Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi Saul mawang niat ku Stepanus ineh pinaté. Bang aco sineh nacing aceh pedereh luk rayeh bang sidang déi' Yerusalim, idi amungdeh nepatad-patad aput bawang Yudia idi Samaria, iamo' rasul-rasul mo' luk ketecan.
2 Idi lemulun luk mepicet manu nenanem ni Stepanus, idi nenangi' neneh tu-tu.
3 Iamo' Saul nengedereh sidang ineh. Ieh nesemuet bang anid-anid ruma' idi nengeruid lemulun, deléi idi decur pana', idi nemaré nedeh bang tutup.
4 Idi amung-amung lemulun luk nepatad ineh pana' nenalan mada' Bala luk Do' ineh.
5 Pilipus iné' bawang Samaria, idi nemada' nedeh ratnan Keristus.
6 Lun mula' ineh neninger do'-do' luk bila Pilipus, idi ideh nenier tanu'-tanu' luk inau'neh.
7 Ada'-ada' neremuat rat bang burur mula' lemulun, idi ideh nengitang. Idi mula' lemulun luk mét naté urat idi meliai dino'neh.
8 Idi ideh nengalap awang luk rayeh bang bawang Samaria ineh.
9 Iamo' bang bawang ineh inan selemulun ngadanneh Simun, luk mileh mangun, idi ieh nenganau' lun Samaria ineh mawa. Ieh nengedita' bururneh sebuleng, kebalaneh, "Ui ini luk melalud."
10 Idi amung lun luk bang bawang ineh, do' lun dat idi lun do' pana' neninger balaneh idi nepebala, "Lun ini, ieh ineh lalud Allah luk titen Lalud Rayeh ineh."
11 Idi ideh neninger neneh do'-do', ngaceku mio ieh nenganau' nedeh mawa ngaceku bangunneh.
12 Iamo' kareb ideh manu ni Pilipus luk nemada' Bala luk Do' ratnan Imet Allah idi ngadan Yésus Keristus, idi ideh rireb, do' deléi idi decur teh.
13 Idi Simun pana' manu, idi pangeh ieh rireb ieh lutep maya' ni Pilipus; idi ieh lingo-lingo kareb ieh nenier amung-amung tanu' idi kekamen luk melalud luk inau' ineh.
14 Kareb rasul-rasul déi' Yerusalim neninger ratnan lun Samaria pangeh nemaya' bala Allah, idi ideh nengecuk Pétrus idi Yahya amé' nedeh.
15 Kareb didueh nacing, idi didueh nesembayang kuan lun Samaria, pad lun ineh ngalap Roh Meligan,
16 ngaceku Roh Meligan ineh nateh netemurun luun seburur pana' rat arang lun ineh, iamo' ideh pangeh rireb dengan ngadan Tuhan Yésus mo'.
17 Idi didueh nengerareng ticu' didueh luun lemulun ineh idi ideh pana' nengalap Roh Meligan.
18 Kareb Simun nekali' idi Roh Meligan ineh biré ngaceku rasul-rasul nengerareng ticu' didueh luun lemulun ineh, idi ieh nemaré usin kuan didueh,
19 kebalaneh, "Maré negku lalud ineh, pad ui ngerareng ticu'ku luun idé'-idé', pad ideh ngalap Roh Meligan."
20 Iamo' keburi' Pétrus neneh, "Do' usinmu idi bururmu pana' amé' bang apui, ngaceku iko ngerawé katu Allah miak belian dengan usin.
21 Iko na babpat bang kekamen kai ini, ngaceku niatmu na mesiri pa kiung Allah.
22 Do' iko uren ratnan terawému luk dat ineh idi sembayang pad Tuhan maré do' namu.
23 Ngaceku ui nier namu mepanu' ku lili luk dat, idi inabet sala'."
24 Idi kebala Simun nedidueh, "Sembayang kuanku inan Tuhan, pad ui na mekaneh anun-anun luk pangeh bila medueh negku."
25 Kareb Pétrus idi Yahya pangeh nemada' luk nekali' didueh idi nemada' bala Tuhan, idi didueh nelemubed iné' Yerusalim, idi nemada' Bala luk Do' kuan mula' bawang lun Samaria.
26 Iamo' aceh melaikat Tuhan nepebala ni Pilipus, "Nalan iko idi amé' pa kabing busat aco maya' dalan rat Yerusalim amé' Gasa." (Na lemulun maya' dalan ineh nekini.)
27 Pilipus nenipa idi nenalan. Idi inan aceh lun Etiopis, ieh ineh selemulun luk pinani', idi rayeh laludneh pa liang Kandéké, raca' decur bawang Etiopia, luk ngasa' amung binawehneh. Idi ieh iné' Yerusalim sikal sembayang.
28 Idi kareb ieh nelemubed, ieh tudo bang kerétaneh, idi nemaca' surat Nabi Yesaya.
29 Idi Roh Meligan nepebala ni Pilipus, "Amé' iko muneng ku keréta ineh."
30 Pilipus nupun iné' matun neneh, idi neninger neneh uned maca' surat Nabi Yesaya, idi keburi'neh, "Iko kali' ilung luk bica' muké?"
31 Idi kebalaneh, "Kudeng apeh ui kali' kudeng na lemulun mada' negku?" Idi ieh nenawar Pilipus umak tudo iringneh.
32 Idi ini ayat-ayat luk bica'neh bang Surat Allah ineh: "Ieh pangeh inuit kudeng aceh dumba luk kereten idi kudeng aceh anak dumba luk mebegkeh pa kiung lun luk muting buluhneh; kudeng ineh teh na Ieh nengukab tangNeh.
33 Ieh dinatdeh, idi ukum luk matu na inau' kuanNeh. Idéké miak mada' ratnan inulNeh? Ngaceku niatNeh pangeh ilap rat bang tana' ini."
34 Idi lemulun luk pinani' ineh nepebala ni Pilipus, "Ui mutuh namu mada' negku ratnan idéké nabi nemada', ratnan bururneh sebulengké, kian ratnan lun baken lek?"
35 Idi Pilipus nengelio ayat-ayat ineh, idi nemada' neneh Bala luk Do' ratnan Yésus.
36 Kareb didueh uned maya' dalan ineh, idi didueh nacing inan aceh abpa'. Idi lemulun luk pinani' ineh nepebala, "Ieni inan abpa', anunké luk mebpeng negku na rerebpen?"
37 [Idi kebala Pilipus, "Kudeng iko manu dengan amung niatmu miak iko rerebpen." Idi kebalaneh, "Ui manu idi Yésus Keristus, Ieh ineh Anak Allah."]
38 Idi ieh nengagka' keréta ineh. Idi didueh netemurun bang abpa', idi Pilipus nengerereb neneh.
39 Kareb didueh numak rat bang abpa', Roh Tuhan nengalap ni Pilipus. Idi lun Etiopia na miak nier neneh peh, idi ieh nuli' dengan mawang niat.
40 Idi denak-denak Pilipus kali' neneh idi déi' Asotus. Idi ieh nenalan idi nemada' Bala luk Do' bang amung-amung bawang pad ieh nacing déi' Kaisaria.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA