Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani panorang ai adong ma na roh patugahkon hu Bani pasal halak Galilea, na dob madurus darohni ibahen si Latus, anjaha saor bani galangan ni sidea.
2 Jadi nini Jesus ma mambalosi sidea, “Na iagan uhurnima do mardousanan halak Galilea ai marimbang haganup halak Galilea, halani sonai mangonai bani sidea?
3 Huhatahon ma bennima: Lang, tapi anggo seng mubah uhurnima, lanjar sonai do hanima haganup magou use.
4 Barang na iagan hanima do banggalan salah ni sisapuluh ualuh halak ai, na matei idondoni manara na i Siloam ai, marimbang haganup halak na marianan i Jerusalem?
5 Huhatahon ma bennima: Lang, tapi anggo seng mubah uhurnima, lanjar sonai do hanima haganup magou use.”
6 Dob ai ihatahon ma limbaga on, “Adong ma hayu ara ni sada halak, na sinuanni i pohon anggurni; jadi roh ma ia mangindahi buahni, hape seng dong jumpahsi.
7 Gabe ihatahon ma hubani sihorjahon pohon anggurni ai, ʻTonggor ma, domma pala patolu-tahunkon roh ahu mangindahi buah ni hayu ara on, hape seng dong. Roboh ma in, mase ma soya tanoh in bahenon ni in?ʼ
8 Tapi nini mambalosi, ʻTuannami, paturut ham ma lobei in satahun on, ase sompat husangkul tanoh inggot ni in, anjaha hubahen napu hujin,
9 andohar marbuah hu lobeian on; tapi anggo seng ra be, na roboh ma.ʼ”
10 Jadi mangajari ma Ia bani sada parguruan sanggah ari Sabat.
11 Anjaha tonggor ma, adong ma ijai sada naboru na siniaran ni tonduy na jahat. Domma sapuluh ualuh tahun ia boritan, suhung do angkulani, anjaha seng boi ia jongjong dirgak.
12 Dob ididah Jesus ai, idilo ma ia anjaha nini ma hu bani, “Ham inang, maluah ma ham humbani naboritmu in!”
13 Lanjar itampeihon ma tangan-Ni hu bani; gabe mintor dirgak ma ia, anjaha ipuji ma Naibata.
14 Ia sintua ni parguruan ai, sogam do uhurni, halani na pamalum naborit ai Jesus sanggah ari Sabat, gabe nini ma hubani halak na mabuei ai, “Onom ari do pangkorjahononkon; ijai ma nasiam roh, ase ipamalum nasiam, ulang ma sanggah ari Sabat.”
15 Jadi nini Tuhan in ma mambalosisi, “Ale sipakulah-kulah, ai lang haganup do nasiam, age bani ari Sabat paluahkon lombuni atap halodeni humbani harang, laho pasiburhon ai?
16 Ia naboru on, ai ma boru ni si Abraham, na dob sinangkut ni setan sapuluh ualuh tahun dokahni, mintor lang ma patut tanggalan sangkut-sangkut on bani ari Sabat?”
17 Jadi dob ihatahon sonai, maila ma haganup imbang-imbang-Ni ai, tapi marmalas ni uhur do haganup halak na mabuei ai, halani haganup pambahenan-Ni na marmulia ai.
18 Dob ai ihatahon ma, “Usih huja do Harajaon ni Naibata, anjaha huja do ai pausihon-Ku?
19 Usih do ai hubani batu ni loharum na ibuat halak laho manaburhon ai hu jumani. Jadi tubuh ma, anjaha roh do manuk-manuk na i awang-awang marasar bani dangkahni.”
20 Jadi nini ma use, “Huja do pausihon-Ku Harajaon ni Naibata?
21 Usih do ai bani ragi, na ibuat sada naboru, laho manaorhon ai bani itak tolu tumba, paima marragi ganupan ai.”
22 Jadi ibontas Jesus ma huta ampa dusun laho mangajari, sanggah bani pardalanan-Ni dompak Jerusalem.
23 Jadi nini sada halak ma hu Bani, “Tuhan, otik do gakni na saud maluah?”
24 Tapi nini ma dompak sidea, “Maruntol ma nasiam masuk hun labah na sompit in! Ai Huhatahon ma bani nasiam: buei do namin na manlajou masuk, tapi lang boi.
25 Anggo jongjong ma holi simada rumah ai, anjaha itutup labah ai, i darat ma nasiam jongjong hartuk-hartuk marsahap, ʻTuhan, ungkab Ham ma!ʼ tapi hatahonon-Ni ma, ʻSeng hubotoh na roh hunja nasiam!ʼ
26 Gabe hatahonon nasiam ma, ʻNa rap mangan minum do hanami pakon Ham, anjaha iajari Ham do hanami i alamannami.ʼ
27 Dob ai hatahonon-Ni ma, ʻSeng Hubotoh na roh hunja nasiam. Laho ma hun lobei-Hu, nasiam ganup sihorjahon na so pintor!ʼ
28 Ijai ma masa doruh-doruh ampa na patungosngoson, sanggah na ididah nasiam si Abraham, si Isak, si Jakob ampa haganup nabi-nabi ai ibagas Harajaon ni Naibata, tapi anggo nasiam tarbuang hu darat.
29 Ijai ma roh na hun hapoltakan ampa hasundutan, na hun utara ampa dangsina, hundul mangan ibagas Harajaon ni Naibata.
30 Anjaha tonggor ma, adong do na parpudi gabe parlobei, anjaha na parlobei gabe parpudi.”
31 Bani panorang ai roh ma deba Parisei mangkatahon hu Bani, “Laho ma Ham, misir hunjon, ai sihol bunuhon ni si Herodes do Ham.”
32 Gabe nini ma dompak sidea, “Laho ma nasiam, hatahon nasiam ma bani sorigala ai, ʻTonggor ma, Ahu mangusir setan-setan ampa pamalum na boritan sadari on ampa patar, anjaha ari patoluhon marujung ma langkah-Ku.ʼ
33 Tapi maningon mardalan do Ahu sadari on, patar ampa bani ari na mangihut hujai, ai seng bulih matei nabi anggo i darat ni Jerusalem.
34 Jerusalem, Jerusalem, sibunuh nabi-nabi anjaha sipargijig bani batu halak na sinuruh marayak ham! Gati do namin sihol patumpuon-Ku anakmu, songon indung ni dayok na patumpuhon anakni hu toruh ni habongni, tapi seng ra ham!
35 Tonggor ma, tarulang ma rumah nasiam. Tapi Huhatahon ma bani nasiam: Seng idahon nasiam be Ahu, paima ihatahon nasiam: Pinasu-pasu ma na roh marhitei goran ni Tuhan!”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA