Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nori, hit Kristus ebe men mangno roho Allahn honolukap heneptisimu Kristus ino Allah inggik pikit fil heriyeg lit weregma At ubam alem yami ruruk lamuhup.
2 Palimu werehon eneg yami ruruk lit kinangma werehon wenggeluk fug.
3 Hit hinindi siyahon war atisimu hinindi fanowon mondabi honoluk welamuhubon Kristus men mangno roho Allahn hirako fet henesug lit wereg.
4 Nonoluk welamuhuk ane fet nenesuhon ino Kristus mondabi ebenam aruhu sambil hir oho At men mangno roho mondabi umbagpag turuk ambeg ebenam amuhup.
5 Ari fahet kinangmon hininggik hunuyug fam siyag ane turuk lahebon kong toho hik isaruk lamuhup. Pabi ane turukon men siyag-siyag ane hunubam het tehon men, tu hilila ari hilila peruk lit honolok ane turuk lahebon men henebuwap fahet wenggel harukon men obog toho arimano usane hag toho wereg.
6 Aben siyag ane turukon obog toho arimano fahet Allahn nirim peruk lit Olok haruk lit wereg.
7 Hiren oho indam siyahon apma wereg lit ari roho turuk latikip angge famen
8 ketiya mondabi hik usul peruk lamuhup. Hik isaruk lamuhubon te hinindimu inahan atuk lit per eneptukon men honolok ane turukon men ap enebug uruk lit henembilik fam ahum sipuk toho wiliptukon men mondabi umbusuhup.
9 Nori, hit-hit henele si uruk lamuhup fug. Sum miningon embeseruk hag toho miningon hunubam werehon embeseruk lit
10 sum keron suknuruk hag toho henebe keron fam welamuhup. Allah wal henepfahon inowen hit An pingganet hag toho welamuhup ulug hunubabut kerap heneptukmu pikir ane eneg wenggel haruk lit welamuhup.
11 Allahn kerap heneptuk lit weregma Yahudi inap Allah unuk onoluk inap men Yunani inap Allah unuk enepeleg inap men enembilahap palehon men paleg elehon men ap pohon men enepeleg inap men aben mingming eneptukmu enemingmingangge werehon men ap mingming eneptuk lit palimu unduhukon men alem aru apma it obog toho welam fug angge Kristus apma welamuhup.
12 Allahn An numaliki amuhup ulug mumal heneptisireg fanowap heneptisimu hit-hit hinindi roho wereg lit honori men let-ler atuk lamuhup. Hinindi apma teberuk lit hinindi wiyig toho wereg lit hunubam lombuk toho welamuhup.
13 Honori men hunubam lombuk toho wereg lamuhup. Honori eke fam honolok ane hunundaman peruk lit ahe laharuk halug elehap turuk lit henembol fil embeseruk lamuhup. Hiren siyag ane tirikibon Nonoweyen ambolma embeserisi hag toho hiren oho honoriyen siyag ane turukon henembolma embeseruk lamuhup.
14 Hunubam ihi ane ari obog toho welaruhu angge famen ap hinindi enesug lamuhup ane ari eneg palimu welaruhu. Palimu welaruhu ane ari famen henebe misig hag toho fano roho wereg lit hele pug tohon hag toho welamuhup.
15 Nonowe Kristus henebe mangnowap heneptuk lit hinindi yuwahap heneptisiyon inowen fet henesug laruhu. Ari roho henebe misig hag toho welamuhup ulug wol heneptisimu hiren Nonowe ulug At hi ruruk lamuhup.
16 Kristus wene fanowon hiyag nisarisiyon ino hit sehelimu weregma likiya hupmu wenggel haruk lit welamuhup. Hiren fuki roho hinindi wenggel haruk lit hit hininggareg komo-komo atuk lit honori hiyag isaruk lamuhup. Sini Mazmur uruk lit Allah wel turuk asini men weneman uruk asini men yunggultuk lit hinindimuwen Allah Ninikni uruk lit wel turuk lamuhup.
17 Mun angge man angge hiren turuk lahebon henembilik fam wilip atukon men hininggik fam turuk lahebon men ari Nonowe Yesus unuk fam turuk lamuhup. Hiren turuk lamuhubon ariyen At unuk fam Ninikni Allah wel turuk lamuhup.
18 Hit hiyap ap oho lahebon hunubam tot nele imin. Nonowe min mangno roho wereg inaben turuk hag toho henehunsi enele holtuk lamuhup.
19 Hit ap hiyap oho lahebon hunubam tot imin. Hunuhesi hinindi enesug lit honolok ane unubam tuk fug angge fano roho welamuhup.
20 Hit malik toron hunubam tot imin: Hiniknisi hinisingasiyen komo heneptuk ane fahet fano roho holtuk lamuhupmu Nonoweyen oho ahiyeg toho welaruhu.
21 Hit ap hunumalikisi ondoho lahebon hunubam tot imin: Hunumalikiyen enekolen inine eleg am nowen inindi siyahap enebuhup fug.
22 Hit ap enemingmingangge welahebon hunubam tot imin: Hiniknisi kinangma werehonen mun ane man ane fahet hiyag hisarukmu enele holtuk lamuhup. Hiniknisi onolohotman fano pukag ulug eneg ler eneptuk lamuhup fug. Allah fahet hinindi wirik toho wereg lit ler eneptuk lamuhup.
23 Mun angge man angge fahet turuk lahebon ari henesukun fano roho turuk lit ap fahet turuk lahe puk fug angge Ninikni Allah fahet turuk lahe peruk lamuhup.
24 Hinikniyen hit fahet onggo og hisahuk ulug fano angge wep toho emberisiyon ino og nisahu ulug honoluk toho welamuhup. Kristus ino Hinikni weregma hit At amingmingangge welahep.
25 Ninikni Allahn ap tu siyag tu fano ulug onorohole haluk fug angge weregma ap san siyag ane turuk halug inggareg ubam unggum hebeloho kuhu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA