Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Paulus wakidi-diriidi 'o 'Agamaka ma Hakimi de kawongosekau, "'Esa moi riaka dodoto! Sigado ne'ena yaino, ngoi tomanakoku 'ai singina kaitebi-tebini ma Jo'oungu ma Dutu wi bionoka."

² Ma gee 'o Paulus koge'ena wongose de ma 'Imam ma Amoko 'o Ananias wosuloko 'o nyawa gee 'o Paulus wi dateoka woma'oko-'okode, 'o Paulus wi 'uruoko wapoka.

³ So 'o Paulus kawongosekau ma 'Imam ma Amokika, "Ma raiokau dua ma Jo'oungu ma Dutu wonihukumu, ngona gee noma'uca-'uca 'isoka 'o nyawa 'itebi-tebini! Ngona nogogerie ge'enaka noi'urusu moteke ma Jo'oungu ma Dutu 'awi besesongo gee 'o Musa wositotarokau, momongo ngona ma sirete nosuloko 'ipoka. Ge'ena ma ngale naparenokau 'o besesongo ge'ena!"

⁴ 'O Paulus wi date-dateuku gee kayongosekau, "Ma Jou wi 'Imam ma Amoko nositi-tingoono!"

⁵ 'O Paulus wosango, "Ee, 'Esa moi riaka dodoto, ngoi kotanakowa 'ato 'una 'o 'Imam ma Amoko. Ma goungu 'o Buku 'Itebi-tebinoka naga 'isilefoku konee: ''Uwa niositi-tingoono nia balu-balusu!'"

⁶ 'O Paulus wakimake ma 'Agamaka ma Hakimi go'ona munuka 'o Sadukioka de munuka 'o Farisioka. So kawongosekau waamo-amokie 'onaka, "'Esa moi riaka dodoto! Ngoi 'o Farisioka, de 'ai 'asali mita 'o Farisioka. Ngoi ni'urusu ne'enaka sababu ngoi tongaku 'o nyawa yosonge-songenokau dua kayomomiokali."

⁷ Gee 'una koge'ena wongose, de ma Farisioka de ma Sadukioka yomakangamo so manga lo-lomu ge'ena 'ipula modidiokau.

⁸ Sababu 'o Sadukioka yongose 'ato 'o nyawa yosongenokau ge'ena koyomomikuawau, de yongose 'ato 'o mala'ekati mita koi'iwa, de 'o ngomasa 'iregu-regu mita koi'iwa; ma 'o Farisioka 'ona yongaku 'ato ge'ena 'iodumu de ma 'ena.

⁹ So ma rai 'o gangamo de ge'enasi. Ma Farisioka gee yoguru-guru 'o 'agamaka yamuruo naga yoma'oko de yoba-baili yosigou-gounguku. 'Ona yongose 'ato, "Moteke ngomi, 'o nyawa nu'una 'awi sala ka ma eta ma koi'iwa! Poilia ma gou-goungu 'o ngomasa bolo 'o mala'ekati 'ibicara 'unaka!"

¹⁰ Yomakangamo kaifoloi so ma solodado ma balusu gu'una wi ngoma 'ibookou 'uwa si'ado 'o Paulus wigo'ora. So wosuloko 'awi tentara yaika 'o Paulus wi'ese ge'ena 'o nyawa ma gu-gudaioka de wi'asa manga ngiika.

¹¹ Ma bibinie ma obiruku de ma Jou Yesus woma'okode 'o Paulus wi gagaroka de kawongosekau, "'Ani singina nakua-kuata! Ngona posironga nomoroinoka noisisakisiiokau 'o Yerusalemuoka. 'Ani sakisii ge'ena salingou nositotaroli 'o Romaka mita."

¹² Ma bibinie 'o ngoru-ngorumika, de 'o Yahudioka yokurue yomasikagaro. 'Ona yosasioka 'ato nako la 'o Paulus kowito'omawasi ge'ena kayo'odomuwa de koyo'okeruwa.

¹³ Naga yanagi soata 'ipailoka yomasigaro-garo ma ngale ge'ena.

¹⁴ 'Ona yotagi 'o 'imam ma sae-saekika de 'o Yahudioka manga balu-balusika de kayongosekau, "Ngomi miosasiokau dua komio'odomuwa de komio'okeruwa nako 'o Paulus komito'omawasi.

¹⁵ So ne'ena 'Esa moi riaka dodoto, ngini de 'o 'Agamaka ma Hakimi 'iregu-regu mita, tanu 'o surati niosidingoto 'o Roma manga tentara ma balusika, ma ngale nioga'asoko la 'o Paulus wi 'asali ne'enano wisitaari nginika, niongose 'ato ngini wini'urusoli 'ifoloiosi niosidi-diai. De dua ngomi mijagakou la kowa'adonuawasi ne'ena nginino 'ena mito'omakau."

¹⁶ Ma 'o Paulus ma biranga mi ngowaka wimoi wo'isene to 'ona manga niati koge'ena. So wotagi 'o tentara manga ngiika de 'o Paulusika wosidemo ma ngale ge'ena.

¹⁷ Ge'enaka de ma Paulus 'o tentara wimoi wi'asokino de kawongosekau, "Tagi 'o dogu'uru nu'una woni'asa ma tentara ma balusika; 'una womau wosidemo 'o hali moi."

¹⁸ Ma tentara gu'una 'o dogu'uru gu'una wi'asaka manga balusika de kawongosekau, "'O Paulus wobui-buika gee woi'asokino de woisuloko 'o dogu'uru nu'una towi'asa ngonano 'Aba, womau 'okia naga moi wosidemo."

¹⁹ Ma tentara ma balusu gu'una 'o dogu'uru gu'una wi giamika wa'ao so 'o lilioka wi'asaka de wosano, "'Okia nomau nosidemo ngoino?"

²⁰ De 'una wosango, "'O Yahudioka yomasigarokau ma ngale yoga'asoko ngonaka 'Aba la wangede 'o Paulus woni'asali 'o 'Agamaka ma Hakimika, la barikia 'awi hali ge'ena ya'urusu 'ifoloiosi yosidi-diai.

²¹ Ma 'uwa nakidomoteika 'Aba, sababu naga yanagi soata 'ipaili wigi'iunika ma ngale yomau wito'oma 'o ngekomoka. 'Ona yoodumu yosasiokau nako la 'o Paulus kowito'omawasi ge'ena kayo'odomuwa de koyo'okeruwa. Ne'ena naga yomadudu-duangou, yodamaa ka ngona nosango 'Aba."

²² Ma tentara ma balusu gu'una kawongosekau, "Ka moika ma 'uwa nosidemo 'ato ne'ena nosidemokau ngoino." Ge'enaka de wosuloko 'o dogu'uru gu'una woliou.

²³ Ge'enaka de ma kapita gu'una 'awi solodado yamididi waki'asokino, de kawongosekau 'onaka, "Niasadia 'o tentara yaratusu modidi gee de manga wase de manga sawaunu, de yaratusu modidi gee de manga kuama, de yanagi tumudiingi gee 'o kudaku yoparene, la 'o takoro siwo ne'ena ma obiri niotagi 'o Kaisareaku.

²⁴ Niasadia mita to Paulus wi kuda la ge'enaku woparene, de wini'asa 'o Paulus 'uwa wido'oanikia sigado winisitotaroka ma gubernur 'o Feliksika."

²⁵ Ge'enaka de ma tentara ma balusu gu'una 'o surati wolefo ma betongo koneda:

²⁶ "Tabea 'Aba, Gubernur Feliks. Ngoi 'o Klaudius Lisias!

²⁷ 'O nyawa nu'una 'o Yahudioka witagokinou de tanu wito'omau duru gee ngoi de 'ai tentara mioboa misilaha, sababu to'isene 'ato 'una 'o Roma ma nyawa.

²⁸ Sababu ngoi tomau tanako 'awi sala 'okia gee 'ona wikalaki, so towi'asa manga 'Agama ma Hakimika.

²⁹ Ma ma nyo-nyata 'una kokiawa wadiai gee yadaene wihukumu wiso-songene bolo wibui. 'Ona wikalaki duga ka to 'ona ma sirete manga 'agama ma besesongo.

³⁰ Ge'enaka de ngoino 'isidemo 'ato 'o Yahudioka manga singina 'itorou 'unaka. So katowisidingotokau ngonaka 'Aba ma gubernur. De ngoi takisulokokau yoka-kalaki manga galaki 'unaka gee ya'asa ngonaka 'Aba."

³¹ So ma tentara go'ona yadiai to 'ona manga manarama. 'O Paulus wi'ese so wi'asa kage'ena ma obiri de sigado 'o Antipatrisoka.

³² Ma bibinoka de 'ona yakisidipidilika 'o tentara de manga kudaka gee yogila-gila de 'o Paulus, de 'ona ma sirete yolio manga ngiino.

³³ 'O tentara de manga kudaka gee yototaruku 'o Kaisareaka, de yokula ma surati ge'ena ma gubernuruka, ge'enaka 'asa de 'o Paulus wisisarakani 'unaka.

³⁴ Ma gubernur wabacaka ma surati ge'ena de wosano 'o Paulusika kiano wi 'asali. Gee wanako 'ato 'o Paulus wi 'asali 'o Kilikiano,

³⁵ de ma gubernur kawongosekau, "Ia, 'asa talega ma diai 'ani hali, nako 'o nyawa nika-kalaki gee yototarinou ne'enaka." Ge'enaka de wosuloko la 'o Paulus witahanukosi 'o Herodes wi kadatoka.

Kisah Para Rasul

Video Kisah Para Rasul 23

Ikuti Kami:

KONTAK | PARTISIPASI | DONASI