Yerusalem! Side matẽq nabi-nabi! Utusan-utusan Allah side pelẽwas siq batu jangke ninggal! Sampun pire kali Tiang mẽlẽ ngumpulang selapuq pendudukde maraq inen manuk saq kekep anak-anakne lẽq bawaq kelẽtẽkne, laguq side ndẽq mẽlẽ!

³⁵ Setetune balẽnde gen tebilin dait jari sepi. Laguq Tiang badaq side: Mulai mangkin side ndẽq gen serioq Tiang malik, jangke side bebase, 'Teberkahin Ie saq rauh dalem pesẽngan Tuhan.'"

Lukas

Video Lukas 13

Ikuti Kami:

KONTAK | PARTISIPASI | DONASI