Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Side pade sampun teidupang malik bareng kance Almasih. Keranaq nike side pade harus berusahe jari mauq hal-hal saq lẽq sorge, lẽq taoq Almasih mrẽntah ngiring Allah.

² Pikirang hal-hal saq araq lẽq derike, ndaq tipaq hal-hal saq lẽq dunie.

³ Sẽngaq side pade sampun ninggal, dait idupde teilipang bareng kance Almasih lẽq dalem Allah.

⁴ Nah, sumber idupde saq sejati nike Almasih, dait lamun Ie penggitan ẽraq side pade gen araq ẽndah bareng kance Ie lẽq dalem kemuliean-Ne!

⁵ Keranaq nike, matẽq kemẽlẽq-kemẽlẽq dunie saq ngerongrong diriqde, misalne: bezinah, hal-hal saq ndẽq pantes, hawe napsu, kemẽlẽq saq jahat, dait serakah (sẽngaq serakah nike pade maraq nyembah berhale).

⁶ Hal-hal maraq nike saq datengang murke Allah tipaq dengan-dengan saq durhake.

⁷ Laẽq side mẽsaq turut kemẽlẽq-kemẽlẽq nike, sewaktu side pade masih tekuasein siq kemẽlẽq-kemẽlẽq nike.

⁸ Laguq mangkin side pade harus tetẽh hal-hal saq jahat nike lẽman diriqde: ndaq malik sili, atao ngamuk atao bedowẽ perasaan saq lengẽ tipaq dengan lain. Ndaq gati sugul lẽman biwihde ucapan-ucapan saq lengẽ atao ucapan saq kotor.

⁹ Ndaq berugung sopoq kance saq lainne, sẽngaq idup saq laẽq dait selapuq tabiatne sampun side pade tetẽh.

¹⁰ Mangkin side pade sampun teicanin idup saq baru. Side pade jari manusie baru, saq kenyeke tejariang baru terus-menerus siq penciptene, nike Allah, menurut gambar Allah. Maksutne adẽq side pade kenal kance Allah secare sempurne.

¹¹ Dalem hal niki, ndẽq araq malik bẽdene antare dengan Yunani dait dengan Yahudi, dengan besunat dait ndẽq besunat, dengan Barbar dait dengan Skit, hambe dait dengan merdẽke. Laguq sebalikne, Almasih nike selapuq-lapuqne dait lẽq dalem selapuq-lapuqne.

¹² Side pade jari dengan-dengan saq tehususang bagi Allah. Allah ngasihin side pade dait tepilẽq jari dowẽ-Ne saq husus. Keranaq nike side pade harus nyatayang belas kasihan, side pade harus murah atẽ, rendah atẽ, lemah lembut dait sabar.

¹³ Side pade harus sabar sopoq kance saq lainne, dait saling ngampunin lamun araq saq dendem tipaq saq lain. Pade maraq Tuhan sampun ngampunin side pade, jari side pade ẽndah harus mẽlẽ saling ngampunin sopoq kance saq lain.

¹⁴ Dait lẽq atas selapuqne nike: Side pade harus kadu kasih, jari pengiket saq pesopoq dait nyempurneang.

¹⁵ Damẽ sejahtere Almasih harus mrẽntah lẽq dalem atẽnde, sẽngaq jari hal nike side pade sampun temanikang jari sopoq awak. Dait pade besyukur.

¹⁶ Manik Almasih harus araq secare belimpah-limpah lẽq antare side, sehingge side siq selapuq hikmat ngajah dait ngebẽng peringetan tipaq sopoq dengan dait saq lain sambil nyanyiang zabur, dait puji-pujian serte nyanyian rohani, side ngucap syukur tipaq Allah lẽq dalem atẽnde.

¹⁷ Napi juaq saq side pade laksaneang atao ucapang, hal nike harus telaksaneang dait teucapang siq pesẽngan Junjungan Saq Mulie Deside Isa Almasih, sambil ngucap syukur tipaq Allah Bapa lẽq napi saq telaksaneang siq Deside Isa umaq side.

¹⁸ Semeton senamian saq jari senine! Pade tunduk lẽq semamende, sẽngaq maraq nike seharusne kelakuande sebagẽ dengan saq idup lẽq dalem Tuhan.

¹⁹ Semeton senamian saq jari semame! Pade kasihin seninende. Ndaq sakitin angen seninende.

²⁰ Kanak-kanak! Pade taat lẽq dengan toaqde dalem selapuq hal, sẽngaq perbuatan saq maraq nike saq nyenengang Allah.

²¹ Semeton senamian saq jari bapaq! Ndaq sakitin angen bije-bijende adẽq ie pade ndẽq jari putus ase.

²² Semeton senamian saq jari hambe! Pade taat lẽq majikande saq araq lẽq dunie niki dalem selapuq hal. Ketaatande nike ndaq cume lẽq waktu ie araq lẽq julunde adẽq side teajum, laguq adẽqde taat lẽq ie siq angen saq ihlas, sẽngaq side pade hormatin Tuhan.

²³ Napi juaq saq side piaq, piaq nike siq segenep atẽnde maraq tipaq TUHAN, dait ndẽqne tipaq manusie.

²⁴ Pade inget bahwe side pade gen nerimaq upaq lẽman Tuhan. Napi saq tesedieang siq Tuhan umaq umat-Ne, nike saq gen teicanin tipaq side. Sẽngaq majikan saq setetune side pade kenyeke layanin nike, Almasih mẽsaq.

²⁵ Dait sai juaq saq piaq kesalaqan, gen tanggung kesalaqan-kesalaqan nike; sẽngaq Tuhan nẽnten bẽde-bẽdeang dengan.

Kolose

Video Kolose 3

Ikuti Kami:

KONTAK | PARTISIPASI | DONASI