1 Hong katika te oloh manyarita akan Yesus tahiu pire-pire oloh Galilea je impatei Pilatus, metoh ewen kanjerae maluput parapahe akan Hatalla.
2 Hapa manombah sarita te, Yesus hamauh, "Awi oloh Galilea te impatei kalote, keton mangira jete buktie ewen te labih badosa bara kakare oloh Galilea awang beken?
3 Dia samasinde! Tapi keleh mingat: amon keton dia hobah bara kare dosan keton, keton handiai kareh matei kea, sama kilau ewen.
4 Kilen ampie kea dengan hanyawalas oloh je matei hong Siloam, katika candi te manjato menyet ewen? Keton mangira jete mamparahan ewen te labih badosa bara kare oloh handiai awang beken je melai hong Yerusalem?
5 Dia samasinde! Sinde tinai Aku hamauh: Amon keton dia hobah bara dosan keton, keton kareh uras matei kea sama kilau ewen."
6 Limbah te Yesus manyarita kare paribasa toh, "Aton ije biti oloh je tempon batang sikon hong kabon anggor. Sinde andau ie haguet manggau bua hong batang sikon te, tapi ije kabawak bua mahin jaton ie sondaue.
7 Maka ie hamauh dengan tukang kabon, 'Ite, jari telo nyelo aku dumah manggau bua sikon hong batang sikon toh, tapi ije kabawak bua mahin jaton aku sondaue. Teweng ih batang kayu toh! Ie baya mampalepah zat panginan bara petak!'
8 Tapi tukang kabon te tombah, 'Nauhe ie belom ije nyelo tinai, Tuan. Aku mancangkul petak hakalilinge tuntang mambowor pupuk.
9 Mikeh ie kareh tau mamua nyelo rahian. Tapi amon dia, tau ih Tuan manyoho oloh manewenge.'"
10 Sinde hong andau Sabat, Yesus majar hong ije huma sombayang.
11 Intu hete aton oloh bawi je jari hanyawalas nyelo haban, awi aton roh papa huang ie. Oloh bawi te hajongkong tuntang dia olih samasinde mendeng bujur.
12 Katika mite ie, ie hamauh hai auhe dengae, "Ibu, ikau bebas bara panyakitm!"
13 Palus Yesus mingkes lengen Aie hunjun oloh bawi te, tuntang hong katika te kea ie mendeng bujur palus manara Hatalla.
14 Kapala huma sombayang te balait, ganan Yesus mampakeleh oloh hong andau Sabat, tagal te ie hamauh dengan kare oloh, "Aton jahawen andau akan oloh mangat bagawi; keleh dumah hong kare andau te uka impakeleh, ela hong andau Sabat!"
15 Tuhan tombah, "Keton toh haliau! Hong andau Sabat uras oloh maliwus sapi atawa kalidaie bara karambang tuntang mimbite balua mangat mampihope.
16 Nah, hong hetoh aton ije biti oloh bawi turonan Abraham, je hanya walas nyelo katatahie injarat awi setan. En dia tau ie iliwus bara jarat te hong andau Sabat?"
17 Auh tombah Yesus te mawi kare musoh Yesus mahamen toto; tapi kakare oloh awang beken uras hanjak mite kakare taloh heran je iawi Yesus.
18 Yesus misek, "Amon Hatalla marentah, kilen ampie keadaae? Dengan en Aku tau manandinge?
19 Keadaae te sama kilau paribasa toh. Ije kabawak sawi induan awi ije biti oloh palus iimbul hong kabon. Bawak sawi te belom palus manjadi batang kayu, tuntang kare burong palus mawi sarangae intu kare edan kayu te."
20 Sinde tinai Yesus misek, "Amon Hatalla marentah, hapan en Aku tau mananding ampin keadaae?
21 Keadaae sama kilau ragi je induan awi ije biti oloh bawi palus ie mawoie dengan epat puluh liter tepong, sampai kamer urase."
22 Hong benteng jalan akan Yerusalem, Yesus mahalau kare lewu tuntang kare kampong oloh sambil majar.
23 Palus aton oloh misek dengan Yesus, "Pa, en baya isut ih oloh je akan inyalamat?" Yesus tombah,
24 "Keleh manggau jalan mangat tame mahalau bauntonggang je simit. Basa, ingat! Are oloh je manggau jalan tame tapi jaton olihe.
25 Hong katika tempon huma misik tuntang matep bauntonggange keton mendeng intu luar tuntang nampara manegah sambil hamauh, 'Tuan, uap bauntonggang akan ikei!' Tuan te akan tombah, 'Aku dia katawan keton bara kueh!'
26 Limbah te keton tombah, 'Ikei jari kuman mihop dengan Tuan, tuntang Tuan kea jari majar intu kare jalan lewun ikei!'
27 Tapi Tuan te hamauh tinai, 'Aku dia katawan keton bara kueh. Dari bara hetoh, keton je manguan gawi papa!'
28 Katika keton mite Abraham, Isaak tuntang Yakob dengan kakare nabi hanja-hanjak hong lewu taheta ain Hatalla, keton kareh manangis tuntang kapehe awi keton kabuat iharak balua!
29 Kare oloh kareh dumah bara hila timor tuntang hila barat, bara utara tuntang salatan, tuntang handak hanja-hanjak huang Lewu Taheta ain Hatalla.
30 Puna toto, aton oloh je pangkarahiae kareh manjadi oloh je pangkaheloe, tuntang aton oloh je pangkaheloe je kareh manjadi oloh je pangkarahiae."
31 Hong katika te kea aton pire-pire oloh Parisi dumah manalih Yesus tuntang hamauh, "Ela melai intu hetoh! Talih akan eka beken, basa Herodes handak mampatei Ikau."
32 Yesus tombah, "Lius ih sanan akan oloh je dia baguna te, 'Andau toh tuntang andau jewu Aku maharak setan tuntang mampakeleh oloh haban tapi hong andau kateloe, Aku handak mahapus kare taloh gawing-Ku.'
33 Aloh kalote Aku musti marajur kea panjalanang-Ku andau toh, jewu atawa limbah jewu, basa dia bahalap ije biti nabi impatei intu luar Yerusalem.
34 Yerusalem, Yerusalem! Kare nabi impateim! Kare sarohan Hatalla imantingm hapan batu sampai matei! Jari pire tingkat Aku handak mamumpong kakare oloh lewum sama kilau manok pehok mangalindong kare anake hong penda palapase, tapi ikau dia maku!
35 Tagal te Hatalla dia hindai mampahayak Ikau. Ingat, nampara bara katika toh Ikau kareh dia mite Aku tinai, sampai Ikau hamauh, 'Imberkat Ie je dumah huang aran Tuhan.'"

Studi Alkitab lengkap, silahkan lihat Alkitab SABDA :: Lukas 13
Studi Alkitab mobile, silahkan lihat Alkitab Mobi :: Lukas 13
Studi Alkitab dengan Video LUMO, silahkan lihat LUMO Indonesia :: Lukas

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke