Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba no mu'orifi ami awõ Keriso, bõrõ da'õ lõ tola lõ miforege wanõndra ngawalõ hadia zi so ba zorugo, ba nahia heza mamatõrõ Keriso si fao Lowalangi.
2 Ba da'õ mifataula gera'erami, bõi ba wa'a'ulidanõ.
3 No sa mate ami, ba hiza no auri sa, hew̃a'ae no tobini wa'aurimi si fao Keriso ba khõ Lowalangi.
4 Bõrõ da'õ, Keriso gumbu wa'auri sindruhu khõmi, ba na to'ele Ia dania, ba fao ami khõ-Nia ba lakhõmi-Nia andrõ.
5 Bõrõ da'õ mibunu sa'ae gomasiõ gulidanõ andrõ samakiko fa'aurimi, si mane fohorõ, fa'ara'ira'iõ, hokha, fangisõ si lõ sõkhi, ba fa'erõhõ (no faoma ira wa'erõhõ wamosumange adu).
6 Da'õ fefu mbõrõ zamaoso fõnu Lowalangi ba niha si lõ molo'õ oroisa-Nia.
7 Me fõna ba no mi'o'õ gõi gomasiõ dõdõ si manõ, me da'õ zamatõrõ fa'aurimi.
8 Iada'e, ba mitibo'õ sa'ae fefu zi lõ sõkhi andrõ ba wa'aurimi: bõi mofõnu sa'ae, ba ma mamawukaisi, ba ma abao dõdõ ba niha bõ'õ. Bõi manõ alua ba mbawami wehede falelesa, ba ma fehede sogoro niha.
9 Bõi milimo nawõmi, me no miheta wa'aurimi si tohõna andrõ awõ mbuabuania.
10 Ia da'e no mube'e khõmi wa'auri si bohou. No niha si bohou ami, si lõ mamalõmalõ Ibohouni Lowalangi sombõi andrõ, molo'õ famaedo-Nia samõsa. Ohitõ dõdõ-Nia ena'õ mo'ahonoa wa'aboto ba dõdõmi Lowalangi.
11 Ba da'õ taya fefu gamaehutara niha Yahudi ba si tenga niha Yahudi, si no laboto ba si lõ muboto, lõ sa'ae famaehuni niha si fatewu ba niha si lõ sõkhi, lõ sawuyu ba lõ si tenga sawuyu, bõrõ me ha sambalõ Keriso manõ, ba awõ wa no sambua Ia ba khõra fefu!
12 Ba no banua Lowalangi ami. No I'omasi'õ ami Lowalangi awõ wa no Ituyu ami tobali tana khõ-Nia ni'amoni'õ. Bõrõ da'õ miforoma'õ wa'ahakhõ dõdõ, fa'asõkhi dõdõ, fangidengide'õ fa'ohauhau ba fanaha tõdõ.
13 Faoma mibologõ dõdõmi khõ nawõmi, ba mi'efa'õ zala nawõmi khõmi, na so zinegu zamõsana khõ nawõnia. Ba wa'omuso dõdõ I'efa'õ horõmi Keriso, bõrõ da'õ gõi lõ tola lõ faoma mi'efa'õ zala nawõmi.
14 Ba sabõlõ moguna, ya'ia: Faoma mi'omasi'õ nawõmi, bõrõ me fa'omasi da'õ zamabõbõ ya'ami fefu, irege mo'ahonoa.
15 Ba ena'õ fa'atulõ nibe'e Keriso bakha ba dõdõmi zangahonogõi angetulami. No Ikaoni ami Lowalangi tobali ndrotondroto mboto andrõ si ha sambua, ena'õ auri ami ba wa'ohahau dõdõ soroi Keriso. Ba mi'andrõ saohagõlõ.
16 Ya mow̃a'a bakha ba dõdõmi wamahaõ Keriso andrõ, safõnu howuhowu. Ya'a'oi so wa'atuatuami ba wamahaõ awõmi ba ba wo'amenesi awõmi. Mi'anunõisi zinunõ fanuno; mi'anunõ khõ Lowalangi fao fangandrõ saohagõlõ bakha ba dõdõ.
17 Fefu hadia ia nilaumi ba ma niw̃a'õmi, ba ena'õ ba dõi Zo'aya Yesu milau ba miw̃a'õ ia. Ba mi'andrõ saohagõlõ khõ Lowalangi Ama, ba ngawalõ zi no Ifalua Yesu khõmi.
18 Ya'ami talifusõ fo'omo ira alawe! Mi'o'õ li ndra matuami, si manõ zinangea amuatami ba wa'aniha Keriso.
19 Ya'ami talifusõ fo'omo ira matua! Mi'omasi'õ ndra alawemi. Bõi milau zi lõ sõkhi khõra.
20 Ya'ami iraono! Mi'o'õ li ndra amami inami da'õ sa zomasi Lowalangi.
21 Ya'ami ira ama! Bõi mifõkhõi dõdõ ndraonomi, fa bõi aetu wanõtõnara.
22 Ya'ami enoni! Ba ngawalõ hadia ia, mi'o'õ li zokhõ ya'ami ba gulidanõ. Bõi ha ba ginõtõ lafaigifaigi ami mi'o'õ lira, si mane niha somasi nisuno. Ena'õ moroi ba dõdõmi mi'o'õ lira, bõrõ me no samosumange So'aya ami.
23 Gofu hadia halõw̃õ nibe'e khõmi, ba ena'õ moroi ba dõdõmi wangohalõw̃õgõigõ ya'ia, hulõ na khõ Zo'aya mi'ohalõw̃õgõigõ ia, ba tenga ba niha.
24 Mitõngõni, wa khõ Zo'aya mitema dania luomi. Hadia zi no Ihõnagõ So'aya ba mbanua-Nia, da'õ nibe'e-Nia dania khõmi. Khõ zindruhu sokhõ mohalõw̃õ ami sindruhunia, ya'ia Keriso.
25 Ba haniha sa zolau si sala, ba itema dania zulõ zalania andrõ; bõrõ me lõ famaigi bawa khõ Lowalangi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA