Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma Saulus sipok kanisak ndia no namahokok boe. Faik ndia dale na boe, ala usi salanik manai Yerusale mala, de nalosa hataholi kamahehele kala lalai tapasasala leo basa nusa Yudea no Samaria lala'ena leu, ta'da fe'e Lamatua ka hataholi nadedenu nala soona, ta lalai fa.

² Hataholi fo lamahele neu Manetualai na, latoi Stefanus. Dale nala he'di sa, de ala kii-makaleleun.

³ Tehu Saulus ka'da ana sanga enok nakandoo, fo ana tao nakalulutuk salani kala. Neme uma esa leo uma esa neu, fo ana lele'a-loloso hataholi kamahehele kala nau inak do touk boe leme uma dale mai, boema ana taos leo bui dale leu.

⁴ Hataholi kamahehelek fo mana tapasasalak sila la tui-benga Manetualain Hala Malole na leo basa mamanak lala'ena.

⁵ Felipus neu leo kota Samaria neu de ana tui-benga Mane Mana Fe So'dak fo Manetualain helu ka neu hataholi manai naa la.

⁶ Lelek fo hataholi la lamanene Felipus tutui-bebengan ma lita ana tao manda'di beu kala boema hataholi sila la ba'u ka, ala taoafik neu hata fo Felipus tui-bengak sila la.

⁷ Nana dula dale mangalau kala lakadi-lakadau fo ala kalua leme hataholi nitu sa'e kala dalek mai. Hataholi lu'u kala ma hataholi ei hela kala boeo ba'u ka ala lea-hai.

⁸ Boema hataholi manai Samaria la lamahoko lanseli.

⁹ Nai kota ndia, hapu touk esa na'de Simon. Nai faik de'ubee dale na, ana tao na hataholi la langan beekale, hu ka nde malela suangi na. Nafa'da hataholi la nae, ndia hataholi malela ina.

¹⁰ Boema basa hataholi ta'da-ta'dak manai kota ndia, ala taoafik lanseli neu hataholi ndia. Hataholi sila la lae, "Hataholi ia, Manetualain be'i balakain, fo nananita-nalelak da'dileo Be'i balakai Matua Ina."

¹¹ Ana tao na hataholi la bafa nala bee poo nana malela suangi na doo ba'u so, de nalosa hataholi la taoafik lanseli neun.

¹² Tehu Felipus tui-benga fe hataholi sila la Hala Malole la'eneu tao leo beek de Manetualain paleta leo Mane ka, ma la'eneu Yesus Kristus fo Mane Mana Soi-Tefak ndia. Boema hataholi la lamahele Felipus tutui-bebengan ndia de ala salanis, nau touk do inak boe.

¹³ Simon boeo namahele de salanin. Salani basan boema ana tunga nahele Felipus. Manda'di beu kala tao la Simon bafanpoo-poo.

¹⁴ Hataholi nadedenuk manai Yerusale mala lamanene hataholi Samaria la sipok Manetualain dede'a-kokolan so, boema ladenu Petrus no Yohanis leu leo naa leu.

¹⁵ Lelek fo Petrus no Yohanis losa naa boema, ala hule-haladoi fe hataholi Samaria sila la fo daenga ala hapu Manetualain Dula Dale na,

¹⁶ nana Manetualain Dula Dale na beita koasa na hataholi sila la esa boen; hataholi sila la besa ka nanasalanik ninik ka'da Lamatuak Yesus na'de na.

¹⁷ Boema Petrus no Yohanis lalaa lima nala neu hataholi Samaria sila la langan lain; boema ala hapu Manetualain Dula Dale na.

¹⁸ Simon nita hu ka nde hataholi nadedenuk sila la lalaa lima nala neu hataholi la langan lain fo ala hapu Manetualain Dula Dale na. Hu ndia de Simon nini fe Petrus no Yohanis doik,

¹⁹ boema nafa'das nae, "Fe au koasa ndia boe, fo ela metema au lalaa au lima nga neu su'di see lain soona, hataholi ndia hapu Manetualain Dula Dale na."

²⁰ Tehu Petrus naen nae, "Soe ba'eneu o mo o doi ma! O maedaenga o hapu asa Manetualain baba'e-babatin ninik doik do?

²¹ O ta manuu hak soaneu tunga ami nai ami lau-onom dalek fa, nana o dale ma ta ndos soaneu Manetualain fa.

²² Hu ndia de tu'u-tapaheni o dudu'a-aafi mangalaum ndia leona, fo moke neu Lamatua ka fo daenga Ana fe do'o do ampon neu o dudu'a-aafi manga laum ndia!

²³ Nana au bubuluk o dale ma henuk no nape'da dale ka, ma tatao-nono'i mangalau ka tao o da'di ata."

²⁴ Boema Simon nafa'da Petrus no Yohanis nae, "Sue na moke Lamatua ka, fo emi mafa'da basa dede'ak sila la, esa boeo ana boso da'di neu au."

²⁵ Petrus no Yohanis fe basa sakasii ma tui-benga basa Amak Manetualain dede'a-kokolan boema, duas fali leo Yerusalem leu. Nai leleo-lala'o nala dalek, ala tui-benga Hala Malole ndia neu nggolo-ta'duk ba'u ka nai Samaria.

²⁶ Lamatua ka ata nusa so'dan esa nafa'da Felipus nae, "La'o lai-lai leo kona mu fo tunga enok mana tuti Yerusalem no Gasa." Enok ndia nee nee-lino lino.

²⁷ Boema Felipus la'o leona. Ndia te mane Etiopia pegawin esa bei nai eno tala'dak fo ana sanga fali ne'un leo nusa na neu. Hataholi ndia pegawi matua-madema esa, fo ndia nde ito-ato basa ina mane Etiopia fo Kandake su'i-beten lala'ena. Hataholi ndia neu leo Yerusalem neu fo ana hule-haladoi neu Manetualain, de besak ia ana fali ne'un no kaleta na. Nangatuuk neu kaletan lain boema ana lees Nabi Yesaya Susula na.

²⁸ (8:27)

²⁹ Boema Manetualain Dula Dale na nafa'da Felipus nae, "Mu leona, fo deka mo kaleta ndia."

³⁰ Boema Felipus neu deka no kaleta ndia de namanene hataholi ndia lees Nabi Yesaya Susula na. Boema Felipus natanen nae, "Ade Tuan malelak hata fo Tuan lees ndia do ta?"

³¹ Hataholi ndia nataa nae, "Neme bee mai, au hapu alela kana, metema hataholi ta nafa'da mangalele'do au, sosoa-ndandaan fa." Boema nafa'da Felipus fo ana kae leo kaleta lain neu fo nangatuuk sama-sama non.

³² Hataholi ndia lees lalane ka nae leo ia, "Ndia sama leo ala hela lini bi'ilopo a, fo leu do'don, sama leo bi'ilopo ana fo ta nakamee, metema ala nggute bulu na, leondiak boe Ana ta kokolak dede'ak de'ek esa boen,

³³ Lakamumulu-lakamamae kana, ma ala ta tao ndoos neu fan. Ala tao laketu hahae na nai daebafa ka, nalosa ta hapu hataholi esa boen, hapu tui la'eneu tititi-nonosin fa."

³⁴ Boema pegawi matua-madema fo maneme Etiopia ndia nafa'da Felipus nae, "So'ba mafa'da su'dik fe au, see ka nde nabi ia nafa'da ka? Nafa'da seluk aoina na nde ndia do nafa'da hataholi fe'ek ndia?"

³⁵ Boema Felipus ana mulai kokolak. Ana pake lalanek sila la da'di neu tutui-bebenga makasososak, fo ana tui-benga Hala Malole la'eneu Yesus neu pegawi matua-madema ndia.

³⁶ Ala losa mamanak esa nai eno tala'dak boema hapu oe nai ndia. Boema pegawi matua-madema ndia nafa'da Felipus nae, "Mitak oe a nde ndia so! Bei kulang beek seluk bai soaneu salani au?"

³⁷ Boema Felipus nae, "Metema Tuan namahele no dale katematuak soona, bole salani Tuan leona." Boema pegawi matua-madema Etiopia ndia nae, "Au amahele Yesus Kristus nde bee na Manetualain Anan."

³⁸ Boema noke hela nate'e kaleta na; basa boema duas fo nde Felipus no pegawi matua-madema ndia, ala kona leo oe dale leu de Felipus salanin leona.

³⁹ Lelek ala kalua leme oe dale mai, boema Manetualain Dula Dale na no heok Felipus de nalosa pegawi matua-madema fo maneme Etiopia ndia ta nita Felipus so'on. Pegawi matua-madema ndia la'ok nakandoo no namahokok.

⁴⁰ Te se'ko na Felipus losa nai Asdod so. Nai leleo-lala'o na dalek, ana tui-benga Hala Malole la'eneu Kristus nai basa kota lala'ena, losa ana nduku Kaisarea.

Kisah Para Rasul

Video Kisah Para Rasul 8

Ikuti Kami:

KONTAK | PARTISIPASI | DONASI