Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sanang ati si Saulus, dek karano urang lah mambunuah Stefanus. Di ari tu juwo, mako muloilah jamaat nan di Yerusalem di aniayo, sainggo kasadonyo urang ba iman, salain daripado rasul-rasul, lah baserak-serak kian kumari di kasadonyo daerah di Yudea jo di Samaria.

² Urang-urang nan takuik kapado Allah, payi mangubuakan Stefanus, sarato maratok-inyo jo ati nan sangaik ibo.

³ Tapi si Saulus taruih juwo ba usawo, nak ka ma ancua kan jamaat. Inyo payi dari rumah ka rumah, untuak mancari urang-urang nan ba iman, sudah tu inyo masuakkan ka pinjaro.

⁴ Urang-urang ba iman nan lah baserak-serak tu, inyo payi kian kumari untuak mambaritokan Injil nan dari Allah tu.

⁵ Si Filipus payi ka kota Samaria untuak mangabakan kabake urang-urang nan disinan, tantang Rajo Panyalamaik nan dijanjikan dek Allah.

⁶ Kutiko urang-urang tu mandangakan si Filipus babicaro, inyopun lah bi maliyek mukjizat-mukjizat nan dipabuwek dek si Filipus, mako sambuahlah dari urang-urang tu nan lai sabana mamparatikan apo nan dikatokan dek si Filipus.

⁷ Dek karano, lah sambuah roh-roh jahek nan mamakiak-makiak, kaluwa dari urang-urang nan kamasuak-an setan. Sambuah pulo urang-urang nan lumpuah sarato jo urang-urang nan pincang nan dicegakkan.

⁸ Mako urang-urang di kota Samaria tu sangaik bagadang ati.

⁹ Di kota tu ado surang laki-laki nan banamo si Simon, nan lah babarapo wakatu lamonyo, mambuwek urang-urang Samaria tapukau jo alemu sihienyo. Inyo mangatokan kabake urang-urang tu, baraso inyo adolah urang nan sabana santiang.

¹⁰ Mako kasadonyo urang dikota tu, dari nan gadang sampai ka nan ketek, bi manuruikkan inyo, urang-urang tu bi mangatokan, "Urang ko adolah kakuatan Allah, nan tamusaua sabagai 'Kakuatan Nan Gadang'".

¹¹ Lah sangaik lamonyo, inyo mamukau urang jo kakuatan sihienyo, sainggo urang-urang tu sangaik ma aragoinyo.

¹² Tapi si Filipus tibo mambaritokan kabake urang-urang tu, tantang Injil Karajaan Allah, sarato tantang Isa Almasih, nan adolah Rajo Panyalamaik. Mako bi picayolah urang-urang tu kabake barito nan dibawok dek si Filipus, inyo bi dipamandikan biya laki-laki maupun padusi.

¹³ Nan si Simon sandiri, inyopun lah picayo pulo. Sasudah inyo dipamandikan, inyo lansuang payi manuruikkan si Filipus. Dek maliyek mukjizat-mukjizat nan tajadi, mako si Simon tacangang-cangang.

¹⁴ Rasul-rasul nan di Yerusalem lah mandanga kaba, baraso urang-urang Samaria lah manarimo firman Allah. Dek karano itu, inyo utuihlah si Petrus jo si Yahya ka sinan.

¹⁵ Kutiko si Petrus jo si Yahya tibo disinan, inyo badowa untuak urang-urang Samaria tu, supayo urang tu buliah mandapek Roh Allah,

¹⁶ alun surang juwo lai urang tu, nan lah dikuwasoi dek Roh Allah; dek karano, inyo dipamandikan baru ateh namo Tuhan Isa Almasih sajo.

¹⁷ Dek karano itu, si Petrus jo si Yahya malatakkan tangannyo kabake urang-urang Samaria tu; mako turunlah Roh Allah kabake urang-urang tu.

¹⁸ Kutiko itu si Simon maliyek, dek karano tangan rasul-rasul dilatakkan ka badan urang-urang tu, mako Roh Allah dibarikan kabake urang tu. Mako dibawoknyolah pitih dek si Simon, kabake si Petrus jo si Yahya,

¹⁹ sudah tu inyo bakato, "Agiahkan pulolah kabake ambo kuwaso nan bakcando itu, supayo, jikok tangan ambo, ambo latakkan ka badan siya-siyanyo, mako urang tu ka manarimo Roh Allah pulo."

²⁰ Mako manjawablah si Petrus, "Cilakolah angkau jo pitih angkau tu! Angkau sangko pambarian Allah tu dapek dibali jo pitih?

²¹ Angkau indak punyo hak untuak sato di satiyok karajo kami, dek karano, ati angkau indak batua taradok Allah.

²² Dek karano itu, buwanglah mukasuik jahek angkau tu, mintaklah ampun kapado Tuhan, supayo pikieran angkau nan jahek tu di ampuni!

²³ Dek karano ambo tawu, baraso ati angkau panuah jo parasaan bingik, sarato dipabudak dek karajo nan jahek."

²⁴ Bakatolah si Simon kabake si Petrus jo si Yahya, "Tolonglah mintakkan kapado Tuhan, supayo jan sampai tajadi andaknyo di diri ambo, apo nan angku-angku katokan tu."

²⁵ Sasudah si Petrus jo si Yahya mancuritokan pangalamannyo jo Tuhan, sarato mambaritokan firman Tuhan, mako babaliaklah inyo ka Yerusalem. Di pajalanan, inyo taruih mambaritokan Injil di kampuang-kampuang di daerah Samaria.

²⁶ Surang malekaik Tuhan bakato kabake si Filipus, "Tagaklah, bajalanlah! Payilah ka arah salatan, ka jalan nan ma ubuangkan Yerusalem jo Gaza." Jalan tu langang.

²⁷ Mako barangkeklah si Filipus. Dikutiko itu ado surang pagawai istana Etiopia, nan sadang dalam pajalanan babaliak ka nagarinyo. Urang tu adolah surang panjabaik tinggi, nan batangguang jawab jo kasadonyo arato bando Kandake, ratu nagari Etiopia. Urang tu lah babaliak dari Yerusalem untuak ba ibadaik kapado Allah, kiniko inyo sadang di ateh bendinyo dalam pajalanan. Samantaro inyo di ateh bendi, inyo mambaco Kitab Nabi Yesaya.

²⁸ (8:27)

²⁹ Roh Allah bakato kabake si Filipus, "Payilah mandakek ka bendi tu."

³⁰ Mako mandakeklah si Filipus ka bendi tu, tadangalah dek inyo urang tu sadang mambaco Kitab Nabi Yesaya. Batanyolah si Filipus kabake urang tu, "Apokoh angku layi mangarati, tantang apo nan angku baco tu?"

³¹ Urang tu manjawab, "Dima pulo ambo ka mangarati, jikok indak ado urang nan ka manarangkannyo kabake ambo?" Mako inyo ajaklah si Filipus nayiak ka ateh bendinyo, duduak samo-samo jo inyo.

³² Ikolah ayaik-ayaik nan dibaconyo tu, "Inyo bakcando domba nan di alau untuak ka didabiah, Inyo bakcando anak domba nan indak mambebek, jikok bulunyo diguntiang, bakcando itulah, Inyo indak mangecek agak sapatah kato pun.

³³ Inyo dihino sarato dipabuwek sacaro indak adie. Nyawo-Nyo dicabuik dari muko bumi, indak surang juwo doh urang nan dapek mancuritokan tantang asa-usua-Nyo."

³⁴ Panjabaik tinggi dari Etiopia tu bakato kabake si Filipus, "Cubolah curitokan kabake ambo, siya tu urangnyo nan dimukasuikkan dek nabi nan manulihkan ayaik ko? Dirinyo sandiri atau urang lain?"

³⁵ Mako muloilah si Filipus manarangkan; inyo mamakai ayaik-ayaik nan cako tu, untuak pamangka-i mambaritokan Injil Isa Almasih kabake panjabaik tinggi tu.

³⁶ Di tangah pajalanan, sampailah inyo ka suatu tampaik nan ado ayie taganang. Panjabaik tu bakato, "Liyeklah tu ngku, kan ado tu ayie! Apo kurang juwo lai tu, untuak ka mampamandikan ambo?"

³⁷ [Si Filipus bakato, "Jikok angku layi picayo sapanuah ati, angku buliah dipamandikan." "Ambo picayo, Isa Almasih adolah Anak Allah," kecek Pegawai Tinggi Etiopia tu.]

³⁸ Mako inyo suruahlah bendinyo tu baranti; kudian inyo baduwo, si Filipus jo panjabaik tu, turun masuak ayie, mako dipamandikan si Filipuslah panjabaik tinggi tu.

³⁹ Kutiko inyo bi kaluwa dari ayie, Roh Allah manyemba si Filipus dari tampaik tu. Panjabaik tinggi dari Etiopia tu, indak manampak si Filipus lai. Jo ati nan basukocito, panjabaik tinggi tu manaruihkan pajalanannyo.

⁴⁰ Indak disangko-sangko si Filipus lah sampai sajo di Asdod. Kutiko inyo manaruihkan pajalanannyo, inyo tatap mambaritokan Injil tantang Isa Almasih, dikasadonyo kota sampai inyo tibo di Kaisarea.

Kisah Para Rasul

Video Kisah Para Rasul 8

Ikuti Kami:

KONTAK | PARTISIPASI | DONASI